15
Ko te 'ū tautea faka'osí
1 Pea u vakai he faka'ilonga 'e taha 'i te langí, ko te fu'u me'a fakaofo, ko te 'āngelo 'e toko fitu 'oku 'iā nātou te 'ū tautea 'e fitú; ko te 'ū tautea faka'osí ia, he 'oku fakakakato ai 'ia te houhau 'o te 'Atuá.
2 Pea u vakai he me'a 'oku hangē he tai sio'ata 'oku fiofio afi, pea ko te kau ikuna 'o te manu fekaí mo tono 'īmisí mo te fika 'o tono hingoá ne'e notou tu'u 'i te tai sio'atá,*15:2 'i te tai sio'atá, ko ia pe 'i te 'āfaki 'o te tai sio'atá. 'o notou to'o te 'ū ha'ape 'a te 'Atuá. 3 Pea ne'e notou hiva 'ia te hiva 'a Mōsese ko te tamaio'aliki 'a te 'Atuá, pea mo te hiva 'a te Lamí, pea notou pehē,
“'Oku lahi mo fakaofo Tau ngāué,
'ia te 'Aliki ko te 'Atua Aoniu;
'oku totonu mo mo'oni Tou 'ū 'alungá.*15:3 'Eki 15:1
4 Ko ai 'e kailoa 'apasia ki te 'Afioná 'e 'Aliki,
mo ta'efakahīkihiki'i Tou huafá?
He ko Koe toko taha pē 'oku mā'oni'oní,
pea 'e ha'u kotoa pē 'ia te 'ū kakaí,
'o punou 'i Tou 'aó;
kote'uhí kua fakae'a Tau 'ū fakamaaú.”*15:4 Sel 10:7; Saame 86:9
5 Pea hili ko iá ne au vakai atu, pea tā ne'e fakaava 'ia te Potu Tapu 'o te tāpanekale 'o te fakamo'oní 'i hēvani.*15:5 'Eki 38:21 6 Pea ne'e 'alu atu mei te Potu Tapú 'ia te 'āngelo 'e toko fitu, 'oku 'iā nātou te tautea 'e fitú, 'oku notou kofu 'aki te līneni ma'a mo ngingila, pea notou no'o koula 'i te notou fatafatá. 7 Pea ko te toko taha 'o te me'a ma'uli 'e faá ne ina 'avange ki te 'āngelo 'e toko fitú 'ia te ipu koula 'e fitu, ne'e fonu 'i te houhau 'o te 'Atuá, 'a ē 'oku Ina ma'uli 'o lauikuonga pea ta'engatá. 8 Pea ne'e fonu 'ia te Potu Tapú 'i te kohu 'a ia ne'e tupu mei te lāngilangi 'o te 'Atuá, mo Tono māfimafí; pea ne'e kailoa lava he taha ke hū ki te temipalé, kae'aua ke 'osi te tautea 'e fitu ne'e 'i te 'āngelo ko ia 'e toko fitú.*15:8 'Eki 40:34; 1 Tu'i 8:10-11; 2 Kal 5:13-14; 'Ais 6:4