Ko te 'Ipiseli 'a Paula kiā
Taitusí
Ko te talateú
Ko Taitusí ko te Senitaile ne'e ului ki te lotu faka-Kalisitiané pea ne'e hoko ia ko te kaungā ngāue mo te tokoni kiā Paula 'i tana ngāue fakamisinalé. Ko te 'Ipiseli 'a Paula kiā Taitusí ne'e fai ia ki tono tokoni kei talavou ko 'ení, 'a ia ne'e tuku ai 'ona 'i Kēliti ke tokanga'i te ngāue 'a te siasí. 'Oku tolu te 'ū me'a 'oku tokanga ki ai te tohí.
1. Ne'e fakamanatu 'e Paula kiā Taitusi 'ia te tō'onga ma'uli 'oku totonu ke hā mei te kau taki 'o te siasí, 'āsili aí ko te tō'onga ma'uli kovi 'a te kakai Kēliti tokolahi.
2. Ne'e fakahinohino ange 'e Paula kiā Taitusi 'ia te fa'ahinga ako ke fai ki te kakaí 'i te 'ū tu'unga kehekehe 'i te siasí, 'ia te mātu'a tangatá, mo te finemātu'a fafiné, ('a ia 'e notou akonaki'i te kau finamulí), mo te kau talavoú, mo te kau pōpulá.
3. Ne'e fale'i 'e Paula kiā Taitusi 'o kau ki te 'ulungāanga faka-Kalisitiané, 'o tautautafito ki te nofo melino, mo te fe'ofa'ofani, mo te faka'ehi'ehi mei te loto tāufihi'a, mo te feke'ike'i, mo te fakafa'afa'ahi 'i te siasí.
Ko te kakano 'o te tohí
Ko te talateú (1:1-4)
Ko te kau ma'u lakanga 'i te siasí (1:5-16)
Ko te 'ū fatongia 'o te kakai tu'unga kehekehe 'i te siasí (2:1-15)
Ko te 'ū akonaki mo te fakatokanga (3:1-11)
Ko te tātukú (3:12-15)
1
Ko te fakafe'iloakí
1 Ko au 'eni Paula ko he tamaio'aliki 'a te 'Atuá, kae'uma'ā ko he 'apōsetolo 'a Sīsū Kalaisi ma'a te tui 'a te kakai kua fili 'e te 'Atuá, pea ki te 'ilo'i 'o te mo'oní 'a ia 'oku tataki ki te ma'uli faka-'Atuá, 2 'i te 'amanaki lelei ki te ma'uli ta'engatá, 'a ia ne'e tala'ofa 'aki 'e te 'Atuá, 'a ia 'oku kailoa 'aupito lohi, ki mu'a 'i te kamata'anga 'o taimí. 3 Kā kua fakahā 'i tono 'ū kuonga totonú Tana Folafolá, 'aki te malanga 'a ia kua tuku kiā au, 'o fakatatau ki te fekau 'a te tou 'Atuá ko te tou Fakama'uli.
4 Ko taku tohi kiā Taitusi, ko toku foha mo'oni 'i te tui 'oku tā taha aí.*1:4 2 Kol 8:23; Kal 2:3; 2 Tīm 4:10
'Ofa ke ke ma'u kelesi mo te fiamālie mei te 'Atua ko te Tamaí, mo Kalaisi Sīsū ko te tou Fakama'uli.
Ko te fai fatongia 'a Taitusi 'i Kēlití
5 Ko tono 'uhinga 'eni 'o taku tuku 'ou 'i Kēlití, kote'uhí ke fai atu 'e koe tono fakatonutonu 'o te 'ū me'a ne'e toé, 'o fakanofo te kau faifekau 'i te kolo kotoa pē hangē ko taku tu'utu'uni atú: 6 Ko te takí ko te toko taha ia 'oku ta'emele, ko te 'unoho 'o he fafine pē taha,*1:6 ko te 'unoho … taha, ko ia pe ne mali tu'a taha pē. 'oku 'i ai tana fānau 'oku lotu, pea 'oku kailoa notou pau'u mo talangata'a.*1:6-9 1 Tīm 3:2-7 7 He ko tono tonu 'o te kau faifekau pulé ke ta'elau'i, he ko te tangata tauhi ia 'a te 'Atuá; ko te toko taha 'oku kala fai ki tono lotó, 'oku kala 'itangafua, 'oku kailoa uaine'ina, 'oku kailoa fa'a kē, 'oku kailoa havala ki te pa'anga 'ulí; 8 kā ko te toko taha 'oku fa'a fakaafe 'āunofo, 'oku 'ofa ki te me'a 'oku leleí, 'oku anga-fakapotopoto, 'oku faitotonu, 'oku mā'oni'oni, 'oku anga-fakama'uma'u. 9 'Oku piki ma'u ia ki te 'ū lea totonu, 'a ia ne'e ako 'i aí, kote'uhí ke ina malava 'ia te enginaki 'aki 'ia te tokāteline haohaoá, pea mo ikuna'i 'ia nātou 'oku fakafepakí.
10 He 'oku tokolahi he kau talangata'a, (ko te notou tokolahi mei te ha'a Kamú), 'oku lea launoa, mo fakahalaki te loto 'o te kakaí. 11 Ko tono totonú ke tāpuni'i te ngutu 'o te kakai ko iá, he ko te fa'ahinga 'oku notou fakahinga'i te 'ū fāmili kakato, 'i te notou ako 'aki 'ia te 'ū me'a ta'etaaú ko te notou sio koloa 'uli. 12 Ko te notou toko taha, ko te fe'i palōfita 'o nātou, ne'e iange ia, “Ko te anga ai pē 'o te kau Kēlití ke lohi; ko te fanga manu fekai 'ia nātou; ko te koto kete pē fakapikopiko.” 13 'Oku mo'oni 'ia te tala ko iá, ko ia ke valoki'i māsila 'ia nātou 'e koe, kote'uhí ke ma'uli lelei te notou tuí, 14 'o 'aua 'e notou tokanga ki te 'ū talatupu'a faka-Siú, mo te 'ū fekau 'a te kakai 'oku afe mei te totonú. 15 'Oku ma'a 'ia te me'a kotoa pē kiā nātou 'oku ma'á; kā kiā nātou kua 'uli mo ta'etuí 'oku kailoa ma'a he me'a ia, kā kua 'u'uli pē te notou lotó mo te konisēnisí fakatou'osi. 16 'Oku notou lau 'oku notou 'ilo'i 'ia te 'Atuá, kā 'i te notou 'ū ngāué 'oku notou fakafisinga'i Ia, 'i te notou fakalialiá mo talangata'á, mo te kailoa notou 'aonga he me'a 'e taha.