6
1 Nurru anaani nunaa-mijgalmina-yinyung na-God, nurru ngana-yandha-yandhawiwanjii nugurru aadanu. Na-God niga nani-walgaṉmana nugurru, nugurru nimbirri-mang anaarrawindi nigawi-wala, marri yagi ngirri-lhaladi wugurru. 2 Nugurru aadanu numburraawanggina ana-lhaawu ana-wubiba-yinyung. Ni-yamayn,
“Anubani-yumbaa ngaya nugurru ngana-man.galagaa anaani, nugurru ngana-yaynjangani aadanu aḏaba.
Ngaya anubani-yumbaa ngana-wiri-gayn, marri nugurru ngana-maṉmangi aadanu.”✡Isaiah 49:8.
Dani-yung na-God ni-yamaa. Marri ngaya ngana-magana nugurru, ana-yimbaj nga nugurru nani-man.galagana aadanu. Ana-yimbaj nga nugurru nani-wiri-gana nugurru aadanu.
Manubami magarrangaynji, warruburru-yung wirri-lhaawu-yarrijgina-yinyung wugurru wirrima-waṉagana.
3 Ngaya anaani nga-magina na-God-jinyung ana-lhaawu, marri ngaya nga-dhi-maṉdhina-windiyung anaani. Marri ngaya ngamba-lhambiyn warraaynbaj-guy, nguynju yadhu yagi wurru-rumi anaaladi-wuy marri yagi wirriij-dhangarrmi wugurru anaaladi, ngayawi-nyinyung-jinyung nga-mijgalmina-yinyung anaani. 4-5 Yigaj! Wudanu nga, ngaya yamba anaani nga-mijgalmina na-God-jinyung, ngaya ngarra-bajiyina warraarrawindi-lhangu, ngaya ngaaṉbina maaḻamburrg anaani. Runggal wungarri wu-waṉiyn ngayawi-wuy, marri warra-wurru-wurruj wugurru ngambi-lharrbadjii ngaya, marri ngambiimana ngaya, marri ngambi-burrii wubani wu-dhi-dhidina-rruj, marri runggal magarrangaynji ma-waṉina ngayawi-wuy. Anubani-yung nga-mijgalmini angaḏajung-bindiyung. Nga waari ngaya ngaynjaay mana-miyn.nganga. Marri ngaya waari nga-nguni ana-marrya, anubani-yumbaa. Anubujujung anaaladi wu-waṉbini ngayawi-wuy, marri nga-wurrij-galadi-wiiyn-bindiyung. Yagu ngaya waari ngandhuṉdhangi aḏaba. Wudanu nga, ngaya ngarra-bajiyina warraarrawindi-lhangu wugurri-wuy, ngaya nga-mijgalmina na-God-jinyung anaani.
6 Waari anubani nganggaṉbaaṉbang ngaya anaalaaladi. Ngaya nga-marrbuy-windiyung, warruburru warra-wurru-wurruj, marri nga-lhambaamburrg-bugij wugurri-wuy, marri ngarra-man.ga-man.galagana. Ngaya ngaaṉbina anaani yamba nga-waṉagana ana-Maṉngulg Mawurr, marri anaani yamba ngarraa-ḏamarr-ngu-burraa-windiyung wugurru. 7 Marri ngaya ngarra-magana aniijgubulu ana-lhaawu marri ngawu-waṉagana ana-lhuḏ na-God-gala wugurru.
Yigaj! Aniijiijung wu-waṉbini, nguynju yaga nga-wiynji-wiynjina-yii, nguynju yaga ngawu-waṉagana a-maragi-yii marri a-ḻaama-yii, anubani ana-maaḻamburrg-jinyung, marri nga-waṉbina ana-maaḻamburrg yungguyung.
8 Yigaj yaga! Mulung-arrgi-yung ngaya anaani ngambi-runggal-wana, marri ngambi-lhama-lhamaani wugurru. Wugurraayung warra-mulung-arrgi-yung ngambi-winyig-gana anaani, marri ngambiiladi-yamawana ngaya. Wiiya wugurru wurru-yamana warra-wurru-wurruj ngaya nga-yanggaḻij. Yagu ngaya nga-yambina anaani yijgubulu-windiyung. 9 Wiiya warra-mulung-arrgi-yung wurru-yamana, “Ngagurru ngurru-maḻaḻadi nubagi na-Paul,” wurru-yamana. Yagu warra-garnyirrimba-lhangu anaani wurru-marrbuy ngaya. Wiiya anubani-yung ngama-waṉagana mana-runggal mana-magarrangaynji, marri ngaya ngambambi-ngawijgaa, yagu ngaya nga-burraa nga-wiri anaani. Wiiya warra-wurru-wurruj ngaya ngambi-lharrbadjangi, yagu waari ngaya ngambambi-ngawijgaa-windiyung anaani, warraaynbaj. 10 Wiiya ngaya nga-wurrij-galadi-wini nga-burri, yagu ngaya nga-wuguuguni-wugij nga-wurrij-maaḻang nga-burraa. Wiiya ngaya anaani nga-burraa ngaambalalari, yagu ngaya ngaandha-wuguuguni-wugij ngarra-maṉmani warraarrawindi warra-wurru-wurruj wugurru, amburru-burraa yungguyung amburraambalal-wina nigawi-wuy na-God-guy yadhu. Waari ngaya nganggaarra-waṉagang anaani anaarrawindi-lhangu anaani-rruj ana-lhal-uj, yagu anaani ngaya ngaarra-waṉagana arrawindi-windiyung.
11 Guwaj-gaang, nurru-burraa-yinyung aadaju ana-Corinth-duj. Anaani ngana-magaa andhurrg ngayawi-wala aandhiri-wala nga-yambini nugurri-wuy. 12 Waari ngaya nganggurrij-ngu-dhidini nugurraa yungguyung. Yagu nugurru aadanu nurru-wurrij-ngu-dhidiyn ngayawi yungguyung. 13 Ngaya anaani ngana-magana nugurri-wuy, nguynju yaga nugurru nurru-yamana aadanu ngayawi-nyinyung warra-mijburrayung, nurru-yamana aadanu. Nugurru numburru-yaal-yamana nguynju ngayawi-yii aḏaba. Nugurru numburru-wurrij-bawalhijgiiyn ngayawi yungguyung.
Yagi ngirri-wali ngagurru anubani-yung anaambaḻaman-jinyung marri anubani anaaladi-yinyung, wu-waliynji aadani-yumbaa wugurru.
14 Anaani ngana-magana nugurri-wuy. Nugurru aadanu yagi nugurru nurru-rumi marri nurru-yagaynji warruburru-wuy warra-wurru-wurruj-guy, waari-yinyung amburru-jambarrgang-jinyung na-God-guy. Anaani wiijamana aḏaba. Anu-dhalng marri anaa-ngududumaj yagi wu-waliynji wu-burrangi wugurru. Wugurraayung wiijamana, anaambaḻaman marri anaaladi yagi wu-burrangi wu-waliynji, waaynjaabu-wi wugurru. 15 Nugurru yuga nurru-marrbuy? Na-Jesus Christ marri na-baḏirrnya-yung, nubagi-yung na-yanggaḻijung, yagi naawiṉi wini-guwaj-gaynji wuguṉi. Marri warruburru-yung wurru-jambarrgina-yinyung na-Jesus Christ marri warruburru-yung waari-yinyung amburru-jambarrgiiyn-jinyung wugurru, yagi anubani wurraaḻamin-nguynju-mi wugurru. 16 Marri anubani ana-maṉngulg-duj ana-lhal nigawi-nyinyung-duj na-God-jinyung, yagi wu-rumi nga yagi wu-burrangi ana-man.gurrg anubagu nigawi-rruj na-God-duj wugurru.
Aḏaba nugurru numburru-wijangayii wudani-waj. Ngagurru anaani aḏaba ngurru-yamana nguynju ana-maṉngulg ana-lhal na-God-jinyung, niga yamba ni-wiri ni-burraa ngagurri-rruj. Anaani ana-wubiba wu-magina, na-God ni-yamaa dani-yung,
“Ngaya anaani nga-burraa ngayawi-nyinyung-duj warruburru warra-wurru-wurruj-duj, ngaya anaani na-God wugurri-nyinyung, warruburru warra-wurru-wurruj ngayawi-nyinyung aḏaba.”✡Leviticus 26:12, Ezekiel 37:27, 1 Corinthians 3:16, 6:19, Ephesians 2:21-22.
Dani-yung na-God ni-yamaa niga.
17 Marri ngijang ni-yamaa,
“Nugurru numburru-yaarri wugurri-wala warra-wurru-wurruj-gala, waari yamba ngayawi-nyinyung-magaa warruburru warra-wurru-wurruj. Nugurru numburru-waḻgaḻ-wiiyn aadanu warra-mulung-arrgi-yung-gala warra-wurru-wurruj. Yagi anubani-yung nurraaliynji anubani-yung aniij-galaaladi nugurru, marri ngaya yungguyung anaani nganamba-waṉagana nugurru aadanu.”✡Isaiah 52:11.
Dani-yung ni-yamaa na-Buunggawa.
18 Marri ngijang ni-yamaa,
“Ngaya anaani nga-ngu-burraa nugurraa aadanu na-ninyarra, marri nugurru aadanu numburru-burraa ngayawi-nyinyung warra-miniwiyayung marri warra-miyn-ngarriwiyayung. Dani-yung ni-yamaa, na-Buunggawa na-Runggal-yung niga.” Dani-yung wu-yamaa ana-wubiba.✡2 Samuel 7:14, 1 Chronicles 17:13, Isaiah 43:6, Jeremiah 31:9.
✡6:2 Isaiah 49:8.
✡6:16 Leviticus 26:12, Ezekiel 37:27, 1 Corinthians 3:16, 6:19, Ephesians 2:21-22.
✡6:17 Isaiah 52:11.
✡6:18 2 Samuel 7:14, 1 Chronicles 17:13, Isaiah 43:6, Jeremiah 31:9.