IBRU
Ibrun Vuak Amur
Fas igi e Jius iji bu Jesu Kurais ma vierafenva ijiebuon. Revo isama buon if iji bu kua Ibruno kuavo ijefuon no buisina kuaivo iji bu e Ibrukono kiav. Regavo fas igi kafu For isoin ki kafu erar isoinma iji noba gain. E Jesuon e ani ijieb e Ibruko bu ma vierafejo iji kam iserdiavo ijefuon bu vierafe buka una unam buon usuikor ijia God sirimamek. Ijefuon e fas igi isoinma iji fu isoime kuardiame nijaidiainkin bu unam buon usuikor iji bu sirimamejo iji bu nuigafiak. Regavo buka Jesu ma vierafekin bu Godon nifak ijia bu maturaik. E ma iji fun Godon Farif Jesu fuonkua. Regavo fun fur fuka ma e Bomana anera iji abevo e Godon vuak vierafene kuaivo ijigam Mosis iji fur ka ma asidiain. Ijefuon e iji buk igi isoinma iji fu kia e be erar fu akai usuikor iji igia vo isuf ni kafokafo barokma e iji fu Godon nifak ijia fu maturaikma bano kiain. Regavo fun Jesu fuonkua duadok fuon ijia God fu ise nuvuon guome arega no nifak fuon ijia maturaik. Ijefuon maiji fur e Bomana isuf baroino nuvuon ga fur nuvuifuon guain. Ijefuon no unam usuikor nuvuon areme una koiknuvuon kege Jesu ma vierafek.
Ibrun vuak kafokafo bu isoinva ijin
1:1-4 God fu Farifuon Jesuon duadok ijia uikinik fuon abe no nijaiduinma ijin.
1:5–2:18 Kuraisri ma e Bomana anera iji asidiainma ijin.
3:1–4:13 Kuraisri ma e bomana Mosis ko Josua asidiainma ijin.
4:14–7:28 Kuraisri ma e bomana e isuf baroijo iji asidiainma ijin.
8:1–9:28 Kuraison unam iviamkor ijar fuka ma bomana unam usuikor iji asinma ijin.
10:1-39 Fun Kuraison kavuan ijar ise nuvuon somduogavo fanuf ijiebuon kavuan bu izeg ise nuvuon somduokva bakin ijin.
11:1–12:29 Ma vierafejo iji fu unam besum ijesugin no God oimaikfuon ijin.
12:1–13:19 Noka Kurais fusugin ma vierafeknum fu igakfuon ijin.
13:20-25 Vuak radkma ijin.
1
God fu Farifuon Jesu Kuraison duadok ijia no kuarduinma ijin
Usuibe God fuka tavan kafokafo ijia ga unam kafokafo ijia fu e Godon vuak vierafene kuaivo ijiebuon ir ijia saifnuvuon iji vuak kuardiain. Regavo iviakma tavan igi God fu Farifuon iji fu kuama fu moikigia ruainma iji duadok fuon ijia kuarduin. Ire fok Godri Jesu kuamga fu amardiame vajamga Jesur ire fok samuagdiain. Fu God aikin ijefuon Godon sanainma ma iji fu vajai fuon ijia sanam. Regavo fur ire fok varur gufia ga moikigia naoivo ijin vuak fuon darokin ijia samuagdiame vak. Tavan iji God fu ik fuon iji mamga fu ari e igi ise buon ijia karauniame fun una God e ka ma darokin ijefuon imut maink ijia fin.
Godon Farif Jesur anera iji fuka ma asidiainma ijin
Ijefuon fu anera iji asidiame ma e bomana ren. Regavo madu fur fu ma Godon Farif revo anera iji bui bakin. No iji ma vierafejo ijefuon maiji buk akaij iji bu usuibe isoinva ijia God fuba anera be kua,
A Farinun ga na ivia nan ma Asoi on no kuain.
Regavo madu fu anera be fuka ba kuai,
Na Asoion ga a Farinun rekno kuain.
Regavo tavan iji God fu Farifuon besum ijesugin iji abe moikigia unaga fu ruakreno ijia fu kuai,
Anera fok nika fuon ato same sirimamefno kiain.
Regavo God fu anera ijiebuon iji fun buk akai bu isoinva ijia ijeg kuai,
Fu anera iji kega bu buibur igeg ufime ar kafokafo ijia oga bu mian igeg migegare naikno kuain.
Regavo madu God fu Farifuon ijefuon iji fu buk akaij ijia fu ijeg kuai,
Ar tavan bog God rene ijia fine maturaime arir e fok mukorigia samuagdiame vak. Regavo aiji aka unam ma iji bu rejo ijesugin oijmiamo revo unam ise bu rejo iji a uzam. Ijefuon Godon oimarvo iji fu a mainma ijar fuka oimarvo iji fu e kafobuon oimarvo iji fu vajiainma iji fuka ma asidianmano kuain.
10 Regavo fu madu kuai,
A E Bomana a ik anej ijia moik fok amare vo imut on ijia varur ga ire fok amardiain. 11 Regavo rad ire fok a amardiainma iji buka ugon igeg bujak vo barekfuon revo aiji a ijia fivak. 12 A ire fok amardiainma iji ugon igeg abe matomga bu una ni kafokafo rek. Regavo aiji a una be rekma bakin revo an tavan bog ijeg fivak.
13 Regavo God fu anera fuon ijia be fuba ijeg kuai,
A imut maink nun ijia fike na e ani on fok kam arafiria barekno kuain. Regavo fuba vuak be ijekin iji anera iji kuardiain.
14 Ijefuon maiji anera iji bu kaven iji Godon ikrejo iji fu uniaga bu tavan bog ari moikigia e iji God fu karauniamo iji ifejdiak.