FIRIFIENS
Firifienson Vuak Amur
Tavan iji For fu vek dibur finma ijia fu fas be isoime e ma vierafejo Firifai ijia karijo iji nijiain. Regavo ai Firifai iji fu mai ikin be ga fu Mesedonia guf ijia. Regavo fas iji fu isoinma iji fu e Firifaiko ijieb uri zinunba mon buon kege e Ifafrodaitas vajavga fu kege ro For vajainma fu iji isoin. Regavo tavan rir be For vuak ma iji abe vainma ijia fu fuon amur fu Firifai ijia vuak ma iji abe bu kuardiamga e roin bu vuak iji faime ma vierafen. Revo e ma vierafejo ai Firifai ijia karinva iji bu mon uruvana nainva bakin. Regavo buka uri zinunba e ma vierafejo Jerusarem ijia e sinuom bakin ijiebuon mon afuiknum vo madu For ifejdakfuon iji afuin. For fu dibur fin revo fuka bomana oimaren. Regavo madu fu vierafe e Firifaiko iji bu afikin roin biediakva buka oimarkfuon fu iji isoin. Regavo For fu bu kabuaikabuaikin ijia kariokfuon iji kuardiain. Regavo madu e iji vuak kufuimene nijaidiavo ijieb bu kikekemiga bu vajai surif buon kania ufukfuon vierafejo ijin ju kuardiain. Regavo madu fu vierafe buka Jesu aikin igeg kariokfuon iji ejafiame kuardiain.
For fu vuak kafokafo fu buk Firifiens isoinma ijin
1:1-11 E Firifaiko ijieb For oijmaknum ifejdainva ijefuon fu una buon oimarenma ijin.
1:12-26 Unam kafokafo iji bu Foron renva ijiga irerag fu reoinon iji fu kuardianma ijin.
1:27–2:18 E God ma vierafejo ijiebuon unam bu kegokfuon ijin.
2:19-30 Timoti ko Ifafrodaitas bu rad izegrekfuon For fu iji unam amardiainma ijin.
3:1–4:9 Unam maturainma ijiga e God ma vierafejo bu izeg karikfuon ijin.
4:10-20 For sinuom kafo bu efkin fu vajainva ijefuon buon oimarenma ijin.
4:21-23 Regavo rad fu bu anadiainma ijin.
1
For fas fu isoime e Firifaiko nijiainma ijin
1 Na For nar Timoti e iji no Jesu Kuraison ikreoijo nor fas igi isoin.
No isoime Godon e iji ja mai Firifai ijia oi besum rene Jesu Kurais ma vierafejo ijigam e mamkanuk jon ijigam e iji bu e roin ifejdiavo iji ja nijiav.
2 No sirimamega God Asoinuvuon ijigam E Bomana nuvuon Jesu Kurais ijieb tavan bog ma rediame mukorigia samuagdiaga ja afuime karikfuon.
For fu e Firifaiko iji buifuon God sirimamenma ijin
3 Tavan bog naka ja vierafejo ijefuon na joifuon God Asoinuvuon iji fuon oimarev. 4-5 Tavan bog na e fok joifuon na nun sirimamejo iji naka oimarknum sirimamej. Ijefuon maiji ja ik anej ijia Jesu Kuraison vuak ma iji na kuardiava ja faime uri na ire kafokafo nijieknum biduakienva iji ja vek rene rok. 6 Ja vuak iji faime ka abe ma vierafenva ijefuon na vierafe fu Godri unam ma iji jon renon iji fuba arek. Regavo fuka vek ijeg ifejdiaga ja unam ma ijesugin rejknum vake tavan radkma iji Jesu Kurais fu una roko ijia ire fok fur fok re barek.
7 Regavo jaiji naka tavan bog na oinun igia ja vierafeoijo iji fu mardo na ijeg ja vierafeknum fiok. Ijefuon maiji e fok ja nana ik ka mukor igi God fu abe na mienma iji ifejdiev. Ja dibur igi na fijo ijia ga madu na kekokva ijia na Godon vuak ma igi na mafaime abe kuaivo ijia jaka na ifejdien. Ijefuon e fok bu vuak iji faime uri giriesame vuak iji abe anu kunaime ma vierafe. 8 Regavo fun Godri fuonkua gieme vierafega izeg na ja oijmiavo iji fuka Jesu Kuraison oij ijia ruain.
9-10 Regavo igi fu nar nun na sirimamekafie vierafejo iji jon ja oijmanamivo iji fuka ofrene vak. Ja ijegrekva ja God fu e izekin iji ja ijia mukoi game vierafekfuon. Regavo ja ijia samakaf unam ise iji ga unam mukor iji ja giame unam ma ijesugin jajiame ke vakfuon. Regavo tavan radkma iji Kurais fu una roko ijia jab jukgavo jaka maturaime fu biek. 11 Regavo madu ja Jesuon daro ijefuon duadok ijia Godon unam ma ijia kegokva e bu ire ma iji ja e kafobuon rejo iji giame una Godon if iji dab aroik.
For dibur fu finma ijar Godon vuak iji ifejdiamga fu bomana rene vainma ijin
12 Ijefuon efnun na vierafe ja vuak igi mukoi vierafekfuon. Vajai fian kafokafo igi na biediavo ijieb Godon vuak ma iji Jesuon fu kuainma iji bijukurainma bakin revo fu ifejdamga fu bomana rene vain. 13 Unam ijegrejo ijar e juo karijo uruvana ga e uruvana igia karinva bu unam igi nun renma iji bun gien. Bu gieme una ma vierafega na ma Kuraison ikreknum vuak fuon ma iji abe e nijaidiavo ijefuon na dibur fijro bu ijeg vierafen. 14 Vajai fian ijieb nun rejo ijefuon e Jesu ma vierafejo uruvana buka ba juv vo jufdiaknum Godon vuak ma iji dab kuaiv.
15 Regavo iji fuka ma e iji God ma vierafejo roin Kuraison vuak maiji una e roin nijaidiavo bu igi na ijegrejo ijefuon buka oi isema na vierafene una na ziegafiev. Ijefuon maiji God fu na ifejdiega e uruvana bu uri vuak nun iji faime una Jesu ma vierafej. Regavo e roin bu na oijmienva iji bu oi ma vierafene vuak maiji abe kuain. 16 Ijefuon maiji e iji buk vierafega na Kuraison vuak ma iji ma faivo ijefuon na ijegrejoro bu iji vierafene una na ifejdiev. 17 Regavo e iji ziemoijo iji bu Jesu Kuraison vuak ma iji buba abe ma vierafene e kuardiav. Regavo bum if buon iji kam biom ajieme e mamkanuk rekuai vierafejo iji bu vierafe bu dibur igi na fijo ijia buka una vajai fian kafo madu vajiekuai vierafen.
18 Regavo vuak iji bu nijaidiavo iji bu ma vierafene nijaidiav vo bu isema vierafeknum nijaidiavo iji naba bomana vierafen. Revo bum ma Jesu Kuraison vuak iji nijaidiakva iji naka oimarev. 19 Regavo naka oimarkfuon ijefuon maiji na ma vierafe Jesu Kuraison Kaven ijefuon daro ga jon ja nuifuon sirimamejo ijar afikin nun kafokafo na biediavo ijia keuniev. 20 Regavo nun bomana na vierafenva iji iviakma igi vo tavan bog ik nun igi na rejo ijia naba zazaik. Na gua vo na nivek fijo ijia naba juk gavo na bomana oimarknum oinun fok ijekma Kurais aroikfuon. 21 Regavo unam na vierafenva iji igin na vajai nun igi na abe moikigia fijo ijia ire fok na rejo iji naka Kurais aroikfuon iji rek. Regavo na vajai nun moikigi na fijo ijia guakva iji fuk fu maren. 22 Regavo na vek moikigia fikva iji naka ire uruvana Kuraison rek. Regavo naba vierafe ire nokarok (2) iji guakfuon ga nivek fikfuon iji izar fu ma bomana iji naba vierafen.
23-24 Na ire nokarok (2) ijieb na kunie roinroin iviev. Regavo na vierafe na vajaima moikigi na fijo iji naka areme Kuraisk fivakfuon. Ijefuon maiji ar iji na Kuraisk fikfuon ijar moikigi no karijo iji fuka asin. Regavo na ja ifejdiakfuon ijefuon na joifuon vek moik ijia nivek jana fiok. 25-26 Regavo iji naka ma vierafejo ijefuon na vierafe God fuba kiega naba guakgavo na nivek jana fikin na ja ifejdiakfuon. Ijefuon maiji na ja ifejdiaga ja giriesame vuak na nijaidiaknum kuardiavo iji ma vierafene e damuikin rek. Na vek jana fijo ijefuon jon izeg ja Jesu Kurais oimardavo iji fuka oijon ijia do igeg irtoijme ajie urakfuon.
Godon vuak ma iji mafaikfuon
27 Regavo igia faif vuak ka ma bomana iji igin Jesu Kuraison vuak ma iji na nijaidiava ja fainva ijia kegoknum karivaf. Ja ijegreoinki na ijia vua giak vo naba ijia vuakva na oknum izeg jon ja unam ma ijin vek giriesame kegoijo na iji faik. 28 Ijefuon ka giriesame tavan bog uri vuak ma ijefuon mafaigavo jab uri e iji bu jana nigaraivo iji giame juk. Ja ijegrekva ja samakaf bu nijaidiaga bu ijia giame vierafega bu iji bu rad God fu bu kam uinituk. Regavo jaiji fun Godri karauniakafa fu ijeg vierafen. 29 Ijefuon maiji ja fun Godri vek ik amur ijia ja Jesu Kuraison ikrekfuon iji ken. Regavo ja fu ma vierafekva ijesugin bagavo ja madu fuifuon vajai fian kafokafo biediak. 30 Ijefuon iviakma jan nana azi ni besum ijia urav. Ja azi ni besum iji usuibe ijia na buna keva ja gienva iji na iviakma vek fine azi ni besum iji vek rejo iji jan faiv.