Ⅰ -Lagɔ ꞌꞌnyɩ-e ꞌtɔ amʋ tinɩɛlreꞌa dɩ, sɩn o, -mɩɛ ꞌsɔn o, ꞌꞌmʋnynɩ o, nyʋꞌa ꞌꞌnyinynikaꞌa ꞌnynɩsiɛɛ o, lɛꞌꞌo lɛ-ɛ ꞌma-a ꞌꞌnyinynilɛ, a -zɛ ɛ kwa gbo! Ⅱ A -gblee, -bho ꞌꞌyu ꞌwlʋ -lreeka, ɔ-ɔ ꞌbɔ-ɔ ti ɔ ꞌke ꞌnya ꞌle ɔ-ɔ ꞌnyaꞌo, ɔ-ɔ ꞌbhʋaꞌo. -Ka -lue ꞌmnɔ, a-bʋ ꞌyeꞌa ɛ-bɛ tinɩɛzɛgɛ ꞌmnɛ, a ꞌbɔ ti a ꞌke -Lagɔwlu ꞌmʋtiꞌcrɛ, ꞌle a ꞌke ɛ ꞌmʋtiꞌcrɛ zɔꞌꞌo zɔ ꞌle ɛ ꞌke amʋ ꞌkpɩ ꞌmʋ po ꞌle a ꞌke ɛ-bɛ tinɩɛlre ꞌmnɛ ꞌli ti-de -ka -zɛgɛka, ꞌle, -nɔɔ -ke ti a-a ꞌyeꞌa ꞌbho -Lagɔꞌɔ ꞌꞌtroli -nɩ mʋ ꞌle yaku ꞌli, ɛ ꞌke ɛ ꞌꞌkpi bhla! Ⅲ ꞌƐ dɩ ɩ ꞌcnɩ-ɛꞌɛ -kaa ꞌle -Lagɔꞌɔ ꞌꞌbɔgʋ ꞌli: Aꞌba ꞌꞌbhi yibo-oꞌo -ka -aꞌba -Kɔyiꞌa ꞌlimʋ -nmɔꞌɔ wɔn.

Ⅳ ꞌKa-a ɩ -nɩꞌe ꞌmʋꞌa dɩ, a ꞌꞌsrii -aꞌba -Kɔyi *Zezii! ꞌƆ nyɔtu kɔɔꞌɔ-ɔ sʋkpʋ ꞌle ɔ-ɔ ꞌꞌnyɩꞌe nyʋ ꞌꞌkɔgwlɛtinɩɛzɛgɛ. Ɛ -nɩꞌa -kaa ꞌmʋ a, nyunyuꞌa -dadudu -see ɔ ꞌybha. Ɛ -nɩꞌa -kaa ꞌmʋ -lrɛɛ, -Lagɔ -cɛ ꞌnɔ-ɔ kpɔ ꞌɔ lbhʋꞌa dɩ, ꞌle, sʋkpʋ-ʋ ꞌbhleꞌa ꞌpɛlʋ, ɔ -nɩꞌe ꞌɛ ka. Ⅴ A -gblee, ɛ-bɛ ꞌꞌkɔgwlɛtinɩɛzɛgɛ ꞌmnɛ, a ꞌye -ɛꞌo -lrɛɛ. ꞌƐ dɩ, a ꞌꞌsrii nɔ ꞌle a -ke ɔ ꞌke ꞌꞌyiꞌꞌsisri ꞌle a-bee -mnʋʋ ꞌke ꞌꞌyiꞌꞌsisri -lrɛɛ ꞌle a ꞌke aꞌba ꞌꞌbhi -aꞌba -Kɔyi -Lagɔ -jeyi ꞌꞌnyɩ ꞌwee ꞌle a ꞌke ꞌɔ bʋbɔmʋ ꞌꞌdu, ꞌle, Zezii *Kliisɩ ꞌmɛꞌɛ -aꞌba ꞌꞌnyinynidɩꞌa dɩ, ꞌɔ kamʋ aꞌba bʋbɔɛ ꞌmnɛ ꞌke -Lagɔ ꞌmnɔ ꞌtʋ nʋ! Ⅵ A ꞌye li-ɔ, ꞌlotʋꞌa ꞌꞌnynuu-a, ɩ ꞌcnɩ-ɛꞌɛ-ɛ ꞌle -Lagɔꞌɔ ꞌꞌbɔgʋ ꞌli ꞌɔ damʋ na:

Ⅸ Ɛ -nɩꞌa -kaa ꞌmʋ a, a-bee -mnʋʋ ꞌmo-o nyʋ -aꞌba -Kɔyi -Lagɔ -cɛꞌɛ kpɔ ɔ ꞌke -kɔ, ꞌle a ꞌke ꞌɔ bʋbɔmʋ ꞌꞌdu. Ɔ -zaꞌa-a amʋ ꞌle ꞌꞌnyinynidɩꞌa -kuyre ꞌmʋ ꞌle ɔ ꞌye zɔ -ya ꞌle aꞌba -pɔlʋ ꞌzɔ ꞌle a ꞌye ꞌɔ ꞌꞌdɩzɩgɩ ꞌwɔɔn, ɔ ꞌye amʋ tinɩɛlre ꞌꞌnyɩ, ꞌle, lɩklɩgbɩ ɔ-ɔ nʋꞌa, a ꞌke ɩ nyʋ -bodɩ ꞌmʋ-za. Ⅹ -Bɛnyɩ a, a -se ꞌkɩ-ɩ ꞌɔ nyʋ -ko. ꞌTraamʋ a ꞌꞌduꞌo ꞌɔ nyʋ. -Bɛnyɩ a, -ka -Lagɔ ꞌyeꞌa aꞌba ngaze, a se ɩ ꞌkɩ yibo. ꞌTraamʋ ꞌtɔ ɔ, ꞌɛ lɛtu -tɔ-ɛꞌɛ-ɛ amʋ ꞌꞌyi ꞌle a ꞌye ɩ yibo.

Ⅺ ꞌAn dɩkmalotʋꞌa ꞌꞌnynuu-a, a popo ꞌgwlʋti na, a-a ꞌmo-o ꞌlɩkpamʋ ꞌnɔɔ ꞌkmʋ ꞌmʋ! A -see ꞌnɔɔ -gwlenamʋ yi. ꞌƐ ꞌꞌlru ꞌꞌyi ꞌɩn-ɩ ꞌtmʋʋꞌo amʋ, lɩ aꞌba ꞌꞌnyinyninaagɩ-ɩ ꞌꞌtuuꞌa amʋ ꞌmʋ ꞌle a ꞌbɔꞌɔ ti a ꞌke ɩ nʋ, a ꞌꞌdu aꞌba ꞌꞌbhi ꞌꞌyrili ꞌya damʋ! Ɩ-bɩ lɩ ꞌmnɩ, ɩ-ɩ ꞌꞌdu-o amʋ -zicɛ ꞌmʋ, ꞌle, kpli-i nʋꞌa -Lagɔ ꞌtʋ, a -kɩɩ ɩ nʋ. Ⅻ Nyʋ-ʋ se ꞌɔ yibo, ꞌnɔɔ a -nɩꞌa ꞌle ꞌwa ꞌꞌklumʋ, a nʋ ꞌle kplizɩgɩ! Ʋ-bʋ nyʋ ꞌmnʋ, -bho ʋn -ka amʋ dɩ ꞌꞌyi-ikpa, a nʋ ꞌꞌyrilinmɔkpli ꞌꞌkɔmʋ, ʋn ꞌke ɩ ꞌꞌyrili-gwɛ, ꞌle, -da *Zezii-i ꞌyeꞌa ꞌnɔɔ ꞌkmʋ ꞌmʋ le -yi -nɩ mʋ, ɔ ꞌke ʋ -zigle -tu, ꞌle ʋn ꞌke ꞌɔ ꞌnynɩ ꞌꞌyiꞌbhɛɛ!

ⅩⅢ ꞌAn ꞌlotʋꞌa ꞌꞌnynuu-a, ꞌbhlɩkpɩ -ke ꞌꞌkpi a -nɩꞌa a, nyɔꞌꞌo nyɔ-ɔ ꞌma-a ꞌleꞌa nyʋꞌa -jolʋgbopoyi, -aꞌba -Kɔyi Zezii *Kliisɩꞌa nyʋ a ꞌꞌduꞌa kamʋ, a ꞌꞌdu ɔ ꞌbho! ꞌBhlʋkpayowliklagba-a -kɔꞌɔ nyʋ ꞌwee, a ꞌꞌdu ɔ ꞌbho! ⅩⅣ Ɔ-bɔ ꞌbhlʋkpayowliklagba ꞌmnɔ, ꞌbhlʋkpayowli ɔbɔ ꞌꞌduꞌa ꞌbho -lrɛɛ, a ꞌꞌdu ɔ ꞌbho -lrɛɛ! Ɔ ꞌꞌdu -ʋ ꞌbho, ꞌle, nyʋ-ʋ nʋꞌa ꞌꞌnyinynidɩ, ɔ ꞌke ʋ ꞌkleyeɛɛ ꞌꞌkpi -ya, ꞌle, -yʋ nʋꞌa -zɛgɛ, ɔ ꞌke ꞌwa ꞌꞌyrilinmɔdɩ -za. ⅩⅤ A -gblee, Zeziiꞌa ꞌꞌdɩzɩgɩ a-a zaꞌa ꞌmʋ, nyʋ-ʋꞌa ꞌwɩn ꞌɩ ꞌmʋti, -ʋ ꞌꞌdu ꞌɛ dɩ -ʋ cɛꞌɛ amʋ, -Lagɔ ꞌbɔ-ɔ ti a ꞌke kplizɩgɩ nʋ ꞌꞌkɔmʋ, -bho ʋn -gbʋ nɩ ya ꞌle ʋn ꞌke wɔn ꞌꞌmu. ⅩⅥ A-bʋ ꞌma-a ꞌꞌyiflɔmʋ, -ʋ zetie-ɛꞌɛ ꞌle ꞌꞌnyinynidɩ ꞌmʋ, kpli a ꞌka nʋ a, a nʋ ɩ! ꞌBho ꞌɛ lemʋ, aꞌba ꞌꞌyiflɔɛ ꞌmnɛ, aꞌba ꞌnɛ ɛ ꞌꞌyi, aꞌba nʋ ꞌꞌnyinynidɩ -le! A-bʋ ꞌma-a -Lagɔꞌɔ lbhʋnʋmʋ, kpli a ꞌka ꞌbhle a, a ꞌbhle ɩ ꞌle a ꞌke ɔ ꞌbho ꞌꞌdu! ⅩⅦ ꞌAn ꞌlotʋꞌa ꞌꞌnynuu-a, a ꞌꞌdu ꞌbho nyʋ ꞌwee! A -kma a -Bozeziiꞌa nyʋꞌa dɩ! A ꞌꞌdu ꞌbho -Lagɔ! A ꞌꞌdu ꞌbho ꞌbhlʋkpayowliklagba -lrɛɛ!

ⅩⅧ A-bʋ ꞌma-a nyʋꞌa lbhʋnʋmʋ, ꞌɩn-ɩ ꞌtmʋʋꞌo amʋ-ɛ, aꞌba -klɩgbɩ -ke lbhʋ a-a nʋꞌa a, a ꞌꞌdu ʋ ꞌbho! ꞌWa -yʋ -nmɔꞌɔ amʋ kwa ꞌmʋti, aꞌba ꞌꞌdu ꞌbho ꞌwa ꞌꞌsɛ -le! -Yʋ -nyniꞌa amʋ kwa ꞌmʋti, a ꞌꞌdu ʋ ꞌbho -lrɛɛ! ⅩⅨ A -gblee, nyɔ-ɔ -seeꞌa ꞌꞌnyinynilɛ nʋ, -bho ʋn -kɔ ɔ ꞌkleyeɛɛ ꞌꞌkpi-i ya, -bho ɔ popo -Lagɔ ꞌgwlʋti ꞌle ɔ ꞌke ꞌꞌgwli-ku, ɔ ꞌke ɩ wɔn ꞌmʋ cɛ, ꞌɛ lɛtu nʋꞌo -Lagɔ ꞌtʋ. ⅩⅩ ꞌBho ꞌɛ lemʋ, -bho aꞌba kpli se ꞌꞌyrili-nmɔ, -bho ʋn ꞌꞌdu ꞌɛ dɩ, -bho ʋn -ka amʋ-ʋ sɩa nɩ, ꞌle a ꞌke ꞌꞌgwli-ku, a ꞌke ɩ wɔn ꞌmʋ cɛ, leedɩ a-a fuo ꞌnɔ wɔn aꞌba -zɛgɛꞌɛ dɩꞌa? Ɛ -nɩꞌa -kaa ꞌmʋ a, -bho a -ka kplizɩgɩ-ɩ nʋ, -bho ʋn ꞌꞌdu ꞌɛ dɩ, -bho ʋn -ka amʋ ꞌkleyeɛɛ ꞌꞌkpi-i ya, ꞌle a ꞌke ꞌꞌgwli-ku, a ꞌke ɩ wɔn ꞌmʋ cɛ, ꞌɛ lɛtu nʋ ꞌɔ ꞌtʋ. ⅩⅪ A ꞌye li-ɔ, a ꞌke ꞌkle ꞌye ꞌle a ꞌke ꞌꞌgwli-ku, a ꞌke ɩ wɔn ꞌmʋ cɛ, ꞌɩnnɛ ɔ ꞌybhaꞌo a ꞌke ꞌmʋ-zi -nɩ ꞌle lɩ -lrɩɩ ꞌmʋ, -ɛkedɩmaa, *ꞌɔ ꞌBhozayi -ɔ ꞌpʋʋnꞌa nyʋ, ꞌka-a ɔ ꞌyeꞌe ꞌkle aꞌba dɩ, ꞌle ɔ ꞌye amʋ ꞌɛ yagbʋlɛ lisie ꞌle aꞌba kpli ꞌke ꞌɔ nɩ ꞌꞌsɛlɩ-za. ⅩⅫ Lɛ-ɛ ꞌma-a ꞌꞌnyinynilɛ ꞌbho -Lagɔꞌɔ ꞌꞌyigbeyi, ɔ -see ꞌɛ -lue ꞌtɩn nʋ, ꞌle, lɛ-ɛ ꞌma-a sɩn, ɛ -see ꞌle ꞌɔ wɔn ꞌmʋ ꞌwlʋ.

ⅩⅩⅢ Ɔ -nɩꞌa ꞌnɔɔ ꞌkmʋ ꞌmʋ, nyʋꞌa -dadudu ꞌꞌjree nɔ-oꞌo. Ɛ -nɩꞌa -kaa ꞌmʋ a, ɔ -see ꞌwa nyɔ -lue ꞌtɩn ꞌꞌjree. Ʋn -yɔ ꞌɔ-ɔ ꞌkleyeɛɛ ꞌꞌkpi -lrɛɛ. Ɛ -nɩꞌa -kaa ꞌmʋ a, ɔ -see ꞌꞌyitiꞌꞌbhiti ꞌle ɔ ꞌke ʋ -kaa ꞌꞌyi-iꞌlɛ na, ɔ-ɔ ꞌye -ʋ ꞌkleyeɛɛ ꞌꞌkpi -ya -mʋ, nʋ. -Lagɔ -ke -zigle ꞌsrɛɛꞌɛ ꞌꞌyi, ꞌle ꞌɔ kwa ꞌmʋ ɔ-ɔ de ꞌɩ ti. ⅩⅩⅣ Ɔ-bɔ -Lagɔꞌɔ ꞌBhozayi ꞌmnɔ, -aꞌba ꞌꞌnyinynidɩꞌa ꞌꞌlru ꞌꞌyi ʋn ꞌlbha -nɩ ꞌnɔ ꞌbho nyʋyrilbhaatu ꞌꞌyri, ꞌle ꞌɔ ꞌmɛmɛɛ ꞌmnɛꞌɛ dɩ ɔ ꞌye -amʋ zetie ꞌle ɩ ꞌmʋ, ꞌle, ꞌya -belu ꞌka -amʋ bhla, ɩ ꞌye ɔ ꞌꞌkpi tiꞌga. ꞌKa-a ɔ ꞌmɛꞌo -aꞌba dɩ ꞌle ꞌꞌnyinynidɩ -kaa ꞌtɔ -amʋ ꞌꞌlru ꞌmʋ -kɔ ꞌle -a ꞌke ꞌya nʋnʋdɩ ꞌbhɔ, ꞌle, kpli-i ꞌsrɛɛꞌɛ ꞌꞌyi ꞌbho -Lagɔꞌɔ ꞌꞌyigbeyi, -a ꞌke ɩ ꞌli ti-de ꞌle -aꞌba tinɩɛ ꞌmʋ. Kɩn, ꞌan ꞌlotʋꞌa ꞌꞌnynuu-a, ɛ-bɛ ꞌkle ɔ ꞌyeꞌa dɩ, a ꞌpʋnꞌo. ⅩⅩⅤ A -gblee, -bɛnyɩ a, -da a se ꞌɔ -bhla yibo ke, lɛ a ꞌybhaꞌa, ꞌɩnnɛ a-a nʋꞌo ꞌle a-a bhluꞌo ꞌꞌmamajolʋ -ka *ꞌbhlabhlɩ-ɩ seꞌa *ꞌꞌyriliduyi ꞌbhle, ꞌle ɩ-ɩ naꞌa ti badiibadii. ꞌTraamʋ ꞌtɔ ɔ, -ka, -bho ɩ ꞌyeꞌa -jolʋ ꞌle ɩ-ɩ muꞌa ꞌya ꞌꞌyriliduyi gbo, ɔ-bɔ *Zezii *Kliisɩ ꞌꞌduꞌa amʋ ꞌꞌyrili, -ɔ poꞌa amʋ -jolʋzɛgɛ gbo, ꞌka-a a ꞌꞌbhiti ꞌnɔ gbo ꞌle ɔ ꞌke amʋ -kɔ.