Ⅰ -Gblee, lɛ-ɛ ꞌbhleꞌa ꞌnynɩ ꞌɩn-ɩ ꞌbɔꞌɔ ti ꞌtraamʋ ꞌtɔ ɔ, ꞌɩnnɛ ꞌmo-o, a ꞌke nyʋ ꞌweeꞌa dɩ *-Lagɔ wɔn gbo po, a ꞌke ɔ libhade, ꞌle a ꞌke ɔ ꞌsɛɛ po. Ⅱ ꞌBhlɩkpɩyowli -ke nyʋklɩgbɩꞌa dɩ a bhade -Lagɔ li, ꞌbhlʋkpa -ke ꞌꞌlru ʋn -nɩꞌa, ɛ ꞌke ti-de ꞌle -a ꞌke -pɔlʋꞌa bhlubhlua ꞌye ꞌle -aꞌba kplizɩgɩ ꞌmʋ -a ꞌke ꞌbho -Lagɔ ꞌꞌdu! Ⅲ Nyɔ ꞌke nyʋꞌa dɩ -Lagɔ wɔn gbo po, ɛ -nmɔꞌɔ-ɔ ꞌꞌyrili ꞌle ɛ-ɛ nʋꞌo *-aꞌba ꞌPʋʋnyi -Lagɔ ꞌtʋ. Ⅳ Ɔ ꞌbɔ-ɔ ti ɔ ꞌke nyʋ ꞌwee ꞌpʋʋnꞌa dɩ ꞌɛ lɛtu nʋ ꞌɔ ꞌtʋ, ꞌle ʋn ꞌke -ziadɩ yibo ꞌwee ʋn ꞌke ɛ ꞌmʋ -na -nɩ. Ⅴ Wlu -nɛɛ ɛ, nyʋ ꞌwee ɛ geꞌe ꞌꞌyi, -ɛkedɩmaa, -Lagɔ -nɩꞌe-e -lue ꞌtɩn. ꞌLe dɩꞌa ꞌnynɩmʋnɩyi -nɩꞌa ꞌbho -Lagɔ -ke nyunyuꞌa ꞌnynɩmʋ, ɔ -nɩꞌe-e -lue ꞌtɩn -lrɛɛ. ꞌƖnnɔ ꞌmo-o *Zezii *Kliisɩ ꞌꞌduꞌa nyunyɔ. Ⅵ -Gblee, ɔ yi-oꞌo ꞌle ɔ ꞌke ꞌɔ ꞌꞌbhuo ꞌꞌyitiꞌꞌtayi ꞌle ɔ ꞌke nyʋ ꞌweeꞌa ꞌꞌlru ꞌꞌyi ꞌmɛ -nɩ ꞌle ɔ ꞌke ʋ zetie ꞌle ꞌwa ꞌꞌnyinynidɩ ꞌmʋ. Ɔ ꞌka ꞌɛ lɛtu nʋ a, -nɔɔ -ke ꞌꞌbhuo -Lagɔ ꞌꞌduꞌa ꞌtɩn, ꞌbho-o ɔ -nʋ -nɩ nɛꞌo. -Ka -Lagɔ ꞌbɔꞌɔ ti ɔ ꞌke nyʋ ꞌꞌwe ꞌpʋʋn, ꞌɩnnɛ -tɔ nɛꞌo. Ⅶ -Ɩn ꞌye li-ɔ, ꞌɛ kamʋ -Lagɔ nʋꞌo ꞌɩnmʋ *ꞌɔ -dalbhoyi ꞌmʋ ꞌle ɔ ꞌye ꞌɩnmʋ lbho ꞌle ꞌɩn ꞌke ꞌɔ ꞌꞌdɩ -za. Ɔ lbhoꞌa -kaa ꞌɩnmʋ a, ɔ na ꞌɩn -tɔ ꞌɔ ꞌꞌdɩzɩgɩ nyʋ-ʋ -seꞌa-a *ꞌZuifʋ ꞌle ʋn ꞌke ɩ ꞌꞌgwlide ꞌle ʋn ꞌke ꞌɔ -ziadɩ ꞌmnɩ ꞌwɔɔn. ꞌƖn -see sɩn cɛ. -Ziadɩ ꞌɩn-ɩ zaꞌa ꞌmʋ. Ⅷ ꞌBho ꞌɛ lemʋ a, ꞌɩn ꞌbɔ-ɔ ti, -da ꞌwee nyukpasi-i bʋbɔꞌɔ -Lagɔ ɔ, ʋn ꞌke -kʋtɩ yayi -tɔ ꞌle ʋn ꞌke -Lagɔ wɔn gbo po ꞌle ʋn ꞌke ɛ nʋ ꞌle -pɔlɔplu ꞌmʋ. ꞌWa nyʋtuꞌa ꞌbhle ꞌcɛ ꞌli -le, ꞌwa jɛ -le!

Ⅸ -Gblee, ꞌle ꞌnynʋkpakpɩ -mnʋʋ -bodɩ ꞌɩn ꞌbɔ-ɔ ti, ɛ ꞌke -kaa ꞌmʋ-nɩ -lrɛɛ. ꞌBho ꞌɛ lemʋ a, ʋn -pa lɩ ꞌmʋ dɩlikpʋnka! ꞌLe ꞌwa -bɛbɛlɩꞌa zi ꞌꞌkalɛ ꞌꞌyi -le, ꞌle ʋn ꞌke dɩ likpʋn ꞌle ꞌwa nʋnʋkpli ꞌmʋ ꞌle ʋn ꞌke ꞌwa ꞌꞌbhi wɔnyiꞌbhɛɛ! ꞌꞌNɩmnɩꞌa timɔɛ -ke ꞌya lbhalbhaa -yɩ yaꞌa nyʋ ꞌꞌyrili, ꞌwa nʋ ꞌya lɛtu -le, ꞌmʋpalɩ -ke -bɛbɛlɩ -ke ꞌpɛlʋ-ʋ -kmuꞌa ꞌꞌyi, ꞌwa tri ꞌya ꞌꞌlru ti -le! Ⅹ Lɛ-ɛ ꞌkʋ ʋ ꞌꞌyrili-nmɔ ɔ, ɛ ꞌꞌdu ꞌwa kplizɩgɩ! ꞌNynʋkpakpɩ-ɩ ꞌbɔꞌɔ ti ʋn ꞌke ꞌbho -Lagɔ ꞌꞌdu, ꞌɩnnɛ -nmɔ ꞌnʋ ꞌꞌyiti. Ⅺ -Tɔtɔlɩ nyʋ-ʋ tɔꞌɔ ꞌle -Lagɔbidi ꞌli, ꞌnynʋkpakpɩ kpʋn dɩ li, ʋn ꞌke ɩ -lokuipo, ꞌle ʋn ꞌke ꞌwa ꞌꞌbhi ꞌzɔ -ya ꞌbho -Lagɔwluꞌa -tɔmʋꞌa ꞌꞌyigbeyi. Ⅻ ꞌƖn -see ꞌnynʋkpakpɩ ꞌꞌyiflɔɛ ꞌꞌnyɩ ꞌle ʋn ꞌke nyukpasi ꞌꞌkpi -nɩ ꞌle ʋn ꞌke ꞌwa -Lagɔwluꞌa -tɔmʋ ꞌꞌdu. ꞌwa ꞌꞌdu -klɩgbɩ ꞌbho ʋ-beeꞌa damʋ -le! Ʋn ma ꞌmʋti! ⅩⅢ -Gblee, -Lagɔ -yaꞌa-a *Adaa ti -tanyɩ ꞌle *Ɛvʋ ꞌye gbɔ ꞌmʋ ꞌbhɔɔ. ⅩⅣ ꞌLe ɛ -se Adaa ꞌꞌtayi ꞌɔ ꞌꞌbhuo ꞌꞌyiti ꞌꞌnyinynidɩꞌa tiyayi ꞌye ɔ ꞌꞌmaa -ko, ꞌnynaakpʋ-ʋ ꞌꞌtayiꞌe ꞌwa ꞌꞌbhuo ꞌꞌyiti ꞌle ɛ ꞌye ʋ ꞌꞌmaa ꞌle ʋn ꞌye -Lagɔꞌɔ wlu ꞌꞌyiꞌnaa. ⅩⅤ Ɛ -nɩꞌa ꞌtɔ -kaa ꞌmʋ a, ꞌwa ꞌꞌyreetɩ ʋn-ʋ ꞌwlʋꞌa ʋn ꞌka ꞌꞌgipo, -ɛ -ke lbhʋ ʋn ꞌbhleꞌa ꞌle -aꞌba -Kɔyiꞌa ꞌnynɩ ꞌmʋ, ꞌle ɛ ꞌmʋ, ꞌpʋnpʋan ʋn ꞌyeꞌa a, ʋn ꞌke ɛ ꞌmʋ -na -nɩ. Ɛ -nɩꞌa ꞌtɔ -kaa ꞌmʋ-ɔ, ꞌwa -Lagɔꞌɔ ꞌꞌgwlideɛ -ke nyʋꞌa dɩkmɛɛ ʋn -deꞌa ꞌli ti, ʋn -mu nɩ ꞌꞌlru ꞌle ꞌwa tinɩɛ ꞌke ꞌꞌyiꞌsrɛɛ ꞌbho -Lagɔꞌɔ ꞌꞌyigbeyi ꞌꞌkɔmʋ ꞌle ʋn ꞌke dɩ likpʋn ꞌle ɩ-bɩ lɩ ꞌmnɩ ꞌmʋ!