ꞌZAANꞌa ꞌꞌbɔgʋꞌa ꞌsɔnnɛ
Wludie poꞌa nyɔ ꞌꞌbɔgʋ -nɛɛꞌɛ -naagɩ ꞌli.
Zeziiꞌa -glɩgba -lue ꞌZaan poꞌo ꞌꞌbɔgʋ -nɛɛ -jeyi. Ɔ ꞌnʋ-o -kaa ꞌle ʋn -ke Zezii ꞌke ꞌꞌyiꞌꞌsisri ꞌle -ziadɩ -ke dɩkmɛɛ ꞌmʋ ꞌꞌkɔmʋ, ꞌle, lɩ-ɩ seꞌa ꞌkpʋ ꞌbhle, nyʋ-ʋ tɔ ꞌnɩ, ꞌbho ꞌwa damʋ ʋn ꞌke ꞌwa ꞌꞌbhi ꞌꞌyriliꞌꞌdu.
ꞌBʋbʋa
Ⅰ ꞌƖnmɔ nyunyɔzɛgɛ *ꞌZaan ꞌma-a *Zeziiꞌa -glɩgbaꞌa ꞌꞌlrutideyi, a-bʋ -Lagɔ -zaꞌa ꞌbho ꞌɔ lbhʋꞌa dɩ, a-bʋ -ke dɩ ꞌɩn -kmaꞌa -ziaka, ꞌɩnmɔ poꞌo amʋ ꞌꞌbɔgʋ -nɛɛ -jeyi. Ɛ -se ꞌɩn -nɩ -lue ꞌtɩnꞌa ꞌꞌsɛ-ɛ -kma aꞌba dɩ ꞌnɩ -ko. -Ka Zezii Kliisɩꞌa dɩ ꞌꞌduꞌa -ziadɩ, nyɔꞌꞌo nyɔ-ɔ yibo nɩꞌa a, ɔ -kmaꞌa-a aꞌba dɩ -lrɛɛ. Ⅱ -Ɛkedɩmaa, ɛ-bɛ -ziadɩ ꞌmnɛ -nɩꞌe-e ꞌle -aꞌba -pɔlʋ ꞌzɔ ꞌꞌkɔmʋ.
Ⅲ -A-bʋ -ke Zezii *Kliisɩ ꞌꞌsisriꞌa ꞌꞌyi ꞌle -ziadɩ -ke dɩkmɛɛ ꞌmʋ, -aꞌba -tɩta -Lagɔ -ke ꞌɔ ꞌꞌyu Zezii Kliisɩ ꞌmnɔ -sie -amʋ gbo! Ʋn nʋ -amʋ -zɛgɛ ꞌꞌlruli ꞌle ʋn ꞌke -amʋ -pɔlʋꞌa bhlubhlua ꞌꞌnyɩ!
Ⅳ -Ka -aꞌba -tɩta ꞌmnɔ ꞌbɔꞌɔ ti -a ꞌke -na ꞌbho ꞌɔ -jeyi ꞌle -a ꞌke ꞌle ꞌɔ -ziadɩ ꞌli ti-de, ꞌɩn ꞌye-e li na ꞌka-a aꞌba tɔlʋ-ʋ naꞌo. ꞌƖn ꞌyeꞌa -kaa ꞌɛ lɛtu li a, ꞌbʋbʋa ꞌlbhaꞌa ꞌɩnmʋ-ɛ tenyɩ.
Dɩkɩkmɛɛ
Ⅴ ꞌTraamʋ ꞌtɔ ɔ, ꞌɩn-ɩ ꞌtmʋʋꞌo amʋ-ɛ, -a kɩkma -kɩkma dɩ! Ɛ-bɛ wlu ꞌɩn-ɩ poꞌa -laa amʋ -jeyi a, ɛ -se wlulre -ko. ꞌBho -aꞌba -Lagɔjeyiꞌa yinamʋ, -ɛ ꞌwlʋꞌa ꞌbho, -ɛ bhlaꞌa -zɩan ꞌꞌkpi, -a ꞌwɛn -ɛ ꞌbɔ ꞌle -a yibo nɛꞌo -lrɛɛ. Ⅵ A yibo -Lagɔꞌɔ dɩꞌa -kmakmaa ꞌnɩ? A -gblee, nyɔ-ɔ ꞌꞌduꞌa ꞌbho ꞌɔ wlu, ꞌɩnnɔ -kmaꞌa ꞌɔ dɩ. ꞌLe ꞌɔ wlu -a ꞌwɔnꞌɔ ꞌbɔ see, ꞌɩnnɛ ꞌmo-o, a kɩkma -kɩkma dɩ!
-Ziadɩ
Ⅶ A ꞌye li-ɔ, ꞌɩn-ɩ ꞌzɩ -ɩ amʋ -bodɩ ꞌmʋ, -ɛkedɩmaa, nyʋꞌa -dadudu-u ꞌꞌmaaꞌa nyʋ dɩ ꞌꞌyrili, ʋn bʋbaꞌa-a ꞌnɔɔ ꞌbhlɩkpɩ ꞌꞌkpi ti. -Ka *Zezii *Kliisɩ ꞌꞌluoꞌa nyunyɔku ꞌmʋ ꞌle ɔ ꞌyeꞌa ꞌnɔɔ ꞌkmʋ ꞌmʋ yi, ʋn -see ɩ -ziadɩ ꞌla. ꞌWa nyʋtu-u ꞌmo-o nyʋꞌa dɩyrilimaamʋ. *-Lagɔꞌɔ ꞌBhozayi -ɔ ꞌpʋʋnꞌa nyʋꞌa ꞌꞌyidedemʋ moꞌo -lrɛɛ. Ⅷ A ꞌꞌdu aꞌba ꞌꞌbhi ꞌꞌyrili, -Lagɔꞌɔ lbhʋ a-a nʋꞌa, ɛ -kaa ꞌꞌnukɔ ꞌwla ꞌle ɔ ꞌke amʋ -zɛgɛ ꞌꞌlrulinʋ! Ⅸ A -gblee, -Lagɔꞌɔ ꞌBhozayi -ɔ ꞌpʋʋnꞌa nyʋ, lɩ ɔ-ɔ tɔꞌɔ -amʋ, nyɔ-ɔ cɩ ꞌɩ ꞌꞌkpi a, ɔ -ke -Lagɔ se -na. Nyɔ-ɔ -de ꞌnɩ ꞌmʋti a, ꞌɩnnɔ -ke -aꞌba -tɩta -Lagɔ -ke ꞌɔ ꞌꞌyu Zezii ꞌꞌsisriꞌe ꞌꞌyi. Ⅹ ꞌƐ dɩ ꞌɩn-ɩ ꞌtmʋʋꞌo amʋ, -bho -Lagɔꞌɔ wluꞌa ꞌmʋzayi yi ꞌle amʋ gbo, -bho ꞌɔ -tɔtɔlɩ -ke *nyʋꞌa ꞌpʋʋnyi Zeziiꞌa nɩ se gʋgɔ ɔ, aꞌba bhubhlu nɔ ꞌmʋti -le! Ⅺ -Ɛkedɩmaa, nyɔ-ɔ kpʋn ꞌɔ ꞌlɩkpʋ -ka -zɛgɛka a, ʋn -nɩ ꞌsɔn, ʋn -nɩꞌe-e ꞌꞌnyinynikpli ꞌmnɩꞌa bo ꞌli.
*ꞌZaanꞌa wluyijrawlu
Ⅻ A -gblee, ꞌɩn ꞌbhle ꞌko-o dɩꞌa -dadudu ꞌɩn ꞌke amʋ ꞌtmʋʋ. Ɛ -nɩꞌa -kaa ꞌmʋ a, ꞌɩn -see tiꞌbɔ ꞌɩn ꞌke ɩ ꞌle ꞌꞌbɔgʋ ꞌli ꞌꞌdu. ꞌƖn ꞌybha-oꞌo ꞌɩn ꞌke ꞌle amʋ gbo yi -a ꞌke -dalue ti-de ꞌle ꞌɩn -ke a ꞌke -wlu. ꞌLe, ꞌbʋbʋa-a ꞌlbhaꞌa -a -nɩ ꞌwee, ɛ ꞌke -amʋ ꞌmʋ ꞌꞌyi tenyɩ.
ⅩⅢ Nyʋ -Lagɔ -zaꞌa ꞌbho -lrɛɛ ꞌɔ lbhʋꞌa dɩ, ʋn na ʋ-bʋ ꞌyeꞌe amʋ!