ꞌPɔlʋꞌa ꞌꞌbɔgʋꞌa ꞌsɔnnɛ ɔ poꞌa TESALONIKƖKƆMƲ -jeyi
Wludie poꞌa nyɔ ꞌꞌbɔgʋ -nɛɛꞌɛ -naagɩ ꞌli.
Tesalonikɩkɔmʋ ꞌma-a Zeziiꞌa nyʋ, ꞌɩnnʋ ꞌɔ -dalbhoyi ꞌPɔlʋ poꞌo ꞌꞌbɔgʋꞌa ꞌsɔnnɛ -jeyi, -ɛkedɩmaa, ɔ ꞌbɔ-ɔ ti, lɩ ɔ -tɔ ꞌnʋ ꞌbho Zeziiꞌa leyiɛꞌɛ ꞌꞌkpi, ɔ ꞌke ɩ ꞌꞌkpi po. ꞌBho ꞌɛ lemʋ, lɩ-ɩ seꞌa ꞌkpʋ ꞌbhle, nyʋtɔlʋ-ʋ tɔ nɩ-oꞌo ꞌle ꞌwa tɔlʋ-ʋ nʋꞌo na ɔ ꞌyi-e le see ꞌle ꞌwa -lrʋʋ-ʋ nʋꞌo na ꞌɔ leyinɔɔ ꞌꞌkɔɔꞌɔ-ɔ gboꞌa dɩ ʋn -see lbhʋ -nʋ yi! Ɩ-bɩ dɩ ꞌmnɩ ɔ ꞌbɔꞌɔ ti ɔ ꞌke ɩ ꞌꞌyiꞌsrɛɛ. -Lagɔꞌɔ ꞌBhozayi -ɔ ꞌpʋʋnꞌa nyʋꞌa ꞌꞌyidedeyi ʋn-ʋ ꞌlaꞌa -lokumʋkuyiklagba, -ka ɔ ꞌka yi -tanyɩke-ɔ ꞌle ɔ ꞌke le yi, ɔ-ɔ ꞌnʋ-o ꞌna -lrɛɛ.
Ⅰ
ꞌYewlu
Ⅰ ꞌƖnmɔ ꞌPɔlʋ-e *Silɩvɛɛ -ke Timotee, a-bʋ Tesalonikɩkɔmʋ ꞌma-a *Zeziiꞌa -glɩgbawɔnyiꞌa nyʋ, -a-bʋ ꞌyeꞌe amʋ! ꞌBho ꞌɛ lemʋ ꞌɩn-ɩ ꞌpo-o amʋ wlu -jeyi. A-bʋ ꞌma-a -aꞌba -tɩta -Lagɔ -ke -aꞌba -Kɔyi Zezii Kliisɩꞌa nyʋ, Ⅱ ꞌwa ꞌꞌnitiwʋnnakʋta -nɩ amʋ ꞌꞌkpi ꞌle ʋn ꞌke amʋ -pɔlʋꞌa bhlubhlua ꞌꞌnyɩ!
*Zeziiꞌa -glɩgbawɔnyiꞌa nyʋ-ʋ -nɩꞌa Tesalonikɩ, ꞌPɔlʋ ꞌpo -ʋ ꞌkpa ꞌꞌyi
Ⅲ ꞌLotʋꞌa ꞌꞌnynuu-a, ɛ -nmɔꞌɔ-ɔ ꞌꞌyrili ꞌle -a ꞌke aꞌba dɩ -Lagɔ ꞌsɛɛ po -wlɛɛwlɛɛ. ꞌKa -nmɔꞌɔ-ɔ ꞌꞌyrili, -ɛkedɩmaa, aꞌba *Zeziiꞌa ꞌꞌgwlideɛ -ke dɩkɩkmɛɛ-ɛ ꞌkpa-a ꞌꞌkpi. Ⅳ ꞌKa-a ɛ -nɩꞌe ꞌmʋꞌa dɩ a, Zeziiꞌa -glɩgbɩwɔnyiꞌa nyʋ -Lagɔ -kɔꞌɔ, -ʋ -nɩꞌa -dalrɔɔ, -bho -a -nɩ ꞌle ꞌwa ꞌꞌklumʋ a, -a zaꞌa aꞌba ꞌꞌyrilinmɔdɩ ꞌmnɩ ꞌle ꞌbʋbʋa ꞌmʋ. -Ka nyʋ-ʋ yaꞌa amʋ ꞌkleyeɛɛ ꞌꞌkpi ꞌle ʋn-ʋ klaꞌa amʋ nyanɩ ꞌmʋ ꞌle a-a kuꞌa ꞌkpa ꞌꞌyi ꞌle aꞌba ꞌbhɔ Zeziiꞌa ꞌꞌgwlideɛꞌɛ dɩ, -a ꞌzʋ -ʋ ꞌna -bodɩ ꞌmʋ. Ⅴ ꞌƐ lɛtu-u ꞌtɔ-ɔ -amʋ gbaa na -Lagɔ-ɔ ꞌye-e nyʋ -zigle -tu -mʋ ꞌle ꞌꞌyisrɛɛɛ ꞌmʋ. -Lagɔꞌɔ nyʋꞌa kamʋ a-a ꞌye-e ꞌkleꞌa dɩ ɔ-ɔ ꞌye amʋ ꞌꞌyiti-wa mʋ, ꞌbɩ a ꞌbhleꞌa ꞌle ꞌɔ -kɔmʋꞌa ꞌꞌklumʋ, a -ke ɛ nɩnmɔꞌɔ-ɔ ꞌꞌyiti ꞌle a -ke ɔ ꞌke -dalue -nɩ ꞌꞌkɔmʋ. Ⅵ Kɩn, -ziadɩ moꞌo, ɔ-ɔ ꞌye-e nyʋ -zigle -tu -mʋ ꞌle ꞌꞌyisrɛɛɛ ꞌmʋ. Nyʋ-ʋ yaꞌa amʋ ꞌkleyeɛɛ ꞌꞌkpi a, ɔ-ɔ ꞌye -ʋ ꞌkleyeɛɛ ꞌꞌkpi -ya -mʋ -lrɛɛ, Ⅶ ꞌle, a-bʋ ꞌyeꞌa ꞌkle ꞌtraamʋ a, ɔ-ɔ ꞌye amʋ ꞌꞌyiflɔɛ ꞌꞌnyɩ mʋ, ꞌle, -abʋ a, ɔ-ɔ ꞌye ɛ -amʋ ꞌꞌnyɩ mʋ -lrɛɛ. -Nɔɔ -ke ti -aꞌba -Kɔyi Zezii-i ꞌyeꞌa ꞌle yaku ꞌli ꞌwlʋ mʋ ꞌle ɔ ꞌke ꞌnɔɔ ꞌkmʋ ꞌmʋ le yi a, ꞌbho ꞌmnɔ, ꞌbho-o ɔ ꞌke ɩ -nʋ -nɩ. -Bho ɔ -ka yi a, ɔ -ke ɔ gboꞌa -dalbhomʋ kuꞌa ꞌwɔn-ɔ ꞌye-e -yi -mʋ. ꞌLe nɛꞌɛ -gbʋgbʋ ꞌmʋ ɔ-ɔ ꞌye -yi -nɩ mʋ ꞌle ɛ ꞌke ꞌɔ ꞌnynɩ ꞌꞌyiꞌbhɛɛ. Ⅷ Ɛ-bɛ -nɔɔ ꞌmnɛ ti, nyʋ-ʋ -seeꞌa ꞌwɔn ʋn ꞌke -Lagɔ yibo ꞌle -ʋ ꞌꞌsiꞌa ꞌbho -ʋ -seeꞌa ꞌwɔn ʋn ꞌke -aꞌba -Kɔyi Zeziiꞌa ꞌꞌdɩzɩgɩ ꞌwɔɔn, ɔ-ɔ ꞌye -ʋ ꞌkle ꞌye -nɩ -mʋ, Ⅸ ꞌle ɛ ꞌke ʋ ꞌꞌkpi -gwle ꞌꞌkɔgwlɛka. -Ka ɛ-ɛ ꞌyeꞌa ꞌmʋtinɩnɩ mʋ, ꞌkla-a ꞌka-a: -Da -aꞌba -Kɔyi Zezii -nɩꞌa a, ʋn -see ꞌbho tiꞌꞌsi yi ꞌꞌkɔmʋ, ꞌle, -ka ɔ kuꞌa wɔn ꞌle ꞌɔ ꞌnynɩ ꞌbhɛꞌɛ ꞌꞌyi a, ʋn -see ꞌna ꞌye yi ꞌꞌkɔmʋ. Ⅹ Ɩ-bɩ dɩ ꞌmnɩ, -nɔɔ -ke ti ɔ-ɔ ꞌyeꞌa le -yi mʋ a, ꞌbho-o ɩ-ɩ ꞌye -zi -nɩ mʋ. Ɛ-bɛ -nɔɔ ꞌmnɛ ti, ɔ-ɔ ꞌye-e -yi -mʋ, ꞌle, nyʋ-ʋ de ꞌɔ ꞌꞌgwli ꞌle ɔ ꞌye ꞌʋ -kɔ ɔ, ʋn ꞌke ꞌɔ ꞌnynɩ ꞌꞌyiꞌbhɛɛ. A-bee -mnʋʋ, Zeziiꞌa ꞌꞌdɩzɩgɩ -a -zaꞌa amʋ -bodɩ ꞌmʋ a, a ꞌwɔɔn nɩ-ɩꞌa dɩ a, a-a ꞌye ꞌle ꞌwa ꞌꞌklumʋ -nɩ mʋ -lrɛɛ.
Ⅺ ꞌKa-a ɛ -nɩꞌe ꞌmʋꞌa dɩ a, -Lagɔ -a -ke a-a bʋbɔꞌɔ, -a po ꞌɔ wɔn gbo aꞌba dɩ -wlɛɛwlɛɛ. -A bhade ꞌnɔ-ɔ li ꞌle ɔ ꞌke amʋ ꞌmʋ lbhʋ nʋ ꞌꞌkɔmʋ ꞌle aꞌba nʋnʋkpli ꞌke ɔ ꞌtʋ nʋ -ka -zɛgɛka, ꞌle, -ka ɔ ꞌlaꞌa amʋ, a -ke ɔ ꞌke -dalue -nɩ ꞌle ɔ ꞌke amʋ -kɔ ꞌle a ꞌke ꞌɔ ꞌnynɩ ꞌꞌyiꞌbhɛɛ ꞌꞌkɔmʋ, ɔ ꞌke amʋ ꞌꞌyitiwa, a -nmɔꞌɔ-ɔ ꞌna ꞌꞌyiti. -A bhade ꞌnɔ-ɔ li -lrɛɛ, ꞌle ꞌɔ wɔnkuɛ ꞌmʋ ɔ ꞌke amʋ -kpa, ꞌle, lɩzɩgɩ ꞌwee a ꞌybhaꞌa a ꞌke nʋ a, ꞌle lbhʋ a-a nʋꞌa a de ꞌɔ ꞌꞌgwliꞌa dɩ, a ꞌke ɩ nʋ. Ⅻ ꞌKa ꞌmnɔ, ꞌka-a nyʋ-ʋ ꞌye -aꞌba -Kɔyi Zeziiꞌa ꞌnynɩ ꞌꞌyiꞌbhɛɛ mʋ aꞌba dɩ ꞌle ʋn ꞌke aꞌba ꞌnynɩ ꞌꞌyiꞌbhɛɛ ꞌɔ dɩ. -Lagɔ -a -ke a-a bʋbɔꞌɔ -ke -aꞌba -Kɔyi Zezii Kliisɩ, ꞌwa ꞌlimʋ -nmɔ -nɩꞌe-e amʋ ꞌꞌkpi wɔn. ꞌƐ dɩ ɩ-bɩ dɩ ꞌmnɩ ꞌke -nʋ-ɛ.