ꞌPɔlʋꞌa ꞌꞌbɔgʋ ɔ poꞌa GALASIIKƆMƲ -jeyi
Wludie poꞌa nyɔ ꞌꞌbɔgʋ -nɛɛꞌɛ -naagɩ ꞌli.
Galasiibhlʋkpaꞌa nyʋ-ʋ ꞌma-a Zeziiꞌa -nʋ, ꞌɩnnʋ ꞌɔ -dalbhoyi ꞌPɔlʋ poꞌo ꞌꞌbɔgʋ -nɛɛ -jeyi. Ɔ ꞌnʋ-o -kaa, -ɛkedɩmaa, lɩ-ɩ seꞌa ꞌkpʋ ꞌbhle, nyʋtɔlʋ tɔ ꞌnɩ a, ʋn-ʋ ꞌnʋ-o na, ꞌwa ꞌꞌklumʋꞌa nyʋ-ʋ -seꞌa-a ꞌZuifʋ, -ka ꞌZuifʋ-ʋ nʋꞌa ꞌle ꞌwa -Lagɔlbhʋ ꞌli, ꞌka-a ʋn ꞌke nʋ -lrɛɛ ꞌle ʋn ꞌke ꞌpʋn ꞌbho -Lagɔꞌɔ ꞌꞌyigbeyi. Lɛklagba ʋn ꞌka nʋ, ꞌɩnnɛ ꞌmo-o ʋn ꞌke klɛ ꞌmʋ mu. ꞌƐ dɩ ꞌPɔlʋ poꞌo ꞌꞌbɔgʋ -nɛɛ -jeyi ꞌle ɔ-ɔ nʋꞌo ɛ -se -klaa -ko. Nyɔ -yɔ deꞌa -Lagɔ ꞌꞌgwli, ꞌɩnnɔ ꞌpʋnꞌo ꞌbho ꞌɔ ꞌꞌyigbeyi. ꞌƐ ꞌꞌsɛ moꞌo. Nyɔ -yɔ ꞌpɛɛꞌɛ ꞌɔ ꞌꞌbhuoꞌa ꞌmʋtikukuɛ ꞌmʋ ꞌle ɔ ꞌke ꞌpʋn, ɔ -see ꞌpʋn yi. -Lagɔ-ɔ zetieꞌe -amʋ-ɛ ꞌle ɩ ꞌmʋ ꞌle ɔ-ɔ poꞌo -amʋ ꞌꞌyiflɔmʋzɩgɩ.
Ⅰ
Galasiikɔmʋ ꞌPɔlʋ poꞌo ꞌꞌbɔgʋ -jeyi
Ⅰ ꞌƖnmɔ ꞌPɔlʋ ꞌma-a *Zeziiꞌa -dalbhoyi, ꞌɩnmɔ poꞌo amʋ ꞌꞌbɔgʋ -jeyi. -Aꞌba -tɩta, -Lagɔ -zaꞌa *Zezii *Kliisɩ glu ꞌle ꞌmɛmʋꞌa ꞌꞌklumʋ ꞌle ɔ ꞌyeꞌa ti-nɩ -lrɛɛ, ɔ -ke Zeziiꞌa ꞌꞌbhuo-o lbhoꞌo ꞌɩnmʋ ꞌɩn ꞌke lbhʋ ꞌmnɛ nʋ. Ɛ -se nyunyɔ lbho ꞌɩnmʋ -ko ꞌle ɛ -se nyunyɔꞌɔ ꞌnynɩ ꞌɩn ꞌbhle ꞌꞌkpi -ko -lrɛɛ. Ⅱ ꞌƖnmɔ ꞌPɔlʋ -ke ꞌlotʋꞌa ꞌꞌnynuu -ke ꞌɩn -plɛꞌɛ ꞌꞌgwlideɛ -lue ꞌmʋ, -ʋ -ke ꞌɩn -nɩꞌa ꞌnɔɔgbɛ ɛ, -a-bʋ ꞌyeꞌe a-bʋ ꞌlotʋꞌa ꞌꞌnynuu ꞌma-a Zeziiꞌa -glɩgbɩ ꞌwee -nɩꞌa ꞌle Galasiibhlʋkpa ꞌꞌkpi!
Ⅲ -Aꞌba -tɩta -Lagɔ -ke -aꞌba -Kɔyi Zezii Kliisɩ -nɩ ꞌsɔn -wʋnna amʋ ꞌꞌniti ꞌle ʋn ꞌke amʋ -pɔlʋꞌa bhlubhlua ꞌꞌnyɩ! Ⅳ Zezii Kliisɩ ꞌꞌtayiꞌe-e ꞌɔ ꞌꞌbhuo ꞌꞌyiti ɔ ꞌye ꞌmɛ ꞌle ɔ ꞌke -amʋ -aꞌba ꞌꞌnyinynidɩ ꞌꞌkpi -za, ꞌle, ꞌꞌnyinynilɩ -nɩꞌa ꞌnɔɔ ꞌkmʋ mʋ, -ɩ -ke ꞌꞌklumʋ -a -nɩꞌa ꞌtraamʋ, ɔ ꞌke -amʋ ꞌya wɔnkuɛ ꞌꞌkpi -za. ꞌLe -aꞌba -tɩta -Lagɔꞌɔ ꞌgwlʋdɩ ꞌmʋ, ꞌle-e ꞌɛ lɛtu -nʋ-ɛ -nɩꞌo. Ⅴ Nyunyu ꞌbhɛɛ -Lagɔꞌɔ ꞌnynɩ ꞌꞌyi ꞌꞌkɔmʋ, -nɔɔꞌꞌo -nɔɔ ti! *Ɩ -nɩ -kaa ꞌmʋ!
ꞌꞌDɩzɩgɩ -nɩꞌe-e -lue ꞌtɩn
Ⅵ A -gblee, kpli -yɛ a-a nʋꞌa -laa, ɛ ꞌꞌmaaꞌa ꞌɩnmʋ-ɛ, -Lagɔ ꞌlaꞌa amʋ-ɛ ꞌle *Zezii *Kliisɩꞌa ꞌsana ꞌmʋ ɔ ꞌke amʋ -kɔ, ꞌle a-a tbhɛ ꞌnɔ ꞌꞌkpi -susueyi, ꞌle a-a poꞌo nyʋ -lrʋʋꞌa -tɔtɔlɩ -lokui ꞌle a-a ꞌlɩ ꞌɩ ꞌꞌdɩzɩgɩ. Ⅶ ꞌƖn-ɩ ꞌtmʋʋꞌo amʋ-ɛ, ꞌꞌdɩgɩzɩ ꞌɩn -tɔꞌɔ amʋ, ꞌya ꞌꞌsɛ-ɛ moꞌo -ziaka. ꞌꞌDɩ -lrɩɩ-ɩ ꞌka -zɩgɩ ꞌꞌdu, -ɩ ꞌkɩ ɩ ꞌmʋ -zi, ɩ se -nɩ. ꞌƖn-ɩ zɩ ꞌɩ ꞌmʋ-ɛ, -ɛkedɩmaa, nyʋ -lrʋʋ ꞌgble-e aꞌba -pɔlʋ ꞌmʋ ꞌle ʋn ꞌbɔꞌɔ ti, ꞌbho *-Lagɔꞌɔ ꞌBhozayi Zezii Kliisɩꞌa ꞌꞌdɩzɩgɩꞌa damʋ, ʋn ꞌke ɩ ꞌꞌyida ꞌmʋ -za. Ⅷ A ꞌꞌdu aꞌba ꞌꞌbhi ꞌꞌyrili, -bho nyɔ -lrɔɔ yi, ꞌle ɔ ꞌke amʋ -tɔ, -bho ɛ ꞌꞌdu ꞌkɩ -aꞌba ꞌꞌbhi o, ꞌle ɛ ꞌke ꞌkɩ -Lagɔ gboꞌa -dalbhoyiꞌa ꞌꞌbhuo ꞌꞌdu o, lɩ ꞌɩn -tɔꞌɔ amʋ, -bho ɩ -ke ɩ se gʋgɔ ɔ, -Lagɔꞌɔ tutibhlasʋ -nɩ nɔ ꞌꞌkpi! Ⅸ ꞌƖn -zɩ ꞌɩ-ɩ amʋ -bodɩ ꞌmʋ see ꞌle ꞌɩn-ɩ muꞌo ꞌbho le -lrɛɛ ꞌtraamʋ: -Bho nyɔ -tɔ amʋ -tɔtɔlɩ -lrɩɩ, ꞌan -nɩ a ꞌwɔnꞌɔ ꞌbɔ ɔ, -bho ɩ -ke ɩ se gʋgɔ ɔ, -Lagɔꞌɔ tutibhlasʋ -nɩ nɔ ꞌꞌkpi!
Ⅹ -Bho ꞌɩn -zɩ ɩ ꞌmʋ ꞌtraamʋ, nyunyuꞌa ꞌmʋybhɛɛ ꞌɩn-ɩ ꞌbɔꞌɔ tiꞌa? -Gba! -Lagɔꞌɔ -nɛ ꞌɩn-ɩ ꞌbɔꞌɔ ti. Nyunyuꞌa ꞌtʋnʋdɩ ꞌɩn-ɩ ꞌbɔꞌɔ tiꞌa? -Gba! -Lagɔꞌɔ ꞌtʋnʋdɩ ꞌmna-a ꞌbɔꞌɔ ti; ꞌle, -bho ꞌɩn -ka ꞌkɩ nyunyuꞌa ꞌtʋnʋdɩ tiꞌbɔ -bhla a, ꞌɩn se ꞌkɩ ꞌbhɛɛ ꞌɩn ꞌke Zezii Kliisɩꞌa lbhʋnʋyizɛgɛ ꞌꞌdu.
ꞌPɔlʋꞌa -dalbhoyiꞌa ꞌꞌdudua
Ⅺ ꞌAn ꞌlotʋꞌa ꞌꞌnynuu-a, ꞌɩn-ɩ ꞌwɩ -ɩ amʋ ꞌꞌyiti, ꞌle ꞌɩn ꞌbɔꞌɔ ti a ꞌke ɩ yibo, ꞌꞌdɩzɩgɩ ꞌɩn -zaꞌa ꞌmʋ see ꞌle ꞌɩn -nɩꞌa -bhla ꞌꞌkpi a, ɩ -se nyunyuꞌa ꞌlimʋticɛdɩ -ko. Ⅻ *Zezii *Kliisɩꞌa ꞌꞌbhuo-o poꞌo ꞌɛ -naagɩtu ꞌle ꞌan -pɔlʋ ꞌzɔ. Ɛ -se nyɔ -zɩ ɩ ꞌɩnmʋ -bodɩ ꞌmʋ -ko, ꞌle ɛ -se nyɔ -tɔ nɩ ꞌɩnmʋ -ko -lrɛɛ.
ⅩⅢ Ɩ -nɩꞌa -kaa ꞌmʋ, a yiboꞌo-o ꞌan -dedekpli ꞌɩn -nɩꞌa ti ꞌkɩ -tanyɩ, ꞌɩn -nɩꞌe-e *ꞌZuifʋꞌa -Lagɔlbhʋ ꞌli ꞌle ꞌɩn-ɩ klaꞌa Zeziiꞌa -glɩgbawɔnyiꞌa nyʋ nyanɩ ꞌmʋ tenyɩ, ꞌle, lɩ ʋn deꞌa ꞌꞌgwli, ꞌɩn ꞌbɔꞌɔ ti ꞌɩn ꞌke ʋ ɩ -pɔlʋ ꞌꞌyi -za. ⅩⅣ ꞌƖn -nɩꞌa -kaa ꞌle ꞌZuifʋꞌa -Lagɔlbhʋ ꞌli a, ꞌɩn -boyreetɩ -ke ꞌɩn ꞌbhɛɛꞌɛ ꞌmʋ ꞌle ʋn -ke ꞌɩn -plɛꞌɛ lbhʋ -lue ꞌmnɛ ꞌmʋ, ꞌɩn -zi nʋ-oꞌo ꞌwee. ꞌBho ꞌɛ ꞌꞌkpi a, ꞌɩnmɔ -smuaꞌa ꞌmʋti tenyɩ, -ɔ -deꞌe ꞌle -aꞌba ꞌꞌna ꞌꞌweꞌa kpli ꞌli ti.
ⅩⅤ A -gblee, ɛ -nɩꞌa -kaa ꞌmʋ a, ꞌle -Lagɔ -mnɔɔꞌɔ ꞌsana ꞌmʋ ɔ ꞌlaꞌa ꞌɩnmʋ-ɛ ꞌɩn ꞌke ꞌɔ lbhʋ nʋ. ꞌƐ dɩ, ꞌɩn -see -bhla ꞌwlʋ ke see, ɔ ꞌye ꞌɩnmʋ ꞌbho -za. ⅩⅥ ꞌLe, -nɔɔ-ɔ nʋꞌa -Lagɔ ꞌtʋ, ɔ ꞌꞌduꞌa see ꞌle ɔ ꞌke ꞌɩnmʋ ꞌɔ ꞌꞌyu ꞌꞌyi-tɔ, ɛ nyniꞌa a, ɔ -tɔ ꞌnɔ ꞌɩnmʋ ꞌꞌyi ꞌle ꞌɩn ꞌye ɔ yibo. ꞌBho ꞌmnɔ, ꞌbho-o ɔ -za -nɩꞌe ꞌɔ ꞌꞌkpidɩ -druku ꞌꞌyrili, ɔ ꞌye ɩ ꞌɩnmʋ -tɔ, ꞌle, nyʋ -lrʋʋ -seꞌa-a ꞌZuifʋ, ꞌɩn ꞌke ʋ ꞌɔ ꞌꞌkpidɩzɩgɩ -bodɩ ꞌmʋ-za. Ɛ ziꞌa -kaa a, ꞌɩn -see nyɔ gbo mu, ꞌle ɔ ꞌke ꞌɩnmʋ ꞌbho Zeziiꞌa damʋ ꞌꞌdɩ ꞌmʋ-ʋ ꞌꞌdu. ⅩⅦ ꞌƖn -see Zelizalɛɛmʋ mu -lrɛɛ, ꞌle, nyʋ-ʋ ꞌꞌduꞌa *Zeziiꞌa -dalbhomʋ -tanyɩ ꞌan damʋ, ꞌɩn ꞌke ʋ ꞌye. ꞌƖn -sɔꞌɔ ꞌmʋ -nalo, ꞌɩn ꞌkpa-a Alabiibhlʋkpa ꞌꞌkpiꞌa -jeyi. ꞌƖn nyniꞌa ꞌle a, ꞌle ꞌɩn ꞌye Damaasɩgwlɔ ꞌmʋ le yi. ⅩⅧ -Zʋɩn tan zi -kpayɩ-ɔ ꞌle ꞌɩn ꞌye Zelizalɛɛmʋ mu, ꞌle ꞌɩn -ke *ꞌPiɛlɩ ꞌke yibo -yibo. ꞌƖn -ke ɔ ꞌnʋ-o ꞌbho ꞌwɩ -bue ꞌwɩ -muu ꞌꞌklenyɩ! ⅩⅨ ꞌƖn -see Zeziiꞌa -dalbhomʋ -lrʋʋ ꞌye, -bho ɛ -se Zaakɩ ꞌma-a -aꞌba -Kɔyi Zeziiꞌa leyi. ⅩⅩ A -gblee, dɩ ꞌɩn-ɩ zaꞌa -laa ꞌmʋ, -Lagɔꞌɔ ꞌꞌyigbeyi ꞌɩn-ɩ za nɩ ꞌnɩ ꞌmʋ. -Ziadɩ moꞌo, ꞌɩn -see sɩn cɛ.
ⅩⅪ Ɩ ziꞌa -kaa a, ꞌɩn -sɔꞌɔ ꞌmʋ-ɛ ꞌɩn ꞌye Silii -ke Silisiibhlʋkpa ꞌꞌkpi mu. ⅩⅫ ꞌLe Zideebhlʋkpa ꞌꞌkpiꞌa Zeziiꞌa -glɩgbɩwɔnyiꞌa nyʋ -see -bhla ꞌɩnmʋ ꞌꞌyri ꞌmʋ ꞌye ke tukutuku. ⅩⅩⅢ ꞌAn ꞌꞌdɩfɔfʋꞌa ꞌꞌsɛ ʋn-ʋ ꞌwɔnꞌɔ ꞌbɔ, nyʋ na: Nyɔ-ɔ kla ꞌka -amʋ nyanɩ ꞌmʋ -bɛnyɩ, ɔ ꞌbhɔ-ɔ -kaaꞌa dɩ. ꞌTraamʋ ꞌtɔ ɔ, Zeziiꞌa ꞌꞌdɩzɩgɩ -ke dɩ ɔ ꞌbɔ ꞌka ti, nyʋ-ʋ deꞌa Zezii ꞌꞌgwli, ɔ ꞌke ʋ ɩ -pɔlʋ ꞌꞌyi -za a, ꞌɩnnɩ ꞌɔ ꞌꞌbhuo-o tɔꞌɔ nyʋ. ⅩⅩⅣ A -gblee, ʋn ꞌwɔnꞌɔ ꞌya ꞌꞌdɩtu ꞌmnɩ ꞌbɔ ɔ, ʋn-ʋ ꞌbhɛɛ-ɛ -Lagɔꞌɔ ꞌnynɩ ꞌꞌyi ꞌan dɩ.