Ⅰ *Zezii -ke *ꞌɔ -namʋ cɛꞌɛ ꞌbho ꞌꞌdie a, ꞌle ɔ na: A -gblee, tu ʋn-ʋ ꞌlaꞌa lezɛɛn, -ɛ -ke ꞌꞌbhi nyʋ-ʋ nʋꞌa duvɛɛn ꞌmʋ, ꞌɩn kɔɔꞌɔ-ɔ ꞌɛ tuzɛgɛ. ꞌAn -tɩta -Lagɔ kɔɔꞌɔ-ɔ ꞌya -kpaaꞌa lbhʋnʋyi. Ⅱ ꞌAn nyʋ -ke ꞌɩn-ɩ naꞌa a, ʋn kɔɔꞌɔ-ɔ ꞌɛ ꞌꞌklei. A ꞌye li-ɔ, ꞌya -yɩꞌa -troꞌa a, -kpaa ꞌmnɛꞌɛ lbhʋnʋyi-i cɩ ɩꞌo, ꞌle, -yɩ troꞌa, ꞌya ꞌꞌbhi ꞌke -antanyɩnɩ ꞌmʋ-ziꞌa dɩ, ɔ-ɔ zɩ ꞌɩ bhubhuyitiꞌa ꞌꞌklei li. Ⅲ A-bʋ -yʋʋ, dɩ ꞌɩn -zaꞌa amʋ -bodɩ ꞌmʋꞌa dɩ, a kɔɔꞌɔ ꞌꞌklei -yɩ nyɔ -zaꞌa ꞌya -lrɩɩ ꞌꞌtroli. Ⅳ ꞌƐ dɩ a, -ka ꞌɩn -ke a ꞌꞌsisriꞌa ꞌꞌyi, a ꞌꞌdu -kaa ꞌꞌyrili ꞌꞌkɔmʋ! -Bho a nʋ -kaa a, ꞌɩn-ɩ ꞌye-e aꞌba ꞌꞌtroli -nɩ -mʋ ꞌꞌkɔmʋ. A -gblee, -ka tuꞌa ꞌꞌkleiꞌa ꞌꞌsɛ seꞌa ꞌbhɛɛ, -bho ɩ -ke ꞌya tu se ꞌꞌyiꞌꞌsisri, ꞌle ɩ ꞌke ꞌꞌbhi po a, -bho ꞌɩn -ke a se ꞌꞌyiꞌꞌsisri, -ka -lue ꞌmnʋ ꞌka-a, a se ꞌbhɛɛ a ꞌke ꞌan ꞌgwlʋdɩ nʋ.

Ⅴ ꞌƖn-ɩ ꞌtmʋʋꞌo amʋ-ɛ, ꞌɩn kɔɔꞌɔ-ɔ lezɛɛntu ꞌle abʋ kɔɔꞌɔ ꞌɛ ꞌꞌklei. Nyɔ -ke ꞌɩn ꞌꞌsisriꞌa ꞌꞌyi a, ꞌɔ nyɔtu kɔɔꞌɔ-ɔ ꞌꞌklei -ɩ troꞌa ꞌꞌbhiꞌa -dadudu. A ꞌye li-ɔ, -bho ꞌɩn -ke a se ꞌꞌyiꞌꞌsisri, a se ꞌbhɛɛ a ꞌke ꞌan ꞌgwlʋdɩ nʋ. Ⅵ Nyɔ -ke ꞌɩn seꞌa ꞌꞌyiꞌꞌsisri a, ɔ kɔɔꞌɔ-ɔ tuꞌa ꞌꞌklei nyɔ-ɔ poꞌa ti. -Bho ɩ -po-ɛ ti a, ɩ-ɩ yɛ-oꞌo, ꞌle nyʋ-ʋ po ꞌɩ -zrʋʋ ꞌmʋ, ʋn-ʋ po ꞌɩ ꞌꞌyri ꞌle ɩ-ɩ sinꞌo. Ⅶ Ɛ -nɩꞌa -kaa ꞌmʋ a, -bho a se -aꞌba ꞌꞌyisriidɩ ꞌbhɔ ɔ, ꞌle a se ꞌan wluꞌa ꞌbhodudɩ ꞌbhɔ -lrɛɛ, lɛꞌꞌo lɛ a ꞌbɔꞌɔ ti, a ꞌybhaa nɛ ꞌɩnmʋ ꞌle ꞌɩn ꞌke ɛ amʋ ꞌꞌnyɩ. Ⅷ -Bho a nʋ -kaa a, a kɔɔꞌɔ-ɔ tuꞌa ꞌꞌklei -ɩ troꞌa ꞌꞌbhiꞌa -dadudu, ꞌle, -ka ꞌɩn -ke a-a naꞌa a, nyʋ ꞌke ɩ yibo, ꞌle ꞌan -tɩta -Lagɔꞌɔ ꞌnynɩ ꞌke ꞌꞌyiꞌbhɛ.

Ⅸ A -gblee, -ka ɔ -kmaꞌa ꞌan dɩ a, ꞌka-a ꞌɩn -kmaꞌa aꞌba dɩ -lrɛɛ. ꞌƐ dɩ a ꞌbhle -aꞌba ꞌꞌyisisriɛ kwa ꞌꞌkɔmʋkɔmʋ, ꞌle a ꞌke ꞌan dɩkmɛɛ ꞌmnɛ ꞌmʋ ti-de. Ⅹ -Ka ꞌɩn-ɩ nʋꞌa ꞌan -tɩtaꞌa ꞌgwlʋdɩ, ꞌle ꞌɩn -ke ɔ ꞌyeꞌa ꞌꞌyiꞌꞌsisri, ꞌle ꞌɩn ꞌke ꞌɔ dɩkmɛɛ ꞌmnɛ ꞌmʋ ti-de, -ka -lue ꞌmnɔ, ꞌka-a, -bho a nʋ ꞌan ꞌgwlʋdɩ -lrɛɛ, ꞌle a se -aꞌba ꞌꞌyisriidɩ ꞌbhɔ, ꞌle a ꞌke ꞌan dɩkmɛɛ ꞌmnɛ ꞌmʋ ti-de.

Ⅺ Ɩ-bɩ dɩ ꞌmnɩ, ꞌɩn-ɩ ꞌzɩ -ɩ amʋ -bodɩ ꞌmʋ, ꞌle, -ka ꞌbʋbʋa-a ꞌlbhaꞌa ꞌɩnmʋ, ɛ ꞌke -kaa a-bee -mnʋʋ ꞌlbha, ꞌle ɛ ꞌke amʋ ꞌmʋ ꞌꞌyi tenyɩ.

Ⅻ Lɛ ꞌɩn ꞌybhaꞌa a ꞌke nʋ a, ꞌɩnnɛ ꞌka-a: -Ka ꞌɩn -kmaꞌa aꞌba dɩ, a kɩkma -kɩkma -kaa dɩ! ⅩⅢ A ꞌye li-ɔ, -bho nyɔ ꞌwɔɔn ɔ ꞌke ꞌmɛ ꞌɔ bhaꞌa dɩ, ɔ -kmaꞌa-a ꞌɔ dɩ tenyɩ. Lɛ-ɛ ꞌka ꞌꞌyiꞌbhɛ, -ɛ ꞌka ɛ-bɛ dɩkmɛɛ ꞌmnɛꞌɛ lɛtu ꞌmʋ-zi, ɛ se -nɩ. ⅩⅣ A-bʋ -yʋʋ, -bho a nʋ ꞌan ꞌgwlʋdɩ, a-a ꞌmo-o ꞌan bha ꞌꞌwe. ⅩⅤ A -gblee, lɩ ꞌan -tɩta -Lagɔ -tɔꞌɔ ꞌɩnmʋ, ꞌɩn-ɩ zɩ -ɩ amʋ -bodɩ ꞌmʋ. ꞌƐ dɩ ꞌɩn-ɩ ꞌlaꞌa amʋ ꞌan bha ꞌꞌwe. Ɛ -nɩꞌa -kaa ꞌmʋ a, lɛ lbhʋnʋmʋꞌa -kɔyi-i nʋꞌa, ꞌɔ ꞌtmʋʋ nʋ ꞌɛ ꞌzɔ. ꞌƐ dɩ ꞌɩn -see ꞌtɔ amʋ ꞌan lbhʋnʋmʋ ꞌla yi. ⅩⅥ Abʋ -see ꞌbho ꞌɩnmʋ -za, ꞌɩn -ke a ꞌke -na. -Gba! ꞌƖnmɔ nʋ ɛꞌo ꞌle a ꞌke mu ꞌle a ꞌke kplizɩgɩꞌa -dadudu nʋ ꞌꞌkɔmʋkɔmʋ ꞌle nyʋ ꞌke ɩ liꞌye. -Bho ꞌɩn -ke a ꞌꞌsisri ꞌꞌyi a, lɛꞌꞌo lɛ a-a ꞌyeꞌa ꞌan -tɩta ꞌybhaa mʋ ꞌle ꞌan ꞌnynɩ ꞌmʋ, ɔ-ɔ ꞌꞌnyɩ ꞌɛ amʋ-ɛ. ⅩⅦ A ꞌye li-ɔ, lɛ ꞌɩn-ɩ ꞌtmʋʋꞌa amʋ a ꞌka nʋ a, ꞌɩnnɛ ꞌmo-o, a kɩkma -kɩkma dɩ!

ⅩⅧ A po -lokui -lrɛɛ, ꞌkmʋ ꞌmʋꞌa nyʋ-ʋ seꞌa -Lagɔ yibo, -bho ʋn ꞌnyɛ amʋ ꞌmʋ, a popo ꞌgwlʋti na, ꞌɩnmɔ ʋn ꞌnyaaꞌa ꞌmʋ-ɔ, ꞌle ɛ ꞌye amʋ ꞌꞌkpi bhla. ⅩⅨ Ʋ-bʋ nyʋ ꞌmnʋ, -bho aꞌba kpli -ke ꞌwa nɩ gʋgɔ ꞌkɩ ꞌꞌyiti a, ʋn-ʋ kma ꞌko-o aꞌba dɩ, -ɛkedɩmaa, nyɔ -lue a ꞌꞌduꞌo. A -gblee, aꞌba kpli -ke ꞌwa nɩ se ꞌtɔ ꞌꞌyitigʋgɔ, -ɛkedɩmaa, ꞌle ꞌwa ꞌꞌklumʋ ꞌɩn -zaꞌa amʋ ꞌle ꞌɩn -ke a-a naꞌo. ꞌƖnnɛ ꞌbhleꞌe ꞌnynɩꞌa dɩ, ʋn-ʋ ꞌnyɛꞌɛ amʋ ꞌmʋ. ⅩⅩ Wlu ꞌɩn -zaꞌa amʋ -bodɩ ꞌmʋ, a popo nɛ ꞌgwlʋti! ꞌƖn na: Nyɔꞌɔ lbhʋnʋyi se ꞌꞌyiꞌbhɛ ɔ se ꞌɔ -kɔyi -zi. Nyʋ-ʋ ꞌkla-a ꞌɩnmʋ nyanɩ ꞌmʋ, ꞌɛ dɩ ʋn-ʋ ꞌye a-bee -mnʋʋ nyanɩ ꞌmʋ -kla mʋ -lrɛɛ, ꞌle ꞌwa -dadudu -see ꞌan -tɔtɔlɩ -lokuipo. ꞌƐ dɩ ʋn -see aꞌba nɩ -lokui-po yi -lrɛɛ.

ⅩⅪ A ꞌye li-ɔ, ꞌan nyʋ a ꞌꞌduꞌa dɩ ʋn-ʋ ꞌye lɩ ꞌmnɩꞌa ꞌwee amʋ ꞌꞌlruli-nʋ mʋ, -ɛkedɩmaa, -Lagɔ lbhoꞌa ꞌɩnmʋ, ʋn se ɔ yibo. ⅩⅫ -Bho ꞌɩn se ꞌkɩ ꞌnɔɔ ꞌkmʋ ꞌmʋ yi, ꞌle ꞌɩn ꞌke ʋ ꞌan ꞌꞌkpidɩ -bodɩ ꞌmʋ-za a, ꞌwa ꞌꞌnyinynidɩ -see ꞌkɩ ꞌꞌyi-kmu yi ꞌbho -Lagɔꞌɔ ꞌꞌyigbeyi. ꞌTraamʋ ꞌtɔ ɔ, -bho ʋn se kpli ꞌꞌyizizia, ɔ -see ꞌya dɩ ꞌbhɔ yi. ⅩⅩⅢ Nyɔ -yɔ ꞌnyɛꞌɛ ꞌɩnmʋ ꞌmʋ a, ꞌan -tɩta -Lagɔ ɔ ꞌnyɛꞌɛ ꞌmʋ -lrɛɛ. ⅩⅩⅣ *Wɔnkulɩ nyɔ -seeꞌa nʋ ke, -bho ꞌɩn -see ɩ ꞌkɩ ꞌnɔɔ ꞌwa ꞌꞌklumʋ nʋ a, ꞌwa ꞌꞌnyinynidɩ -see ꞌkɩ ꞌꞌyi-kmu yi ꞌbho -Lagɔꞌɔ ꞌꞌyigbeyi. A ꞌye li-ɔ, ꞌɩn -nɩ ꞌɩ nʋnamʋ, ʋn ꞌye -ɩ li. Ɛ -nɩꞌa -kaa ꞌmʋ a, ʋn ꞌnyɛ-ɛ ꞌɩn -ke ꞌan -tɩta ꞌmʋ. ⅩⅩⅤ A -gblee, wlu-u ꞌcnɩ-ɛꞌɛ ꞌle -Lagɔbɔgʋ ꞌli, ɛ na: ꞌAn ꞌmʋnyɛɛɛ se ꞌꞌlru -ke -gbɔtʋ ꞌbhle. Ɩ-bɩ dɩ ꞌmnɩ -nʋ-ɛꞌɛ ɛ, ꞌle ꞌɛ wlutuꞌa ꞌꞌyriꞌa ꞌbɩ ꞌye ꞌwlʋ.

ⅩⅩⅥ A ꞌye li-ɔ, aꞌba -kpayi-i ꞌye-e -yi -mʋ. ꞌAn -tɩta *-Lagɔꞌɔ Lisaazuzu zaꞌa -ziadɩ ꞌmʋ, ꞌɩnnɔ moꞌo. ꞌAn -tɩta ꞌmnɔꞌɔ ꞌnynɩ ꞌmʋ ꞌɩn-ɩ ꞌye ɔ amʋ -jeyi -po mʋ, ꞌle ɔ ꞌke amʋ ꞌan ꞌꞌkpidɩ -bodɩ ꞌmʋ-za. ⅩⅩⅦ A-bee -mnʋʋ-ʋ ꞌye-e ꞌan dɩ nyʋ -bodɩ ꞌmʋ-za -mʋ -lrɛɛ, -ɛkedɩmaa, ꞌan lbhʋꞌa wɔndunamʋ, ꞌbho-o ꞌɩn -ke a -zaꞌa -nanaa.