Ⅰ Ɩ ziꞌa -kaa a, *Zezii na *ꞌɔ -namʋ -ke nyʋ-ʋ po ꞌɔ -lokui -bodɩ: Ⅱ *-Lagɔꞌɔ gbayibomʋ -ke *Faliziɛɛn-ɛ ꞌmo-o *gba -Lagɔ ꞌꞌnyɩꞌa *Moyiizɩꞌa gbɔzɩzamʋ. Ⅲ Lɩ ʋn-ʋ tɔꞌɔ amʋ, a ꞌꞌdu ɩ ꞌbho a ꞌke ɩ nʋ. A ꞌꞌdu aꞌba ꞌꞌbhi ꞌꞌyrili! Ʋ-bʋ nyʋ ꞌmnʋ, lɩ wa-a tɔꞌɔ, ꞌwa -de nɩ ꞌmʋ ti. ꞌWa kpli ʋn-ʋ nʋꞌa a, aꞌba -gbʋ nɩ ya, aꞌba nʋ ɩ -le! Ⅳ Wɔnkugbɩ ʋn-ʋ poꞌo nyʋ. ꞌLe ꞌwa ꞌꞌbhiꞌa ꞌbɔ ti ʋn ꞌke ɩ ꞌmʋ ti-de ꞌle ʋn ꞌke ʋ ꞌle ꞌɛ -lue ꞌtɩn ꞌmʋ -kpa -nɩ ꞌle ʋn ꞌke ɩ ꞌꞌyi-kpʋn -lrɛɛ. Ⅴ Ʋn-ʋ ꞌnʋ-o lɛꞌꞌo lɛ-ɛ ꞌkʋ ʋ ꞌꞌyrili-ya. Lɩtɔlʋ ʋn-ʋ nʋꞌa, ꞌɩnnɩ ꞌka-a: -Bɔtɔ -ke ꞌlimʋ -Lagɔwludidi -nɩꞌa ʋn-ʋ poꞌa sʋ ꞌmʋ -ke ꞌꞌyigbeyi ti, ʋn-ʋ ꞌbhɛɛ ꞌnɩ-ɩ ꞌꞌyi. ꞌLe ʋn-ʋ tɛꞌɛ ꞌwa -vilɔbanɩꞌa wɔndrɩꞌa -wlawlɩ ti ꞌle ʋ-beeꞌa nɩ -ke nyʋ -lrʋʋꞌa nɩ -kaa gʋgɔ ꞌle nyʋ ꞌke ʋ ꞌyra. Ⅵ -Bho nyʋklɩgbɩ ꞌꞌdu gɔ ɔ, ꞌle ʋn ꞌke ʋ ꞌla a, ʋn ꞌybha-oꞌo ʋn ꞌke ꞌnynɩbhlekpi ꞌꞌkpi -de, ꞌle *-Lagɔwluꞌa ꞌlicɩaanbudu ꞌli ʋn ꞌybha-oꞌo ʋn ꞌke kpizɩgɩ ꞌꞌkpi -de ꞌle nyʋ ꞌke ʋ ꞌyra -lrɛɛ. Ⅶ -Bho -die -gwɛ ꞌle ʋn ꞌybha-oꞌo nyʋ ꞌke ʋ ꞌbho ꞌꞌdu ʋn -ke ʋn ꞌke ꞌyɩye ꞌle ʋn ꞌke ʋ ꞌwa -tɔmʋklɩgbɩ ꞌla.

Ⅷ A-bʋ -yʋʋ, aꞌba ꞌbɔ -klagba ti -le ꞌle nyʋ -kaa amʋ ꞌwa -tɔmʋklɩgbɩ ꞌla! -Ka a -dieꞌa ꞌmʋ a-a ꞌmo-o ꞌlotʋꞌa ꞌꞌnynuu, aꞌba -tɔyiklagba -nɩꞌe-e -lue ꞌtɩn. ꞌƖnnɔ ꞌmo-o -Lagɔꞌɔ ꞌBhozayi -ɔ ꞌpʋʋnꞌa nyʋ. Ⅸ ꞌNɔɔgbɛ ꞌbhlʋkpa ꞌꞌkpi nyʋ-ʋ ꞌbɔꞌɔ ti ʋn ꞌke -tɩtaꞌa ꞌnynɩ ꞌbhle ꞌle nyʋ ꞌke ʋ ꞌyra ʋn ꞌke ʋ ꞌbho ꞌꞌdu, ꞌwa nyunyɔtu -ke nyɔꞌꞌo nyɔ, aꞌba ꞌlaa nʋ ꞌmʋ -le! Aꞌba -tɩta -nɩꞌe-e -lue ꞌtɩn, ꞌɩnnɔ ꞌmo-o -Lagɔ -nɩꞌa ꞌle yaku ꞌli. Ⅹ Aꞌba ꞌbɔ -klagba ti -le, ꞌle nyʋ -kaa amʋ ꞌwa -klagba ꞌla. -Lagɔꞌɔ ꞌBhozayi -ɔ ꞌpʋʋnꞌa nyʋ -nɩꞌe-e -lue ꞌtɩn, ꞌɩnnɔ ꞌmo-o aꞌba -klagba. Ⅺ A -gblee, nyɔ-ɔ ꞌbɔꞌɔ ti ꞌle aꞌba ꞌꞌklumʋ ɔ ꞌke -klagba ꞌꞌdu, ɔ -ya ꞌɔ ꞌꞌbhuo ya ꞌle ɔ ꞌke aꞌba ꞌweeꞌa lbhʋnʋyi ꞌꞌdu! Ⅻ Nyɔ-ɔ ꞌbhɛɛꞌɛ ꞌɔ ꞌꞌbhuo ꞌꞌyi, -Lagɔ-ɔ ꞌyɔ -ɔ ꞌzɔ, nyɔ -yɔ yaꞌa ꞌɔ ꞌꞌbhuo ya, -Lagɔ-ɔ ꞌbhɛɛ ꞌnɔ-ɔ ꞌꞌyi.

ⅩⅢ *Zezii poꞌa wlu ꞌmnɛ ti a, ɔ na: A-bʋ *-Lagɔꞌɔ gbayibomʋ -ke *Faliziɛɛn, a-a ꞌmo-o -mɩɛ ꞌsɔn wɔn ꞌmʋ ꞌbhlemʋ, -ɛkedɩmaa, -ka a-a ꞌlɛꞌɛ, aꞌba nʋ -kaa. -Yeee! Ngazedɩ! Abʋ -see tiꞌbɔ -Lagɔ ꞌke amʋ -kɔ, ꞌle, nyʋ-ʋ ꞌbɔꞌɔ ti -Lagɔ ꞌke ʋ -kɔ, a-bʋ ka ꞌnʋ -budu le. ꞌƐ dɩ, a-a ꞌye ꞌkle ꞌye mʋ tenyɩ. [ ⅩⅣ A-bʋ -Lagɔꞌɔ gbayibomʋ -ke Faliziɛɛn, a-a ꞌmo-o -mɩɛ ꞌsɔnꞌɔ ꞌbhlemʋ. -Bho a -ka *-Lagɔ wɔn gbo-o po, nyʋ ꞌke amʋ ꞌbho ꞌꞌduꞌa dɩ, ꞌka-a a ꞌbhle ɛꞌo kplokplo! A-a ꞌnʋ-o -bhla -kaa, ꞌle a-a ꞌlbhaꞌa -dɩgbanynʋkpakpɩ ꞌꞌyrabha ꞌmʋ, a-a zʋ ꞌʋ lɩ ꞌwee kwa ꞌmʋ. -Yeee! Ngazedɩ! ꞌKla ꞌmnɔꞌɔ dɩ, -Lagɔ-ɔ ꞌye amʋ -zigle -tu mʋ tenyɩ.]

ⅩⅤ -Lagɔꞌɔ gbayibomʋ -ke Faliziɛɛn, a-a ꞌmo-o -mɩɛ ꞌsɔnꞌɔ ꞌbhlemʋ. -Ka a-a ꞌlɛꞌɛ, aꞌba -na -kaa. ꞌNɔɔ ꞌbhlʋkpa ꞌꞌkpi a-a ꞌmu-o -da ꞌwee ꞌle a-a ꞌyeꞌe -pɔlʋꞌa ꞌꞌyitibhitiyi -lue a -ke ɔ -naꞌo. -Yeee! Ngazedɩ! -Bho a ꞌye ɔ -kaa, ꞌle ꞌɔ ꞌmʋtiyɛɛɛ ꞌmʋ, ꞌꞌkɔgwlɛnɛ -ke ꞌmʋ aꞌba ꞌꞌbhi ꞌka mu, ꞌle-e a-a ꞌꞌnyɩnyɩɛ ꞌnɔ ti. ꞌƐ dɩ a-a ꞌye ꞌkle ꞌye mʋ tenyɩ.

ⅩⅥ A-bʋ ꞌma-a -naagɩꞌa ꞌꞌyisumʋ -ʋ poꞌa nyʋ ꞌꞌyisrɛɛjolʋ gbo, -yeee! Ngazedɩ! A-a ꞌgbʋ-o nyʋ ꞌꞌyrili na, -bho nyɔ -zrɛ -nɩ *-Lagɔꞌɔ bʋbɔbhlegboꞌa lisaabudu ꞌmʋ, ꞌɔ wlu -see ꞌꞌyitiꞌꞌsi. -Bho ɛ ꞌꞌdu -budu ꞌmnɛꞌɛ sanu, ꞌꞌlemnɩɩ ɛ ꞌꞌsi-e ꞌꞌyiti. ꞌƐ dɩ a-a ꞌye ꞌkle ꞌye mʋ tenyɩ. ⅩⅦ -Naagɩꞌa ꞌꞌyisumʋ-a, a-bʋ seꞌa -naagɩ ꞌbhle a, -Lagɔꞌɔ bʋbɔbhlegboꞌa lisaabuduꞌa damʋ sanu nyɔ-ɔ ꞌꞌnyɩꞌa -Lagɔ ꞌꞌdu-o lɛ. ꞌƐ dɩ ꞌbho ꞌya ꞌꞌklumʋ yɛɛ ꞌꞌyri kpʋnꞌo tiꞌa? Sanu-ae -ale -Lagɔꞌɔ bʋbɔbhlegboꞌa lisaabudu? ⅩⅧ ꞌLe a-a nʋꞌo -lrɛɛ: -Gbagbʋ -ke ꞌꞌkpi ʋn-ʋ za nɩꞌa -Lagɔꞌɔ *ꞌsraga, -bho nyɔ -zrɛ -nɩ nɛ ꞌmʋ, ꞌɔ wlu -see ꞌꞌyitiꞌꞌsi, ꞌle ɔ ꞌke ꞌsraganmi ꞌmʋ -zrɛ -nɩ a, ꞌɔ wlu ꞌꞌsi-e ꞌꞌyiti. ⅩⅨ -Naagɩꞌa ꞌꞌyisumʋ-a! ꞌSragagbagbʋꞌa damʋ, nmi nyɔ-ɔ ꞌꞌnyɩꞌa -Lagɔ ꞌꞌdu-o lɛ. ꞌƐ dɩ ꞌbho ꞌya ꞌꞌklumʋ yɛɛ ꞌꞌyri kpʋnꞌo tiꞌa? ꞌsraganmi-ae -ale ꞌsragagbagbʋ? ⅩⅩ Nyɔ -yɔ -zrɛ -nɩꞌa ꞌsragagbagbʋ ꞌmʋ, ɔ-ɔ zrɛ ꞌnɩ-e lɛꞌꞌo lɛ-ɛ -nɩꞌa ꞌbho ꞌɛ ꞌꞌkpi ꞌmʋ -lrɛɛ. ⅩⅪ Nyɔ -yɔ -zrɛ -nɩꞌa -Lagɔꞌɔ bʋbɔbhlegboꞌa lisaabudu ꞌmʋ, ɔ-ɔ zrɛ nɩꞌe -Lagɔ -nɩꞌa ꞌle ꞌɛ ꞌlimʋ ꞌmʋ-ɛ -lrɛɛ. ⅩⅫ Nyɔ -yɔ -zrɛ -nɩꞌa yaku ꞌmʋ, ɔ-ɔ zrɛ ꞌnɩ-e -Lagɔꞌɔ -dena ꞌmʋ -da ɔ -kɔꞌɔ ɔ, ꞌle ɔ ꞌꞌsiꞌe ꞌbho, -Lagɔ -kɔꞌɔ ꞌbho, ꞌɩnnɔ ɔ-ɔ zrɛ nɩꞌe ꞌmʋ -lrɛɛ.

ⅩⅩⅢ A-bʋ -Lagɔꞌɔ gbayibomʋ -ke Faliziɛɛn, a-a ꞌmo-o -mɩɛ ꞌsɔnꞌɔ ꞌbhlemʋ. -Yeee! Ngazedɩ! Aꞌba -kpɩɩ ꞌmʋꞌa -lololɩ -srɩɩnꞌa -buenɛ, a-bʋ ꞌbhɛɛꞌɛ ꞌya -Lagɔꞌɔ ꞌꞌnyɩnyɩa, ꞌle, *gba -Lagɔ ꞌꞌnyɩꞌa *Moyiizɩ, ꞌya -tɔtɔlɩzɩgɩ -nɩɩ: ꞌꞌyisrɛɛdɩ-e ngazebhleɛɛ -ke ꞌmʋtiyɛɛɛ, a-a kpʋn ꞌnɩ ꞌplʋ. ꞌƐ dɩ a-a ꞌye ꞌkle ꞌye mʋ tenyɩ. ⅩⅩⅣ -Naagɩꞌa ꞌꞌyisumʋ-a, a-bʋ poꞌa nyʋ ꞌꞌyisrɛɛjolʋ gbo, a-bʋ kukuꞌa ꞌmʋti ꞌbho lɩtoopeꞌa damʋ ꞌle a-a kpʋn nɩꞌe lɩzɩgɩ ꞌplʋ.

ⅩⅩⅤ A-bʋ -Lagɔꞌɔ gbayibomʋ -ke Faliziɛɛn, a-a ꞌmo-o -mɩɛ ꞌsɔnꞌɔ ꞌbhlemʋ. -Ka aꞌba gba ꞌlɛꞌɛ, ꞌka-a a-a wɔtɔꞌɔ aꞌba ꞌꞌkɔpɩ -ke aꞌba ꞌꞌbe li. -Yeee! Ngazedɩ! -Ɛkedɩmaa, ꞌꞌyriyrinaagɩ -ke ꞌꞌnyinyninaagɩ -lrɩɩ-ɩ ꞌꞌtuuꞌa amʋ -ɩ -ke ꞌmʋ a-a zi nɩꞌa ꞌle a-a ꞌyeꞌa nmɔ-e lililɩ, ꞌɩnnɩ a-a kpʋnꞌo ꞌplʋ. ꞌƐ dɩ a-a ꞌye ꞌkle ꞌye mʋ tenyɩ. ⅩⅩⅥ Faliziɛɛn -ke -naagɩ ꞌꞌlɔꞌɔ, a zi ɩ-bɩ ꞌꞌnyinynidɩ ꞌmnɩꞌa dɩ ꞌbho -Lagɔꞌɔ ꞌꞌyigbeyi -tanyɩ ꞌle -Lagɔ ꞌke ꞌya dɩ ꞌbhɔ ꞌle aꞌba kpli ꞌke ꞌꞌyiꞌsrɛɛ.

ⅩⅩⅦ A-bʋ -Lagɔꞌɔ gbayibomʋ -ke Faliziɛɛn, a-a ꞌmo-o -mɩɛ ꞌsɔnꞌɔ ꞌbhlemʋ. -Yeee! Ngazedɩ! A kɔɔꞌɔ-ɔ tritrizokoeplu. ꞌYa ꞌꞌkpi -nmɔꞌɔ-ɔ ꞌꞌyrili ꞌle ꞌya ꞌlimʋ ꞌzɔnꞌo -plɔnkɩn, ꞌle ꞌꞌkuꞌa ꞌkpɩ ꞌwlaꞌa ꞌle ti. ꞌƐ dɩ a-a ꞌye ꞌkle ꞌye mʋ tenyɩ. ⅩⅩⅧ -Ka -lue ꞌmnɔ, ꞌbho ꞌꞌkpiti a ꞌꞌdu-o -zɩgɩ ꞌbho nyʋꞌa ꞌꞌyigbeyi, ꞌle aꞌba ꞌlimʋ ꞌꞌyrabha -ke ꞌꞌnyinynidɩ -lrɩɩ ꞌꞌyiꞌe ꞌle.

ⅩⅩⅨ A -gblee, *Zezii ꞌlʋ -ʋ -kaa ꞌꞌyi -lrɛɛ: -Yeee! Ngazedɩ! A-bʋ *-Lagɔꞌɔ gbayibomʋ -ke *Faliziɛɛn, a-a ꞌmo-o -mɩɛ ꞌsɔn wɔn ꞌmʋ ꞌbhlemʋ. A -nmɔꞌɔ-ɔ -Lagɔꞌɔ wluꞌa ꞌmʋtizamʋ -ke ꞌꞌyisrɛɛmʋ -lrʋʋꞌa zokoe kwa ꞌmʋ ti. ⅩⅩⅩ ꞌLe a-a nʋꞌo: -Bho -abʋ -nɩ ꞌkɩ ti -aꞌba ꞌꞌnaꞌa -nɔɔ ꞌꞌyi a, -abʋ -ke ʋn -see ꞌkɩ -naagɩ -lue ꞌmʋ-plɛ yi -a ꞌke -Lagɔꞌɔ wluꞌa ꞌmʋtizamʋ ꞌlbha ʋn ꞌke ꞌmɛ. ⅩⅩⅪ Ɩ -nɩꞌa -kaa ꞌmʋ a, nyʋ-ʋ ꞌlbhaꞌa -Lagɔꞌɔ wluꞌa ꞌmʋtizamʋ ʋn ꞌyeꞌa ꞌmɛ, -ka a ꞌꞌduꞌa ka ꞌwa ꞌꞌnynuuꞌa ꞌꞌnynuu, aꞌba ꞌꞌbhiꞌa wlu ꞌlɛꞌɛ ꞌna. ⅩⅩⅫ ꞌMna yiboꞌo-o, lɛ aꞌba ꞌꞌna ꞌꞌwe nʋꞌa ꞌbho, a -see ꞌɛ dɩ ꞌbhɔ yi! ꞌƐ dɩ a-a ꞌye ꞌkle ꞌye mʋ tenyɩ. ⅩⅩⅩⅢ ꞌꞌYrabhabhlemʋ-a! -Zigle -ɛ ꞌyeꞌa amʋ -kpʋn mʋ ꞌle a ꞌke ꞌꞌkɔgwlɛkle ꞌye, koo a ꞌke ɛ wɔn ꞌmʋ cɛꞌɛ? ⅩⅩⅩⅣ ꞌƐ dɩ, a po -lokui! -Lagɔꞌɔ wluꞌa ꞌmʋtizamʋ-e nyʋ -Lagɔ ꞌꞌnyɩꞌa ꞌꞌyisrɛɛnaagɩ -ke -Lagɔꞌɔ wluꞌa yibomʋ, ꞌɩn-ɩ ꞌye -ʋ amʋ -jeyi -po -mʋ ꞌle a ꞌke tɔlʋ ꞌlbha ʋn ꞌke ꞌmɛ, ꞌle a ꞌke -lrʋʋ ꞌbho nyʋyrilbhaatu ꞌꞌyri kɔ ꞌle a ꞌke -lrʋʋ ꞌle aꞌba *-Lagɔwluꞌa ꞌlicɩaanbidi ꞌli ꞌꞌsɛɛn -nɩ, ꞌle, -yʋ -sieꞌa ꞌbho -ʋ ꞌyeꞌa -ple mʋ, a ꞌke ʋ kli ple ꞌle gwlɛ ꞌꞌkpi ti -lue -lue. ⅩⅩⅩⅤ-ⅩⅩⅩⅥ Nyʋ-ʋ -seeꞌa ꞌꞌnyinynidɩ nʋ aꞌba ꞌꞌna ꞌlbhaꞌa ꞌbho ʋn ꞌyeꞌa ꞌmɛ, ʋn -dieꞌe-e ꞌꞌyi. Ɛ ꞌnyaaꞌa-a ꞌbho ꞌꞌyisrɛɛyi *Abɛlɩꞌa ꞌꞌkpi, ꞌle, Balakiiꞌa ꞌꞌyu, Zakalii a ꞌlbhaꞌa see ꞌbho *-Lagɔꞌɔ bʋbɔbhlegboꞌa *ꞌsragagbagbʋ -ke ꞌɛ lisaabuduꞌa gwia ꞌmʋ, ɔ ꞌyeꞌa ꞌmɛ, ɛ ꞌye ɔ -yɛ. A-a ꞌye-e -Lagɔꞌɔ nyʋ nyanɩ ꞌmʋ -kla -mʋ -lrɛɛꞌɛ dɩ, -ziadɩ ꞌɩn-ɩ zaꞌa amʋ -bodɩ ꞌmʋ, ʋ-bʋ nyʋ ꞌmnʋ ꞌwee aꞌba ꞌꞌna ꞌlbhaꞌa ꞌbho ʋn ꞌyeꞌa ꞌmɛꞌɛ dɩ, ꞌkleyeɛɛꞌɛ -belu -Lagɔ-ɔ ꞌyeꞌa -ya mʋ, a-bʋ ꞌtraamʋꞌa nyʋ ɛ-ɛ ꞌye ꞌꞌkpitiꞌga mʋ!

ⅩⅩⅩⅦ *Zezii poꞌa wlu ꞌmnɛ ti a, ɔ na: Zelizalɛɛmʋkɔmʋ-a, Zelizalɛɛmʋkɔmʋ-a! -Lagɔꞌɔ wluꞌa ꞌmʋtizamʋ ɔ poꞌa amʋ -jeyi, a-bʋ ꞌlbhʋ -ʋꞌo ʋn ꞌye ꞌmɛ. A -gblee, -ka -gbanynɔsʋʋn ꞌkɩkleꞌa ꞌɛ ꞌꞌyreetɩ ꞌꞌlruli ꞌbho ꞌɛ -kpakpɩ ꞌzɔ, -ka -lue ꞌmnɔ ꞌka-a ꞌɩn ꞌbɔꞌɔ ti sese ꞌɩn ꞌke amʋ ꞌꞌlruliꞌkɩkle ꞌbho ꞌan ꞌꞌtroli ꞌɩn -ke a ꞌke -na ꞌle aꞌba ꞌwɔnꞌo! ⅩⅩⅩⅧ ꞌƐ dɩ ꞌtraamʋ ꞌtɔ ꞌɩn-ɩ ꞌwlʋ-o amʋ ꞌꞌyrili. A -gblee, wlu -Lagɔꞌɔ wluꞌa ꞌmʋtizayi *Ezayii -za ꞌka ꞌmʋ see, ꞌɛ ꞌꞌyriꞌa ꞌbɩꞌa ꞌwlʋwlʋnɔɔ ꞌꞌkɔɔꞌɔ-ɔ gbo. Ɔ na Zelizalɛɛmʋgwlɔ-ɔ ꞌye-e ti-sɔ -mʋ ꞌle ɛ ꞌke wɔn -zɛ. ⅩⅩⅩⅨ ꞌƖn-ɩ ꞌwɩ -ɩ amʋ ꞌꞌyiti, -ɛ ꞌwlʋꞌa -laa, a -see ꞌɩnmʋ ꞌye yi kplokplo, ꞌle, -nɔɔ -ke ꞌli a-a ꞌyeꞌa -nʋ mʋ, na: *-Lagɔꞌɔ ꞌBhozayi -ɔ ꞌpʋʋnꞌa nyʋ, ꞌɩnnɔ -nɩꞌe yinamʋ, -Lagɔ -wʋnna nɔ ꞌꞌniti ɔ! ɛ ꞌke ɛ ꞌꞌkpi bhla.