Ⅰ ꞌƖnnɛ ꞌbhleꞌe ꞌnynɩꞌa dɩ a, ꞌan dɩkmalotʋꞌa ꞌꞌnynuu-a, a-bʋ -ke ꞌtʋ-ʋ ꞌlbhaꞌa ꞌɩnmʋ tenyɩ ꞌle ꞌan -pɔlʋ-ʋ ꞌwlaꞌa ꞌꞌyiti ꞌɩn ꞌke ꞌye a, -ziadɩ moꞌo, aꞌba dɩ-ɩ ꞌlbhaaꞌa ꞌɩnmʋ ꞌbʋbʋa ꞌꞌyi. A-beeꞌa dɩ ꞌɩn ꞌke ꞌnynɩ ꞌwlʋ -lrɛɛ. ꞌƐ dɩ a, ꞌan dɩkmalotʋꞌa ꞌꞌnynuu-a, a kuku ꞌmʋti ꞌle a -ke -aꞌba -Kɔyi *Zezii ꞌke ꞌꞌyiꞌꞌsisri -ka -zɛgɛka ꞌꞌkɔmʋ!

Ⅱ ꞌLe -aꞌba ꞌlotʋꞌa ꞌꞌnynuunynʋkpakpɩ -bodɩ a, Evodii -ke Sɛntisɩ ꞌbhleꞌa jɛjɛɛ ꞌnynɩmʋ, ꞌɩn-ɩ bhade ꞌnʋ-ʋ li tenyɩ ʋn -ybhɛ! -Aꞌba -Kɔyi Zeziiꞌa nyʋ ʋn ꞌꞌduꞌo. Ⅲ ꞌLe -mnaaaꞌa ꞌꞌbhuo -lrɛɛ, Sisigɩ, -ɩnmɔ -ke ꞌɩn -naꞌa tenyɩ, ꞌmna-a ꞌpo-o -ɩnmʋ ꞌsrʋ: Ʋ-bʋ ꞌnynʋkpakpɩ ꞌmnʋ, pa ꞌwa dɩ ꞌmʋ ꞌle ʋn ꞌke -ybhɛ! -Gblee, ʋn -nɩ ꞌsɔn, Klemaa ꞌkpʋ ꞌʋ ꞌꞌkpi, ʋn -ke nyʋ -lrʋʋ -ke ꞌɩn nʋꞌa -Lagɔlbhʋ, ꞌwa ꞌwee, ꞌmʋtikukuɛ ꞌmʋ ʋn -kpaꞌa ꞌɩnmʋ ꞌle -a ꞌye Zeziiꞌa ꞌꞌdɩzɩgɩ kpa. -Lagɔꞌɔ ꞌꞌbɔgʋ -ke ꞌli, nyʋ-ʋ -nɩꞌa ti ꞌbho ꞌɔ ꞌꞌyigbeyi, ꞌwa ꞌnynɩ-ɩ ꞌcnɩ-ɛꞌɛ, nyʋ ꞌwee ꞌmnʋꞌa ꞌnynɩ, ꞌle-e ɩ ꞌcnɩ-ɛꞌo.

Ⅳ -Ka a -ke -aꞌba -Kɔyi Zezii ꞌꞌsisriꞌa ꞌꞌyi, a li ꞌna ꞌɛ ꞌbʋbʋa ꞌꞌkɔmʋ! ꞌƖn-ɩ ꞌmu-o ꞌbho le, ꞌɩn na: A li ꞌbʋbʋa ꞌꞌkɔmʋ! Ⅴ A ꞌꞌdu nyʋ-ʋ -nmɔꞌɔ kpli ꞌmʋ ꞌle nyʋ ꞌwee ꞌke ꞌna liꞌye. A -gblee, -aꞌba -Kɔyi ꞌmnɔꞌɔ leyinɔɔ ꞌꞌkɔɔꞌɔ-ɔ gbo. Ⅵ ꞌƖnnɛɛnɛꞌɛ dɩ a, -bho koo dɩ bhla amʋ ꞌꞌkpi, nymɔꞌɔ ꞌꞌsi amʋ ꞌgwlʋ -le! ꞌLe ɩ-bɩ lɩ ꞌwee ꞌmnɩ ꞌmʋ, a po *-Lagɔ wɔn gbo ꞌꞌkɔmʋ! ꞌLe, -bho a -kɔ ɔ-ɔ libhade, a po ɔ ꞌsɛɛ -lrɛɛ! Ⅶ -Bho a nʋ -kaa, -pɔlʋꞌa bhlubhlua-a ꞌwlʋꞌa -Lagɔ ꞌmʋ, ꞌle a ꞌke ɛ ꞌye. Ɛ-bɛ -pɔlʋꞌa bhlubhlua ꞌmnɛ, lɛ nyɔ ꞌkɛ ɛ likpʋkpa -nɩ, ɛ se -nɩ. Ɛ-ɛ ꞌpɩple-e nyʋ ꞌweeꞌa -naagɩ ꞌꞌkpi. Ɛ -nɩꞌe-e -kaa, ꞌle, a-bʋ -ke Zezii *Kliisɩ ꞌꞌsisriꞌa ꞌꞌyi, ɛ ꞌke aꞌba -pɔlʋ gbo ꞌꞌyi.

Ⅷ ꞌLotʋꞌa ꞌꞌnynuu-a, lɛ ꞌɩn ꞌka amʋ ꞌtmʋʋ a, ꞌɩn na, lɩ -ke dɩ a ꞌka zi, ꞌɩnnɩ ꞌka-a: Lɩ-ɩ ꞌma-a -ziadɩ, -ɩ -ke dɩlɩkpʋɛn-ɛ naꞌa a, -ɩ ꞌsrɛɛꞌɛ ꞌꞌyi, -ɩ -nmɔꞌɔ ꞌꞌyrili, -yɩ, -bho a nʋ a, ꞌle nyʋ -seeꞌa ꞌbho aꞌba da ꞌꞌdu yi, ꞌle -ɩ -seeꞌa aꞌba ꞌnynɩ wɔn-nyni yi, ꞌɩnnɩ ꞌmo-o, lɛꞌꞌo lɛ-ɛ ꞌma-a -zɛgɛ, -ɩ -nmɔꞌɔ ꞌꞌyrili tenyɩ. ꞌYa dɩ a ꞌke zi ꞌle a ꞌke ɩ nʋ. Ⅸ A ꞌye li-ɔ, -Lagɔꞌɔ wlu ꞌɩn -tɔꞌɔ amʋ, a ꞌwɔɔnꞌɔ, a ꞌꞌdu ɩ ꞌbho, ꞌle, -ka ɩ ꞌlɛꞌɛ, a ꞌke -kaa -na! ꞌƖnnɛ ꞌmo-o, -ka ꞌmna-aꞌa ꞌꞌbhuo-o ꞌꞌdu ꞌɩ ꞌbho, ꞌle a ꞌye ꞌɩ ꞌbʋꞌwɔn ɔ, ꞌya kpli a ꞌyeꞌa ꞌɩnmʋ li, a nʋ ɩ! -Bho a nʋ -kaa a, -Lagɔ ꞌꞌnyɩꞌa nyʋ -pɔlʋꞌa bhlubhlua, ꞌle ɔ ꞌke amʋ gbo -sie ꞌꞌkɔmʋ.

Ⅹ A -gblee, ꞌɩn -ke -aꞌba -Kɔyi *Zezii ꞌꞌsisriꞌe-e ꞌꞌyiꞌa dɩ ꞌbʋbʋa ꞌlbhaꞌa ꞌɩnmʋ tenyɩ. ꞌLe ɛ -se bhebhe ɛ -nɩ -kaa -ko, ꞌle, -ka a kukuꞌa ꞌmʋti ꞌle a ꞌyeꞌa ꞌtɔ ꞌan dɩ ꞌgwlʋtipopo -lrɛɛ, ꞌle a ꞌyeꞌa ꞌɩnmʋ ꞌjɛmɔni -ya ꞌle ꞌɔ ꞌnynɩ ꞌmʋ, ꞌɛ dɩ moꞌo. ꞌLe ꞌɩn yiboꞌo na a ꞌbɔ ꞌko-o ti see a ꞌke ɛ nʋ, ꞌle, -ka a ꞌkɛ ɛ -nyna, a se -ka ꞌbhle. Ⅺ -Bho ꞌɩn ꞌlɛ -kaa a, ɛ -se lɛ ꞌɩn seꞌa ꞌbhle, ꞌɛ ꞌtʋ-ʋ ꞌlbhaꞌa ꞌɩnmʋ, ꞌɛ dɩ -ko. A -gblee, ꞌbho ꞌmna-aꞌa damʋ, -ka -aꞌba -Kɔyi -tɔꞌɔ ꞌɩnmʋ, ꞌka-a ꞌka-a: -Bho koo ɛ -nɩ ꞌmʋ, lɛ ɔ ꞌka ꞌɩnmʋ ꞌꞌnyɩ, -bho koo ɛ -die ꞌmʋ, ɛ-ɛ ꞌnyni-e ꞌɩnmʋ ꞌꞌyi. Ⅻ -Bho ꞌꞌpʋanꞌa ꞌꞌbhuo ꞌlbha ꞌɩnmʋ, -ka ꞌɩn ꞌka nʋ a, ꞌɩn yiboꞌo-o ꞌna. ꞌLe, -bho ɛ se ꞌɩnmʋ ꞌlbhanamʋ -nɩ, -ka ꞌɩn ꞌka nʋ a, ꞌɩn yiboꞌo-o ꞌna -lrɛɛ. -Bho koo ɛ -nɩ ꞌmʋ, -bho ꞌɩn ꞌye lililɛ o, -bho ꞌɩn se ɛ ꞌye o, -bho ꞌɩn ꞌye lɩꞌa -dadudu o, -bho ꞌɩn -see lɛ ꞌye o, -Lagɔ -tɔꞌɔ ꞌna ꞌɩnmʋ-ɛꞌɛ dɩ, ꞌan -pɔlʋ bhluꞌo ꞌle ꞌya ꞌwee ꞌmʋ. ⅩⅢ A -gblee, Zezii Kliisɩ ꞌꞌnyɩꞌe ꞌɩnmʋ ꞌmʋtikukuɛ, ꞌɩnnɔ nʋ ɛꞌo ꞌle ꞌɩn ꞌke ɩ-bɩ sɩasɩaalɩ ꞌwee wɔnyiꞌbhɛɛ ꞌɩn ꞌke ɩ ꞌꞌkpi ꞌya. ⅩⅣ Ɛ -nɩꞌa -kaa ꞌmʋ a, ꞌle ꞌan sɩasɩaa ꞌmʋ, -ka a -seeꞌa ꞌɩnmʋ ꞌꞌyriti-po ꞌle a ꞌyeꞌa ꞌɩnmʋ -kpa a, lɛzɛgɛ a nʋꞌo.

ⅩⅤ Filiipʋkɔmʋ-a, aꞌba ꞌꞌbhi yiboꞌo-o na, -da a kpaꞌa Zeziiꞌa -jeyi -lreeka, -da ꞌɩn ꞌwlʋꞌa ꞌle aꞌba ꞌfɔ gbo Masedʋanɩbhlʋkpa ꞌꞌkpi ꞌle ꞌɩn ꞌke -Lagɔꞌɔ ꞌꞌdɩzɩgɩ kpa a, -gwlɔ -lrɛɛ ꞌmʋꞌa Zeziiꞌa -glɩgbawɔnyiꞌa nyʋ-ʋ ꞌka ꞌɩnmʋ ꞌjɛmɔni ꞌꞌnyɩ, ꞌwa nyɔ se -nɩ, -bho ɛ -se -yɩ aꞌba ꞌꞌsɛ ꞌꞌnyɩꞌa ꞌɩnmʋ, ꞌɩnnɩ ꞌɩn ꞌyeꞌe. ⅩⅥ ꞌLe, ꞌɩn ꞌwlʋꞌa ꞌle a ꞌꞌbhlifɔ gbo, ɛ seꞌa ꞌmʋ-gwle ke a, ꞌle ꞌɩn -nɩꞌa -bhla Tesalonikɩgwlɔ ꞌmʋ a, mɔniꞌa dɩ ꞌꞌsriꞌa ꞌɩnmʋ ꞌꞌyi, kpɛ ꞌsɔn ꞌꞌbhuoka a -po -nɩꞌe ꞌɩnmʋ ꞌjɛmɔni -jeyi ꞌɩn ꞌke li. ⅩⅦ A -gblee, ɛ -se -zɩgɩ -yɩ a nʋꞌa ꞌɩnmʋ ꞌꞌlruliꞌa ꞌtʋ-ʋ -zi ꞌɩnmʋ -ko. Aꞌba ꞌꞌbhiꞌa dɩ ꞌɩn-ɩ ziꞌo. ꞌƖn ꞌybha-oꞌo a -ke Zezii ꞌke -na ꞌꞌkɔmʋ, -zɩgɩ ɔ ꞌybhaꞌa, ꞌle a ꞌke ɩ nʋ. ꞌLe, -bho a nʋ -kaa, -Lagɔ ꞌke amʋ ꞌꞌniti-wʋnna ꞌꞌkɔmʋ. ⅩⅧ A ꞌye li-ɔ, aꞌba ꞌjɛmɔni-i ꞌbhɔɔꞌɔ gbɔ ꞌmʋ a poꞌa ꞌɩnmʋ -jeyi, ꞌɩn ꞌye -ɩꞌo -lrɛɛ. Ɩ -dieꞌe-e ꞌꞌyi tenyɩ, ɩ ꞌnyni-e ꞌɩnmʋ ꞌꞌyi -ka -zɛgɛka. Epafloditɩ -ke ɩ yiꞌa, ꞌya dɩ ꞌɩn ꞌbhleꞌe ꞌtɔ lɛ kwa ꞌmʋ. ꞌLe, ɩbɩ ꞌmnɩ a ꞌꞌnyɩ -nɩꞌa ꞌɩnmʋ ꞌle -pɔlʋzɛgɛ ꞌmʋ, ɩ kɔɔꞌɔ -Lagɔꞌɔ *ꞌsragalɩ -ɩ poꞌa ngnɛzɛgɛ. ꞌƐ ꞌzɔ ꞌmo-o, ꞌjɛmɔni ꞌmnɩ, -Lagɔ a ꞌꞌnyɩ ɩꞌo. ꞌLe, lɩ ꞌwee a-a ꞌꞌnyɩꞌa -Lagɔ, ɩ-ɩ nʋ ꞌɔ ꞌtʋ. ⅩⅨ ꞌKa-a a nʋꞌo ꞌɩnmʋ -zɛgɛ -bodɩ. -Aꞌba -tɩta -Lagɔ -ke lbhʋ ꞌɩn-ɩ nʋꞌa a, ꞌɩnnɔ ꞌbhɛꞌɛ ꞌꞌyi ꞌle ɔ -kɔꞌɔ lɩ ꞌweeꞌa dɩ, ɔbɔ ꞌmnɔ, ꞌɩnnɔ ꞌye amʋ -kpa mʋ -lrɛɛ, ꞌle, lɩ-ɩ ꞌꞌsriꞌa amʋ ꞌꞌyi, ɔ ꞌke ɩ amʋ -bodɩ nʋ ꞌwee. Lɩ ɔ-ɔ ꞌꞌnyɩꞌa -amʋ -aꞌba Zezii *Kliisɩꞌa ꞌꞌgwlidekamʋ, ꞌɩnnɩ ꞌɩn-ɩ ꞌꞌsiꞌe ꞌnynɩ. ⅩⅩ ꞌKa-a ɛ -nɩꞌe ꞌmʋꞌa dɩ a, ꞌɔ ꞌnynɩ ꞌbhɛ ꞌꞌyi ꞌꞌkɔmʋkɔmʋ ꞌle -nɔɔꞌꞌo -nɔɔ ꞌli! *Ɛ -nɩ -kaa ꞌmʋ!

ⅩⅪ ꞌLotʋꞌa ꞌꞌnynuu-a, ꞌleꞌa Zezii Kliisɩꞌa nyʋ ꞌwee, ꞌɩnmɔ ꞌye ꞌʋ! ꞌLotʋꞌa ꞌꞌnynuu -nɩꞌa ꞌnɔɔ ꞌan ꞌꞌtroli na, ʋ-bʋ ꞌye ꞌʋ -lrɛɛ! ⅩⅫ ꞌLe ꞌɔ -nʋ -ke ꞌɩn -nɩꞌa ꞌnɔɔ, -ʋ nʋꞌa ꞌbhlʋkpayowliklagbaꞌa lbhʋ, ʋn -ke ꞌɔ nyʋ -lrʋʋ-ʋ -nɩꞌa ꞌnɔɔ, ʋn na ʋ-bʋ ꞌyeꞌe amʋ -lrɛɛ!

ⅩⅩⅢ -Aꞌba -Kɔyi Zezii Kliisɩ ꞌmnɔ -wʋnna amʋ ꞌꞌniti!