Lihamba lya 1 Akaakolinto
1 Akaakolinto
Ulongohi
Lihamba lya 1 Akaakolinto likityekwa na Nndumila Paulo mu ngungwa ya hamsini na nhano mbole ya kubhelekwa kwa Kilisito, kipalamande 1:1. Ali ndo lihamba lya ulongohi nkati ya mahamba mabhili ghatubheghite nagho ghene Paulo kakiatyekela kimati kya bhandu bhaanhyubhalilite Kilisito lya akwo Kolinto. Pangi yinguhwachilwa kakiyandika lihamba ali pakatamiteghe ku Efeso, yikali na ningo yake ya kutyangila akwo ku pakapitila akwo ku Makedonia, kipalamande 16:5-9.
Lihamba ali ndo luyango lwa malagho ghene Paulo kakikingama kuhuma kwa amoo bha kuhuma mu ngwemuko ya bhandu bhaanhyubhalilite Kilisito ya kya milando ghaabwitukilite, handa bhandu kubhaghulana na utyahe papamu na ungongola. Kitami kya Kolinto kikimanyikwa muno kwa utyahe ghwake, kya habhu yingukangahya ng'obhe kukita kimati kya bhandu bha anhyubhalilite Kilisito lya akwo bhakilihanga mu milando ayi. Ubhwabhu abhu 1 Akaakolinto libhegha na hipalamande ihwadali hya mapalo, Kipalamande kya 13.
Ghaabheghite
Paulo kanguajambuha Akaakolinto na kunnumba Chapanga kwakya bhombe, kipalamande kya 1:1-9.
Mbole kangulubhulilila malagho ghakakingamite yakya mmaghulano mu kimati kya ku Kolinto, kipalamande kya 1:10—4:21.
Mbole kangulubhulilila milando ya utyahe na ungongola na kuyeghana mu mabalasa, kipalamande kya 5-6.
Mbole ya agho Paulo kanguapegha malaghilo yakya kutolana, kutendekeha nyambi ya ming'omong'omo, matundamilo gha pakindandabhanji, hupo hya Nhuki na uhyuko, kipalamande kya 7-15.
Kuuhiko kanguyomolela kulubhulila milando yiinoghwa kutenda na milando ya mundu yumu mwene, kipalamande kya 16.
1
1 Nenga Paulo, nungemitwe kwa mapalo gha Chapanga meghe nndumila ywa Kilisito Yesu. Lihamba ali tutyeka nenga na nnongo ghwetu Sosene.
2 Tungubhatyekela mwenga mummeghite ngwemuko ya bhandu bhaanhyubhalila Kilisito bha akwo ku Kolinto. Mwenga ntendwa bhandu ang'anyimo mu kulilunga na Kilisito Yesu, na mmeghe bhandu bha Chapanga papamu na bhandu bhoha bha kwohele bhanakuntundamila Bambo ghwetu Kilisito Yesu, ywene ndo Bambo ghwabhe na ghwa twenga bhubho.
3 Nungubhayupila umaha na uhihimilo kuhuma kwa Chapanga Tate ghwetu na Bambo ghwetu Yesu Kilisito.
Paulo kangunnumba Chapanga
4 Nungunnumba Chapanga manjubha ghoha kwa kya mwenga kwa umaha ghwake ghumpeghitwe mu Kilisito Yesu. 5 Mana, kwa kulungana kwenu na Kilisito, Chapanga kabhapegha kila kilibhi kimukipala, na hinu munguhotola kulongela kila kilibhi kimukipala kulongela na kumanya kila kilibhi kyakakipala Chapanga mukimanye, 6 kiyaha milando ayi yingulaha kukita Nhalo ghwa Yesu Kilisito ghutuulandamahite kwa mwenga ndo ghwa hoto, 7 kya habhu, mpelelwa ng'obhe na lilumbo lyohele lya nhuki pammegha mukunnindila kwa uhongo, kubhuya kwake Bambo ghwetu Yesu Kilisito. 8 Ywombe katabhatenda mmeghe nglii mbaka ku uhiko, ngati nkotoke kubhegha na mahokelo mu linjubha lila lya kubhuya Bambo ghwetu Yesu Kilisito. 9 Chapanga kaatenda agho kiyaha ywombe ndo nhyubhaliko, ywombe ndo ywakabhakemite ngati nhotole kulilunga na Mwana ghwake Yesu Kilisito, Bambo gwetu.
Nng'abhaniko mu ngwemuko lya Chapanga.
10 Maalongo bhangu, nunguasigha kwa makakala gha Bambo ghwetu Yesu Kilisito, nningane mwenga mabhoha kwa mahwacho ghenu, ngati nnyitikilane mu ghala ghamughalongela, na kukita mmeghe papamu telatela kwa mahwacho ghamu na ningo yimu. 11 Maalongo bhangu, ng'ombelwa mihalo na amoo bhandu kuhuma kulubhagha lwa Kuloe, kukita ghabhegha malimbano munkati yenu. 12 Bhang'ombela habhu, kila yumu munkati yenu kangulongela ghake mwene, yumu kangulongela! “Nenga ndo ghwa Paulo.” Na yungi, “Nenga ndo ghwa Apolo.” Na yungi, “Nenga ndo ghwa Petili.” Na yungi, “Nenga ndo ghwa Kilisito.” 13 Bhuli, Kilisito kaghabhanika? Bhuli, Paulo ndo ywakabhambitwe mu lupingika kwa kya mwenga? Ebu bhuli, mukibatiswa kwa lihina lya Paulo?
14 Nungunnumba Chapanga kukita nikimbatisa ng'obhe mundu ywoheli mu mwenga, ngati nga Kilisipo na Gayo ghweka chabhe. 15 Kabhone mundu ywakahotola kulongela kukita kabatiswa kwa lihina lyangu. 16 Ehee, kangi nikinbatisa Stefano papamu na bhandu bha kulubhagha lwake, peni kuchweha kwa agho, manya chepa kukita nikinbatisa mundu yungi ywohele. 17 Mana Kilisito kakinaghila ng'obhe batise, ngati nandamihe Nhalo ghwa Maha, na chepa kwa kutumila malagho gha malango gha bhandu gha kunyegheleha, ngati kiho kya Kilisito mu lupingika kikotoke kuyuyuka makakala ghake.
Kilisito ndo makakala na malango gha Chapanga
18 Mana lilagho lya kya kiho kya Kilisito mulupingika ndo nnando ghwa ubhughabhugha kwa bhala bhabheghite mu njila ya kuhobha, peni kwa twenga tuubheghite mu njila ya ulopohi, lilagho alyo ndo makakala gha Chapanga. 19 Malembo gha Chapanga ghangulongela,
“Ndaghatindingana malango ghabhe bhaabheghite na malango,
na ndaabhoneha mahwacho gha malango gha bhaabheghite na kisomo ndaghatakulila kutali.”
20 Hinu, kabhegha kwoki yuna malango? Kabhegha kwoki nhunda ghwa Malaghilo? Naywo kabhegha kwoki yunamitaho ywa manjubha agha? Chapanga kaghatenda malango gha nnima aghu kubhegha ubhughabhugha.
21 Kwa malango ghake Chapanga, bhandu bhanguhotola ng'obhe kummanya Chapanga kupitila malango ghabhe bhene, peni Chapanga kapala kubhalopoha bhala bhanakuhyubhalila kukindila bhala bhaabheghite na malango, bhangubhona ndo ubhughabhugha lilagho litulilandamiha. 22 Akaayahudi bhangupala naho ya kubhona ngati ahyubhalile, na Akaayunani bhangupalaha malango ngati ahyubhalile. 23 Peni twenga tungunnandamiha Kilisito ywakabhambitwe mulupingika, nnando aghu kwa Akaayahudi kinguayaghabhiha, na kwa bhandu bhaabheghite ng'obhe Ayahudi ndo ubhughabhugha. 24 Peni kwa bhala bhayitikilitwe, abheghe Ayahudi, ebu bhandu bhaabheghite ng'obhe Ayahudi, Kilisito ndo makakala gha Chapanga na malango gha Chapanga. 25 Mana kiibhonekana ubhughabhugha ghwa Chapanga, kibhegha na malango kuchweha malango gha anabhandu, na uyoyoho ghwa Chapanga ghubhegha na makakala kuchweha kwa anabhandu.
26 Maalongo bhangu, nkulungwe nndaluko pala Chapanga pakankemite. Atangalo nkati ya mwenga bhakibhegha bhangubhonekana handa bhangali malango muulongolo ghwa bhandu, na atangalo mukibhegha ng'obhe na mahina makulu, na mukibhelekwa ng'obhe mu bhandu hinala. 27 Peni Chapanga kakiyihaghula milando yene bhandu bhanguyibhona ya kibhughabhugha, ngati kabhapeghe honi bhaabheghite na malango, kangi Chapanga kakiyihaghula milando yene bhandu bhanguyibhona hiyoyoho, ngati kabhapeghe honi bhaabheghite na makakala. 28 Kangi Chapanga kakihihaghula hilibhi hyene bhandu bhanguhibhona ndo himbenju na hinakupughanwa, hilibhi hyene bhandu bhanguhibhona hyangali kunoghwa, ngati kahikanjaghane hila hiibheghite. 29 Chapanga kakitenda habhu ngati mundu kakotoke kuhotola kuliloka muulongolo ghwake. 30 Chapanga ndo ywakaalungite mwenga na Kilisito Yesu. Chapanga kantenda Kilisito kabheghe malango ghetu, kwa njila yake twenga tunguyitikilwa na Chapanga, na ndo tungubhegha bhandu bhake Chapanga na kukomboleghwa. 31 Hino, handa paghalongela Malembo gha Chapanga, “Ywakapala kuliloka, na kaliloke kwa lihengo lyakalitendite Bambo.”