1 Maalongo bhangu, nkulungwe kukita bhala bhaalongohitwe na Musa bhakibhegha mukukingikihwa pahi ya lila lihundi, na bhoha bhakiyomboka maha mu lihibha. 2 Paalongohitwe na lila lihundi na kupita pakati ya lihibha, bhakibhegha abatiswa ngati abheghe afwaasi bha Musa. 3 Bhoha bhakilyegha mulyo ghulaghula ghuhumite kwa Chapanganhuki, 4 na bhoha bhakinywegha bhubho kinywegho kila kila kihumite kwa Chapanga. Kiyaha bhakinywegha kuhuma mu lila litalabha lya kinhuki lilongohanite na bhombe, na litalabha alyo kakibhegha ndo Kilisito. 5 Hata habhu, bhandu atangalo bhakinnogheha ng'obhe Chapanga, na Chapanga kakianjaghana na mitumba yabhe yikitapakala kukibhala.

6 Hinu, milando ayi ndo nhwano kwa twenga, yingutukinya twenga tukotoke kupala kutenda uhokelo handa paatendite bhombe. 7 Nkotoke kutundamila ming'omong'omo, handa pabhabheghite amoo bhabhe, handa paghatyekitwe Malembo gha Chapanga, “Bhandu bhakitama pahi bhakilyegha na kunywegha, mbole bhakiyima na kukina nginilo ya honi.” 8 Nkotoke kutenda utyahe handa pabhatendite amoo bhabhe, mbaka bhakihwegha bhandu elufu ishilini na ndatu kwa linjubha limu. 9 Bhubho tukotoke kunng'eha Bambo, handa pabhatendite amoo bhabhe, bhakihwegha kwa kulumwa na mayoka. 10 Bhubho nkotoke kung'ung'ulika handa paang'ung'ulikite amoo bhabhe, bhakikanjaghanwa na Lihoka ywa kiho ywa Chapanga.

11 Milando yoha ayi yikiatula bhombe ngati yibheghe nhwano kwa bhangi, na yikityekwa ngati kutukinya twenga tunakutama mu nndaluko ghwa kuuhiko.

12 Ywakahwacha kukita kayima ngangalima mu uhyubhalilo kalindakile ngati kakotoke kughwegha. 13 Mang'eha ghantutitwe ndo ghala gha bhwakabhwaka kwa anabhandu. Chapanga ndo nhyubhaliko, katabhaleka ng'obhe nng'ehwe kupitingana makakala ghenu. Peni pang'ehwa katabhapegha njila kulimbilila na ya kubhuka.

14 Kya habhu, maaghanja bhangu, nneke kuyitundamila ming'omong'omo. 15 Nungulongela na mwenga bhandu mummeghite na malango, nhwache maha mabhene agha ghanughalongela. 16 Patunnumba Chapanga kwa nnobho ghula ghwa nonelo, bhuli, tungulihanga ng'obhe na mwahi ghwa Kilisito? Patulyegha lingati, bhuli, tungulihanga ng'obhe na mmili ghwa Kilisito? 17 Kiyaha lingati ndo limu, na twenga tuutangalite tubhegha mmili ghumu, kiyaha twabhoha tungulihanga kulyegha mu lingati limu.

18 Mubhalole bhandu bha ku Islaeli bhene, bhala bhanakulyegha nyambi bhangulihanga mu lila likuta mu lihengo lya Chapanga. 19 Hinu, nongele niki? Kukita kila kibhuhitwe nyambi kwa kya ling'omong'omo ndo kilibhi? Ebu kukita ling'omumg'omu ndo kilibhi? 20 Akaaa! Kiinongela ndo kukita nyambi yaayitendekeha bhandu bhanga kummanya Chapanga, bhangubhatendekehela mandilu, hangi chepa Chapanga. Nungubhakanila mwenga kulihanga na mandilu. 21 Mungunoghwa ng'obhe kunyweghela nnobho ghwa Bambo na kangi nnobho ghwa mandilu, mungunoghwa ng'obhe kulyegha mu lifungu lya mulyo ghwa Bambo na mulyo ghwa mandilu. 22 Bhuli, tungupala kulipula kiyaghabhu kya Bambo? Bhuli, twenga tubhegha na makakala kuchweha kwa ywombe?

23 “Bhandu bhangi munkati yenu bhangulongela, hilibhi hyoha hinguteghekwa.” Peni nenga nongela chepa hilibhi hyoha hingutangatila. “Hilibhi hyoha hibhegha telatela.” Peni chepa hyoha hinakunoghela. “Hilibhi hyoha ndo hya telatela.” Peni chepa hyoha ndo hinakuchenga uhyubhalilo. 24 Mundu ywoheli kakotoke kupalaha ghala gha kulitangatila mwene, ngati kapalahe ghala gha kuatangatila bhangi.

25 Nlyeghe hipongi hya nyama yiichuhuswa mumagulio, kyangali kukonyakonya ngati nkotoke kunyengemala mumyoyo yenu. 26 Mana Malembo gha Chapanga ghangulongela habhu, “Nnima na hilibhi hyoha hiibheghite ndo hya Bambo.”

27 Handa pankemelwa mulyo na mundu ywene chepa nhyubhalila ywa Kilisito, na mwenga nnyitikila kughenda, nlyeghe hyoha hyakaapeghite kya nga kukonyakonya ngati nkotoke kulikokela mu myoyo yenu. 28 Peni handa mundu pakaaghombela, “Mulyo aghu ghuyambikilwa ming'omong'omo” Hino, kubhukana na aywo ywakaaghombelite kakotoke kulikokela mu myoyo ghwake na hilahila mwenga, nkotoke kulyegha. 29 Nungulongela habhu, kwakya kulikokela mu myoyo, chepa kulikoke ghwa mu myoyo yenu mwenga, ngati ya aywo ywakaaghombilite.

Maalongela, “Kya bhuli mahwacho gha mundu yungi ghanamule nenga ghakutenda? Nenga nunguhotola kutenda kinukipala. 30 Nungunnumba Chapanga kakya mulyo ghwangu pakali ya kulyegha. Handa nungutenda habhu, kahone mundu ywakalongela aghu ndo uhokelo kwa nenga kulyegha mulyo aghu.”

31 Hino, kyoheli kimukitenda, kubheghe kulyegha ebu kunywegha, ntende hyoha kwakya kunkweha Chapanga. 32 Nkotoke kutenda nnando ghwohele ghuupala kuayambuha bhandu bhangi atende uhokelo, kwa Akaayahudi ebu kwa bhandu bhaabheghite ng'obhe Ayahudi ebu kwa ngwemuko ya Chapanga. 33 Mmeghe handa nenga, nunguyigha kuanogheha bhandu bhoha kwa njila kafauti kafauti, chepa kwakya kulitangatila numwene, ngati kwakya bhoha amokole kulopoleghwa.