Nhalo ghwa Maha handa paghutyekitwe na
1 YOHANE
Ulongoleho
Lihamba lya 1 Yohane likitekwa na Nndumilwa Yohane mu pakati ya ngungwa hya 85 na 90 mbole ya kubhelekwa Yesu Kilisto. Yohane kangulikambuha ng'obhe kukita ywombe ndo ywakatyekite lihamba ali, Peni kipalamande kya ulongohi kingummoneha kukita ywombe handa ywakabhonite na kakilibhonela kwa meho ghake ubhumi na kuhyuka kwa Yesu Kilisto, kipalamande kya 1 Yohana 1:1-3. Bhubho madolido gha matyekelo ghangulihwana muno na ghala ghaakumokoleka mu Nhalo ghwa Maha handa mughutyekitwe na Yohane. Yinguhyubhalika kukita Yohane ndo ywakatyekite Nhalo ghwa Maha handa mughutyekitwe na Yohane mu mahamba ghala mandatu, ghene ndo 1 Yohane na 2 Yohane na 3 Yohane manjubha ghene yohane kakibhegha kangutama mu kitami kya akwo Efeso.
Yohane kakityeka lihamba ali kwa Akilisito bhoha mu manjubha ghene lingwemuko lya bhandu bhaanhyubhalila Kilisto likitindilwa na mangolombano ghaabhukaniti na bhandu bhaalikemite “Awagunositi.” Bhandu abho bhakihyubhalila kukita Yesu kakibhegha Chapanga ntwihiliko peni kakibhegha chepa mundu menyu pakabheghite kangutama pannima. Kubhukana na nnando aghwo Yohane kakilikambuka kukita ywombe ndo mundu ywakabhonite ubhumi ghwa Yesu kwa meho ghake, na kwa mabhoko ghake mwene bhubho kakinbyala Yesu, kipalamande kya 1 Yohana 1:1-3. Ningo ya Yohane ya kutyeka lihamba ali ghakibhegha ndo kutwihiliha uyelelo ghwake ywombe, kipalamande kya 1 Yohana 1:4, kuakanikiha ahyubhalila akotoke kutenda ulemwa kipalamande kya Yohana 2:1, kubhakanikiha bhaanhyubhalila Kilisto akotoke kutughila mahundo gha uhwangi, kipalamande kya 1 Yohana 2:26, na kuapegha ubhoneho ghwa kumanya kya kulyaghila kukita bhombe ahyubhalila alopoleghwa, kipalamande kya 1 Yohana 5:13.
Ghaabheghite
Yohane kanguyanda lihamba lyake, bhubho kangulubhulila ningo yimu ya kulityeka lihamba ali kipalamande kya 1 Yohana 1:1-4.
Mbole, kangufwambula bhula Chapanga pakabhegha lung'ali na kutusigha kukita tungunoghwa kutama handa Yesu pakatamite munnima, kipalamande kya 1 Yohane 1:5—3:10.
Kangi kangutukulungwa kwakya ngwiliho ya kupalana twenga kwa twenga, kipalamande kya 1 Yohana 3:11—5:12.
Paul kanguyomolela lihamba lyake mu kipalamande kya 5:13-21.
1
Lilagho lya Ubhumi
1 Twenga tungaalandamiha mihalo ya yula, Lilagho lya Ubhumi, kakibhegha kutandila makachu, twenga andumilwa tukinnyihwa na tukimmona kwa meho ghetu, na kunkamula kwa mabhoko ghetu. 2 Ndo ywombe ywakabhegha Ubhumi, kakibhoneka kwa twenga. Tukimmona na habhu tunguhola kuaghombela bhangi yakya mihalo yake. Hunu tungualubhulila mihalo kukita ywombe ndo ubhumi ghwa manjubha ghoha ywkabheghite na Chapanga Tate na kakibhonekana kwa twenga. 3 Tungulandamiha Nhalo ghwa Yesu aywo, ywene tukimmona na kunnyihwa, ili mmeghe papamu na twenga mu ughumu ghwene ghutubheghite naghwo na Tate Chapanga na Mwana ywake Yesu Kilisto. 4 Tunguatyekela mwenga milando ayi ili tuyelelwe kyanalumu.
Chapanga ndo ulangalo
5 Hino, nhalo ghutughuyihwite kuhuma kwa Yesu na ghutubhalandamiha ndo aghu, kukita Chapanga ndo ywa maha na ywa nyanyi na lung'ali na kahone lubhindo lyohele nkati mwake. 6 Patulongela kukita tubhegha papamu na Chapanga, na kunu tungughendelela kutama mu lubhindo, tungubhegha ahwangi na tungutama ng'obhe mu hoto kwa malagho na mandendelo. 7 Peni handa twaatama mu lulangalo, handa mwene pakabhegha mu lulangalo, ndo twaabhegha na ughumo twenga kwa twenga na mwahi ghwa Mwana ghwaki Yesu Kilisto, ghwatuyoha ulemwa ghwoha.
8 Patulongela kukita twaabhegha ng'obhe ulemwa, apwo tungulikuluha twabhene, na kahone hoto mu twenga. 9 Handa patulongela na kulilipetula ulemwa ghwetu, Chapanga katatulekekeha ulemwa ghwetu na kutughulula kuhuma mu uhakata ghwoha kiyaha ywombe nhyubhaliko na kabhegha na kangutenda ghanakunoghela. 10 Handa patulongela kukita tunatenda ng'obhe ulemwa, tunguntenda Chapanga nhwangi na tungulema mahundo ghake.