Lihamba lya ulongohi lya Paulo kwa
Akaasesalonike
Ulongohi
Lihamba lya ulongohi kwa Akaasesalonike likityekwa na Nndumila Paulo 1:1. Ali ndo pangi likibhegha lihamba lya ulongohi liibhikitwe mu Bibilia mu mahamba ghakatyekite Paulo na likityekwa mu handa ngungwa ya mbinda mabhoko nhano na yimo mbole ya kubhelekwa Kilisito. Paulo kakibha ku Kolinto pakatyekite lihamba ali kwa ngwemuko ya bhandu bhaanhyubhalilite Kilisito ya akwo Sesalonike, Ngwemuko lyene lyakaliyandihite pakabheghite mu mwanja ghwake ghwa ubhili ghwa kulandamiha Nhalo ghwa maha ghwa Chapanga (Andumila 17:1-10). Mu kitabho kya Andumila yikityekwa kukita ngwemuko alyo likibha na amoo Akaayahudi na Akaagiliki atangalo.
Paulo kakilepelwa kutama muno ku Sesalonike mbole ya kuyandiha ngwemuko, akwo Sesalonike ndo kakiatyekela lihamba ali ngati kaayonjokehe mwoyo bhala bhaanhyumbalilite Kilisito. Lihamba ali linguhunda mihalo mitangalo na kangi himoo malaghilo gha kya bhuli Bhaanhyubhalilite Kilisito yinguanogha kutama. Paulo kakiabhinilila ya kya kubhuya kwa Kilisito. Naywo ngwemuko ya bhandu bhaanhyubhalilite Kilisito ya akwo Sesalonike bhakinoghelwa muno na mahundo agho. Paulo kakighatumila mahundo gha kubhuya kwa Kilisito ngati kuanyeghelehe bhandu kutama kwa kunogheha Chapanga 5:6-8
Ghaabheghite
Paulo kanguyanda kutyeka lihamba ali kwa kuajambuha alongo na kunnumba Chapanga kwa kya bhombe 1:1
Mbole kangualubhulila milando yakayitendite nkati yabhe na mihalo yakayigheghite Timoti 2-3
Kangi Paulo kangualubhulila kya bhuli bhaanhyubhalilite Kilisito yinguanogha kulama mu bhwelo mbaka pala pakabhuya Yesu 4:13—5:11
Paulo kanguyomola kwa kulijambua ngwemuko ya bhandu bha anhyubhalilite Kilisito na kualaghila kukita bhandu bhoha yinguapala kusoma lihamba ali. 5:12-22.
1
1 Nenga Paulo papamu na Saluvanusi, na Timoti tungutyekya lihamba ali.
Kughenda kwa bhandu munhyubhalilite Kilisito akwo Sesalonike, mwenga ndo bhandu bhake Tate Chapanga na Bambo ghwetu Yesu Kilisito.
Tunguayupila umaha na uhihimilo ghubheghe na mwenga.
Ubhumi na kuhyubhalila kwa Akaasesalonike
2 Tungunnumba Chapanga mu manjubha ghoha kwa kya mwenga mabhoha na kuayupila mu mayupo ghetu pipipi. 3 Kiyaha tungukulungwa pipipi mahengo ghenu gha uhyubhalilo muulongolo ghwa Chapanga Tate ghwetu, kulimbilila kwa mwenga na kuhyubhalila kwenu kwa mandendelo, bhula upalo ghwenu kwa Chapanga paghubhalongoha kutenda lihengo kwa ukangamalo, na udumbilo ghwenu mu Bambo ghwetu Yesu Kilisito ghuubheghite nglii. 4 Maalongo, tungumanya kukita Chapanga kanguapala na kukita kabhalinga mmeghe bhandu bhake. 5 Kiyaha manjubha ghala patubhalandamihite ghula Nhalo ghwa Maha, yikibha kwa malagho ghweka ng'obhe, ngati bhubho kwa makakala na kwa Nhuki ghwa Chapanga, patubhele na ulyaghilo kukita lilagho alyo likibhegha lya hoto. Mungumanya kya bhula tukitama na mwenga na kuatangatila. 6 Kangi mukilikingama lila lilagho kwa uyelelo ghuuhuma kwa Nhuki ghwa Chapanga, na mukilihunda kutenda handa patutendite twenga na kangi mukilihunda kwa Bambo, na aghwo ghoha mukighatenda hata payibhele pammeghite mu himbamanda hitangalo. 7 Habhu mwenga mukibha nhwano ghwa maha kwa bhandu bhoha bha anhyubhalilite Kilisito akwo Mekadonia na ku Akaya. 8 Kiyaha kubhuka kwa mwenga lilagho lya Bambo liyihwanika ku Mekadonia na Akaya ghweka ng'obhe, peni kuhyubhalila kwenu kwa Chapanga kukwila kwoha mbaka tungulepelwa kulongela kyohele kyanalumu. 9 Bhandu abho kwohele bhanguyobhela kya bhula pamutukingamite patubhahikilite, na kya bhula pamunntughilite Chapanga na kughaleka mang'omung'omu, ngati munndendele lihengo Chapanga yunakulama na ghwa hoto 10 na hinu mungunnindila Mwana ghwake kuhuma kunani, ndo aywo Yesu, ywene Chapanga kakinhyuha kuhuma kwa ahweghite, ywakatulopoha ku kiyaghabhu kya Chapanga kiipala kuhika.