Lihamba lya ubhili kwa
Akaakolinto
Ulongohi
Lihamba lya ubhili kwa Akaakolinto likityekwa na Nndumila Paulo nkati ya ngungwa ya 55 na 56 mbole ya kubhelekwa kwa Kilisto, kipalamande 1:1. Ali ndo lihamba lya ubhili nkati ya mahamba ghatubheghite nagho ghakatyekite Nndumila Paulo kwa ngwemuko lya bhandu bhaanhyubhalilite Kilisto lya akwo ku Kolinto. Asomi bhanguhyubhalila kukita pakandahi apo, Paulo kakiatyekela Akaakolinto lihamba liibheghite na malagho makalipo muno. Tubhegha naghwo ng'obhe mahighalo gha lihamba alyo lyene Nndumila Paulo kalilubhulila mukipalamande 2:3, 4. Lihamba ali lya ubhili kwa Akaakolinto linguhwachilwa kukita Paulo kakityeka pakabheghite ku Makodonia, mukipalamande 2:13.
Lihamba ali lya ubhili kwa Akaakolinto ndo lya kighweka kiyaha lingulubhulila milando ya kighweka na bhula paahwacha mu mwoywo ghwake. Paulo kangulubhulila kuyelelwa kwa ywombe kubhukana na malubhulilo gha Maha ghakapeghitwe na Tito kualinga Ngwemuko lya bhandu bhaanhyubhalilite Kilisto lya akwo ku Kolinto. Kubhukana na lihamba ali tungumokola mahundo gha maha yakya kubhuha matulo handa payinogha mu Ninganilo lya hyono, mu mbande hyene Paulo kangulaghila malaghililo gha kukungana nhango ghwa ngalabha ngati kubhatangatila ahyubhalila bhaabheghite ku Yelusalemu, kipalamande 8-9. Yingulaha kukita amoo bha andumila bhaahunda ahwangi kuhuma panje ya ngwemuko ya bhandu bha anhyubhalila Kilisto bhene bhakitumila lukila lwaalubhikite mu myoyo ya bhandu bha ngwemuko bhankalalile Paulo kwa nningo ghwa kulitenda amanyikane kyanalumu. Bhakibhegha bhangulongela kukita bhangulihyubhalila ng'obhe likalama lya Paulo, akyo ndo kiintendite Paulo kalikingikihe kwa makakala yakya likalama lyake handa ywa Yesu Kilisto, agha ghangubhonekana kuuhiko ghwa kitabho aki.
Ghaabheghite
Paulo kanguyanda kutyeka lihamba lyake kwa kulijambuha ngwemuko ya bhandu bha anhyubhalilite Kilisto ghwa akwo Kolinito mukipalamande 1:1-7.
Mbole Paulo kangulubhulila maghalambuko gha mipangilo ya mwanja ghwake na milando yakaghombilitwe kuhuma kwa Akaakolinto na uyitikilo ghwabhe yakya lihamba lyake lya ulongohi, kipalamande 1:8—7:16.
Mbole ya apo, Paulo kanguapega malaghililo yakya nhango ghwa ngalabha kubhatangatila ahyubhalila Kilisto bhaabheghite akwo ku Yelusalemu, kipalamande 8:1—9:15.
Kuuhiko, Paulo kangubhuha ukingiko yakya undumila ghwake, na kangualongela yakya mwanja ghwake ghuupala kuhika, kipalamande 10:1—13:10.
1
1 Nenga Paulo nndumila ywa Kilisto Yesu na nnongo ywetu Timoteo kwa kupala Chapanga, tunguajambuha.
Tunguatyekela lihamba ali mwenga bhandu bha kitami kya Kolinto bhamunhyubhalila Kilisto, papamu na bhandu bhoha bha Chapanga bha nnima ghwa Akaya. 2 Tunguayupila umaha na uhihimilo kuhuma kwa Chapanga Tate ywetu na Bambo Yesu Kilisto.
Paulo kangunnumba Chapanga
3 Katikilwe Chapanga na Tate ywa Bambo ywetu Yesu Kilisto, Tate yunakuabhonela luhungu bhandu na Chapanga ywakatutangatila twabhoha. 4 Ywombe kangututangatila mumapungwo ghetu, ngati tumokole kubhatangatila bhangi bhaabheghite mumapungwo nhanganganiko handa Chapanga pakatutangatila twenga. 5 Kiyaha handa bhula Kilisto pakapamandikite na twenga tungulihanga mukupamandika, Ubhwabhu abhu ndo Chapanga pakachweha kututangatila kupitila Kilisto. 6 Handa twenga tungupamandika, tungupamandika kwakya kuatangatila na ulopohi ghwa mwenga. Ayi yinguatangatila kuyitikila mapungwo ghala ghala ghatughamokola twenga. 7 Na udumbilo ghwetu kwakya mwenga ghubhegha ngingilima, kiyaha tungumanya kukita mapungwo ghamughamokola ndo handa ghatughamokolite twenga, ndo mungutangatilwa handa bhula mututangatilwa twenga bhubho.
8 Maalongo bhetu, tungupala mmanye mapughwo ghatumokolite ku nnima ghwa Asia. Mapughwo ghakibhegha makulu muno, mbaka tukilepelwa kulimbilila, na mapungwo agho ghakitutenda tuhwache kukita twaahwegha. 9 Kulyaghila, mumyoyo ya twenga tukihwacha kukita, tukibhegha handa twabhandu bhatutoswitwe kukomwa, milando ayi yikibwituka ngati tuhundwe kunndumbila Chapanga yunakuahyuha bhandu, kihyengo kya kudumbila makakala ghetu. 10 Peni Chapanga kakitulopoha kuhuma mu bhwaghalili ghwa kuhwegha, na kangughendelela kutulopoha, twenga tungummikila udumbilo kukita katatulopoha kangi, 11 handa pammegha mungughendelela kututangatia mumayupo. Ndo bhandu atangalo bhatannumba Chapanga kwa umaha ghwake kwakya twenga, kukita Chapanga katutendela ghamaha kubhukana na mayupo gha bhandu atangalo bhanakutuyupila na katatunonela.
Paulo kangughalambula mpangilo ghwa mwanja
12 Basi, twenga tungulidumbila bhula patutamite mu nnimaaghu, kyanalumu patutamite na mwenga mu ung'anyimo na uhyubhaliko kuhuma kwa Chapanga. Myoyo yetu yingubhoneha tumama kwa kuhwama na umaha kwa kila mundu, handa pakatutangatilite Chapanga, tukitenda habhu chepa kwa malango ghetu ngati pakapalite Chapanga. 13 Tunguatyekela mwenga milando yiimuyihotola kusoma na kuyimanya mana yake niki, na nenga ningudumbila kukita maamanya maha kyanalumu, 14 mbaka hinu mungumanya kya mandina ghweka. Tungumanya kukita mu linjubha lya kubhuya Bambo maalidumbila kwakya twenga, handa bhula twenga patulidumbila kwakya mwenga.
15 Nikibhegha na udumilo ghwa milando ayi, nikipala kuhika kwa mwenga kya ubhili, ngati mmokole nonelo ndangalo. 16 Kiyaha nikipangila kupitila huti kwa mwenga pamegha mumwanja ghwa kughenda ku Mekadonia, na kangi kubhahikila pamegha mukubhuya bhubho, ngati mundangatile mu mwanja ghwangu ghwa kughenda ku nnima ghwa Yudea. 17 Pambangite nnando aghu, bhuli, nikibhegha mundu ywa kughilimbuka ghilimbuka? Ebu munguhwacha kukita nungulamula kwa hwacho ya kianamundu na kukita megha kala kulongela, “Ena” yingubhegha “Kabhone” kwa nndaluko ghumu? 18 Kulyaghila handa bhula Chapanga pakalongela hoto, malagho ghetu kwa mwenga chepa gha kulongela “Ena” yibheghe “Kabhone” kwa nndaluko ghumu. 19 Kiyaha Yesu Kilisto Mwana ywa Chapanga, ywene nenga na Timoteo na Silivano, tukinnandamiha kwa mwenga, kakibhegha ng'obhe ywakulongela “Ena” yibheghe “Kabhone” Ngati mu ywombe manjubha ghoha ndokakibhegha ywakulongela “Ena.” 20 Kiyaha naghilo yoha ya Chapanga yibhegha “Ena.” Kupitila Yesu kwakya agho tungulongela “Mwika” yetu yingukambukwa kwa njila ya Kilisto yibheghe kwa kuntika Chapanga. 21 Na ywombe Chapanga ndo kangututenda mwenga na twenga tukangamale papamu na Kilisto, naywo Chapanga ndo ywakatuhaghulite twenga, 22 ywombe ndo ywakabhikite mango ya kubhoneha tubheghe bhandu bhake, na ywombe ndo katupegha Nhuki Nng'anyimo mu myoyo yetu, na tungumanya kukita twaakingama hilibhi hyoha hya maha hyakatulaghite Chapanga kwa twenga.
23 Chapanga ndo nnyimiho ywa nenga, mwene kangughumanya mwoyo ghwa nenga! Nenga nikihika kangi ng'obhe ku Kolinto kubhukana na kubhonela luhungu ghweka ngotoke kualakalila. 24 Tungulema kuakikinilha mwenga nnyubhalile niki kwakya kimukihyubhalila, kiyaha mwenga mmegha nglii mu kuhyubhalila, peni tungutenda lihengo papamu na mwenga kwakya uyelelo ghwa mwenga.