Lihamba lya ubhili kuhuma kwa
Petili
Ulongolelo
Lihamba lya ubhili kuhuma kwa Petili lingulubhulilwa kukita likityekwa na Nndumila Petili, peni asomi atangalo bha manjubha agha bhanguhyubhalila ng'obhe kukita ayo ndo hoto. Yinguhyubhalika kukita mundu yungi kakityeka lihamba ali mbole ya Petili. Ywakatyekite kangulongela kukita mwene kakibhegha nnyimiho kwa maho ghake ya kya ulami ghwa Yesu na kyanalumu pala pakaghalambukite kibhungi, Nlyango ghwa 1:17-18. Handa Petili kakityeka lihamba ali, yingubhoneha kukita kakityeka pakabheghite ku Loma mu uhiko ghwa ngungwa ya mbinda mabhoko sita mbole ya kubhelekwa kwa Kilisito pakali na kuhwegha Petili. Kangi Petili kangulikema lihamba ali ndo lya ubhili. Nlyango ghwa 3:1, Petili bhubho kangulikema lihamba ali ndo lihamba lyake lya ubhili lyeni lyakatyekite mbole ya lihamba lyake lya ulongohi. Kakiatyekela bhandu bhoha bhaanhyubhalila Kilisito.
Petili kakityeka lihamba ali ngati kabhayonjokehe mwoyo bhaanhyubhalila Kilisito bhatame ubhumi ghwa maha na kuakinya kukita bhakotoke kubhatughila mahundo gha ahunda bha uhwangi, Nlyango ghwa 2. Kangubhayonjokeha mwoyo pakilongela kukita bhabhayuyuhe bhandu bhaalongela kukita Yesu kakabhaalila kubhuya. Mbole yake kangubhinilila kukita Chapanga kangukabhalila ng'obhe ngati kangupala bhandu bhoha bhalopoleghwe, Nlyango ghwa 3:8-9. Aki ndo kihokonyo kya kutama ubhumi ghwa maha, Nlyango ghwa 3:14.
Ghaabheghite
Petili kangulimanyia na kangubhamanyiha bhala bhakabhatyekela lihamba, Nlyango ghwa 1:1-2.
Mbole kanguaghombela bhatame ubhumi ghwa maha kiyaha Chapanga kanguatangatila kulama abho Nlyango ghwa 1:3-21.
Mbole kanguakinya ya kya ahunda bha uhwangi na kulongela kukita kila kyabhapala kubhatula kuuhiko bhaabwituka ahunda bha uhwangi, Nlyango ghwa 2:1-22.
Mbole kanguyomolela kwa kuayonjokeha mwoyo ahyubhalila kutama ubhumi ghwa maha na kulibhika kala kwa kubhuya kwa Yesu, Nlyango ghwa 3:1-17.
1
1 Lihamba ali linguhuma kwa nenga Simoni Petili, nndumitumi na nndumila ghwa Yesu Kilisito.
Nungubhatyekela mwenga bhene kwa umaha ghwa Chapanga na nlopohi ghwetu Yesu Kilisito, mmemwa uhyubhalilo ghulaghula ghwa utopelo handa ghutunemelitwe twenga. 2 Nungubhapalila umaha na uhihimilo ngenju mu kummanya Chapanga na Yesu Bambo ghwetu.
Nkemwa na kulingwa na Chapanga
3 Kwa makakala ghake gha uchapanga, Chapanga katupegha milando yoha yituyipalite ngati tutame ubhumi ghwa kuntundamila Chapanga kwa kummanya ywombe ywakatukemite tulilunge muukulu na umaha ghwake. 4 Kwa njila ayi, katupegha ninganilo ngulu na hya utopelo hyene hyakatulaghiliti. Kya habhu hingututangatila kuhileka uhanjabhano hiibheghite munnima na kubhegha papamu na uchapanga. 5 Kya habhu, nkakalike kwa nnyonjokeha uhyubhalilo ghwenu nnyonjokehe na umaha na umaha ghwenu nnyonjokehe na umanyi, 6 na umanyi ghwenu nnyonjokehe na uyukuto, na uyukoto ghwenu nnyonjokehe na ulimbililo, na ulimbililo ghwenu nnyonjokehe kuntundamila Chapanga, 7 na uhokamo ghwenu kwa Chapanga nnyonjokehe na upalo ghwa kiulongo na upalo ghwa kiulongo nnyonjokehe na upalo, 8 handa pammegha na numbo ahi hyoha, maabhegha atotoho ng'obhe hangi maalepelwa ng'obhe kutenda gha maha mu kummanya Bambo ghwetu Yesu Kilisito, 9 peni mundu ywa nga numbo ahyo ndo ywangalola, kaahotola ng'obhe kubhona kutali naywo kalibhalila kukita kutandila makachu kakiyohwa kala ulemwa ghwake. 10 Kya habhu, makaalongo bhangu, mukatende ubhinililo kyanalumu ngati kulutenda alwo lukemo na kuhaghulighwa na Chapanga lubheghe nnando ghwa ngungulima muubhumi ghwenu. Pantenda habhu maahobha ng'obhe, 11 kwa njila ayi maanemelelwa utekulo nkulu pakuyingila kuubhutwa ghwa Bambo na nnopohi ghwetu Yesu Kilisito.
12 Na kya habhu, ndaghendelela kubhakulungilwa maghenda maghenda milando ayi, hata payibhele manya kala na ntengeleka mu hoto ghumughukingamite. 13 Nenga nungubhona nnando ghwa shaliya kwa nenga, manjubha ghoha pandama apa pannima, kubhayonjokeha makala na kubhakulungilwa kwa kya milando ayi, 14 kiyaha nungumanya kukita mmili ghwangu aghu hamba ndaghuleka, handa Bambo ghwetu Yesu Kilisito pakanng'ombelite pekupeku. 15 Hino, ndaabhinilila kwa likaho mbole ya kuhwegha nenga nhotole kughakulungwa agha maghenda maghenda.
Mayimiho bha Ukulu ghwa Kilisito
16 Manjubha patubhahundite kwa kya kuhika kwa Ukulu ghwa Bambo ghwetu Yesu Kilisito, tukilidumbila ghweka nga mihumu ya uchenjelo chenjelo, ngati tukiubhona Ukulu ghwa kuhika kwa Bambo ghwetu Yesu Kilissito kwa meho ghetu twabhene. 17 Kiyaha kakikingama uhokamo na ukulu kuhuma kwa Tate Chapanga, pala lilobhe palinhikilite kuhuma kwa ywombe ywakabheghite Ukulu Nkulu, paliyuhwanika, “Ayu ndo Mwana ghwangu mpalo yunuuyelelitwe naywo.” 18 Kangi twenga twabhene tukiliyihwa lilobhe alyo kuhuma kunane manjubha patubheghite papamu naywo kunane kwa kila kukitumbi kya Chapanga.
19 Kangi, twenga tubhegha na lilaghilo lya kulyaghila muno lya umbuye ghwa Chapanga, na mwenga mungutendite maha handa munng'ungilite, kiyaha ndo handa lung'ali palilangalika palubhindo mbaka kucheghe ndondwa ya ngeha paying'anyima mu myoyo yenu. 20 Kuchweha kwa agho, peni nkulungwe kukita kahone mundu ywakapala kufwambula mwene ulondohi ghuubheghite mu umbuye ghwa Chapanga, 21 kiyaha kahone lilagho lya ulondohi ghwa Chapanga liibhukana na mapalo gha anamundu, ngati bhandu bhakikambuka ulondohi pabhalongohitwe na Nhuki ghwa Chapanga.