Lihamba lya ubhili lya Paulo kwa
Akaasesalonike
Ulongolelo
Lihamba lya ubhili kwa Akaasesalonike lityekwa na Nndumila Paulo 1:1. Paulo kakityeka lihamba ali manjubha machoko mbole ya kutyeka lihamba lya ulongohi kwa Akaasesalonike, yikibhegha handa ngungwa ya mbinda mabhoko nhano na yimo mbole ya kubhelekwa kwa Kilisito. Paulo kakibhegha kakali ku Kolinito pakatyekite lihamba ali kwa ngwemuko ya bhandu bha Chapanga bhaanhyubhalila Kilisito lya akwo Sesalonike, Ngwemuko aywo kakiliyandiha mwene Paulo mu mwanja ghwake ghwa ubhili ghwa kulandamiha Nhalo ghwa Maha (Andumila 17:1-10). Mu kitabho kya Andumila yikityekwa kukita ngwemuko aywo yikibhegha na amoo Akaayahudi na Akaagiliki atangalo.
Ngwemuko ya bhandu bha Chapanga bhaanhyubhalilite Kilisito ya akwo Sesalonike yikilighayila mu mahundo ya nndaluko ghwa uhiko na kubhuya kwa Kilisito, kiyaha Paulo kakityeka malagho agho mu mahamba ghake ghoha kwa Akaasesalonike. Handa ugheghela ghwa lihinda lya lihamba ali lya ubhili kwa Akaasesalonike likityekwa ya kya nndaluko ghwa uhiko. Kangi Paulo kakiakinya ya kya utotoho na kukita mundu ywohele yingunkwiliha kutenda mahengo kwa kya hilyo hyake 3:6-10.
Ghaabheghite
Paulo kanguliyandiha lihamba kwa kulimanyiha mwene na ayake mu 1:1-2.
Mbole Paulo kangunnumba Chapanga kwa kya Ngwemuko ya bhandu bha anhyubhalilite Kilisito na kuayupila 1:3-12
Mu kipalamande kya ubhili, Paulo kanguyobhela ya kya nndaluko ghwa uhiko
Mbole kanguakinya kwa kya utotoho na ngwiliho ya kutenda lihengo 3:1-15
Paulo kanguyomolela lihamba lyake kwa kuyijambuha kangi ngwemuko ya bhandu bha Chapanga bhaanhyubhalila Kilisito 3:16-18.
1
1 Nenga Paulo, papamu na Saluvanusi na Timoti.
Tunguatyekela lihamba mwenga ngwemuko lya bhandu bhaanhyubhalilite Kilisito lya akwo Sesalonike, mwenga mmegha bhandu bha Chapanga Tate ghwetu na ghwa Kilisito Yesu Bambo ghwetu.
2 Tunguayupila kukita Chapanga Tate ghwetu na Kilisito Yesu Bambo ghwetu bhaghendelele kuatendela umaha na kubhapegha mwenga uhihimilo.
Toso pakabhuya Kilisito
3 Maalongo, yingutukwiliha kunnumba Chapanga kwa kya mwenga manjubha ghoha. Yingutunogha kutenda habhu kiyaha kunhyubhalila Kilisito kwa mwenga kungukula munu na upalo ghwa kila yumu ywenu kwa nnyake ghunguyonjokeheka. 4 Kwakya agho tungulidumbila mwenga mu ngwemuko yingi yoha ya bhandu bhaanhyubhalila Kilisito kiyaha mungughendelela kulimbilila na kunhyubhalila Kilisito mu mahakata ghoha na muhimbamanda himuyihikindila.
5 Agha ghoha ghanguyimiha kukita toso ya Chapanga yibha tela na muuhiko ghwaki mwenga maanoghwa kubhegha mu Ghubhutwa ghwa Chapanga, ghwene mwenga mpamandwa kwa kya aghwo. 6 Chapanga kaaghutendekeha nnando ghwa shaliya, kataabhuyihila himbamanda bhala bhaabhabamanda mwenga, 7 na kuatenda mwenga muupamandika upughwo papamu na twenga. Kupughwa akwo katatupegha pakabhuya Bambo Yesu papamu na andumitumi bhaki bha kunani bhana makakala pakahwimulighwa kuhuma kunani kwa Chapanga, 8 katahika na mibhali ya mwoto, kuakeha bhala bhanga kummanya Chapanga na bhanga kuyitikila Nhalo ghwake ghwa Maha. 9 Toso yabhe yaabhegha kukanjaghanwa manjubha ghoha na kubhaghulighwa kutali na Bambo na ukulu ghuubhukana na makakala ghake, 10 agho ghaabwitukila mu linjubha lya kabhuya Bambo kukingama ukulu kuhuma kwa bhandu bhaki na bhala bhaanhyubhalila. Abho ndo papamu na mwenga kiyaha mughuuhyubhalila uyimiho ghula ghutubhagheghelite.
11 Ndo mana tungubhayupila manjubha ghoha, ngati Chapanga ghwetu kabhabhalange kukita mungunoghwa ubhumi ghwakaakemilite na kukita kwa makakala ghaki kahotole kutwihiliha kila nnando ghwenu ghwa maha ghumughupala kughutenda na mahengo ghoha ghaalongohwa na kuhyubhalila kwa mwenga. 12 Tunguyupa habhu ngati Lihina lya Bambo ghwetu Yesu likwihwe mu nkati yenu, na mwenga nkati yake, kulandana na umaha ghwa Chapanga ghwetu na ghwa Bambo Yesu Kilisito.