Lihamba lya ubhili lya Paulo kwa
TIMOTI
Ulongolelo
Lihamba ali lya ubhili likityekwa na nndumila Paulo kughenda kwa nhundwa ghwake Timoti. Lihamba lya ubhili lya Timoti likityekwa ugheghela na kuyomoka kwa Paulo. Paulo kakibhegha mu kiphopo ku Kitami kikulu kya Loma mu nndaluko aghwo (2 Tim 1:16). Paulo kakibhegha mu ughanja handa alongo na Timoti, na pamoo pangi Paulo kakinkema Timoti handa mwana ghwake (Flp 2:22, 1 Tim 1:2, 1:18).
Ali ndo lihamba limoo mu mahamba ncheche ghene Paulo kakintyekela mundu yumu yumu mbole ya ngwemuko ya bhandu bhaanhyubhalila Kilisito. Mahamba ghangi mandatu gha kwa mundu yumu yumu ndo 1 Timoti na Tito na Filimoni. Mu nndaluko palityekitwe 2 Timoti, bhandu bhaanhyubhalila Kilisito ku kitami kya Lumi bhakibhegha mu kupamandwa kubhukana na uhyubhalilo ghwabhe. Yinguhwachilwa kukita aki ndo kikibhegha kihokonyo kya Paulo kubhopwa mu kibhopo, na Paulo kakinlaghila Timoti kukita kalimbilile hipamanda. Handa mu lihamba lya ulongohi kwa Timoti, Paulo kangunpegha Timoti makinyo matangalo kwa kya ahundwa bha uhwangi (1 Tim 1:16-18). Na kangi Paulo kangunng'ombela Timoti kukita kwaabhegha na midaluko minonopo mu manjubha ghaapala kuhika 3:1.
Ghaabheghite
Paulo kanguyanda lihamba lyake kwa kunnjambua Timoti 1:1-2 na mbole kangunnyonjokeha mwoyo 1:3-18
Mbole kangunpala Timoti kalimbilile himbamanda 2:1-13
Mbole kangunpegha malaghilo nhanganganiko 2:14-26
Mbole kanghunkinya yakya milando yiipala kubwituka mu manjubha ghaapala kuhika na bhula pakughahyepetuka 3:1—4:8
Paulo kanguyomola kutyeka lihamba kwa malubhulilo ghake mwene kwa Timoti 4:9-24.
1
1 Lihamba ali linguhuma kwa nenga Paulo, nndumila ghwa Yesu Kilisito kwa mapalo gha Chapanga, naghilwa kulandamiha ghula ubhumi tuulaghihitwe mukulilunga na kilisito Yesu. 2 Nungukutyekela ghwenga Timoti mwana ghwangu yunughupala muno, nungukuyupila umaha na unonelo na uhihimilo kuhuma kwa Chapanga Tate ghwetu na kwa kilisito Yesu Bambo ghwetu.
Numbo na nyonjokeho ya myoyo
3 Nungunnumba Chapanga yununtendela lihengo kwa umaha kuhuma nkati ya mwoyo ghwangu handa paatendite aghohi bhangu, kangi nungunnumba Chapanga panughukulungwa pamuhi na pakilo mumayupo ghangu mu manjubha ghoha. 4 Nungughakulungwa mahohi ghako, na nungupala muno kughubhona ngati memekwe na uyelelo. 5 Nunguyikulungwa hyubhalilo yako yanga ufyangu, hyubhalilo ahyo kakibhegha naywo mbuyu ghwako Loisi, na kangi kakibhegha nahyo mama ghwako Eunike. Kulyaghila nungumanya kukita na ghwenga ghubhegha nahyo. 6 Kya habhu nungughuyupa ghukulungwe kughendelela kuyitumila kila kipala kyakakukamuhite Chapanga pala panughuyabhikilite mabhoko. 7 Kiyaha Chapanga kakitupegha ng'obhe Nhuki ghwa kututenda tuyoghope, ngati ndo nhuki ghwa kututenda tubhegha na makakala, na upalo, na uyukuto.
8 Hinu, ghukotoke kubhona honi kunnyimiha Bambo ghwetu, hangi ghukotoke kumonela honi nenga nuumeghite mmopwa kwa kya ywombe, hangi ghulilunge na nenga mu himbamanda ya Nhalo ghwa Maha, handa Chapanga pakaghukamuhite makakala gha kuhotola. 9 Mwene kakitulopoha na kakitukema tubheghe bhandu tuubhaghulitwe kwa kya Chapanga, kakitenda agha chepa kwa kya ghala ghatughatendite, peni kwa likaho na umaha ghwake. Umaha aghwo tukamuhwa mu Kilisito Yesu kukali na kuyanda midaluko, 10 peni hinu umaha aghwo ghuhwimulighwa kwa twenga kwa kuhika Nnopohi ghwetu Kilisito Yesu. Mwene kaghahotola yomo makakala gha kiho, na kya kukindila Nhalo ghwa maha kahwimula ubhumi ghwa nga kupela.
11 Kya habhu, Chapanga kakinninga meghe nnandamiha na nndumila na nhunda ghwa Nhalo ghwa Maha, 12 na ndo kwa kya agho nenga nungupamandika, peni ngali nungubhona honi ng'obhe, kiyaha nungummanya yula yununhyubhalila, kangi ninguhyubhalila kukita kila kyakakibhikite nkati ya nenga katakikingikiha, mbaka mu linjubha lila. 13 Ghughakamule muno mahundo gha hoto ghanughuhundite. Na ghuhighale mu akwo kuhyubhalila na upalo mu kulilunga na Kilisito Yesu. 14 Nnando ghula ghwa maha ghuukamuhitwe ghuukingikihe kwa makakala gha Nhuki ghwa Chapanga ywaatama nkati yetu.
15 Handa paghumanya kukita bhandu bhoha bha nnima ghwa Asia bhangiluka, mu bhombe ab hegha Filego na Helimogene. 16 Peni nunguyupa kukita Chapanga kalupeghe umaha lubhagha lwa Onesifolo, kiyaha kakimbughaha hangi kakibhona ng'obhe honi kiyaha nikibhegha mu kibhopo, 17 kihyegho kyaki, kamu pakahikite ku Lumi, mwene kakiyanda kumbalaha mbaka pakammonite. 18 Bambo kannonele ngati kamokole lipyanda lyake mu linjubha lila, na ghwenga ghungumanya ghamaha matangalo ghakandendelite akwo Efeso.