Lihamba lya Paulo kwa
AKAAKOLOSAI
Ulongolelo
Lihamba kwa Akaakolosai likityekwa na nndumilwa Paulo, kipalamande kya 1:1. Yinguhwachilwa kukita kakilityeka lihamba ali pakabheghite mu kibhopo, na yinguhyubhalika kaibhegha ku Loma, mu handa ngungwa ya mbinda mabhoko sita mbole ya kubhelekwa Kilisto. Lihamba ali kwa Akaakolosai na lila lya kwa Akaaefeso na lihamba lya kwa Filemoni, ghangukemwa mahamba gha mukibhopo kiyaha Paulo kakighatyeka pakabheghite mu Kibhopo. Ywakatyekite lihamba ali kwa ahyubhalila mu kitami kya Kolosai. Paulo kakiyandiha ng'obhe ngwemuko ayi ya ahyubhalila, handa pakalubhulilite kipalamande kya 2:1, peni kakibhona kukita kangunoghwa kuahunda bhandu bha ngwemuko alyo. Yinguhyubhalika pangi Epafula kakiyandiha ngwemuko alyo kiyaha kakibhegha nkolannima ghwa kitami kya ku Kolosai.
Paulo kakiyituhwa na mahundo gha uhwangi kwa ngwemuko lya bhnandu bhaanhyubhalila Kilisto bha akwo Kolosai. Kakityeka kuwa utangalo lyakya mahundo gha uhwangi. Akwo kukibhegha na kimati kya Akaayahudi bhaahyubhalilite Kilisto, peni bhakibhegha bhanguakikiniha bhandu bhangi kughatughila malaghilo gha Akaayahudi, kyanalumu mahundo yakya kulumula unyagho. Paulo katyeka pekupeku kukita Ahyubhalila bhangupala ng'obhe kyohele ebu mundu yungi ywohele ngati nga Kilisto ili amokole kuyitikilwa na Chapanga, kipalamabnde kya 1:15-20 na mahundo ghanakuhuma na mahala gha bhandu ghangunoghwa ng'obhe kipalamabnde kya 2:8.
Ghaabheghite
Paulo kanguliyandia lihamba kwa kuajambhua bhandu bhaanhyubhalila Kilisto bha ku Kolosai, kipalamabnde kya 1:1-2.
Mbole kangutyeka yakya ukulu ghwa Kilisto, kyanalumu kuyanga mahundo gha uhwangi, kipalamabnde kya 1:3—3:4.
Handa muyibheghite mu mahamba ghangi gha Paulo, Paulo kangutumila lihinda lya lihamba ali, kulubhulila bhula bhandu bhaanhyubhaliala Kilisto pabhanoghwa kutama, kipalamabnde kya 3:5—4:6.
Paulo kanguyomolela kwa kuajambua na kulubhulila na kulaghila mu lihamba bhula yingunoghwa kusomwa kwa lilobhe likulu mu mangwemuko gha bhandu bhaanhyubhaliala Kilisto, kipalamande kya 4:7-18
1
1 Nenga Paulo Nndumilwa ghwa Yesu Kilisto, kwa kupala Chapanga ndyeka lihamba ali, pamegha papamu na nnongo nnyetu Timoteo.
2 Tunguatyekela mwenga bhandu bha Chapanga mummeghite ku Kolosai, alongo bhetu munakuhyubhalika mu kulilunga na Kilisto.
Tunguayupila umaha na uhihimilo kuhuma kwa Chapanga Tate ghwetu.
Mayupo gha kulumba
3 Manjubha ghoha tungunnumba Chapanga kila patuayupila mwenga, kuhuma kwa Tate ghwa Bambo ghwetu Yesu Kilisto. 4 Mana tuyihwa uhyubhalilo ghwenu kwa Kilisto Yesu na yakya upalo ghwenu kwa bhandu bha Chapanga. 5 Uhyubhaliilo ghwenu na upalo ghwenu kungubhukana na udumbilo ghuunmikiitwe kunani. Udumbilo ghumuuyihwite mu lilagho lya hoto. Kya habho mughuyihwa kala yakya udumbilo aghwo kupitila Nhalo gha Maha aghwo. 6 Nhalo aghwo ghwene ghukihika kwa mwenga, ghukwila mu milima hyoha. Ghunguaghilimbula bhandu handa mughuaghilimbukihite mwenga kutandila linjubha mukiyihwa mihaloya umaha ghwa Chapangana kumanya uhoto ghwake mughubheghite. 7 Mukilihunda Nhalo gha Maha aghwo kuhuma kwa nndumitumi nnyetu nhyubhaliko Epafla, ntendalihengo nnyetu. 8 Ywombe kakitughombela yakya upalo ghwenu kwa bhangi, upalo ghuunkamuhitwe na Nhuki ghwa Chapanga.
9 Kiyaha, tukibhegha patubhayupila manjubha ghoha kutandila patuyihwite milando yenu. Tungunnyupa Chapanga kabhamemekehe utendehi ntwihiliko ghwa mapalo ghake, papamu na malango ghoha na utendehi ghwa Nhuki. 10 Apo ndo maahotola kutama handa Bambo na kughatenda ghala ghakaghapalana kutenda kwa njila yohele yene yinngunnoghela matamilo ghenu ghabhegha kawa mahengo ghenu gha maha, kangi maachweha kummanya Chapanga. 11 Bubho tungunnyupa Chapanga kabhapeghe makakala kwa likalama lyake likulu, ili nhotole kubhegha ngingilima. 12 Kangi munnumbe Tate kwa uyelelo, ywakabhatenda mwenga nhotole kulihanga mu milando yila yakaabhikilitee bhandu bhake mu ubhutwa ghula ghwa lubhwelo. 13 Ywombe katulopola kuhuma mu makakala gha lubhindo na kutuyingiha mu ghubhutwa ghwa Mwana ghwake ywakampalalite 14 Kupitila ywobhe tungukomboleghwa, mana yake tungulekekehwa ulemwa ghwetu.
Lihengo na ukulu ghwa Kilisto
15 Kilisto ndo nhwano ghwa Chapanga ywangabhonekana, na mmeleko ghwa ulongohi ghwa hibhumbe hyoha. 16 Kupitila ywombe, hilibhi hyoha hikibhhumbwa, hiibheghite kunane na munnima hikibhumbwa, hilibhi hiibhonekana na hyangabhonekana. Bhaabheghite na makakala na atabhala na abhatwa, akulu na bhana makalama. Hyoha hikibhumbwa kwa ywombe na kwakya ywombe. 17 Ywombe kakibhegha yikali ya hilibhi hyoha, na hyoha hingughendelela kubhegha kwa makakala ghake. 18 Ywombe ndo mutwe ghwa mmili ghwake, mana yake ndo ngwemuko ya bhandu bhaanhyubhalila Kilisto, ywombe ndo kihina kya ubhumi ghwa aghwo ghwa mmili. Ywombe ndo aghwo ulongohi, mmeleko gha gkalongohi, ywakahyuhitwe kuhuma mu kiho, ngati kabheghe na ng'ebhu ya kandahi mu hilibhi hyoha. 19 Kiyaha Chapanga kakipala bhula pakabheghite ywombe, uchapanga ghwake ghubheghe nkati ya Kilisto. 20 Kupitila Yesu Kilisto, hilibhi hyoha hikilinganihwa malobhe na Chapanga. Na kwa mwahi ghwake mu lupingika kakitendekeha uhihimilo na hilibhi hyoha hiibheghite munnima na kukunani.
21 Pamakachu mwenga mukibhegha kutali na Chapanga na mukibhegha amyanja bhake kwakya hwacho ghenu na mandendelo ghetu mahakata. 22 Peni hinu kwa kiho kya mwana ghwake ywakatamite mu nnima aghu, Chapanga kabhalinganiha malogbhe na ywombe, kiyaha kabhabhike muulongolo ghwake pammegha bhandu bhake Chapanga, bha nyanyi na bhanga libhaya. 23 Peni yinguanogha kughendelela na kitamiko ngingilima mu kuhyubhalila, nkotoke kutingihika kuhuma mu lila lidumbilo limulimokolite pala pannyihwite Nhalo ghwa maha. Nenga Paulo megha nnandamiha ghwa Nhalo ghwa Maha ghuulandamihitwe kala kwa kila mundu mu nnima.
Lihengo lya Paulo kwa ngwemuko ya bhandu bhaanhyubalila Kilisto
24 Hinu nunguyelela kupamandika kwakya mwenga, mana kwa kimbamanda kyangu mu nnima aghu, nungutangatila kukitwihiliha kila kiipungulite mu kimbamanda kya Kilisto kwakya mmili ghwake, mana yake ndo ngwemuko lyake. 25 Nenga ndendwa kubhegha ntendalihengo ghwa ngwemuko lya bhandu bhaanhyubalilila Kilisto kubhukana na likaho lyake Chapanga ywakangamuhite kuatangatila mwenga. Na nnando aghwo ndo kulandamiha Nhalo ghwa Maha handa muyinoghwa, 26 ghwene ndo mbwepo yiihihitwe kwa bhandu bha Chapanga kutandila makachu, peni hinu kahibwitula kwa bhandu bhake. 27 Chapanga kakipala kubhamanyiha bhula mbwepo ayi muyibheghite ngulu na ng'anyimo na yikwila kwa bhandu bhaabheghite ng'obhe Ayahudi, nayo ndo ayi, Kilisto kabhegha nkati yetu, na nnando aghu lingumanyiha kukita mwenga maalilunga muukulu ghwa Chapanga. 28 Kya habhu tungunlandamiha Kilisto kwa bhandu bhoha, tunguakinya na kubhahunda bhoha kwa umanyi ghwoha, ili tumokole kuagheghela bhandu bhoha muulongolo ghwa Chapanga pabhakamala mu kulilunga na Kilisto. 29 Kubhukana na nnando agho nungutenda lihengo na kukakalika pandumila makakala makulu gha Kilisto ghaatenda lihengo nkati yangu.