Lihamba lya Paulo kwa
Akaafilipi
Ulongolelo
Paulo kakilityeka lihamba ali kwa ahyubhalila bha ku Filipi handa ngungwa ya mbinda mabhoko sita na yimo, pakabheghite mu kibhopo, kipaamande kya 1:13, na yinguhyubhalika kakityeka lihamba ali pakabheghite ku kitami kya Lomani. Lihamba ali likityekwa kwa bhandu bhahyubhalilite Kilisto bha ku Filipi. Tunguhotola kulihunda kya mandina kwakya kitami kya Filipi kuhuma ku kitabho kya Andumila. Pilipi kikibhegha kitami kikulu kya nkoa ghwa Mekadonia. Bhubho kukibhegha na ngwemuko lya kandahi yiiyandihitwe ku Mekadonia. Paulo na Sila ndo bhaayandihite ngwemuko alyo lya bhandu bhaanhyubhalilite Kilisto, na bhubho, bhakibhwindwa ku kibhopo kilukilu ndaa paabheghite akwo mandendelo, kipaamande kya 16.
Paulo kakibhegha na ningo ndangalo hya kulityekya lihamba ali. Kakilitumia lihamba ali kubhalumba bhandu bhanhyubhalilite Kilisto bha akwo kwa lilumbo lyaang'eghelite pala paayihwite kukita kaibhegha kukibhopo, kipaamande kya 4:10-19. Bhupo kakiaghombela bhula pakaghendelela mu kibhopo na kakiahaghula Timoi na Epafladitu kwa ahyubhalila, kipaamande kya 2:19-30 ili bhabhatekule na kughuyitikila kukita ndo hilongohi bhabhe.
Ghaabheghite
Paulo kakiyanda kutyeka lihamba lyake kwa kuajambuha ahyubhalila kipaamande kya 1:1-2.
Mbole kangualubhulila bhula pakabheghite na milando yiibheghite mu mwoyo ghwake kualinga bhombe 1:3—2:30
Mbole, Paulo kangulubhulila malaghilo gha kughatenda ili atame handa bhandu bhaanhyubhalila Kilisto, kipaamande kya 3:1—4:9.
Kuuhiko Paulo kanguyomolela kubhataghila lilobhe na kualumba Akafilipi bhanhyubhalilite Kilisto 4:10-23.
1
1 Lihamba ali lihuma kwa nenga Paulo papamu na Timoti, twaandumitumi bha Yesu Kilisto.
Tunguatyekela mwenga bhandu bhoha bha Chapanga bha akwo Filipi muulilungite na Kilisto Yesu, papamu na hilongohi bha bhandu bha ngwemuko lya bhandu bhaanhyubhalila Kilisto na bhaabhatangatila hilongohi na ahyubhalila.
2 Tunguayupila kwa Chgapanga Tate ghwetu na Bambo Yesu Kilisto, kabhapeghe mwenga umaha ghwake na uhihimilo.
Paulo kangunnumba Chapanga kwakya ahyubhalila
3 Nungunnumba Chagapanga maghenda maghenda panuakulungwa mwenga, 4 na kila panuayupila mwenga mabhoha, nunguyupa kwa uyelelo. 5 Nunguyelelwa kiyaha tunguaghombela papamu bhandu Nhalo ghwa Maha ghwa Kilisto. Mukindangatila kutandila linjubha lila pannyihwite mbaka lelo. 6 Hinu, nungubhegha na ulyaghilo kukita Chapanga ywakaliyandihite lihengo ali lya maha munkati yenu, kaaghendelela mbaka litwihilike mulinjubha lila pakapala kubhuya Kilisto Yesu. 7 Yinoghela nenga kuahwachila habhu mwenga mabhoha, kiyaha nunguapala muno. Chapanga katupegha umaha ghwake, ngati nenaga na mwenga tulitende lihengolyake, payibhele megha mu kibhopo ebu panubhalubhulila bhandu kikita Nhalo ghwa maha ndo lolagho lya hoto lya Chapanga. 8 Chapanga kangubhona kukita nungupala muno kuabhona. Nunguapala muno mwenga mabhoha ndo handa bhula Kilisito Yesu pakabhapala.
9 Agha ndo ghanughayupila kwa Chapanga, kukita nng'endelele kupalana muno, na nunguyupa kyanalumu kukita muyimanye milando yoha ya hoto na mmeghe na malango, 10 ili mmokole kughamanya ghala ghaabheghite gha maha. Apwo ndo mahotola kubhegha na miyoyo ya nyanyi na maabhegha ng'obhe na lihokelo mu linjubha lila lya kubhuya kwa Kilisto. 11 Kutama kwa mwenga kwaamema milando ya maha, ghaamokolwa kwa njila ya Yesu kilisito, agho ghoha ndo kwakya kubhoneha bhula Chapanga pakabhegha nkulu na kuntika.
Kutama ndo Kilisto
12 Hinu, maalongo bhangu nungupala mmanye kukita milando yoha yiindulukilite kulyaghila yitangatila muno kukwiha Nhalo ghwa Maha. 13 Kubhukana na nnando aghu, machonda bhoha bha liboma lya mutwa papamu na bhangi bhoha bhangumanya kukita mopwa kukibhopo kiyaha nunguntumikila Kilisto. 14 Kubhopwa kwa nenga kukibhopo kubhatenda alongo atatangalo anhyubhalile Bambo na kuayonjokeha mwoyo ghwa kulandamiha Nhalo ghwa Maha ghwa Chapanga kwa ukangamalo na kyanga lyogha.
15 Kulyaghila amoo ahyubhalila bhangumonela tama na bhangulimbana bhangupala kulibhoneha kukita bhombe ndo bhamaha kupitingana nenga. Akyo ndo kinguatenda bhabhaghombele bhandu Lilagho lya Kilisto. Peni bhangi bhanguangulandamiha Lilagho lya Kilisto kiyaha bhangupala kundangatila. 16 Abha bhangutenda habhu kubhukana na upalo, kiyaha bhangumanya kukita Chapanga kambegha lihegho ali lya kubhaghombela bhandu kukita Nhalo ghwa Maha ndo lilagho lya hoto lya Chapanga. 17 Na abho bhangi bhangunnandamiha Kilisto kiyaha bhangupala kulimbana. Bhangutenda habhu chepa kwa mwoyo ghwa nyanyi, ngati likaho lyabhe kuyonjokeha mapungwo matangalo mu kubhopwa kwa nenga.
18 Alyo kwa nenga ndo kilibhi ng'obhe! Nenga nunguyelelwa bhandu pabhannandamiha Kilisto kwa njila yohele, payibhele kwa mwoyo ghwa maha ebu kwa mwoyo nhakata. Kangi ndaghendelela kuyelelwa, 19 kiyaha nungumanya kukita, kwa mayupo ghenu na kwa kutangatilwa na Nhuki ywa Yesu Kilisto, ndalekekehwa kukibhopo. 20 Nungulema kutenda kyohele, kyene kimbala kundenda nepelwa ng'obhe mu kutwihiliha lihengo lyangu, peni ndabhegha na mwoyo ngingilima mu manjubha ghoha na kyanalumu mumanjubha agha, ngati kwa kutama kwangu kwoha, pamegha na ubhumi ebu pahwegha nung'eghele Kilisto uhokamo. 21 Kwa nenga nungutama kwakya kundumikila Kilisito na kuhwegha ndo nnando ghwa maha kyanalumu. 22 Peni handa nungughendelela kutama ndaghendelela kutenda milando ya maha kubhatangatila bhandu, nenga nungumanya ng'obhe lyoki lya maha kwa nenga kulama na kuhwegha. 23 Nunguhutwa na milando ayi mibhili yiibheghite ya maha. Nungupala kughuleka ubhumi aghu ngati ndame na Kilisto, nnando ghuubheghite ghwa maha kyanalumu, 24 peni kwakya mwenga yibhegha maha kyanalumu kw nenga kughendelela kutama. 25 Mmegha na ulyaghilo kukita ndaghendelela kutama papamu na mwenga mabhoha, ngati mokole kubhatangatila nkule na kubhegha na uyelelo mu kunhyubhalila Chapanga. 26 Hinu, pamegha papamu na mwenga kangi, kiyaha Yesu Kilisto katabhegha kandangatila nibhuye kangi kwa mwenga.
27 Hinu, nndando ghunakunoghela kyanalumu ndo aghu, bhula pantama ntame handa paghapala mahundo gha Nhalo ghwa Maha ghwa Kilisto, payibhele ndahika kubhatyangila ebu ndahika ng'obhe. Nungupala kuyihwa kukita Mungutenda lihengo papamo kwa mwoyo ghumo mu kubhatangatila bhangi kughuhyubhalila Nhalo ghwa Maha. 28 Nkotoke kubhayoghopa amyanja bhenu, ngati mmeghe ngingilima manjubha ghoha, na akwo kwabhayimiha amyanja kukikia bhaahotola ng'obhe, na mwenga maahotola kiyaha mwene Chapanga ndo ywaabhapegha mwenga kuhotola. 29 Kiyaha npeghwa umaha ghwa Kilisto chepa kunhyubhalila ghweka, ngati na kupamandika bhubho kwakya mwene. 30 Kiyaha mulilunga na malimbano ghaghala ghala ghamughabhonite kwa nenga na ghala ghamughayihwa kukita mbaka hinu megha nagho.