Lihamba lya Paulo kwa
Titus
Ulongolelo
Lihamba ali kwa Titusi ndo limoo mu mahamba ncheche ghaatyekitwe na Paulo kughenda kwa mundu ghwa kighweka na chepa kwa ngwemko ya bhandu bha Chapanga bhaanhyubhalia Kilisito. Mahamba ghangi mandatu ndo 1 Timoti, na 2 Timoti na Filimoni. Paulo kakintyekela Titusi peni kangi kakityeka handa kukita lisomwe pa kindangabhanji. Tungumanya habhu kiyaha Paulo kangulubhulila umanyi ghwake katwihilika na kangunoghwa kubhegha Nndumila, nnando ghwene Titusi kakimanyagha ubhwabhu abhu. Yingukitilwa kukita Paulo kakityeka lihamba ali nkati ya ngungwa 63-65 mbole ya kubhelekwa Kilisito.
Paulo kangunlaghila Titusi kulilongoha ngwemuko liibheghite mu kigunguli kya Kelete. Paulo kakityeka lihamba ali kwa nningo ghwa kunlaghila Titusi ya kya kuhaghula na kubhahunda hilongohi bha ngwemuko. Paulo kakikamuha malaghilo ghaalandanite na agho mu lihamba lyakantyekelite Timoteo. Lihamba lyake lingulubhulila kya bhuli hilongohi bha ngwemuko bhangunoghwa kuhokamilwa muno. Ngwemuko na hilongohi bhake bha manjubha gha lelo bhangunoghwa kulolekeha milando ayi yinakupalwa kwa hilongohi bha ngwemuko.
Ghaabheghite
Paulo kangunlaghila Titusi kubhahaghula hilongohi bhaannyitikila Chapanga 1:1-16.
Kangi kangunlaghila kuahunda bhandu ngati bhalame kya kuntundamila Chapanga 2:1—3:11.
Muuhiko Paulo kanguyomola lihamba lyake kwa kutyeka malagho gha kuyomolela 3:12-15.
1
1 Lihamba ali linguhuma kwa nenga Paulo, nndumila ghwa Chapanga na nhundwa ghwa Yesu Kilisito.
Nenga nikihaghulighwa kutengelekeha kuhyubhalila Kilisito kwa bhandu bhaahaghulitwe na Chapanga na kualongoha ngati bhatame ulami ghwa kunnogheha Chapanga, 2 ghwene kitamiko kyake ndo udumbilo ghwa kumokola ulami ghwa manjubha ghoha. Chapanga ywanga kulongela uhwangi kakitulagha ulami aghwo pakali na kubhumbwa kwa nnima, 3 naywo kwa nndaluko ghuunoghite kakighuhwimula mu lilagho lyake. Nenga hyubhalika mu lilagho alyo nililandamihe kulandana na ngwiliho ya Chapanga Nlopohi ghwetu.
4 Nungukutyekela ghwenga Titusi, mwana ghwangu ghwa hoto mu uhyubhalilo ghutulilungite twabhoha.
Nungukuyupila umaha na uhihimilo kuhuma kwa Tate Chapanga na kuhuma kwa Kilisito Yesu Nlopohi ghwetu.
Lihengo lya Titusi akwo Kilete
5 Hino, nenga nikikuleka kula ku Kilete ngati ghuyitende milando yila yiibheghite yikali kutwihilika, na kuahaghula Aghohi bha ngwemuko ya bhandu bhaabhyubhalilite Kilisito mu kila kigunguli. Ghughakulungwe malaghilo gha nenga, 6 nghohi ghwa ngwemuko ya bhandu bhaabhyubhalilite Kilisito kangunoghwa kabhe mundu ywa nga kubhayilwa, ywakabheghite na nhumbu yumu ghweka, na bhana bhaki anoghelwe bhubho bhabhe bhangunhyubhalila Kilisito, na bhakotoke kumanyikwa mubhulwa ebu ngakatala. 7 Kya bhula kilongohi ghwa ngwemuko ya bhandu bhaabhyubhalila Kilisito ndo nkulu mu lihengo lya Chapanga, kangunoghwa kabheghe mundu ywa nga kubhayilwa. Kakotoke kubheghe mundu yunakulidumba, nnyeyehu ghwa kuyaghabhala, nlobhi, ntenda bhulwa ebu yuna tama ya kumokola mbiya kwa njila ya nga kunoghela. 8 Kanoghwa kabheghe ntekulo na ywakapala milando ya maha. Kanoghwa kabheghe mundu yunakuyukuta, nng'ololeho, ghwa kya Chapanga na yunauhokamo. 9 Kangunnoghwa kakamulile telatela lilagho lya uhyubhalilo handa palihunditwe. Pakahotola kubhayonjokeha myoyo bhangi kwa mahundo ghanakunoghwa na kughahwimula mahokelo gha bhandu bhanakupingikiha mahundo agho.
10 Kiyaha bhabhegha bhandu atangalo bhangayitikila, bhaabheghite na malagho gha ubhughabhugha nalumu ndo bhala bhamukimati kya ulumula unyagho. 11 Yinogha mbaka kuahibha milomo, kiyaha bhanguyitindingana lubhagha lwoha lwa bhandu kwa kuhunda milando yibhanoghite ng'obhe kuhunda. Bhangutenda habhu ngati bhalimokolele ngalabha kwa ukubhuhi. 12 Hata yumoo ywa ambuye ghwabhe, naywo bhubho ndo Nkelete, kakilongela, “Akaakelete ahwangi manjubha ghoha, ndo handa anyama ahakata, alyegha kwapukwapu na atotoho!” 13 Naywo kakilongela hoto, na kya habhu, ghungunoghwa kubhalakalila kwa ulakalo, ngati bhabhe na bhanakunhyubhalila Kilisito ghwa telatela, 14 bhakotoke kughendelela kukamulila nga hitohe ghweka hya Akaayahudi na malaghilo gha bhala bhandu bhaayilemite hoto. 15 Hilibhi hyoha hibhegha nyanyi kwa bhandu bhayitikilitwe muulongolo ghwa Chapanga, peni kahone kilibhi kiiyitikilitwe kwa bhala bhaahwachila uhokelo na bhanga kuhyubhalila, kiyaha hwacho na malango ghabhe ghahokela. 16 Bhandu handa abha bhangulikwina kukita bhangunmanya Chapanga, peni kwa mandendelo ghabhe bhangunkiluka. Ndo bhandu bha kuyaghabhiha muno na bhangayitika, bhangunoghwa ng'obhe kwa nnando ghwohele ghwa maha.