1 Ira oe! Uatinu ata ia isa arihon omi ikaparua. Uatinu ata ia isa wain inana amai sahai muie. Sio wason oationa Anahatana tewa iae, okaparua tu-tu san rei tewa oi. 2 Ne masike san rei iae, omi ohati ruamo sirinia. Aikee omi mo, kahurae oatamisi ia wain ne hali kalakuan rei. Na kahurae onei ia wain ipalalosa san rei, na pene iamanou ikatamo nea. 3 Masike ukatamo tewa, ne anoku wamo rekatamo sirinia. Au uapamata sou nea na ia wain ikaparua rei mo, kahurae iapasanai sapan. Reiso omi mo, kahurae ouna sani au wamo ukatamo. 4 Sani omi pusimo wan oparisaa tau Upuri Yesus oamanoumo tau Upuri Yesus ne kawasa, mka noo sani au wamo ukatamo pan rei oi. Mka Upuri Yesus irui ne kawasa osita na ipusu ne maue. 5 Omi mo, kahurae onei ia wain ikaparua rei na ihokai arihon omi pusimo wan oparisaa. Ruiki osi ia aia sakahatene na iunai sinsarai rotu-tu ineni ne hali. Neiki na iarihon ne hali kahatene rei. Iarihoniki na mka Upuri ihokai mai tuniai reini honu, iapuheui na pene iapasanai nea.

6 Reiso ohati ruamo ne otapi ia wain ipalalosa san rei ikatamo sirinia, areimo iake tewa. Oanei sou nanae wan reasau ata, “Mnehue mkane man reuna poroti pusiki resaa.” Areimo sani ia isa isaka ipalalosa, mka iuna pusimo wan oparisaa tau Kristus opusui ia-ia tewa. 7 Omi mo, kahurae onei sio wason opalalosa san rei na pene okatamo nea. Noo sani sio Yahudiu opesi mnehue wan monae tau karisaa anoo rapeka runa Anahatana ihoka no upu momou arihon otoe Mesir. Mnehue wan opesiki rei rekakina sio wason opalalosa rei. Opesi ia rei, noomo sani poroti honue wan nene mnehue tewa. Areimo tau omi mo, Anahatana iunamo manisate onate nea. Tea mo, sio ohunu Kristus nea noo sani rompa anae wan sio Yahudiu ohunui tau karisaa anoo rapeka na Anahatana ihoka noa upu momou arihon otoe Mesir rei. Ohunui na reusi no rosau.

8 Kristus iusi re rosau nea, reiso mai na ipesi re rosau na re hali kahatene rai hainau, nooi sani sio Yahudi nanie ouna no karisaa oai poroti wan resaa tewa, reiso opesi no mnehue. Ne ita iuna sae wan manisata na iamahaita pusu manisate noo sani iai poroti wan nene mnehue, tewa tea!

9 Tau we surate wan naone mo, uasau osimo na pene ooi neta tau sio wason okaparua. 10 Uasau tewa rerihoni sio wason oationa Anahatana tewa. Sio rei panesi okaparua, onana mansiau no apia osi ruao reiso oakarotaso na onana no apia rai. Sio panesi oainisi oainaa runa anahatanau waron titue tewa. Sani nanie ohaineke sio rei tewa, areimo kahurae oeumo arihon tuniai rein. 11 Ne uasau rerihoni mo kaka wani wain iparisaa tau Kristus. Iasau ata iparisaa, aikee ikaparua, ianana mansiau no apia, iainaa runa anahatanau waron titue tewa, iruni mansia, ininu, ikimanaka. Pene okatai. Oai okatai man iae, pene nea oi.

12-13 Au we kawasa tewa na uarinii sio wason oparisaa tau Kristus tewasi. Uarinii tewa ia sia wain titue na ia sia wain titue tewa. Mka Anahatana sahoro iariniiso. Ne kahurae oarinii sio wason oparisaa okatamo. Reiso ouna sani Musa ikanu tau Anahatana ne anamanaya. Ata, “Onei ia seia man wain ne hali kahatena arihonimo.5:12-13 Musa Iruni Honu 13:5; 17:7”