1 Petrus runa Yohanis wason oanamana osiso asi, oyo sio imam no ia polisi tau Anahatana ne numa mainisie runa sio Sadukiu umau ohokaso mai tanso. 2 Sio rei oakapuku tau sio ua rei tau sio wason oatuheteso rerihoni Yesus. Osima ata Yesus wain iamahaiki honu rerihoni sio matana. Arei nene nohue sio matana mka oamahaiso honu. 3 Reiso osotaso, samatoro onususo pan pui anoe. Pumono nea reiso osakaso pan pui anoe rotu-tu manahane. 4 Ne sio panesi sahoro oatinu no maunauna oparisaa. Reiso sio nihu nima wason oparisaa nea.

5 Hanu roe oyo, sio imam no siniriu, sio matuhete Musa ne maunauna runa sio ona Yahudi nesia rei oamanouso mai kota Yerusalem. 6 Oamanouso runa sio imam no ia mainae wain nanai Hanas runa Kayapas, Yohanis, Aleksander, runa ia mainae rei ne enau umau honu. 7 Oyo orori sio ua rei oamananeso, samatoro oasei tanso san rei, “Ia seia irui kawasa osimo na osuisene ia wain naone italai rei? Ohete ia seia nanai?”

8 Oyo Petrus isupu kawasa rerihoni Anahatana Ne Inaha reiso iasau san rei, “Omi ona Yahudiu. 9 Omi wani oasei tanuma ranie hatae reini tau ami auna iake. Akahai ia wain naone italai rei. Reiso nanie oanei sapani na asuisenei rotu-tu ia iake nea. 10 Reiso kahurae omi runa sio Yahudiu pusimo oanei ata ia rei wain ioo iamananemo mai rei tinain iake nea, tau Yesus Kristus, ia wain on pan nia Nasaret rei, ne kawasa. Yesus reimo, omi orerei roe hini wani reniene. Ne Anahatana iapuhaiki honu. 11 Yesus rei, sio oanamana tanui tau Anahatana ne anamanaya san rei,

12 Yesus ruai man bisa iapuheuta na iamahaita rotu-tu ria supan. Mai tuniai reini pusiki mo, ia isa iae ne kawasa iapuheu na iamahaita tewa. Hasae Yesus sahoro ne kawasa.” 13 Sio onata oatinu ata Petrus runa Yohanis uaso okaitau oanamana tewa. Masike sio mainaya tewa, okaitau tewa. Masike sio isikola tewa, okaitau tewa. Reiso osira. Oyo sio anoo rapeka runa naone uaso okata-kata Yesus. 14 Ne sio mka oasau sapan? Ia wain naone italai rei wain ioo iamananeso ikata Petrus runa Yohanis. Ia wain ieui iake nea. 15 Reiso sio onata oaisosi uaso ohokaso onapa pan manahane na sio ruao oanamana osi umau. 16 Oyo oasei tau umau, “Kahurae ita iuna sae runa sio ua rei? Sio pusiso mai kota Yerusalem reini oanei nea ata sio ouna sima-simane rei. Sapan na ita iauhaa? 17 Ne mai, ita iputa isauso na pene oanamana osiso ohete Yesus nanai nea na pene sima-simane rei, sio panesi oatinu rerihoniki honu.”

18 Reiso sio oanaha runa uaso na onususo honu, oyo osopo uaso na pene ohete Yesus nanai nea runa pene oatuheteso rerihoni Yesus.

19 Ne Petrus runa Yohanis oasau san rei, “Ruamo oarinii. Nene manisate tau Anahatana matai usena wani sapan? Apusu omi mo maunaune te apusu Anahatana ruai ne maunauna? 20 Ami arihoni iake tewa. Kahurae asima rerihoni ruama anoo sae runa atinu sapan.” 21 Sio onata rei osupu manaete isa tewa nea na oapasanaso. Reiso oputa osauso honu, oyo ohokaso. Tau sae, sio pusiso mka openeso tau rei. Sio wason oainaa runa Anahatana tau sima-simane rei. 22 Ia wain naone italai rei wani ia iake nea tau sima-simane rei, ne musum hutu ate nesi nea.

23 Sio onata ohoka Petrus runa Yohanis arihoni pui anoe, samatoro uaso onunso pan no netau wason oparisaa rei. Hoka pan, oyo osima runa sio imam onata runa sio ona Yahudi nesia rei oasau sapan. 24 Satinu tau no anamanaya rai, oyo oainisi tau Anahatana anoo osa. Oahata, “Mania Upu. Ano ahaye tau nante, runa tuniai reini, runa nuae runa pusire waron. 25 Tau Me Inaha, auna mania upu aia Daud, ia rei wain me manorine, aunai iasau san rei,

27 Poe oyo, ereeu sani iasau rei sirinia. Herodes runa Pontius Pilatus oamanouso mai kota reini nea. Oamanouso runa sio wason oationa Anahatana tewa runa sio Israel oi. Oamanouso nanie otuntana runa me manorine, Yesus wain ia manisate onate rei. Ia rei, ano ahitiki tau Ia Anahatana Iratiki Iapuheuso nea. 28 Oamanouso na ouna pusire waron ano aunuture tau me kawasa runa me kaheute naone na ereeu san rei. 29 Reiso, Upu, muie reini mo, masi atinu sapani na oputa osauma. Akahaima, me manorina rei, na aunauso tau Sou Iake rerihoni Yesus na pene akaitau. 30 Atuheteso rerihoni me kawasa sapan. Asuisene sio kupua, auna sima-simana tau me kawasa runa sima-simana raasiraso runa kawasa rerihoni ahete Yesus nanai. Yesus me manorine wain manisate onate.”

31 Oainisi pusi oyo, naniao mananoune rei erekoka. Oyo Anahatana Ne Inaha irui kawasa osiso na osima runa Anahatana ne maunauna. Okaitau tewa.

32 Sio pusiso wason oparisaa, oarinii sani sio osa, anoo osa. Ia isa iasau tewa ata, “Au we apia rei, osi au ruaku man.” Ne osama no apia pusire osi umau. 33 Tau kawasa mainae, sio maisosia osima osiso ata Yesus wain iamahaiki honu. Anahatana irui iake mainae osiso. 34 Waini ia isa tewa rerihoni sio rei wain ne apia tewa, ne muaine tewa. Tau sae, sio pusiso sahoro no tuamana, no numau, taue isa oahenre, oyo orori kepen waron osupure. 35 Ororire oyo, oruire osi sio maisosia na osamare osi sio wason no apia tewa, sio wason no muaio tewa.

36 Sani rei oi runa Yusup. Sio maisosia oaoiki tau Barnabas (nene nohue Ia Sahoro Iaunau Sio Wasoni Anoo Mtinte). Ia ne ipane Lewi. Iamrai nau nusa wani nanae Siprus. 37 Ia rei, iahen ne tuamane isa, oyo irori kepen waron isupure na iruire osi sio maisosia. Iruire na osamare osi sio wason no apia tewa, sio wason no muaio tewa.