MARKUS
Ikanu Sou Iake rerihoni Yesus
Anamana mautunue
Sio Saraneu naone oasau ata ia wain ikanu surate reini mo, ia hanaie isa wain nanai Markus. Markus wain ieu ikata-kata Petrus tau osima runa Sou Iake. Sae wani iatinu arihoni Petrus, ikanui mai surate reini.
Sani ita ihatae tau surate reini, ihatae rerihoni sae wan Yesus iunai runa sae wan iatuhetei osi ne mampusua. Yesus iasau ata Sou Iake wan reasau ata Anahatana irime tuniai reini. (1:14-15) Ia ne kawasa tau isuisene sio kupua runa inei sakahatena waron ramasuni mansia. Sio wason orime sio Yahudiu oatinu tanui tewa na onina nanie ohunui (3:6). Ne Yesus ipenei iruma arihoniso. Ia iasau nea ata mka sio ohunui. (8:31; 9:31; 10:33-34) Ia ieu roe kota Yerusalem tau inina nanie irui ruai tau ikata ita mansiau re rosa. Sio ohunui, oyo ia iamahaiki honu.
Markus nanie ikanu surate reini na iasau ata Yesus mo, Ia wain Iapuheuta runa Anahatana Anai (1:1, 11, 24; 3:11; 5:7; 8:29; 9:7; 14:61-62; 15:39). Ia iae nanie iasau osi ita na masike isupu siraka sae ne ipusu Yesus sirinia (8:34-38; 10:29-31).
1
Yohanis ia mamsohue iseka tau arena osi Yesus
1-2 Au nanie usima na Sou Iake rerihoni Yesus Kristus. Yesus Kristus mo, Anahatana Anai. Sou Iake rei nene aikune wan san naone wan ia mamsima runa Anahatana ne maunauna isa wain nanai Yesaya ikanui. Ikanu ata Anahatana iasau osi Anai, Yesus, san rei,
“Anahatana iasau ata, ‘Au mka uaisosi we ia mamsimae isa ianaone.
Ia mka iseka tau mansia anoo, noo sani oseka tau arena osi aia, na inikui noi arena rei.1:1-2 Maleaki 3:1
3 Ia isa nioi iakapona ria otoe huie san rei,
“Sani sio oseka tau arena osi ia mainae,
aunauso rerihoni Au, na oatinu tau Upuri
san ouna arena katopue na mka ieu pusui.” ’ ”1:3 Yesaya 40:3
4 Yesaya ikanu san rei, areimo sani Yohanis ihokai pan otoe huie. Ihokai na isohuso na mansiau oanei ata oarihon no rosau nea. Iaunauso san rei, “Oarihon mo rosau na Anahatana isiru heu mo rosau rai. Oarihonre, oyo usohumo na mansiau oanei ata oarihon mo rosau nea.”
5 Mansia pusiki sui otoe Yudea runa kota Yerusalem ohoka, nanie oatinu Yohanis ne maunauna. Oamanaku no rosau, oyo Yohanis isohuso na mansiau oanei ata oarihon no rosau nea. Isohuso pan Wae Yordan.
6 Yohanis mo, iausahu papite wan ounai arihoni makapana wan nanae unta nene hunua. Inene koropou unte pan ahai. Iai kauka runa kilalan wesie. 7 Iaunauso san rei, “Mka ia isa ihokai tau muie. Ia reimo mka ne kawasa mainae renesi au. Au mo, au mainae tewa. Reiso ukanahata na unosu ne sandaliu arihoni ain atua man iae, iake tewa oi. 8 Usohumo tau tihu na mansiau oanei ata oarihon mo rosau nea. Ne Ia sahoro mka irui Anahatana ne Inaha osimo.”
Yohanis isohu Yesus
9 Oyo Yesus ihokai on poe nia Nasaret poe otoe Galilea, samatoro Yohanis isohui pusu monne ria Wae Yordan. 10 Isohui pusi, oyo Yesus ihokai arihon waene rei, inoo nante rehekai. Oyo Anahatana Ne Inaha isipui. Anahatana ne Inaha rei mo, nooi sani manu puane. Isipui, 11 oyo iatasohoi roe Yesus. Iatasohoi oyo oatinu nioke isa on roe noiyaha. Iahata, “Ano mo, Au Anaku. Anoku runaya nai osa. Anoku iake tau Ano.”
12 Mata hun tewa oi, oyo Anahatana Ne Inaha iaisosi Yesus ieui ria otoe huie. 13 Reiso iruei ria otoe huie rei, onona hutu ate. Oyo ia aia sakahatene ireai na ipalalosa. Binatang seata warora rei oi. Ne Anahatana ne maisosia on roe noiyaha ohoka oakahaiki.
Yesus ioi sio mamhikua ate
14 Sio oaresi Yohanis nea, oyo Yesus ieui poe otoe Galilea. Ieui poe rei, nanie isima runa Sou Iake rerihoni Anahatana. 15 Hoka poe, isima ata, “Anahatana nanie irime ne mansiau nea. Oarihon mo rosau. Oparisaa tau Sou Iake rerihoni Au.”
16 Taue isa Yesus wain ieui ipusu Wae Galilea nusue, oyo inoo sio mamhikua ua. Sio ua reimo, Simon runa wanin Anreas. Uaso wason ohikuso onina ikae. 17 Yesus iasau osiso ata, “Mai na opusu Au. Mka uatuhetemo na oeu onina mansiau na opusu Au, nooi sani oeu onina ikae rei.”
18 Oyo oarihon no ueta rai sirinia, samatoro opusu Yesus.
19 Yesus ieui hainau mkane, ita inoo Sebedeus ne hehuka, Yakobis runa wanin Yohanis. Uaso wasopan no arupai anoe, oseka tau no ueta. 20 Oyo Yesus ioiso rei sirinia. Reiso oeu arihon noa ama pan arupai anoe rei runa sio umau honu. Oarihoniki runa sio wason isehaso na opakarian osiki rei. Oyo uaso oeu opusu Yesus.
Yesus inei sakahatene arihon mansia
21 Yesus runa ne mampusua oeu rotu-tu ohokaso pan kota Kapernaum. Tau ranie hatae isa wan ita Yahudiu iamuira Anahatana, Yesus inusui pan sio Yahudiu no numa mananoune, nanie iatuhete pan rei. 22 Sio wason oatinui rei, osira tau ne anamanaya rai. Tea mo, iatuhete runa ne kawasa. Iatuhete san sio matuhete Musa ne maunauna tewa.
23 Oyo Yesus iatuheteso pan sio Yahudiu no numa mananoune. Pan rei, ia isa waimo sakahatene remasuniki. Oyo sira tau iakapona ata, 24 “Yesus, Ano Nasaret. Nanie amunama? Ahokaya reini mo, nanie ahunuma si? Uaneia nea. Ano mo, Ano manisate onate. Ahokaya on roe Anahatana!”
25 Ne Yesus iasau osi sakahatene rei. Iahata, “Amaturua! Ahokaya arihon ia reno.”
26 Reiso ia rei ikananunu tau sakahatene rei remasuniki, oyo iasanoata. Oyo sakahatene rei rehokai arihoniki rei sinia. 27 Rehokai oyo sio pusiso osira hun ruao. Reiso oasei mai umau oahata, “Ira oe! Sae reini? Matuhete honue maa! Tau ne kawasa iaisosi sakahatena rahoka, oyo rahokaso rei sirinia tea!”
28 Reiso mata hun tewa oi, oyo sio pusiso oatinu rerihoni Yesus sui otoe Galilea pusiki.
Yesus isuisene sio panesi
29 Yesus ikata Yakobis runa Yohanis, oyo tonso ohokaso oarihoni sio Yahudiu no numa mananoune rei, samatoro oeuso poe Simon runa Anreas no numa. 30 Simon inai hanahanai waipo inekei. Tea mo, titie retanunui. Reiso osima runa ne kupue rei osi Yesus. 31 Oyo Yesus ieui poe, iakahuu ia pina onate hanai atue, samatoro iakahaiki ihitioi. Oyo ia pina onate rei, ne kupue iake rei sinia. Ia iake nea, oyo inana muaine osi pusiso oaiso.
32 Nene manin ruru san rei, mansiau orori sio kupua runa sio wason oauwena na sakahatena. 33 Reiso sio niane hahae rei pusiki, pusiso oamanouso haineke Petrus ne numa mitanunue. 34 Oyo Yesus isuisene sio panesi wason osupu kupu nita-nitaya, inei sakahatena. Ne isopo sio sakahatena rei na pene oanamana. Areimo tau raanei ata Yesus mo, Ia seia.
Yesus iaunau pan otoe Galilea
35 Nene hanroe omnano tunne san rei oyo, Yesus ihanui. Ihanui oyo ieui arihon numa rei. Ieui na pan otoe isa wan meneta nai osa, nanie iainisi tau Anahatana. 36 Ne Simon sio oeu oninai. 37 Taa osupui, oasau osiki ata, “Sio pusiso wason oeu oninaya rei!”
38 Ne Yesus iasau osiso ata, “Mai, na ieuta sui nia tamena sui otoe Galilea reini. Na usima na Sou Iake rerihoni Au osi sio oi. Tea mo, uhokaku mai rei mo, tau rei, tea!”
39 Reiso Yesus ieu ihori otoe Galilea rei pusiki. Ieu isima na Sou Iake rerihoni Anahatana sui sio Yahudiu no numa mananouna na ieu isuisene sio wason oauwena runa sakahatena.
Yesus isuisene ia wain ikupu unte wan iake tewa nai osa
40 Taue isa, ia isa wain ikupu unte wan iake tewa nai osa ieui mai Yesus. Hoka mai, irike tune iakapuni Yesus ain isopa ikokuroui. Oyo iainisi na Yesus isuisenei. Iahata, “Upu. Sani me maue mo, mai na asuiseneku, areimo Ano me kawasa asuiseneku.”
41 Yesus anoi runai, reiso iahusiei. Iahata, “Au we maue. Reiso ano iake nea.”
Oyo ia rei iake rei sinia.
42 Ranie hatae rei sinia, oyo kupue rei rerihoniki rei sinia. Kupue rei rerihoniki, oyo ia kupu unte rei iake rei sinia. 43 Oyo Yesus iaisosiki ieui. Iasau osiki ata, 44 “Anom repeka. Asupu sio umau mo, pene aruni. Ne aeua pan ia imam isa na ainisi na inooa. Arui manua ua osiki na ikenure osi Anahatana sani Musa iaunau rei. Tau rei, sio pusiso mka oanei ata ano iake nea.”
45 Ne ipusu Yesus ne maunaune rei tewa. Ieu suru ria, suru nau iruni osi sio panesi. Iahata, “Yesus isuiseneku.”
Reiso iruni suru ria, suru nau rotu-tu Yesus inusu niana mo, iau-iauhuniki man. Iruei iauhuniki pan otoe huia man. Ne sio on ria, on nau ohokaso mai tanui sui osa sinia.