22
M'fananizo wa m'sinda wa malowozi
(Luk 4:15-24)
1 Jezu adawauza pomwe mwa mifananizo aciti: 2 “Umambo bwa kudzulu budakhala ninga mambo omwe adakondza uzokoto bwa m'sinda wa malowozi ya mwana wace. 3 Adatuma akapolo wace kuna omwe akhadacemeredwa kuuzokoto, adawauza kuti abwere. Tsono iwo adalamba kubwera.
4 “Adatuma pomwe akapolo anango adati: ‘Uzani omwe acemeredwa kuti ndakondza uzokoto bwangu: Ng'ombe zangu tumikono twakunenepa, ndipo bzentse bzakondzedwa kale. Bwerani kuuzokoto bwa malowozi!’
5 “Tsono iwo alibe kum'tetekera ndipo adacoka, m'bodzi kumunda kwace, winango kumalonda yace. 6 Anangowo, adaphata akapolo, adawaboneresa aciwapha. 7 Mambo adakalipa ndipo adatumiza acikunda wace, acikapha akambowa wale na kutentha mzinda wawo.
8 “Pamwepo adauza akapolo wace aciti: ‘Uzokoto bwa m'sinda wa malowozi bwakwana, tsono omwe ndikhadacemera akhalibe kuthemera. 9 Tsapano ndokoni m'magonyo ndipo cemerani kuuzokoto wentse omwe muniwona’. 10 Pamwepo akapolo adacoka aciyenda muzinjira ndipo adagumaniza wanthu wentse omwe adagumana nawo, wabwino na wakuipa, ndipo cipinda ca uzokoto bwa m'sinda wa malowozi, cidadzala na wakucemeredwawo.
11 “Tsono pomwe mambo adapita kuti awone wakucemeredwawo, adawona mwemo mwamuna m'bodzi omwe akhalibe cakubvala ca pamsinda wa malowozi. 12 Ndipo adam'bvundza kuti: ‘Xamwali, kodi iwepo wapita tani muno ulibe cakubvala ca pamsinda wa malowozi?’ Iye adakhala zii.
13 “Pamwepo mambo adauza omwe akhatumikira kuti: ‘M'mangeni manja na minyendo, m'muthuse kunja, kum'dima. Kumweko an'dzalira acikukuta mano’.
14 “Nakuti wakucemeredwa ni azinji tsono wakusankhuliwa ni ang'ono-ng'ono”.
Nkhani ya mtsonkho
(Mko 12:13-17; Luk 20:20-26)
15 Pamwepo afalizi adacoka acikacita citalo cakuti atape m'kanwa Jezu. 16 Ndipo iwo adam'tumizira wakupfundzira wawo pabodzi na waphathi ra Herodi kukam'bvundza kuti: “Misiri, tin'dziwa kuti ndimwe wakulungama ndipo mumbapfundzisa njira ya Mulungu mwacadidi, ndipo Imwe mulibe thupo na munthu ali yentse thangwe mumbanyang'ana lini khalidwe la wanthu. 17 Na tenepo tiuze: Kodi uli kuwona tani? Ni bzakubvumizidwa kulipira mtsonkho kwa m'tongi m'kulu Sezari ayai nee?”
18 Tsono Jezu, pakudziwa ndzeru zawo zakuipa adawabvundza kuti: “Wacipha-masomwe! Thangwe ranyi mulikundiyeza? 19 Ndiwoneseni kobiri yomwe mumbaphatisa basa pakupereka mtsonkho”. Iwo adamuwonesa denariyo*Denariyo ikhali kobiri ibodzi ya ndzayaya icikhala ya parata, yomwe ikhalingana na ntsiku ibodzi ya basa., 20 ndipo Iye adawabvundza kuti: “Nkhopeyi na manembaya ni bzayani?”
21 Iwo adatawira kuti: “Ni bza Sezari”.
Ndipo Iye adawauza kuti: “Na tenepo, pasani†Ayai kuti: “Bwezerani”. Sezari bzomwe ni bza Sezari ndipo bza Mulungu bzomwe ni bza Mulungu”.
22 Pomwe iwo adabva bzimwebzi, adakhala wakudabwisidwa. Ndipo adam'siya, wacicoka.
Bza kulamuka kwa wakufa
(Mko 12:18-27; Luk 20:27-40)
23 Ntsiku imweire, sadusi, omwe ambati kulibe kulamuka kwa wakufa, adafendera pafupi na Iye acimubvundza kuti: 24 “Misiri, Mozeji adalewa kuti penu munthu m'bodzi an'fa acisaya kusiya wana, bzin'funika kuti m'bale wace alowole masiwayo kuti am'balire nyamuyayo‡Deu 25:5. 25 Tsono pakati pathu abale anomwe. Wakuyamba adalowola mkazi, ndipo adafa alibe kusiya wana, mkaziyo adasiira m'bale wace. 26 Bzibodzi-bodzi bzidacitika kwa waciwiri, wacitatu mpaka wacinomwe. 27 Ndipo pakumalizira kwa wentse, adadzafambo mkaziyo. 28 Kodi tsapano, pakulamuka kwa wakufa an'dzakhala mkazi wa yani pa anomwewo? Pakuti wentsenewo akhadamulowola!”
29 Jezu adatawira aciti: “Imwepo mulikubzipumpsa thangwe ra kusaya kudziwa Manemba ngakhale phambvu ya Mulungu! 30 Pakudzalamuka kwa wakufa, wanthu an'dzalowolana lini ngakhale kudzacita malowozi. Tsono an'dzakhala ninga anju kudzulu. 31 Ndipo bza yakulamuka kwa wakufa, imwepo mulibe kulewenga bzomwe Mulungu adakuuzani kuti: 32 ‘Ine ndine Mulungu wa Abrahamu, Mulungu wa Izaki, Mulungu wa Jakobo?’§Eks 3:6 Iye ni Mulungu lini wa wakufa, tsono wa amoyo!”
33 Pomwe mithithi idabva bzimwebzi, idadabwisidwa na cipfundziso cace.
Lamulo likulu
(Mko 12:28-34)
34 Pomwe adabva kuti Jezu adasiya aSaduki alibe fala lakuti am'tawire, afalizi adagumana. 35 Ndipo m'bodzi wa iwo, misiri wa Mtemo adamuyeza pa kum'mbvundza aciti: 36 “M'pfundzisi, lamulo likulu la Mtemo ndiponi?”
37 Jezu adam'tawira kuti: “ ‘Funa Mbuya, Mulungu wako na m'tima wako wentse, na moyo wako wentse ndipo na ndzeru zako zentse’**Deu 6:5. 38 Limweri ndiro lakuyamba ndipo lamulo likulu. 39 Ndipo laciwiri lakulingana na limweri, ni iri: ‘Funa mwandzako ninga momwe umbabzifunira iwe wekha’††Lev 19:18. 40 Pa malamulo mawiriya yambateweza Mitemo yentse na cipfundziso ca Apolofita”.
Krixtu mwana wa Davidi
(Mko 12:35-37; Luk 20:41-44)
41 Afalizi akali pamtsonkhano, Jezu adawabvundza kuti: 42 “Imwepo mun'kumbuka ciyani bza Krixtu‡‡Krixtu: Padutswa limweri bzikhalewa kuti Mesiya. ? Kodi iye ni mwana wayani?”
Iwo adatawira kuti: “Ni mwana wa Davidi”.
43 Iye adawauza kuti: “Tsono, ni thangwe ranyi Davidi mwa Mzimu Wakucena, ambacemera ‘Mbuya’? Na tenepo Iye ambatsimikiza kuti:
44 “ ‘Mbuya§§Ayai Mulungu. adalewa kuna Mbuya wangu:
Khala kuboko langu lamadidi,
mpaka Ine ndidzaikhe anyamadulanthaka wako
pantsi pa ndzayo zako’***Mas 110:1.
45 Tsono, penu Davidi ambamucemera ‘Mbuya’, Iye angakhale tani mwana wace?” 46 Palibe omwe akhakwanisa kum'tawira. Ndipo kuyambira ntsiku imweire palibe na m'bodziyo omwe adakhwimika kuti am'bvundze pomwe.