11
Bza mboni ziwiri
1 Adandipasa mtete wakundendemera na kamuti ka mphimo, ndipo adandiuza kuti: “Ndoko ukapime Nyumba ya Mulungu na guwa, ndipo ukalewenge wakutumbiza Mulungu omwe ali kumweko. 2 Tsono ukasiye cimtalo ca kunja ca Nyumbayo, leka kukacipima nakuti ico cidaperekedwa kuna wakusaya kupemba*Wakusaya kupemba: Bzinilewa kuti omwe ni aJuda lini.. Iwo an'dzaponda mzinda wakucena mkati mwa minyezi makumi manai na miwiri (42). 3 Nin'dzapasa mphambvu mboni zangu ziwiri (2), izo zin'dzapolofita zidabvala masakha†Kubvala masakha: Bzikhawonesa kufedwa ayai kukhumbula. m'kati mwa ntsiku culu na madzana mawiri na makumi matanthatu (1.260)”. 4 Mboni zimwezi ni miti miwiri (2) yakucemeredwa olivera‡Zak 4:3,11-14 na bzakukhazikira bziphaniphani bziwiri (2) bzomwe bziri patsogolo pa Mbuya wa dziko lentse. 5 Penu winango ali-yentse an'dzafuna kuzipweteka, pamulomo pa mbonizo pan'dzacoka moto omwe un'dzadzonga anyamadulanthaka wazene. Ni tenepoyo momwe an'dzafera munthu ali-yentse omwe angadzafune kuzipweteka. 6 Amuna amwewa ana mphambvu za kufunga kudzulu, mwakuti kungabvumbe lini panthawe yomwe angakhale ali kupolofita, ndipo ana mphambvu za kusandusa madzi kukhala mulopa na kudzonga dziko la pantsi na cisi, kazinji-kentse momwe angafunire.
7 Ndipo iwo akadzamaliza umboni bwawo, cirombo cakucokera§Cid 13:5-7; 17:8 pantsi muCigwindza cin'dzawapweteka. Ndipo cin'dzawakunda cicidzawapha. 8 Bzitanda bzawo bzin'dzakhala mumseu wakuyamba wa mzinda ukulu**Jerusalema, omwe madzina yakusuzira ni Sodoma na Ijipito, komwe kudakhomeredwambo Mbuya wawo. 9 M'kati mwa ntsiku zitatu na meya, wanthu wa mbumba yentse, madzindza yentse, bzilewedwe bzentse na madziko yentse an'dzawona bzitandabzo ndipo an'dzabvumiza lini kuti bzikapendesedwe. 10 Wanthu wakukhala padziko an'dzakondwa thangwe ra kufa kwa mbonizo ndipo an'dzakondza cikondwereso, acimbadzatumizirana malonjero m'bodzi na mwandzace, nakuti apolofita awiriwa (2) akhadaboneresa wanthu wakukhala padziko.
11 Tsono zatapita ntsiku zitatu na meya, mphuwe ya moyo yakucokera kuna Mulungu idapita muna iwo, ndipo iwo adaimirira, ndipo wale omwe akhawawona adakhala na mantha kwene-kwene. 12 Pamwepo, iwo adabva fala la mphambvu kucokera kudzulu liciti: “Kwirani kuno”. Ndipo iwo adakwira kudzulu mum'tambo, uko anyamadulanthaka wawo akhawawona.
13 Nthawe ibodzi-bodziyo padabveka kutekenyeka kwamphambvu††Cid 16:18, ndipo cipande cibodzi ca bzipande khumi bza mzinda cidanyunguduka. Bzulu bzinomwe (7.000) bza wanthu adaphedwa na citeketeke. Omwe adasala na moyo adakhala na mantha ndipo adapasa mbiri Mulungu wa kudzulu.
14 Tsoka laciwiri lidapita, tsono tsoka lacitatu lin'bwera tsapanopa.
Cimbututu cacinomwe
15 Anju wacinomwe adaliza cimbututu cace ndipo kudzulu kudabveka mafala yamphambvu yakhambati:
“Umambo bwa dziko la pantsi
wasanduka bwa mbuya wathu
na bwa Krixtu wace‡‡Krixtu: Ni kulewa kuti wakudzozedwa.,
ndipo Iye an'dzatonga
kwakusaya kumala”.
16 Akulu-akulu makumi mawiri na anai (24) omwe akhadakhala pamipando yawo patsogolo pa Mulungu adagodama acigwesa nkhope zawo ndipo adapemba Mulungu, 17 aciti:
“Nkhombo zikhale kwa imwe,
Mbuya Mulungu Wamphambvu-zentse,
omwe ndimwe ndipo mukhali,
thangwe mudawonesa
mphambvu zanu zikulu
ndipo mudayamba kutonga.
18 Madziko yadakalipa,
ndipo ukali bwanu budawoneka.
Yafika nthawe yakutonga
wakufa,
ndipo yakubwezera phindu
kwa anyagirinya wanu apolofita,
wakucena wanu
ndipo na omwe ambalemekeza dzina lanu§§Mas 115:13,
napo ang'ono
napombo akulu,
ndipo na wakupfudza
omwe an'pfudza dziko la pantsi***Mas 2:5; 110:5; 115:13”.
19 Pamwepo mbuto yakucena ya Mulungu idafungulidwa kudzulu, ndipo idawoneka kaxa la cipangano. Padabveka kugunda†††Cid 8:5; 16:18, muwira, mpheni, kutekenyeka na mbvula ikulu ya matalala.