15
Anju anomwe (7) na bzisi bzinomwe (7)
1 Ndidawona kudzulu cizindikiro cinango cikulu ndipo cakudabwisa. Anju anomwe (7) akhana bzisi bzinomwe (7) bzakumalizira, nakuti na bzisi bzimwebzo ukali bwa Mulungu budamalizika. 2 Ndidawona cinthu cakulingana na nyandza ya vidru yakusanganizika na moto, ndipo pafupi na nyandza pakhadaima wale omwe akhadakunda cirombo cire, cifanikizo cace na mulewengo wa dzina lace. Iwo akhadaphata santsi zomwe akhadapasidwa na Mulungu, 3 ndipo akhaimba nyimbo ya Mozeji*Eks 15:1, nyagirinya wa Mulungu, ndipo na nyimbo ya Bira acimbati:
“Makulu na yakudabwisa
ni mabasa yanu,
Mbuya Mulungu Wamphambvu-zentse.
Zakulungama na zacadidi
ni njira zanu,
Imwe, Mambo wa madziko.
4 Mbani an'dzasaya kugopa†Jer 10:7 Imwe, Mbuya?
Mbani an'dzasaya kutumbiza dzina lanu?
Nakuti Imwe mwekha ndimwe wakucena.
Madziko yentse yan'dzabwera patsogolo panu
ndipo yan'dzakutumbizani,
nakuti mabasa yanu yakulungama
yadawoneka padeca”.
5 Bzatapita bzimwebzi, ndidanyang'ana ndipo ndidawona kudzulu kukhadafunguka mbuto yakucena yomwe ni cikumbi ca umboni‡Eks 40:34. 6 Pambuto yakucenayo padacoka anju anomwewo (7) na bzisi bzinomwe (7). Iwo akhana bzakubvala bzakucenesedwa ndipo bzakuyetimira, ndipo akhana bzimabhande bza oro mcifuwa. 7 Ndipo cibodzi ca bzamoyo bzinai (4) cidapereka kuna anju anomwe (7) tacu zinomwe (7) za oro zakudzaza na ukali bwa Mulungu ana moyo kwakusaya kumala. 8 Mbuto yakucena idadzala na utsi§1Az 8:10-11, S2Mb 5:13-14; Iza 6:4 bwa ukulu bwa Mulungu na mphambvu zace, ndipo palibe omwe angadakwanisa kupita munyumba yakucena uko cikanati kumala cisi cinomwe (7) ca anju anomwe (7) wale.