9
Mulungu na mbumba yace yakusankhulidwa
1 Ndirikulewa cadidi mwa Krixtu, ndiri kunama lini. Bzakukumbuka bza mum'tima mwangu bzirikutsimikiza mwa Mzimu Wakucena kuti 2 ndina m'sunamo ukulu na kuwawidwa kwakusaya kumala mum'tima mwangu. 3 Nakuti ine ningadafuna kutembereredwa na Mulungu ndicimwazana na Krixtu, bzingadakhala kuti bzin'bweresa phindu kuna abale wangu omwe ni wa m'tundu wangu, 4 mbumba ya Ijirayeri. Iwo adayanyidwa ninga wana. Bzomwe adatambira ni Ulemerero bwa Mulungu, mipangano, kupasidwa kwa M'temo, kutumbiza mu Nyumba ya Mulungu na mipiciro. 5 Yawo ni makolo yakutoma, ndipo Krixtu ni wa dzindza lawo mu thupi. Umweyo ni Mulungu padzaulu pa wentse, atumbizidwe kwakuyenda na kuyenda! Ameni.
Kulambidwa kwa Ijirayeri kun'kwanirana lini na mipiciro ya Mulungu
6 Mbatireke kukumbuka kuti cipicira ca Mulungu cidakhala cakusaya basa. Pakuti ni wentse lini wa dzindza la Ijirayeri omwe ni aIjirayeri. 7 Napo akhali wa dzindza la Abrahamu, sikuti wentse adakhala wana wa Abrahamu. Tsono bzidanembedwa kuti: “Dzindza lako lin'dzalewengedwa kucokera mwa Izaki”*Jen 21:12. 8 Bzimwebzi ni kulewa kuti, omwe anirewengedwa ninga wana wa Abrahamu caiwo ni wale omwe adabadwa mwa cipiciro ca Mulungu, sikuti wale omwe adabadwa mwa thupi. 9 Thangwe fala la cipiciro ndiri: “Panyengo ninga ino nin'dzabwera ndipo Sara an'dzakhala na mwana”†Jen 18:10, 14.
10 Ndipo bziribe kucitika tenepa kwa iye yekha, tsono kwa Rebekambo. Adabala wana awiri wa mamphese wa baba m'bodzi, baba wathu Izaki. 11 Ndipo wanawo akhanati kubalidwa, ngakhale kucita cabwino ayai cakuipa, (kuti cakulinga ca Mulungu ca kusankhula mwana m'bodzi cipitirize, 12 sikuti kudzera mwa mabasa nee, tsono kwa Ule omwe an'cemera) Mulungu adauza Rabeka kuti: “M'kulu an'dzatumikira m'ng'ono”‡Jen 25:23. 13 Ninga bzidanembedwa kuti: “Ndafuna Jakobo, tsono ndalamba Ezau”§Mlk 1:2-3.
14 Tsono tinirewanyi? Kodi Mulungu ngwakusaya kulungama? Ni tenepoyo lini! 15 Pakuti Iye adauza Mozeji kuti:
“Nin'dzacitira cifundo ule
omwe ningafune kumucitira cifundo
ndipo nin'dzacitira ntsisi ule omwe
ningafune kumucitira ntsisi”**Eks 33:19.
16 Na tenepo, bzimbadza lini na kufuna ayai nyongo ya munthu, koma na cifundo ca Mulungu. 17 Nakuti malingana mubzakunemba, Mulungu adauza Falau kuti: “Ine ndakuikha ninga mambo na citalo cimweci: Cakuti ndiwonese mphambvu yangu mwa iwe, ndipo kuti dzina langu lipalidzidwe padziko lentse”††Eks 9:16. 18 Na tenepo Mulungu ambacitira cifundo ule omwe iye an'funa, ndipo ambaumisa m'tima wa omwe an'funa.
19 Tsono m'bodzi wa imwepo akandiuza kuti: “Penu ni tenepoyo, Mulungu an'tipasiranyi mulandu? Nakuti mbani angalambe cifuniro cace?” 20 Kodi iwepo ndiwe yani, munthu iwe, kuti ucite makani na Mulungu? Bzingacitike kuti cakuumbidwa cingabvundze omwe adaciumba kuti: “Thangwe ranyi udandiumba tenepa?”‡‡Iza 29:16, 45:9 21 Kodi nyakuumba angaleke kukwanisa kuumba cikalango cakuphatisira bzabwino ndipo cinango cakuphatisira bzakunyantsa na dongo libodzi-bodziro?
22 Ni tenepoyombo Mulungu, pakufuna kulatiza ukali bwace na kudziwisa mphambvu zace, adapirira mwakuderekha m'tima kwene-kwene na bzakuumbidwa bzakukalipisa, bzomwe bzikhadakondzekeredwa kuti bzidzongedwe. 23 Ndipo pakufuna kudziwisa udali bwa ulemerero bwace mu bzakuumbidwa bzomwe bzidatambira cifundo, bzomwe akhadakondzekera kale kuti bzitambire ulemerero, 24 bzomwe ndife, omwe Iye adacemerambo, sikuti pakati pa aJuda okha, tsono pakatimbo pa omwe ni aJuda lini. 25 Tenepoyombo ninga bzomwe Mulungu adalewa mubukhu la Ozeya kuti:
“Nin'dzacemera ‘mbumba yangu’
omwe akhali rini mbumba yangu,
ndipo ‘wakufunidwa wangu’
omwe akhali rini wakufunidwa”§§Oze 2:23,
26 Ndipo:
“Bzin'dzacitika kuti pa mbuto ibodzi-bodziyo
pomwe adawatsimikizira kuti:
‘Imwepo ndimwe lini mbumba yangu’,
iwo an'dzacemeredwa
‘wana wa Mulungu wamoyo’ ”***Oze 1:10.
27 Tsono Izaiya adalewa mwakukuwa cipande ca Ijirayeri kuti:
“Ngakhale kuti mbogo
ya aIjirayeri
ingakhale ninga m'cenga wa m'nyandza,
wakusala okha ndiwo
an'dzapulumuka.
28 Pakuti Mbuya an'dzakwanirisa fala lace
padziko lentse,
mwakanfulumize ndipo mwakumaliziratu”.†††Iza 10:22, 23
29 Ninga Izaiya akhadalewa kale kuti:
“Penu Mbuya wa acikunda
angadaleka kutisiyira dzindza,
tingadakhala ninga Sodoma,
ndipo ticiringana na Gomora”‡‡‡Iza 1:9.
Kusaya kukhulupirira kwa Ijirayeri
30 Tinirewanyi tsapano? Omwe ni aJuda lini, akhanyang'ana lini kulungamisidwa, tsono adadzalungamisidwa kudzera mwa cikhulupiriro, 31 tsono Ijirayeri omwe akhanyang'ana M'temo omwe ungadawabweresera kulungamisa, alibe kuukwanisa. 32 Thangwe ranyi? Thangwe akhaunyang'ana lini na cikhulupiriro, tsono na mabasa yawo. Iwo adagwa na “mwala wakugwegwedusa”. 33 Ninga bzidanembedwa kuti:
“Ndirikuikha muSiyau
mwala wakugwegwedusa,
tsendwa lomwe lin'citisa kuti agwe,
ndipo ule omwe an'dzamukhulupirira
an'dzabva lini manyazi”§§§Iza 8:14, 28:16.