12
Moyo upsa mwa Krixtu
1 Tenepo abale, nin'kukumbirani thangwe ra cifundo ca Mulungu kuti mumbapereke mathupi yanu ninga ntsembe yamoyo, yakupambulidwa ndipo yakukomera Mulungu, kumweku ndiko kutumbiza kwakuthemera komwe mucite kuna Mulungu. 2 Lekani kulinganira na makhalidwe ya dziko lino, tsono mukhale wakusandulika kudzera mwa kukondza papsa m'mitima mwanu kuti mukazindikire cifuniro ca Mulungu comwe ni cabwino, cakukoma na cakulungama.
3 Pakuti thangwe ra nkhombo zomwe ndapasidwa, ndirikukuuzani mwentse kuti paleke kuwoneka omwe an'kumbuka bza iye yekha acipitirira bzomwe bzin'themera kukumbuka, tsono akumbuke mwakubzicepesa malingana na kukula kwa cikhulupiriro comwe Mulungu adam'pasa. 4 Pakuti tenepoyo, ninga thupi libodzi lina bziwalo bzizinji, ndipo bziwalo bzimwebzo bzimbaphata lini basa libodzi-bodzi, 5 ni tenepoyombo, ife omwe ndife azinji timbakhala thupi libodzi mwa Krixtu ndipo ciwalo ciri-centse cidaphatana na bzindzace. 6 Tsono tina mphatso zakusiyana-siyana malingana na nkhombo zomwe tidapasidwa. Penu winango ana mphatso ya kupolofita, aiphatise basa malingana na mucikhulupiriro cace. 7 Penu mphatso yako ni yakutumikira, tumikira! Penu ni yakupfundzisa, pfundzisa! 8 Penu ni yakulimbikisa, cita tenepo! Penu ni yakupereka, pereka na m'tima wentse! Penu ni yakutsogolera, tsogolera mwakubzipereka! Penu ni yacifundo, cita na m'pfatso!
Bza lufoi
9 Kufunana kukhale kwacadidi. Wengani cakuipa, funani cabwino. 10 Funanani wina na mwandzace na lufoi la paubale. Lemekezani andzanu kuposa kubziremekeza imwe mwekha. 11 Phatani basa lekani kukhala wautofu, tumikirani Mbuya na m'tima wentse. 12 Kondwerani mwakudikhirira, khalani wakupirira pamabvuto, limbikirani kupemba. 13 Pasani kuna wakupambulidwa bzomwe alibe. Mutambire alendo.
14 Dalisani omwe an'kufambirani m'mbuyo. Adaliseni, lekani kuwatemberera. 15 Pfatsani na omwe alikupfatsa, lirani na omwe alikulira. 16 Khalani wakubverana wina na mwandzace. Lekani kubzikuza, tsono funani wanthu wakunyozeka.*Ayai “Lekani kubzikuza, tsono bvumani mabasa yakunyozeka”. Lekani kukhala adziwi pamaso panu.
17 Leka kubwezera ali-yentse cakuipa na cakuipa. Limbikani kucita bzomwe wentse ambabziwona kuti ni bzabwino. 18 Citani ciri-centse comwe cikwanisika kuna imwe, kuti mukhale mwa ufulu na wentse. 19 Wakufunika, lekani kubwezera cakuipa, tsono pasani m'pata kuna ukali bwa Mulungu, thangwe bzidanembedwa kuti: “Kubwezera ni kwangu, ine nin'dzabwezera”†Deu 32:35, alewa Mbuya. 20 Tsono citani ninga bzidanembedwa kuti:
“Penu nyamadulanthaka wako ana njala, mupase cakudya.
Penu ana nyota, mupase madzi amwe.
Ukacita bzimwebzi, iwe un'dzagwezeka masimbe ya moto
pam'solo pace”‡Mal 25:21-22.
21 Lekani kubzilekerera mucikundidwa na cakuipa, tsono kundani cakuipa na cabwino.