1 Namukeete muno Taata atʉganiile fiijo, mpaka tukʉjobigwa ʉkʉja baanaake! Nalooli bo tʉlɨ. Abandʉ aba batikʉntiila Kyala bakatʉmanya, paapo bakammanya ʉmwene. 2 Bakʉndwe, lɨɨlɨno ʉswe tʉlɨ baana baa Kyala, looli sikamanyigwa muno aatukʉjɨɨlaga. Looli tʉmeenye ʉkʉtɨ akabalɨlo kaa Kɨlɨsiti ʉkwisa kangɨ, tukwisa kʉja bo ʉmwene, paapo tukwisa kʉmmbona muno ajɨɨliile. 3 Kangɨ gwesa ʉjʉ ikʉsʉʉbɨla bo ʉlo, ʉkʉtɨ ikwisa kʉja bo ʉmwene itolo, iijeelʉsyege ʉkʉtɨ aje mwikemo, bo ʉlʉ Kɨlɨsiti jʉʉjo mwikemo.

4 Gwesa ʉjʉ ikʉbomba ʉbʉtʉlanongwa, ikʉbomba bo ʉlwa jʉla ʉmwila ndagɨlo, namanga ʉkʉbomba ʉbʉtʉlanongwa ko kwila ɨndagɨlo. 5 Looli mumeenye ʉkʉtɨ Kɨlɨsiti aaliisile kʉkʉbʉsoosyamo ʉbʉtʉlanongwa bwɨtʉ. Kangɨ ʉmwene atikʉbomba ʉbʉtʉlanongwa nabʉmo. 6 Gwesa ʉjʉ ikwendelela ʉkʉja mwa Kɨlɨsiti, atikwendelela ʉkwila ɨndagɨlo syake. Joope ʉjʉ ikwendelela ʉkwila ɨndagɨlo syake, akammbonamo Kɨlɨsiti, kangɨ akammanya ʉkʉtɨ jo jwani.

7 Baanangʉ, mulɨngiitɨkaga ʉkʉtɨ ʉmundʉ gwesa jʉla abasobesye. Ʉmundʉ ʉngolofu nkyeni mwa Kyala, ʉjo jo ʉjʉ ikʉbomba ɨsya bʉgolofu, bo ʉlʉ Kɨlɨsiti ngolofu. 8 Looli ʉmundʉ ʉjʉ ikʉbomba ʉbʉtʉlanongwa gwa Seetano, paapo Seetano ikwendelela ʉkʉbomba ʉbʉtʉlanongwa ʉkʉfuma kʉbwandɨlo bwa kiisʉ. Jo nongwa ɨjɨ, ʉMwana gwa Kyala*3:8 ɄMwana gwa Kyala Bala kʉ Ɨsyakʉlɨngaania. aaliisile pakiisʉ, ʉkʉsyonanga ɨmbombo sya Seetano.

9 Gwesa ʉjʉ mwana gwa Kyala atikwendelela ʉkʉbomba ʉbʉtʉlanongwa, paapo nkatɨ mmyake Kyala aabɨɨkile ʉbʉʉmi bwake jʉʉjo. Akabagɨla ʉkwendelela ʉkʉbomba ʉbʉtʉlanongwa paapo ʉmwene mwana gwa Kyala. 10 Looli ʉmundʉ ʉjʉ atikʉbomba ɨnunu, pamo akanngana ʉmwitɨki nnine, ʉjo akaja mwana gwa Kyala. Mo muno tukʉkʉmanyila ʉkʉlegana ʉkwa baana baa Kyala na baa Seetano.

11 Ɨndʉmi ɨjɨ mwajɨpɨliike ʉkʉfuma kʉbwandɨlo bwa kʉmmwitɨka Jesu, jo ɨjɨ jikʉtɨ tʉgananege. 12 Tʉlɨngajaga bo Kaini. Aalɨ gwa Seetano! Aalɨnngogile ʉnnuguna!†3:12 Bala kalata gwa Ʉbwandɨlo 4:1-8. Fiki aalɨnngogile? Paapo syosa ɨsi aabombile ʉnnuguna syalɨ nunu. Ʉmwene aabombile ɨmbiibi.

13 Po mwe baamyɨtʉ ndwitɨko, mulɨngaswigaga ʉkʉbengigwa na bandʉ aba batikʉntiila Kyala. 14 Ʉswe tʉbaganile abiinɨɨtʉ, fyobeene tʉmeenye ʉkʉtɨ tʉsookilemo mmaka gaa bʉfwe, twingiile mbʉʉmi bwa bwila na bwila. Ʉmundʉ ʉjʉ akaja nʉ lʉgano, asyele mmaka agaa bʉfwe.‡3:14 Bala kalata gwa Johani 5:24. 15 Gwesa ʉjʉ ikʉmmbenga ʉmwitɨki nnine, ngogi. Mumeenye ʉkʉtɨ akajako ʉngogi ʉjʉ alɨ nabo ʉbʉʉmi bwa bwila na bwila nkatɨ mmyake.

16 Ʉswe tʉlʉmeenye ʉlʉgano muno lʉjɨɨliile, paapo Kɨlɨsiti aabʉningile ʉbʉʉmi bwake kʉnongwa jɨɨtʉ. Na nuuswe bo lʉlalʉla tukʉlondigwa tʉbʉningege ʉbʉʉmi bwɨtʉ kʉnongwa jaa biitɨki biinɨɨtʉ. 17 Po gwesa ʉnkabi gwa kyʉma kya nkiisʉ, lɨnga ikʉmmbona ʉmwitɨki nnine aagiilwe fimo, looli akaja nɨ ndumbula ɨjaa kɨbabɨɨlɨsi, ikʉjobaga bʉleebʉle ʉkʉtɨ alɨ nalo ʉlʉgano lwa Kyala? 18 Baanangʉ, tʉlɨngajobaga peene pa kanwa ʉkʉtɨ tʉbaganile abiinɨɨtʉ, looli tʉbaganege nalooli kʉ njɨla jaa kʉbabombela ɨnunu. 19 Ʉkʉbagana abiinɨɨtʉ bo ʉlo, tʉbagiile ʉkʉmanya kɨsita kwilaamwa, ʉkʉtɨ tukʉbʉkonga ʉbwanalooli. Kangɨ ɨndumbula syɨtʉ sikʉtengaana nkyeni mwa Kyala, 20 nalɨnga tukʉlongigwa mu ndumbula, paapo tʉmeenye ʉkʉtɨ Kyala jo nkʉlʉmba ʉkʉsikɨnda ɨndumbula syɨtʉ. Kangɨ ʉmwene asimeenye syosa.

21 Bakʉndwe, lɨnga tʉtikʉlongigwa mu ndumbula syɨtʉ, po tʉbagiile ʉkʉja nʉ bʉkifu ʉbwa kʉsegelela nkyeni mwa Kyala. 22 Kangɨ tukwambɨlɨla ʉkʉfuma kʉmyake koosa aka tukʉnsʉʉma, paapo tukʉsitiila ɨndagɨlo syake nʉ kʉbomba ɨsi sinkyeliile. 23 Ʉlʉlagɨlo lwake lo ʉlʉ, ʉkʉtɨ tʉjiitɨke ɨngamu jaa Mwanaake Jesu Kɨlɨsiti, nʉ kʉganana, bo muno aatʉlagɨliile. 24 Kangɨ gwesa ʉjʉ ikʉsitiila ɨndagɨlo sya Kyala, ikwendelela ʉkʉja mwa Kyala, joope Kyala ikwendelela ʉkʉja mmundʉ ʉjo. Tʉmeenye ʉkʉtɨ Kyala alɨ nkatɨ mmyɨtʉ. Bʉleebʉle? Paapo aatʉpeele Mbepo Mwikemo gwake.