Kalata gwa bʉbɨlɨ ʉgwa Paʉli kwa
Timoti
Ɨsyakʉlongosya
Kalata ʉjʉ jo kalata gwa bʉbɨlɨ ʉkʉfuma kʉ ntʉmigwa Paʉli, ʉkʉnsimbɨla ʉmfundigwa gwake Timoti. Kalata gwa 2 Timoti aasimbiigwe bo Paʉli alɨ kɨfuki ʉkʉfwa. Akabalɨlo ako aalɨ mu nnyololo kʉ Looma (1:16). Paʉli aalɨ mmanyaani gwa kɨfuki gwa Timoti, kingi antɨgɨ mwanaake (Abafilipi 2:22; 1 Timoti 1:2, 18).
Akabalɨlo aka kalata gwa 2 Timoti aasimbiigwe, aBakɨlɨsiti aba baalɨ mbʉnyafyale bwa kʉ Looma baapyutigwaga. Fyobeene Paʉli aalɨ mu nnyololo, ammanyisyaga Timoti ʉkwikasya mbʉtolwe.
| Ɨsi silimo mwa kalata ʉjʉ | Ʉlʉtʉʉlo |
| Paʉli ikʉmponia Timoti nʉ kʉgwa ʉlʉpi kwa Kyala kʉnongwa jaake | 1:1-7 |
| Ikʉnkasya ʉkwɨma kanunu mu ngʉbɨlo | 1:8–2:13 |
| Ʉntiimi ikʉlondigwa ʉkʉkɨtiima ɨkɨpanga kya Kyala nʉ kʉsikaana ɨmanyisyo ɨsya bʉtʉngʉlʉ | 2:14–4:8 |
| Ɨsya kʉmalɨɨkɨsya | 4:9-22 |
1
Ʉlʉponio
1 Kalata ʉjʉ afumile kʉmyangʉ ʉne Paʉli, ne ntʉmigwa*1:1 Ʉntʉmigwa Bala iisyʉ Abatʉmigwa kʉ Ɨsyakʉlɨngaania. gwa Kɨlɨsiti Jesu kʉ bwigane bwa Kyala, ʉkʉfumusya ʉlʉfingo lwa bʉʉmi ʉbʉ bʉlimo mwa Kɨlɨsiti Jesu. 2 Nikʉkʉsimbɨla Timoti, gwe mwanangʉ gwe nkʉndwe. Ɨliipyana, ʉlʉpaakɨsyo nʉ lʉtengaano ʉkʉfuma kwa Taata Kyala na kwa Kɨlɨsiti Jesu ʉNtwa gwɨtʉ, fijege na nungwe.
Paʉli ikʉnkasya Timoti
3 Ngʉgwa ʉlʉpi kwa Kyala ʉjʉ ngʉmmbombela nɨ ndumbula ɨnyeelu, bo ʉlʉ bammbombelaga abiisʉkʉlʉ bɨɨtʉ, bo ngʉkʉkʉmbʉka mu nyiipuuto syangʉ pakɨlo na pamuusi. 4 Bo ngʉgakʉmbʉka amaasosi gaako, po ngwisyʉkwa fiijo ʉkwaganila na nungwe, ʉkʉtɨ nhoboke fiijo. 5 Ngʉlʉkʉmbʉka ʉlwitɨko lwako ʉlwa nalooli, ʉlʉ kʉbwandɨlo aalɨ nalo ʉmwisʉkʉlʉ gwako Loisi nʉ nyoko Junike. Singolile fiijo ʉne ʉkʉtɨ na nungwe ʉlɨ nalo. 6 Ʉkeetege ngʉkʉkʉmbʉsya ʉkʉtɨ, ʉkɨkʉbɨɨlɨlege ngatɨ mooto ɨkɨkʉngɨlwa ɨkɨ aakʉpeele Kyala bo ngʉkʉbɨɨkɨlapo amaboko, ʉkʉtɨ kyakege. 7 Paapo Mbepo gwa Kyala atikʉtʉpela ʉkʉja booga, looli ikʉtʉpa amaka, ʉlʉgano nʉ kwitiima.
8 Po leelo ʉlɨngafwaga ɨsoni ʉkʉsifumusya ɨnongwa sya Ntwa gwɨtʉ Jesu Kɨlɨsiti, pamo ʉkʉʉfwɨla ɨsoni paapo ndɨ mu nnyololo kʉnongwa jaake. Looli gwikasye mu ndaamyo pamopeene na niine kʉnongwa jaa Ndʉmi ɨNunu, ʉkʉkongana na maka aga akʉpeele Kyala. 9 Kyala aatʉpokile, aatʉkooliile ʉkʉtɨ tʉjege biikemo. Akaabombile bo ʉlo kʉnongwa jaa mbombo syɨtʉ ɨnunu, looli aabombile kʉnongwa jaa bwigane bwake ni ipyana lyake. Ɨliipyana ɨlyo aatʉpeele mwa Kɨlɨsiti Jesu bo kɨkaalɨ ɨkiisʉ ʉkʉpeligwa. 10 Looli akabalɨlo aka, Kyala anangiisye ɨliipyana lyake kʉmyɨtʉ, ʉkwisa ʉMpoki gwɨtʉ Kɨlɨsiti Jesu. Ʉmwene atolile amaka gaa bʉfwe, kangɨ anangiisye ʉbʉʉmi bwa bwila na bwila kʉ njɨla jaa Ndʉmi ɨNunu.
11 Kʉnongwa jaa Ndʉmi ɨNunu ɨjo, nsʉngʉliigwe ʉkʉja ndʉmbɨlɨli, ntʉmigwa, kangɨ mmanyisi. 12 Ʉkeetege ngʉtaamigwa bo ʉlʉ. Looli ndikʉfwa ɨsoni paapo nʉmmeenye ʉjʉ nʉmmwitiike, kangɨ singolile ʉkʉtɨ abagiile ʉkʉlɨndɨlɨla kanunu ɨNdʉmi ɨNunu ɨjɨ ambeele ʉne, ʉkwisa kʉfika pi isikʉ lya bʉlongi. 13 Ʉkole kanunu ɨmanyisyo ɨsya nalooli ɨsi naakʉmanyiisye. Ʉsikonge ɨsyo nʉ kʉsyala nʉ lwitɨko nʉ lʉgano mwa Kɨlɨsiti Jesu. 14 ƗNdʉmi ɨNunu ɨjɨ gwapeeliigwe, ʉjɨlɨndɨlɨle kʉ maka agaa Mbepo Mwikemo ʉjʉ alɨ nkatɨ mmyɨtʉ.
15 Ʉgwe ʉmeenye ʉkʉtɨ, abandʉ boosa abaa nkiisʉ kya mu Asija baandekile. Nkatɨ ndɨ abo alimo Figeli na Elemogeni. 16 Ngʉnsʉʉma ʉNtwa aje nɨ kɨbabɨɨlɨsi kʉ baa mu nyumba jaa Onesifoli, paapo kingi aajɨsangalʉsyaga ɨndumbula jangʉ. Kangɨ akaafwaga ɨsoni ʉkwisa kʉkʉngeeta bo ndɨ mu nnyololo, 17 looli bo iisile nkaaja akanywamu akaa Looma, aaliijʉʉlile ʉkʉʉndonda mpaka aalɨɨnyaagile. 18 ɄNtwa Jesu ampepo Onesifoli ʉkʉkaba ʉlʉpaakɨsyo kʉ Ntwa Kyala, pi isikʉ lya bʉlongi. Ʉgwe ʉmeenye kanunu, nyingi sila aalɨndʉʉlile nkaaja akaa mu Efesi.
*1:1 1:1 Ʉntʉmigwa Bala iisyʉ Abatʉmigwa kʉ Ɨsyakʉlɨngaania.