1 Peeteli na Johani bo balɨ pakʉjoba na bandʉ bala, nakalɨnga balɨnkwisa abapuuti,*4:1 Abapuuti Bala kʉ Ɨsyakʉlɨngaania. ʉnkʉlʉmba gwa basikali baa tempeli, na Basatukai†4:1 ABasatukai Bala kʉ Ɨsyakʉlɨngaania. bamo. 2 Balɨnkʉkalala fiijo kʉnongwa jaa kʉtɨ Peeteli na Johani babamanyisyaga abandʉ nʉ kʉbalʉmbɨlɨla ʉkʉtɨ, Kyala ikʉbasyʉsya abafwe bo ʉlʉ ansyʉsiisye Jesu. 3 Po balɨnkʉbakola Peeteli na Johani, balɨnkʉbiigalɨla mu nnyololo mpaka nʉlʉbʉnjʉ, paapo gaalɨ majolo. 4 Looli abandʉ bingi ndɨ aba baapɨliike iisyʉ ɨlɨ baalʉmbɨlɨlaga Peeteli na Johani, baalɨmmwitiike Jesu. Abandʉ aba baalɨmmwitiike Jesu baafikile 5,000.

5 Po paapo kɨlaabo kyake abapuuti abalongosi, abalongosi baa Bajuuta na bamanyisi baa ndagɨlo sya Moose,‡4:5 Abapuuti abalongosi, abalongosi baa Bajuuta, na bamanyisi baa ndagɨlo sya Moose bo aba baalimo mu Sanihendilini. Bala iisyʉ ƗSanihendilini kʉ Ɨsyakʉlɨngaania. balɨnkʉbʉngaana mu Jelusalemu. 6 Joope Anasi ʉmpuuti ʉnkʉlʉmba aalipo, pamopeene na Kajafa, Johani, Alikisanda na bakamu abangɨ abaa mpuuti ʉnkʉlʉmba. 7 Bo babɨɨmiike baa Peeteli na Johani nkyeni, balɨnkʉbalaalʉʉsya balɨnkʉtɨ, “Ʉmwe mubombile ɨsyo kʉ maka gaani, pamo kʉ ngamu jaani?”

8 Peeteli alɨnkwisʉla Mbepo Mwikemo, alɨnkʉbabʉʉla alɨnkʉtɨ, “Mwe bapuuti abalongosi, na mwe balongosi baa bandʉ! 9 Ʉmwisyʉgʉ, ʉmundʉ ʉjʉ ikʉkwema abombeliigwe ɨmbombo ɨnunu, mukʉtʉlaalʉʉsya ʉswe ʉkʉtɨ abʉmbʉlwike bʉleebʉle. 10 Po mumanyege ʉmwe na bandʉ boosa abaa mu Isilaɨli, ʉkʉtɨ ʉmundʉ ʉjʉ ɨɨmile nkyeni mmyɨnu abʉmbʉlwike mu ngamu jaa Jesu Kɨlɨsiti ʉgwa mu Nasaleti. Ʉjo jo ʉjʉ ʉmwe mwalɨnkomeliile pa kɨkohekano, Kyala aalɨnsyʉsiisye ʉkʉfuma mbʉfwe. 11 Jesu ʉjo jo ʉjʉ Kalata ʉMwikemo ikʉtɨ,

13 Abalongosi bala bo babʉbwene ʉbʉkifu bwa Peeteli na Johani nʉ kʉbamanya ʉkʉtɨ bakaja bamanya kalata, kangɨ bakaja bamangʼanyi, balɨnkʉswiga, balɨnkʉsyagania ʉkʉtɨ abandʉ aba baalɨ pamopeene na Jesu. 14 Looli bakaalɨ nalyo ɨliisyʉ ɨlya kʉbaamula, paapo baalɨmmbwene ʉmundʉ jʉla abʉmbʉlʉsiigwe, ɨɨmile pamopeene na Peeteli na Johani. 15 Po balɨnkʉbalagɨla Peeteli na Johani ʉkʉtɨ basooke panja ʉkʉfuma nkyumba ɨkɨ baabombelaga ʉlʉkomaano lwa Sanihendilini. Abaa lʉkomaano balɨnkʉsyala, balɨnkʉjobesania bo biijeekiile, 16 balɨnkʉtɨ, “Tʉbombe ɨsya fiki na bandʉ aba? Paapo sifumwike kʉ bandʉ boosa aba bikʉtʉʉgala mu Jelusalemu, ʉkʉtɨ ɨkiika ɨkɨnywamu kɨbombiigwe nabo. Tʉkabagɨla nʉ kʉkaana. 17 Looli ʉkʉtɨ ɨsi silɨngongelangapo ʉkʉfumuka, tʉbakemele, balɨngajobaga kangɨ nʉ mundʉ gwesa mu ngamu jaa Jesu.”

18 Po balɨnkʉbakoolela Peeteli na Johani ʉkʉtɨ bingɨle, balɨnkʉbalagɨla balɨnkʉtɨ, “Mulɨngandɨsya ʉkʉjoba pamo ʉkʉmanyisya mu ngamu jaa Jesu, ɨnongwa syosa!” 19 Looli Peeteli na Johani balɨnkʉbaamula balɨnkʉtɨ, “Bʉle, bʉgolofu nkyeni mwa Kyala ʉkʉbapɨlɨka ʉmwe ʉkʉkɨnda ʉkʉmpɨlɨka Kyala? Mulamule jʉjʉʉmwe, 20 namanga ʉswe tʉkabagɨla ʉkʉleka ʉkʉsijoba ɨsi tʉsibwene nʉ kʉsipɨlɨka.”

21 Abalongosi bo bongiilepo ʉkʉbakemela baa Peeteli na Johani, balɨnkʉbaabʉla. Baatoliigwe ɨnjɨla jaa kʉbafundɨlamo, kʉnongwa jaa kʉtɨ abandʉ boosa bantuufyaga Kyala kʉlɨ ɨsi sibombiigwe. 22 Namanga ʉmundʉ ʉjʉ aabombeliigwe ɨkɨmanyilo ɨkɨ ɨkya kʉbʉmbʉlʉsigwa, ɨfyɨnja fyake fyakɨndile amalongo mana.

23 Bo babalekiisye, Peeteli na Johani balɨnkʉbʉʉka kʉ biinaabo, balɨnkʉbabʉʉla ɨnongwa syosa ɨsi baabʉʉliigwe na bapuuti abalongosi na balongosi baa bandʉ. 24 Abiinaabo bo bapɨliike ɨsyo, boosa palɨkɨmokyene balɨnkʉlaata ʉkʉnsʉʉma Kyala, balɨnkʉtɨ, “Gwe Mwene nafyo fyosa, gwe gwapelile ʉmpaalanga, ɨkiisʉ nɨ nyanja, na fyosa ɨfi filimo ʉmo. 25 Jo taata Ndaabɨti, ʉmbombeli gwako, aajobile amasyʉ kʉ njɨla jaa Mbepo Mwikemo ʉkʉtɨ,

31 Bo biipuutile kwa Kyala, palɨnkʉsenyendeka pabʉjo apa baabʉngeene. Boosa balɨnkwisʉla Mbepo Mwikemo, balɨnkwanda ʉkʉlʉmbɨlɨla iisyʉ lya Kyala nʉ bʉkifu boosa.

32 Po abiitɨki boosa baalɨ nɨ ndumbula jɨmojeene na mu nyiinogono syabo baalɨ kandʉ kamokeene. Akaaliko najʉmo nkɨlʉndɨlo kyabo ʉjʉ aatɨgɨ ɨkyʉma ɨkɨ alɨ nakyo kyake mwene, looli ɨkyʉma kyabo kyosa baalɨɨlanilaga. 33 Abatʉmigwa, kʉ maka amakʉlʉmba, baalʉmbɨlɨlaga ʉkʉtɨ ʉNtwa Jesu asyʉkile mbʉfwe. Kyala aabasajaga fiijo abiitɨki boosa. 34 Po akaalipo ʉmundʉ najʉmo ʉjʉ aafumbilwe nkɨbugutɨla kyabo, paapo aba baalɨ nɨ migʉnda pamo ɨnyumba bʉʉlɨsyaga, baatwalaga ɨndalama ɨsi bakabile. 35 Baabapaga abatʉmigwa ɨndalama ɨsyo ʉkʉtɨ basibɨɨkege, aajabɨligwaga kʉkʉtɨ mundʉ ʉkʉkongana nʉ bʉtolwe bwake.

36 Aaliko ʉmundʉ jʉmo ɨngamu jaake Joosefu, ʉNnyaleebi, ʉkʉfuma nkiisʉ kya ndʉsʉngo lwa mu Saipulasi. Abatʉmigwa bankoolelaga ɨngamu ɨjɨngɨ Balinaba, kokʉtɨ ʉjʉ ikʉkasya. 37 Aalyʉliisye ʉngʉnda gwake. Ɨndalama ɨsi aakabile, alɨnkʉbapapo abatʉmigwa ʉkʉtɨ basibɨɨkege.