Dos Unnon Sulat ni Pablo Atag to mgo Toho
CORINTO
Unna nod Bosan
Inis Corinto, oray'n dakkoo woy novantug no bonuwa riyot prubinsya to Acaya no od ngoranan ko-ungkay no Grecia. Nokota-aw kos Corinto riyot ibpit to dahat, de-en novantug ini pomon to nigusyu. Piru inin bonuwa, noponnut kororattan, su oray'n molibmit kos pinuungan to ko-urallan to mgo minuvu nid oubpa rutun.
Na si Pablo, id oubpa rutun daom to sokkad woy tongngot lahun amoy'd ponudtuu to kahit Monama, woy mo-uraa kos id pomakoy (Pinuungan 18:1-28). Nopongnga, id tanan si Pablo riyot Corinto woy id undiyon sikandin to Efeso. Woy iddon timpu, id inguma riyot Corinto iddos sokkad no tohodponudtuu to kahit Monama no id ngoranan ki Apolos (Pinuungan 18:24-19:1). Oray sikandin od kotuig nod nonaw, woy sikandin kos id ponayun nid nonaw rutun (1 Corinto 3:6). Na, id mo-uraa pe-en kos id pomakoy riyot Corinto, piru duwon mgo kodpo-opuloy to od lolivuung nod pompomakoy rutun. De-en nokotanggap si Pablo to sulat no od buyu to pomandu rin moka-atag taddot mgo opulanan dan (7:1).
Na, ka-ay't unnon sulat ni Pablo tod pompomakoy riyot Corinto, id pomonduwan din sikandan no od soro ron taddot kodpo-opuloy ran. Woy moka-atag taddot sakup dan no nokosaa, id posampot din kandan no duwon kotungud dan nod pa-awa kandin. Id tavak din mandad iddos mgo intud dan moka-atag to kodpo-osoway, woy dos ollog nod puungan to mgo bau woy taddot waa mgo sawa. Id tavak din mandad iddos mgo intud moka-atag to koka-an no id buwis diyot konna bonnaan mgo monama. Woy id nonaw rin mandad kandan iddos moka-atag to moppiyon koroniyan diyot kodlolivuung dan, dos moka-atag to nokod-osso-osson kogahan no id boggoy to Uhis no Ispiritu woy dos ollog no kodgamit tadda. Id nonaw rin no iddos langun no kogahan nid boggoy to Uhis no Ispiritu, waa koru-anon otik waa kodginawa (13:1-13). Id nonaw rin mandad iddos moka-atag to kodbadnow taddot id poomatoy ron (15:1-58).
Inin sulat, dakkoo kos koru-anon dinit keta, oyyos ka-ay ta en pantok od kosorollan no iddos mgo samuk no id isau taddot lammin od pompomakoy, iling en mandad tadda kos id isau tod pompomakoy ahad ko-ungkay'n timpu. Woy ka-ay ta en pantok od kosorollan ko ondak tavak to Monama moka-atag ka-ay'n mgo samuk.
Dos mgo Nokota-aw:
Kodpokilaa woy kodposolamat ni Pablo (1:1-9)
Dos kodpo-opuloy tod pompomakoy moka-atag to mgo ponguu ran (1:10 taman to 4:21)
Dos moka-atag to minuvu no molibmit kos pinuungan woy dos kod-usoy to ukahan (5:1 taman to 6:20)
Dos moka-atag to kod-osawa woy taddot konna od osawa (7:1-40)
Dos moka-atag to koka-an no id buwis diyot konna bonnaan mgo monama (8:1 taman to 11:1)
Dos ollog no kodbovotasan diyon tod lolivuung nod pompomakoy (11:2 taman to 14:40)
Dos moka-atag to kodbadnow ki Disas woy taddot id poomatoy ron (15:1-58)
Dos moka-atag to tavang atag to mgo minuvu to Monama riyot Jerusalem (16:1-4)
Dos puhawang ni Pablo woy kotompusan no mgo pomandu (16:5-24)
1
Kodpokilaa
1 Siyak si Pablo no id aam ni Disas Krays amoy'd kovovallan no apostoles din, su ini en kos id kopi-it Monama. Duma ku nid sulat ka-ay, si Sostenes no suwod ta riyot kopomakoy. 2 Id sulat doy ini koniyu no mgo minuvu to Monama no id lolivuung duwot bonuwa to Corinto. Id aam kow to Monama amoy id ossa atag kandin pomon to nosokkad kow riyot ki Disas Krays. Woy ungketen dad en mandad kos id puungan din atag to langun no minuvu riyot ahad ingkon no mgo lugaa nid simba ki Disas Krays, oyyos sikandin kos od Longaggon dan woy keta mandad.
3 Muopa nod kotanggap dow iddos kopiyannoy woy kosunayan no id pomon to Monamon Amoy ta woy tod Longaggon no si Disas Krays.
Dos Kodposolamat ni Pablo atag tod Pompomakoy riyot Corinto
4 Inaayun a od posolamat to Monama taddot kopiyannoy no id pokita rin koniyu pomon to nosokkad kowd diyot ki Disas Krays. 5 Oyyos pomon to nosokkad kowd diyot kandin, noratu kow riyot langun, iling taddot koovottan dow to kovonnaan woy riyot kotuihan dow to kod-ooseng. 6 Na pomon ka-ay, noposivonnalan dow no bonnaa en iddos ponudtulon doy koniyu moka-atag ki Disas Krays. 7 De-en waa kulang dow to ahad ondan no kogahan no id boggoy to Monama koniyu laggun tod aangat kow to kodlivod tod Longaggon ta no si Disas Krays. 8 Sikandin kos od ponokkaa to kopomakoy row taman to kotompusan, su amoy waa en id pokosawoy koniyu riyot allow to kodlivod din. 9 Oyyos od kosolihan en kos Monama nod puung ka-ay, su sikandin man kos id aam koniyu no od kosokkad taddot Anak din no si Disas Krays nod Longaggon ta.
Dos Kodpo-opuloy tod Pompomakoy Moka-atag to mgo Ponguu Ran
10 Na mgo suwod, ukit to kotungud no id boggoy koddi tod Longaggon ta no si Disas Krays, od loglohottan ku sikiyu, no pooblovottoy kow. Yo kow'd po-oo-ossay, ko konna, sokadda row kos koniyun poomdom woy dontulon. 11 Id pomandu ku ini koniyu, su duwon sakup to pomilya ni Cloe no nokoponudtuu koddi no id po-op-opuloy kow kun. 12 Iyon kohulugan ku no nokod-osso-ossa kos osengan taddot duma koniyu. Duwon od oseng no, “Sakup koy ni Pablo.” Dos duma od oseng no, “Sakup koy ni Apolos,” dos duma od oseng no, “Sakup koy ni Pedro,” woy duwon mandad od oseng no, “Sakup koy ni Disas Krays.” 13 Konna idda moppiya! Noko-iling don moho to nova-ad si Disas Krays. Mambo, siyak bo kos id patoy riyon to krus atag koniyu? Id boutismuwan kow vo ukit to ngaran ku, patow no mgo tinodduwan ku sikiyu?
14 Od posolamat a no si Crispo woy si Gayo ra kos id boutismuwan ku ruwot koniyu. 15 De-en waa sokkad koniyu nod poko-oseng no id boutismuwan ku sikiyu amoy'd kovovallan kow no tinodduwan ku. 16 Oyya vos en, duwon pobbos onsi Estefanas woy dos pomilya rin no noboutismuwan ku. Ossa pa kandan, worad dumon nosompottan ku. 17 Waa a id popiyod ni Disas Krays amoy'd boutismu, ko konna, amoy od ponudtuu to Moppiyon Dinoggan. Woy riyot kodpuung ku tadda, waa a mid gamit to motoos no mgo osengan, oyyos dii a od kopiyan nod koworan to koru-anon iddos nonaw moka-atag to kopotayan ni Disas Krays diyon to krus.
Dos Kotuusan woy Moraom no Koovottan to Monama, od Kokita riyot ki Disas Krays
18 Na, atag taddot mgo minuvu no iyon od ingumannon iddos silut to Monama, ko-ongollan iddos nonaw moka-atag to kopotayan ni Disas Krays diyon to krus. Piru atag keta no id tobbus, inin nonaw, oray'd kokita iddos kotuusan to Monama. 19 Oyyos duwon no-ikahi riyot Nosulat no Kahit Monama no mid ungketen to,
“Od worannon ku iddos koovottan taddot moraom kos koovottan, woy
id pokita ku no waa koru-anon taddot kopondayan to mgo mopandoy.”*Od kovasa ini riyot Isaias 29:14.
20 Na, ko ungketen, ondan pobbo kos koru-anon taddot mgo minuvun moraom kos koovottan? Ondan pobbo kos koru-anon taddot mgo tohodnonaw to Suhu ni Moises? Ondan pobbo kos koru-anon taddot od pongkotuig nod ooseng ka-ay to ampow't ingod? Worad en koru-anon! Su id posaddoo ron to Monama no ko-ongollan da iddos mgo moraom no koovottan ka-ay to ampow't ingod.
21 Oyyos pomon to moraom no koovottan to Monama, id puhawang din no konna od pokokilaa kandin kos mgo minuvu ukit to koovottan ka-ay to ampow't ingod. Su iyon puhawang din no od tobbuson din iddos id pomakoy to Moppiyon Dinoggan nid ponudtuu roy, ahad od tommanon taddot diid pomakoy no ko-ongollan da idda. 22 Na iddos mgo Judio, dii ran od pomakoy otik waa mokososoobbu nod posivonnaa taddot norinog dan. Idda mandad so mgo Griego,*Sikandan iddos konna mgo Judio. iyon od nongkapon dan iddos moraom no koovottan ka-ay to ampow't ingod. 23 Piru sikami, id ponudtuu roy iddos moka-atag ki Disas Krays no id pakpak diyon to krus. Inin ponudtulon, dii en od kotanggap taddot mgo Judio. Woy idda mandad so mgo Griego, od tommanon dan no ko-ongollan idda. 24 Piru atag keta no id aam to Monama, Judio man o Griego, nosorollan ta no riyot ki Disas Krays, oray'd kokita iddos kotuusan woy moraom no koovottan to Monama. 25 Su ahad od tommanon to mgo minuvu no ko-ongollan da iddos id puungan to Monama to kodtobbus keta, piru iddos moraom no koovottan to Monama, lampas en to langun no koovottan to minuvu. Woy ahad od tommanon to mgo minuvu no moomet kos kotuusan to Monama, piru waa en ahad sokkad no minuvu nod pokolampas to kotuusan din.
26 Na mgo suwod, poomdomma row ko ondan kow dangan to waa kow pa id aam to Monama. Simbokkad da koniyu kos duwon moraom no koovottan diyot kod-ontong to minuvu. Disok da koniyu kos duwon mowwet no kotundanan, woy pilopila ra kos mgo anak to datu. 27 Piru iyon id aam to Monama, iddos mgo minuvu nod tommanon to duma no waa koovottan ka-ay to ampow't ingod, su amoy od po-ilawan iddos duwon moraom no koovottan. Id aam din mandad iddos mgo minuvu nod tommanon to duma no moomet ka-ay to ampow't ingod, su amoy od po-ilawan iddos duwon konokkaan. 28 Id aam to Monama iddos od ko-ooyuwan woy dos id poddisokkan to kod-ontong to mgo minuvu ka-ay to ampow't ingod, woy idda mandad so waa koru-anon, su amoy id pokita rin to mgo minuvu no iddos duwon koru-anon diyot kod-ontong dan, waa koru-anon tadda riyot kod-ontong to Monama. 29 Id puungan din idda, amoy waa minuvu nod pokopobporoong diyot isowwan to Monama. 30 Su iddos Monama kos id podsokkad keta riyot ki Disas Krays, woy si Disas kos id pomonnan to moraom no koovottan ta. Woy ukit kandin, id podmotallong ki to Monama, molinis ki riyot kod-ontong din woy id polegguang ki riyot kod-uripon to mgo saa. 31 De-en od puungan ta iddos no-ikahi riyot Nosulat no Kahit Monama no mid ungketen to,
“Dos minuvu nod kopiyan od pobporoong, iyon din da id pobporoong, iddos id puungan tod Longaggon.”*Od kovasa ini riyot Jeremias 9:24.