Moppiyon Dinoggan, Moka-atag ki Disas Krays COLOSAS 1

Dos Sulat ni Pablo Atag to mgo Toho

COLOSAS

Unna nod Bosan

Inis Colosas, disok no bonuwa no sakup to Asia no riyon lomig tid tollak to Efeso. Konna si Pablo kos id tigkanoy taddot id lolivuung nod pompomakoy rutun, woy waa ran nokokita kandin (2:1), piru inaayun sikandin id dasaa atag kandan woy id dokollan din sikandan to ginawa. Dos id ponudtuu to Moppiyon Dinoggan diyot Colosas, si Epafras (1:7) no tapoy id nonawwan ni Pablo. Ukit taddot nonaw ni Epafras, mo-uraa kos mid pomakoy ki Disas, de-en duwon don id lolivuung nod pompomakoy rutun.

Na, duwon mgo minuvu no id undiyon to Colosas woy id nonaw to konna bonnaa nod pokoposuwoy kandan pomon diyot ki Disas Krays no “lampas to langun” (1:15). Oyyos waa ran id pomakoy no si Disas Krays kos Anak to Monama. Id nonaw ran no ko-ilangan nod ikuu to mo-uraan botasanon amoy'd ka-awa kos mgo saa ran, woy ko-ilangan nod simba to mgo ponolihan.

To norinog ni Pablo iddos moka-atag taddot od ponnonaw to konna bonnaa, naaggow sikandin, de-en id sulat din ini. Iddon timpu, noprisu poron sikandin diyot Roma pomon to kodponudtuu rin to Moppiyon Dinoggan.

Dos dontulon ni Pablo to kodsulat ka-ay, su amoy od kosorollan dan, no mooggot en no si Disas Krays kos Anak to Monama woy nosokkad sikandin to Amoy rin diyot datas to langit. Woy id posivonnalan ni Pablo no si Disas Krays kos mid bovaa to langit, livuta, ahad iddos langun no duwon kotuusan (1:16). Konna ra idda, ukit to kopotayan din diyon to krus, id posinsyan don kos mgo saa ta woy duwon don lammin umuu ta riyot Monama.

Dos mgo Nokota-aw:

Kodpokilaa (1:1-2)

Dos dosalon woy kodposolamat ni Pablo atag to mgo toho Colosas (1:3-14)

Si Disas Krays kos Lampas to Langun (1:15-23)

Dos kod-oiluggat ni Pablo atag tod pompomakoy (1:24 taman to 2:5)

Dos pomandu no ko-ilangan od mosalig diyot kopomakoy woy konna od posahad taddot konna bonnaan nonaw (2:6-23)

Dos tapoy woy lammin umuu (3:1 taman to 4:6)

Kotompusan no mgo pomandu woy kodpongumusta (4:7-18)

Kodpokilaa

1 Siyak si Pablo, novovallan a no apostoles ni Disas Krays ukit to id kopi-it Monama. Siyak woy si Timoteo no suwod ta riyot kopomakoy, id pongumusta koniyu. 2 Id sulat ku ini atag koniyu no toho Colosas no mgo minuvu to Monama, woy morumorumon mgo suwod doy no nosokkad diyot ki Disas Krays.

Muopa nod kotanggap dow kos kopiyannoy woy kosunayan no id pomon to Monamon Amoy ta.

Kodposolamat ni Pablo atag to mgo Toho Colosas

3 Na ipat timpu nod dasaa koy atag koniyu, inaayun koy'd posolamat to Monama no Amoy tod Longaggon ta no si Disas Krays. 4 Oyya su norinog doy iddos moka-atag to kopomakoy row ki Disas Krays woy dos kodginawa row to langun no minuvu to Monama. 5 Id puungan dow idda, su id imman kow taddot id panoy atag koniyu riyot datas to langit. Inin ko-immanan, tapoy rowd nosorolli iddot norinog dow kos bonnaan nonaw no idda en so Moppiyon Dinoggan. 6 Woy nokoso-ob don inin Moppiyon Dinoggan diyon to intirut ingod taman to mo-uraa kos id pomakoy, woy nopalin kos kodbovotasan dan. Ungketen dad en mandad kos notomanan diyot koniyu iddot norinog woy nooblovottan dowd iddos moka-atag to kopiyannoy to Monama. 7 Na iyon mid nonaw koniyu ka-ay, si Epafras no id dokollan doy to ginawa. Duma roy sikandin no morumorumon uripon ni Disas Krays, woy timbang bivig doy riyot kodponudtuu to kahit Monama. 8 Sikandin mandad kos id ponudtuu konami moka-atag to kodginawa row no id boggoy to Uhis no Ispiritu.

9 De-en pomon taddot allow no norinog doy iddos moka-atag koniyu, id dasaa koy inaayun diyot Monama atag koniyu. Id buyu roy no od iponnuwon kow to moraom no koovottan nid pomon to Ispiritu rin, su amoy od kosorollan dow iddos id kopi-i rin atag koniyu. 10 Oyya su ukit ka-ay, od loppa iddos koniyun kodbovotasan taddot mgo minuvu nid pomakoy tod Longaggon amoy od kopuungan dow inaayun kos id kahaa-i rin. Od dasaa koy nod puungan dow iddos langun no moppiya, woy od kotimulan pe-en kos sinorollan dow moka-atag to Monama. 11 Muopa nod ponokkalon to Monama kos koniyun ginawa ukit to lampas no kotuusan din amoy mowwet kos posinsya row woy kodti-is to mgo kosupittan. Woy ahad ungketen kos od kotomanan, duwon en kahaan dow. 12 Od dasaa a mandad no od ponayun kow nod posolamat to Monamon Amoy ta, oyyos ukit taddot id puungan din, ollog kow nod pokotanggap taddot id panoy rin atag to keta no mgo minuvu rin no od kolonug diyot ma-awang no kohoriyan din. 13 Oyya su id polegguang ki to Monama pomon diyot kotuusan ni Moivuyan no od hari riyot mosukirom, woy id alin ki nikandin diyot kohoriyan taddot Anak din no si Disas Krays no id dokollan din to ginawa. 14 Na ukit kandin, nokolegguang kid pomon diyot kod-uripon ni Moivuyan woy id posinsyan don kos mgo saa ta.

Si Disas Krays kos Lampas to Langun

15 Na riyot ki Disas Krays, od kokita ta iddos botasanon to Monama no konnod kokita.

To waa pa novovalli inis ingod, duwon don tapoy si Disas Krays woy lampas sikandin to langun.

16 Su ukit kandin, novovallan iddos langun no riyot datas to langit woy dos ka-ay to ampow't ingod,

dos langun nod kokita woy dos konnod kokita, ahad iddos nokod-osso-osson ispiritu no duwon kotuusan woy kotungud.*

Langun ka-ay, novovallan ukit ki Disas Krays woy atag to kodposivantug kandin.

17 To waa pa novovalli kos ahad ondan, duwon don tapoy sikandin, woy

sikandin kos id tapid to langun no binovallan woy no-iraom idda to kandin no kotungud.

18 Sikandin kos timbang uu to langun no id lolivuung nod pompomakoy no idda en kos timbang lawa rin.

Sikandin mandad kos id pomonnan to lammin umuu, oyyos sikandin kos unnon novadnow pomon diyot kopotayan woy pomon ka-ay, lampas sikandin to langun.

19 Oyya su iyon id kopi-it Monama no iddos langun no pogko-monama rin, od kokita riyot kandin no Anak.

20 Woy ukit kandin, id kopi-it Monama no od pokod-uli riyot kandin iddos koroniyan to langun ka-ay to ampow't ingod woy riyot datas to langit.

Id puungan din idda ukit to kodtihis to longossa taddot Anak din diyon to krus.

21 Na sikiyu dangan, moriyu kow to Monama woy kuntra kow nikandin pomon to morat no poomdom woy pinuungan dow. 22 Piru ko-ungkay, nokod-uli ron kos koroniyan dow kandin ukit to kopotayan ni Disas Krays. Pomon tadda, id po-isau kow to Monama no molinis diyot kod-ontong din woy worad id pokosawoy. 23 Piru ko-ilangan no od ponayun kow no mosalig woy diid ka-antog diyot koniyun kopomakoy. Ponayun kow mandad nod imman taddot langun no id tandu to Monama riyot Moppiyon Dinoggan no norinog dow no id ponudtuu riyon to intirut ingod. Woy siyak, si Pablo kos novovallan no sudsuhuwon amoy od ponudtuu ka-ay.

Dos Kod-oiluggat ni Pablo atag tod Pompomakoy

24 Ahad id ti-is a to kosupittan pomon to kodponudtuu to Moppiyon Dinoggan no atag to kopiyannan dow, od kahaa a. Oyya su inis kosupittan nod geddamon ku, ini en kos od ponayun taddot kosupittan no id ti-is ni Disas Krays atag to langun nod pompomakoy no timbang lawa rin. 25 Novovallan a no sudsuhuwon to Monama atag to langun nod pompomakoy, su id sanna rin koddi iddos pinuungan no idda en so kodponudtuu to langun no kahi rin diyot koniyu no konna mgo Judio. 26 Na iddon ponudtulon, waa pa id posaddoo to Monama pomon poron dangan, piru ko-ungkay, id posaddoo rin don ini ka-ay't keta no mgo minuvu rin. 27 Oyya su id kopi-i rin nid posaddoo keta iddos oray'n moppiya woy mokososoobbun puhawang no id panoy rin atag to langun no minuvu ahad diyot konna mgo Judio. Na, iddos puhawang no waa rin id posaddoo dangan, idda en si Disas Krays no id ubpa riyot ginawa row. Woy pomon ka-ay, duwon don dakkoon ko-immanan dow no od pokolonug taddot bantug to Monama riyot datas to langit init morin allow. 28 De-en id ponudtuu roy iddos moka-atag ki Disas Krays, woy inaayun koy od pomandu woy od nonaw riyot ahad ondoy ukit to langun no moraom no koovottan no id pomon kandin, su amoy id po-isau sikandan diyon to Monama no buyyag don diyot kodsokkad dan ki Disas Krays. 29 Ini en kos unayan no oraroy a nid oiluggat, su amoy od kotuman idda ukit to kotuusan ni Disas Krays no id boggoy rin koddi.

*1:16 Konna kohulugan ka-ay no id bovallan ni Disas iddos mgo morat no ponolihan. Id bovallan din en kos langun no duwon kotungud woy kotuusan. Piru riyot mori, dos duma id supak to Monama, de-en novovallan no morat. Od kovasa ini riyot 2 Pedro 2:4; Judas 6; Id Pokita 12:9.