Dos Sulat ni Pablo Atag to mgo Toho
FILIPOS
Unna nod Bosan
Inis bonuwa to Filipos, sakup to prubinsya to Macedonia no riyot ingod to Grecia. Dakkoo inin bonuwa woy mo-uraan toho Roma no id oubpa rutun. Dos mid sulat ka-ay, si Pablo. Id sulat din ini laggun to id prisu sikandin pomon to kodponudtuu rin to Moppiyon Dinoggan moka-atag ki Disas Krays.
Diyot Pinuungan 16:6-40 od kovasa ta iddos moka-atag taddot unnon kod-inguma ni Pablo riyot Filipos, dos kodponudtuu rin to Moppiyon Dinoggan, dos no-ukitan din dutun woy dos moka-atag taddot unna nid pomakoy ki Disas Krays.
Dos dakkoon dontulon no id sulat din ini, su amoy od posolomatan din iddos mgo toho Filipos taddot tavang nid popiyod dan. Sokkad mandad no dontulon din, amoy od inniyat kandan no od mosalig kos kopomakoy ran.
Ahad noprisu sikandin, sokkad taddot dakkoon nonaw rin ka-ay'n sulat, iddos moka-atag to kahaan.
Dos kahaan diyot kodsupittan (1:1-30),
Dos kahaan diyot kodpuung atag to Monama (2:1-30),
Dos kahaan diyot kopomakoy (3:1-21, 4:1) woy
Dos kahaan diyot kodboggoy (4:2-23).
Id nonaw rin mandad ka-ay iddos moka-atag to kosunayan no id boggoy to Monama riyot minuvu nod dasaa, woy dos moka-atag to ganti no id boggoy to Monama init morin allow.
Dos mgo Nokota-aw:
Kodpokilaa (1:1-2)
Dos kodposolamat woy dosalon ni Pablo atag to mgo toho Filipos (1:3-11)
Dos kahaan ni Pablo to kodponudtuu moka-atag ki Disas Krays (1:12-30)
Od ikulon ta iddos kodpoobbava ni Disas Krays (2:1-18)
Dos koddoong ni Pablo ki Timoteo woy ki Epafrodito (2:19-30)
Dos bonnaan po-ukit nod komotallong kos minuvu riyot kod-ontong to Monama (3:1-11)
Dos kodponayun nod nokkaanokkaa amoy'd tuman to dontulon ni Disas Krays (3:12-21)
Dos pomandu moka-atag to moppiyon koroniyan woy kosunayan (4:1-9)
Dos kodposolamat ni Pablo taddot tavang to mgo toho Filipos (4:10-20)
Kodpongumusta (4:21-23)
1
Kodpokilaa
1 Siyak si Pablo woy si Timoteo, mgo uripon koy ni Disas Krays. Id sulat koy koniyu no toho Filipos no mgo minuvu to Monama no nosokkad diyot ki Disas Krays, duma to mgo ponguu tod pompomakoy woy taddot mgo diyakono.*Inis diyakono, sikandan kos tohodtavang to pinuungan.
2 Muopa nod kotanggap dow kos kopiyannoy woy kosunayan no id pomon to Monamon Amoy ta woy tod Longaggon no si Disas Krays.
Kodposolamat woy Dosalon ni Pablo atag to mgo Toho Filipos
3 Na ipat timpu nod pokopoomdom a koniyu, od posolamat a to Monama ku, 4 woy inaayun a nod kahaa ipat timpu no od dasaa a atag koniyu langun. 5 Oyyos pomon to kodtigkanoy row to kodpomakoy ki Disas Krays taman ko-ungkay, id tovangan a nikiyu to kodponudtuu to Moppiyon Dinoggan. 6 Woy dakkoo kos kodsalig ku nod ponoyunon to Monama iddos moppiyon pinuungan no id tigkonayan din diyot ginawa row taman tod kopongnga rin idda riyot allow to kodlivod ni Disas Krays. 7 Ollog en no iling ka-ay kos od geddamon ku atag koniyu langun, oyyos id dokollan ku man sikiyu to ginawa. Su no-ukitan dow duma koddi iddos kopiyannoy to Monama laggun to ka-ay a to prisuwan, woy riyot kodlohinat to kovonnaan atag to Moppiyon Dinoggan. 8 Nosorollan to Monama no oraroy a nod pingpingawon koniyu su iddos kodginawa ku koniyu, iling taddot kodginawa ni Disas Krays.
9 Na, od dasaa a nod lampas pe-en kos kodginawa row. Od dasaa a mandad no iddos kodginawa row, od dumannan to sinorollan woy moraom no koovottan. 10 Ukit tadda, od kosorollan dow ko ondan iddos lampas no moppiya nod puungan, su amoy molinis kow riyot kod-ontong to Monama, woy worad en id pokosawoy koniyu riyot allow to kodlivod ni Disas Krays. 11 Muopa no ukit to tavang ni Disas Krays, inaayun motallong kos langun nod puungan dow amoy od koroong woy'd koposivontuhan kos Monama.
Dos Kahaan ni Pablo to Kodponudtuu Moka-atag ki Disas Krays
12 Mgo suwod, id kopi-i ku nod kosorollan dow no iddos koddin notomanan, nokotavang baling no od so-ob kos Moppiyon Dinoggan. 13 Oyyos nosorollan to langun no sundau nid tamong to polasyu woy taddot dumon minuvu ka-ay't bonuwa to Roma, no iyon unayan no id prisu a, pomon da en to kodponudtuu ku moka-atag ki Disas Krays. 14 Woy pomon tid prisu a, id mosalig pe-en kos kopomakoy to ko-urallan to mgo suwod ta, woy pomon tadda, waa kod-aang-aang dan nod ponudtuu to kahit Monama.
15 Bonnaa en no duwon mgo minuvu no id ponudtuu moka-atag ki Disas Krays pomon to nosina sikandan, su id kopi-i ran nod lampas pa koddi. Piru duwon mandad duma no moppiya kos dontulon dan. 16 Oyyos mid nonaw sikandan pomon to ginawa ran koddi, su nokaabbot dan no id boggayan a to Monama to pinuungan no idda en so kodlohinat to kovonnaan atag to Moppiyon Dinoggan. 17 Piru iddos nongosina koddi, id ponudtuu ran iddos moka-atag ki Disas Krays, konna pomon to bonnaavonnaan ginawa ran, ko konna, pomon to idda ra en so kandan no kopiyannan kos od poomdommon dan. Oyya su kunan dan ko ukit taddot id puungan dan, od pokodluntudluntud kos kosupittan ku ka-ay't prisuwan.
18 Piru waa id mosakit kos ginawa ku tadda, su mooggot man o konna kos dontulon dan to kodponudtuu to Moppiyon Dinoggan, od kahaa a, oyyos id ponudtuu ran iddos moka-atag ki Disas Krays.
Woy ponayun a nod kahaa, 19 su nosorollan ku en no ukit to dosalon dow koddi woy ukit to kodtavang to Ispiritu ni Disas Krays, od pokolegguang a ka-ay't prisuwan. 20 Dakkoo kos ingowollon woy ko-immanan ku, no inaayun waa kod-aang-aang ku to kodponudtuu to kahit Monama, su amoy dii a od ko-ilawan diyot isowwan to Monama ahad kannu. Oyyos od ko-uyag a man o od patoy, id kopi-i ku nod koposivontuhan si Disas Krays ukit koddi.
21 Su atag koddi, laggun to no-uyag a pa ka-ay to ampow't ingod, waa osson dontulon ku, idda ra en so kodposivantug ki Disas Krays. Piru otik od patoy a, lampas pa no moppiya oyyos od duma ad kandin. 22 Piru otid ko-uyag a pa, duwon od kopuungan ku no dakkoo kos koru-anon atag koddi. De-en otik siyak kos od aam, waa ku nosorolli ko ingkon musing ka-ay kos od aamon ku, od ko-uyag bo o od patoy. 23 Su nova-ad kos ginawa ku, oyyos dakkoo kos ingowollon ku no od tanan ad ka-ay to ampow't ingod amoy'd pokoruma ad ki Disas Krays, su idda en kos lampas no moppiya. 24 Piru ko-ilangan en nod ko-uyag a pa atag koniyu. 25 De-en dakkoo kos kodsalig ku no dii a pa od patoy, su amoy od kotovangan ku sikiyu nod udsuu pe-en diyot kopomakoy woy od koheddam dow kos kahaan diyot ki Disas Krays. 26 Su otid pokolivod a rad diyot koniyu, oraroy row no id pokoposivantug si Disas Krays pomon tid puungan din atag koddi.
27 Ahad ondan kos od kotomanan ku, ko-ilangan no iddos koniyun ko-ubpa, od poko-ikuu to nonaw riyot Moppiyon Dinoggan moka-atag ki Disas Krays. Su otik od poko-undiyon a man to koniyu o dii, od korinog ku no nosokkad kos ginawa woy poomdom dow to kodlohinat riyot kovonnaan atag to Moppiyon Dinoggan. 28 Woy od kosorollan ku mandad no waa kow novaakki taddot od supak koniyu, su ini en kos kilaannan nod silutan sikandan to Monama. Piru atag koniyu, ini en kos kilaannan nod kotobbus kow, oyyos id pomon en ini to Monama. 29 Su id boggayan kow to kopiyannan, konna ra nod pomakoy ki Disas Krays, ko konna, od ti-is mandad to kosupittan atag kandin. 30 Woy pomon tadda, od ko-ukitan dowd mandad kos kodposuppit iling taddot nokita row no no-ukitan ku dangan, woy nosorollan dow no taman ko-ungkay, id ti-is a poron to kodposuppit.