Dos Sulat ni Pablo Atag to mgo Toho
ROMA
Unna nod Bosan
Inin sulat, id popiyod ni Pablo atag taddot pompomakoy riyot Roma. Iddos duma kandan, mgo Judio, dos duma mandad, konna mgo Judio. Duwon duma nid ikahi no id sulat din ini, laggun to id oubpa sikandin diyot Corinto no sakup to prubinsya to Acaya.
Sokkad no unayan nid sulat din ini, amoy od posaddoo taddot od pompomakoy riyot Roma moka-atag to puhawang din nod lowwi kandan (1:8-15; 15:22-33). Id paabbotlabbot din kandan iddos Moppiyon Dinoggan moka-atag to puhawang to Monama no od kotobbus kos mgo minuvu ukit to kopomakoy ran ki Disas Krays. Dos pantok no kodpaabbotlabbot din ka-ay'n puhawang, od kovasa riyot 1:17, “Su ukit ka-ay't Moppiyon Dinoggan, od kosorollan ta no id podmotallong to Monama kos mgo minuvu ukit da en to kopomakoy.”
Ka-ay'n bersikulu, id tigkanoy si Pablo nod paabbotlabbot moka-atag to po-ukit no od komotallong kos minuvu riyot kod-ontong to Monama. Unna, id posaddoo rin no mosaasaa kos langun no minuvu, Judio man sikandan o konna. De-en otik konna sikandan od komotallong diyot kod-ontong to Monama, ko-ilangan en nod silutan sikandan. Id paabbotlabbot ni Pablo no waa minuvu nod komotallong ukit to kodtuman to mgo suhu, oyyos waa en od pokotuman tadda. Id podmotallong to Monama kos mgo minuvu ukit da en to kopomakoy ki Disas Krays (3:20-22).
Diyot kopitulu 6 taman to 8, id paabbotlabbot ni Pablo iddos moka-atag to lammin umuu nod kotanggap tod pompomakoy pomon to nosokkad sikandin diyot ki Disas Krays. Moppiya kos koroniyan din diyot Monama woy no-iroomman sikandin to Uhis no Ispiritu no id polegguang kandin pomon diyot kod-uripon to saa. Ka-ay'n mgo kopitulu, id paabbotlabbot mandad ni Pablo iddos moka-atag taddot ollog no kodgamit to mgo Suhu, dos kodposupakoy to poomdom to minuvu woy dos kotuusan to Uhis no Ispiritu amoy'd tavang tod pompomakoy.
Diyot kopitulu 9 taman to 11, id paabbotlabbot ni Pablo iddos puhawang to Monama atag to mgo Judio woy taddot konna Judio. Mid ikahi sikandin no iddos kod-elle taddot ko-urallan to mgo Judio ki Disas Krays, idda en kos puhawang to Monama nod pokolonug iddos konna mgo Judio riyot eru rin pomon taddot id puungan ni Disas. Mid ikahi mandad si Pablo no init morin allow, od pomakoy ron iddos mgo Judio.
Diyot kotompusan no mgo kopitulu, duwon mgo pomandu ni Pablo moka-atag to ko-ubpa tod pompomakoy, labbi ron iddos kodpohinowannoy woy kodpotanggapoy. Duwon mandad moka-atag to kodpo-iraom dan to kodponguu to guberno woy dos moppiyon kodporumannoy ran.
Dos mgo Nokota-aw:
Kodpokilaa woy dos nonaw no duwon dakkoon koru-anon (1:1-17)
Mosaasaa kos mgo minuvu (1:18 taman to 3:20)
Dos puhawang to Monama to kodtobbus to mgo minuvu (3:21 taman to 5:21)
Dos lammin umuu to mgo minuvu no nosokkad diyot ki Disas Krays (6:1 taman to 8:39)
Dos puhawang to Monama moka-atag to mgo Judio (9:1 taman to 11:36)
Dos ko-ubpa tod pompomakoy (12:1 taman to 15:13)
Kodpongumusta woy kotompusan no mgo pomandu (15:14 taman to 16:27)
1
1 Siyak si Pablo kos mid sulat ka-ay woy uripon a ni Disas Krays. Id aam a to Monama amoy'd kovovallan no apostoles, woy id po-ossa a nikandin amoy od ponudtuu to Moppiyon Dinoggan to Monama.
2 Inin Moppiyon Dinoggan, tapoy id tandu to Monama, woy nokosulat ini riyot Nosulat no Kahit Monama ukit to mgo propeta rin. 3 Ini en kos Moppiyon Dinoggan moka-atag taddot Anak din no si Disas Krays. Nominuvu sikandin no id pomon to lubbad ni Harin David.*Od kovasa ini riyot Salmo 89:3-4. Dos kohulugan taddot kahi no, Anak ni David, idda en so Mesiyas no id aam to Monama amoy'd harit langun. 4 Woy noposivonnalan no Anak en sikandin to Monama iddot novadnow sikandin ukit to kotuusan to Uhis no Ispiritu. 5 Ukit ki Disas Krays, notanggap ku iddos kopiyannoy to Monama woy novovallan a no apostoles. Oyya su id kopi-i rin no iddos langun no konna mgo Judio no riyot nokod-osso-osson ingod, od koponudtulan to Moppiyon Dinoggan amoy'd kopiyod sikandan nod pomakoy woy'd dumoruma ki Disas, woy od koposivontuhan kos ngaran din. 6 Na sikiyu nod pompomakoy ruwot Roma, apii kowd en mandad taddot mgo minuvu no id aam to Monama amoy'd kosokkad diyot ki Disas Krays.
7 De-en id sulat ku ini atag koniyu langun duwon to Roma no id ginowannan to Monama, woy id aam nod kovovallan no mgo minuvu rin.
Muopa nod kotanggap dow iddos kopiyannoy woy kosunayan no id pomon to Monamon Amoy ta woy od Longaggon no si Disas Krays.
Dos Kodposolamat woy Dosalon ni Pablo
8 Na unnot langun, od posolamat a to Monama ku ukit ki Disas Krays atag koniyu langun, su novantug kos kopomakoy row riyon to intirut ingod. 9 Nokosaddoo kos Monama no allow bulli, id dasaa a atag koniyu. Sikandin kos od tumanon ku riyot tivuk no pusung ku ukit to kodponudtuu to Moppiyon Dinoggan moka-atag taddot Anak din. 10 Od dasaa a inaayun, no otik id kopi-it Monama, od poko-unduwon a to koniyu, su saddook ko-ungkay a pa od pokosakat. 11 Dakkoo en kos ginawa ku nod kokita ku sikiyu, su amoy id pokononaw ku mandad koniyu iddos id nonaw koddi to Uhis no Ispiritu amoy'd mosalig kos kopomakoy row. 12 Iyon kohulugan ku, no od pokodtovangoy ki nod mosalig kos keton kopomakoy, oyyos od kotovangan a ukit to koniyun kopomakoy woy sikiyu mandad, od kotovangan ukit to koddin kopomakoy.
13 Mgo suwod, id kopi-i ku nod kosorollan dow no kopila ad mid pomuhawang nod unduwon to koniyu, piru duwon od pokobaavag koddi taman ko-ungkay. Id kopi-i ku no duwon mandad mgo minuvu ruwot koniyu nod kopiyod ku to kodpomakoy ki Disas Krays, iling taddot id puungan ku riyot konna mgo Judio no riyot nokod-osso-osson lugaa nid undiyonnan ku. 14 Su noheddam ku en no ko-ilangan id ponudtuu ku kos Moppiyon Dinoggan diyot ahad ingkon no mgo minuvu, dos id ubpa riyot mgo bonuwa woy dos diyot mgo buvunganon, diyon to mgo minuvu no mowwet no sinorollan, ahad diyot waa mgo sinorollan. 15 Purisu dakkoo en kos ginawa ku nod pokoponudtuu a mandad to Moppiyon Dinoggan duwot koniyu to Roma.
Dos Kotuusan to Moppiyon Dinoggan
16 Konna ku en id ko-ilow iddos kodponudtuu to Moppiyon Dinoggan, oyya su ini en kos kotuusan to Monama to kodtobbus to langun nid pomakoy, labbi ron iddos mgo Judio woy idda mandad so konna mgo Judio. 17 Su ukit ka-ay't Moppiyon Dinoggan, od kosorollan ta no id podmotallong to Monama kos minuvu ukit da en to kopomakoy. Oyyos no-ikahi riyon to Nosulat no Kahit Monama no,
“Iddos minuvu no id podmotallong to Monama ukit to kandin no kopomakoy, od pokotanggap to umuun waad tomanon.”*Od kovasa ini riyot Habacuc 2:4.
Dos Lampas no Langot to Monama taddot mgo Mosaasaa
18 Piru iddos Monama riyot datas to langit, id pokita to lampas no langot din taddot mgo minuvu no od ponsupak kandin woy'd puung to kororattan. Oyyos id tombunan dan iddos kovonnaan moka-atag kandin ukit taddot morat no pinuungan dan. 19 Konna en sikandan od poko-ikahi no waa saddoo ran moka-atag to Monama, oyyos idda ron en so Monama kos id posaddoo kandan. 20 Bonnaa en no diid kokita kos Monama, piru pomon poron to kodbovaa to ingod, od kokita ran iddos waad tomanon no kotuusan woy botasanon to Monama ukit taddot binovallan din. De-en konna ran od poko-ikahi no waa saddoo ran moka-atag kandin. 21 Ahad nosorollan dan no duwon Monama, piru waa sikandan id posivantug woy'd posolamat kandin. Iyon dan id poomdom iddos mgo ebbaw woy waa mgo koru-anon, woy pomon tadda, nosukiromman kos poomdom dan moka-atag to kovonnaan. 22 Od tommanon dan no moraom kos koovottan dan, piru mgo bangog bos sikandan. 23 Oyyos waa ran simba-ana, iddos Monama no waa kopotayan, ko konna, iyon dan baling simba-ana iddos konna bonnaan mgo monama no iling to boyo to minuvu no duwon kopotayan, dos mgo manuk nod layanglayang, dos mgo oyama woy dos mgo uwod.
24 Purisu id podtohon don sikandan to Monama riyot kodpuung to molibmit no mgo ingowollon to lawa ran, woy pomon ka-ay, oray'n moko-ilow-ilow iddos pinuungan dan diyot mgo duma ran. 25 Waa ran tonggapa iddos kovonnaan moka-atag to Monama, woy iyon dan pomokaya iddos uhus. Su id simba ran baling taddot mgo binovallan to Monama, konna iddos Tohodbovaa. Sikandin da kos ollog nod doongon taman to waad tomanon. Oyya, od kotuman en ini.
26 Na pomon to ungketen kos pinuungan to mgo minuvu, id podtohon don sikandan to Monama riyot kodpuung taddot moko-ilow-ilow'n mgo ingowollon to lawa ran. Ahad iddos mgo ba-ay, konnad mama kos id kopi-i ran, ko konna, idda ron so iling dan da en no ba-ay kos od loyukan dan. 27 Ungketen dad en mandad iddos mgo mama, konnad mgo ba-ay kos id kopi-i ran, ko konna, idda ron so iling dan da en no mama kos od loyukan dan. Moko-ilow-ilow iddos pinuungan dan diyot iling dan no mgo mama. Woy pomon taddot ebbaw no pinuungan dan, od silutan en sikandan to Monama loppa taddot nopuungan dan.
28 Pomon to id elle ran ahad taddot kodpopoomdom moka-atag to Monama, id podtohon din sikandan nod ko-uripon taddot ebbaw no kodpopoomdom dan. De-en id puungan dan iddos konna nanoy ollog nod kopuungan. 29 No-uripon sikandan to nokod-osso-osson kororattan, kodlooggod, kosina, kod-imatoy, kodpo-opuloy, kodloimbung woy kodpomuhawang to kodpuung to morat diyot mgo duma ran. Od posoupottoy sikandan, 30 od podorattoy, id kolingasa-i ran kos Monama, od ayu-ayu to mgo duma ran, od poratasdatas, od pobporoong woy od nonangkap dan to po-ukit nod puung to morat. Dii ran od dumoruma to amoy woy inoy ran. 31 Mgo bangog sikandan, diid tuman to mgo tandu, woy waa en ginawa woy eru ran diyot dumon minuvu. 32 Ahad nosorollan dan don iddos ollog no suhu to Monama, no iddos mgo minuvu nod puung to ungketen, ollog en kandan iddos kopotayan no waad tomanon, piru id ponayun dan pe-en taddon pinuungan. Woy konna ra idda, od doongon dan iddos mgo minuvu nod puung to iling tadda.