1 Rate Saul na embomeni na Steven tea avo kito tunga javotoho be ena.

Eto Steven ta sari ari iji te Jerusalem embo na ari sapura uo ekalesia embomeni osaga peni vahai be kito Jerusalem da toto enda Judea jo ta da nei nei aita pambua eto nei Samaria enda ta pambua rate Iesu ta apostel 12 amina pambae Jerusalem da ta mihahera.

2 Eto God ta tunga humbari embo na Steven pehenu si ijie kovea. 3 Rate Saul na ekalesia irae aja bande vahai vahai ta horeto embo te evohu te humbuto goruketo puvuto tipura ta ere ikihahija.

4 Eto ekalesia embomeni da neita neita pahue God ta ke hande ere uahera. 5 Eto Philip na pambuto da vahai Samaria amita jo ta Iesu Keriso ta puvurari ta duru hande enu 6 embomeni isapamane na Philip ta ari neite neite ena avo kogue oje jevito amita ke ingia. 7 Eto Philip na embo ta jo ta ahihi sasapura avo enu jajavone te arahata puvuto pambua eto popora embo tapa avo kokojekena 8 avoeto da amita embomeni tapa tunga javotoho be ea.

9 Eto embo vahai javo Simon amo Samaria da ta mihie saruka ere uahija amita saruka neite neite ue “Na ivo embora” ainge ijinu 10 embomeni tapa na amita ari kito vani vini ue ke agi eto einge ere ijiahera, “Embo emita sovera amo God ta sovera inono avoeto amita javo ‘Sovera embora’ ” 11 ainge ijie amita saruka kito ke be ijie ambo ambo ere uahera. 12 Rate Philip na ke einge ena, “Iesu Keriso amo ungotenau hondate ari embo mahu puvija eto God na amita embomeni ere uhua eto Iesu Keriso na enana ta King asuja.” ainge ijinu ingito embo te evohu te tapa ke be hotembeto bapataito ere uahera 13 eto Simon na ke avo be hotembeto bapataito ena eto Philip ta ambo ambo eto pambuto amita ari jajavotoho avo kito vani vani ena.

14 Eto Samaria embo na God ta ke ingito uje ea avo apostel nei Jerusalem jo ta enana ingito Peter te John te Samaria enda ta ikeo pambua. 15 Eto pambuto embomeni nei Bada Iesu ta javo ta bapataito ea 16 rate Ahihi Otohu umbae avo kito Ahihi Otohu na enana ta jo ta veaja 17 Peter te John te na pari ue enana ta hamo ta ingeni tembeo Ahihi Otohu umbua. 18 Avo apostel na ingeni hamo ta tembeo Ahihi Otohu umbua avo Simon na kito koro na humbasi 19 ke einge ena, “Eto ari avo nau degi ta ikevu eto na nau ingeni na embo ta hamo ta tembano Ahihi Otohu umbare” ainge enu 20 Peter na ke mine einge ena, “Umo God ta hande koro na humbasi hotembihea avo no koro ga sari ejo 21 eto God ta tihi ta no jo amo javotoho mane ra avo eto ari emo no mane asuja. 22 No ari sapura avo aja to ijie pari ururoro eto no jo ta hotembari sapura avo God na hotembeto toasuja 23 eto no jo ngahia amo ari sapura na andirari avo ere kogona” ainge enu 24 Simon na einge ena, “Ungo nau degi ta ngahia eheva avo mane puvuresuja avo God ta degi pari evujo,” ainge ena.

25 Eto Iesu ta ari te ke te tapa do ena avo Peter te John te ahe poeketo egerembeto Jerusalem degi ta pahue Samaria da vahai vahai ta heteto Iesu ta duru javotoho hande ue pambua.

26 God ta Anera vahai na puvuto Philip ta degi ke einge ena, “Degi Jerusalem eto enda Gaza ojagatambu kaina hena ai pambujo,” ainge enu 27 ingito degi ta ihiketo pambuhumihe Ethiopia embo okose vahai hambuna amo Ethiopia ta Queen Candace ta koro simba ari embo okose avo Jerusalem ta God jakeka asi pambuto puvutuhunu hambuna. 28 Eto Ethiopia embo amo amita pambari nga javo ‘Chariot’ ai ta arumbeto amita da ta pambuhumihe peroveta Isaiah ta ke kajari avo ehekena. 29 Eto God ta Ahihi na 30 Philip ta degi einge ena, “Chariot ai ta auvejo,” ainge enu Philip na huheveto pambuto nga ta auvenu peroveta Isaiah ta ke kajari avo ehekihinu ingito ke einge ena, “Umo ke ehekihea amo be ere ingihete,” ainge Philip na enu 31 ke mine einge ena, “Na daingeto ingono, ke be harikari embo irae,” ainge eto Philip vihito amiga arumbaja ena. 32 Eto ke ehekena amo erevira: ‘O sheep amo humbuto pambuto hevagora amo mane ke eaguja. Eto o sheep ta meni embo na humbuto pambuto hamo hu tiukagora mane ke eaguja eto embo amina ainge dombo ke ae. 33 Eto amina me kiaguja rate embo na hondate ae. Eto enana na tehere embo ta vasiri enda ta irae ehija. Avo eto amita meniundi irae.’ ainge Isaiah na kajena 34 avo Ethiopia embo na eheketo Philip ta degi einge eto ingina, “Ke emo peroveta ta ari avo kajenute mo embo nei ta ari avo kajenu avo e ingone,” ainge enu 35 Philip na Isaiah ta ke kajena amo Bada Iesu puvuresuja eto puvuto tapa do ehija avo Philip na Ethiopia embo ta harikenu ingina. 36 Eto degi ta pambuhumihe umo kito Ethiopia embo na einge ena, “Aravora, na bapataito ejo.” 38 ainge eto Chariot hetenu enana umo ta veto heteto Philip na bapataito 39 eto vihio God ta Ahihi Otohu na Philip humbuto da Azotus ta pambuna. Eto Ethiopia embo na Philip ehako kiae eto degi ta pahue tunga javotoho ena. 40 Eto Philip na da javo Azotus ai God ta ke ahe poekena eto degi ta pahue da vahai vahai ta Iesu ta ke avo hande ue pambuhahija da javo Caesarea ta puvuna.