1 Eto na kogue mihene O Sheep Meni na ihiketo pangire vahai heukehei o vasiri te 4 rate vahai amina ke ‘Hae’ ainge amo tururu na keko ehei ingihene 2 o horse hamo parara amina sariketo embo hamo ta arumbari eto ki te peva te jigari puvei enana na amita degi siro kope ikehere asuketo amita kitoho ga isoro eto dembasi pambija. 3 Eto O Sheep Meni na pangire nei heukehei O Vasirite nei amina ‘Hae’ ainge ijinu 4 o horse nei hamo ji peri ainge hamo pangari amina embo hamota arumbari sariketo puvera amita degi peka haeketo isoro asora sovera ari amite eto isoro asivo peni te avo ikehere humbuto pambuhija. 5 Eto O Sheep Meni na pangire heriso heukehei irae ehei nei avo heukihinu O Vasirite nei amina ‘Hae’ ainge ijinu o horse hamo mume amina nau tihita sariketo puvei kehena. Eto o amita hamota embo arumbeto puvija amo donda tembeto bouka heka humbari avo ingeni na jigito puvija. 6 Eto O Vasirite tapa 4 amita jo ta ke einge puvei ingena “Eto ejo embomeni na koro pajire be na indari isapa be umbare amo embo na pure iji vahai asuja amo wheatwheat:be amina jaseto flour eto bread ingagoraavo litre vahai umbautemo barleybarley:barley be amo wheat be aingera.3 litre humbuhe koro ikau irae aisuja ainge ejo are, Rate esi grapegrape:esi grape ta be amina wine eora.i oliveolive:i olive be amina oil eora.pure avo ao mane sapura aisuja! ainge ena.” 7 Eto O Sheep Meni na pangire heriso nei vahai heukehei irae ehei nei heukihinu O Vasiri te tutumota vahai amina ‘Hae’ ainge ijinu 8 o horse nei hamo karere ari amo embo javo Tari Pehari avo hamo ta arumbari puvutuhunu amita ambota amo embo peheto pambuto iragora da javo Hades amite tapa embo na puvurarako ehei kehena. Eto embo javo Tari Pehari amite eto embo javo Hades amina enda embomeni tapa avo humbuto kaheke kaheke eto tapa 4 ainge iketo heriso nei vahai avo toto vahai avo asivo na tasora, indari pure sosou aro beuje na pehasora eto isoro o na kambaro pehasora eto ari tapa erevi ara sovera ari amo embo javo tari pehari amite eto embo javo Hades amita degi ikehere umbera.

9 Eto pangire heriso nei heriso pirouketo nei heukihinu God ke be ari embopo amo God egikae ue iragora avo kitoho embo na teo pepehekea amita Ahihi amo pene ikari gaga suvu ai kogone 10 enana amina ke peni vahai be eto einge ehera, “Bada God donda tapa simba ari embo umo ke be eto Embo Otohu avoeto iji doinge simba eto enda embo ta ari sasapura sirikihe dago kitoho na teo pepehekea amita orosa veari amita mine humbuhe hajire ikao kiaeherete avo simba mihovora,” 11 ke ainge ijio enana ta degi bo parara kokoso avo ikerekenu aseo, “Iji isapa simba ururovo ungota namei kamei God ta ke agi ari embopo nei uhoho avo kitoho na taro peharo heka inono ai avo simba evujo”, ainge ena.

12 Eto na kogue mihene o hamo ta ke kajari amita pangire 5 heukehei irae ehei God ta o Meni na 6 heukihei enda ta titira pajire puvutuhoi embo pehari ta sinena ue pusu kuhagora hajire avo iji na mume ehei hariga na orosa ta hajire arako ehei 13 kuro tapa enda ta vehera amo ji junga be sari pisara na jaheveoi veaguja aingeko vehera. 14 Eto uhu amo ohi na egoveketo pambaguja aingeko oi tiri te tiuka te na toto degi nei ta pambera. 15 Eto enda ta kings te embo pepenite isoro kihi humbari embopo te haja vaja embopote, sovera embopote embo nei ta ke agi ue pure ari embomeni te eto embo teho te tapa na pambuto panga ho ta eto tiri hemba ta karu ho ta ojijiketo mihie 16 tirite korote ta degi ke einge ehera, “O Sheep Meni na tumo ere ua avoeto embo avoarumba peni ta arumbeto mihia amita tombu titiha eto dagota hamota veto ahureke ojiketo irore. 17 Amo embo siriketo hajire ikari iji peni puvija amo enda embo amuna hetari haitere?” ke ainge ehera.