1 Si o tasho am i ni-tashogid g Hekia S-apꞌekam Gewkdag mat ab wo i e ai g tash mat muꞌi wo dagito g e-wohochudadag. Haꞌi at wo ha mashcha g iattogi nat pi g jijawul wo i ha wahmud. T muꞌi hemajkam ab wo ha wohog el. 2 Hegam mat chum hekid wo ha iattogidad at pi wo shaꞌi e kudutad heg hekaj nat pi ged hu wabsh wo i ha apꞌet. 3 Idam o ha mashcham mo d pi apꞌekam mat wo e hohont ch ep pi ha hiwgid mas wo koꞌad g has mahs haꞌichu hugi. K eda wehs ihda d Jiosh nahtoi ch am wa s-apꞌe am t-wehhejed. Ahchim mach s-mahch g wohokam att hekaj ab wo hoꞌigeꞌel g Jiosh k ab wo ui g nahtoij. 4 Jiosh at wehs haꞌichu nahto. K wehs s-kehgaj. Tt hekaj ab wo i hoꞌigeꞌid k ab wo ui. 5 Bo kaij g Jiosh mat g hoꞌigeꞌidahuna am wo i apꞌech nenaj ed.

6 Dapt wo s-apꞌekam piongajk g Jesus Christ maptp am wo i ha ahgi g t-wehm wohochuddam ihda haꞌichu mashchama. Kupt an wabsh s-ap wo uꞌukchid g e-wohochudadag ch wehs haꞌichu mashchama ab amjed map hab hi wa masma hab e wua.

7 Pi g am hab masma hekaj g hohoꞌoki aꞌagida mas d Jiosh haꞌichu ahga. Pi at hab wo em-juh mamt wo s-aꞌapꞌek am Jiosh nena ed. Am apt wo si e mashchamad mapt am hab wo junihid s-apꞌekam himdag.

8 S-apꞌe mapt wo e momoisha k wo s-gewkk. K wabshaba ab him g tash mat wo huhug ihda. K heg hekai baꞌich i s-apꞌe mapt wo i e gewkai am e-wohochudadag ed. Id o ab m-mahkch g s-apꞌekam doakag idani ch imhab i baꞌich. 9 Do si wohokam ihda haꞌichu ahga. K hab chuꞌig mat wehs ab wo i chum s-e wohoch. 10 Jiosh at wehs wo ha doꞌibia hegam mat ab wo i s-wohoch g haꞌichu ahgaj k am wo i e gewpkai wui. Kuch ab s-wohochud ch heg hekaj am si t-nakog ch muꞌi haꞌichu ab nakog matt wo ha ahgi hemajkam ab amjed ihda. 11 Am g i ha mashcham ihda mani m-ahgid k ab i ha chehani mat am hab wo junihid. 12 Bapt masma s-ap hab wo e junihid ch s-ap wo neokad. T pi hedai pad has wo m-elidad map d wabsh wechij hemajkam. Ab g si pihk e elidad wehs ha wui ch wo si e nuhkudad ch pi hab wo junihid g pi apꞌekam. T hab wo e chehgidahid g em-wohochudadag. 13 Am g i e nakog mapt am wo wa neꞌokchulidad g Jiosh haꞌichu ahga am ha-namki ed ch wo ha mashchamad ch am wo i ha gewkemhunad. 14 Neh, ha wanimeddam at was e hoꞌigeꞌidahu m-wehhejed k ab m-taht. T wa hegam mo d Jiosh haꞌichu i tashogiddam am ah mat has mahs chikpan ab m-mah g Jiosh. Pegih, am g i e nakogad ch heg am hab wo junihid. 15 T hab ab wo i e gewkemhunad g wohochuddam an m-neidch. 16 Si g s-e nenꞌoid map has e junihim ch haschu ha mashcham k hekaj pi wabsh wo heki wua g e-doakag. T hegam mat ab wo m-kaiha hab waꞌap pi wo heki wua g e-dodakag.