7
Matsh haschu neꞌoki ab i nodagi g Steven
1 Kush hab kaij g uhgchu pahl ab wui g Steven, “No am wa woho map hab junihim hegai mo haschu ab m‑abchud?”
2 Kush hab kaij g Steven:
“Ni‑geꞌegedga ch ni‑hajuni, ab g wo si i ni‑kaiham. An o oꞌohadag matsh g Jiosh ab wui e chehgi g t‑shohshonbad Abraham. Kush eda am wabsh kia kih Mesopotamia jewed ch ed.
3 “Sh hab kaij g Jiosh ab wui:
Ia g wo ha dagito g e‑hajuni ch e‑jewedga k ab wo hihi heg wui jewed mant am wo m‑chehgi. Genesis 12:1
4 “Tsh wa woho am dagito g Mesopotamia jewed mash am kih g Caldea hemajkam k am chihpia Haran kihhim wui. Kutsh am i muh g Abrahambad ohgbad. Tsh ab hahawa ep cheha g Jiosh mat ia wo chihpia Canaan jewed wui. Kutsh ia i chiwia mach hemuch ia kih. 5 Tsh eda koi ab hu heꞌes shaꞌi mah ihda jewed k wabshaba am hi wa ahgid mat wo mah. T d wo ha‑enigak g amjedkamaj mat heꞌekiajj ab wo i oi. Kush eda pi koi ha aꞌaliga g Abrahambad mash eda hab ahg g Jiosh.
6 “Kush hab kaij g Jiosh ab wui:
M at hu wabsh heb hu jewed ch ed wo kihk g m‑amjedkam ch d wabsh wo ha‑pionagk.
Kumt wo ha shoꞌigch giꞌik siant aꞌahid ab. 7 Nt wabshaba wo ha kastigal hegam hemajkam mat an wo ha uꞌukchid.
T ab haha wo i wuwha heg amjed jewed k ab wo si has i ni‑elid k wo ni‑ihm iia. Genesis 15:13-14
Neh, bash kaij g Jiosh 8 ch ab mah g Abrahambad hegai himdag mat am wa has masma wo ha oꞌoha an ha hikuchk g chechoj e‑aꞌaliga. Tsh hab masma wo s‑mahchk mash hab waꞌap d ha‑wuikam hegai matsh g Jiosh am ahgi g Abrahambad. Tsh wa woho hab e juh g Abrahambad k an pahl hikuch g e‑alidag Isaacbad mo d i gigiꞌik tash amjed mat mahsi. Tsh g Isaacbad hab waꞌap juh g e‑alidag Jacobbad. Tsh g Jacobbad hab waꞌap ha juh hegam gamai gohk e‑aꞌalidag mach ab d ha amjedkam.
9 “Tsh idam wa s‑hehgam g e‑wehnag Josephbad k ab haꞌi ha wui gagda mat d wo ha neholigak am Egypt jewed ch ed. Sh wabshaba g Jiosh am nuhkud 10 ch ab s‑ap i wuhshad wehs haꞌichu shoꞌigdaj amjed k ab i mah g si oꞌodhamdag ch amichudadag. Tsh am i nei g ha‑kownalig g Egypt t am hemajkam k am i uhgkajid k am kownalch am dahm g e‑kownaltalig ch haꞌichu e‑eniga.
11 “Tsh wa haha wabsh gei g bihugig k ha shoꞌigch g hemajkam wehsko Egypt jewed dahm ch iia Canaan jewed dahm. Tsh pi shaꞌi e amich hegam Abrahambad mat hebai wo bei g haꞌichu hugi. 12 Kush eda am s‑haꞌichu hugig Egypt jewed ch ed. Kutsh am i kah g Jacobbad k am ha cheha g e‑aꞌalidag matsh am wo hunio. Kutsh hab e juh.
13 “Tsh am ep i huhug g haꞌichu ha‑hugi. Kutsh am ep hunio. Tsh g Josephbad am hahawa ha ahgi mo d ha‑wehnag nash pi pi amichud. Tsh g ha‑kownalig g Egypt t am hemajkam ab s‑ha mai g Josephbad hajuni. 14 Tsh g Josephbad am hahawa wai g e‑ohgbad mat wehsijj ab wo i chihpia Egypt wui. Kush eda d wewaꞌakko gamai hetasp (75) hemajkam. 15 Tsh wa woho am i chihpia hegam Jacobbad Egypt wui k am kihkahim ch am koi. 16 Tsh am uhpam i e ui g ha‑ohꞌo g Abrahambad ch Josephbad Shekem kihhim wui. Abrahambad atsh wa am heꞌes ha nolawt g jewed hegam mash d Hamor amjedkam matsh am wo e toa g ha‑koꞌidag.
17 “Sh amjed muꞌi aꞌahidag wehgaj. Sh e aihim matsh am hab wo juh g Jiosh mash haschu i heki hu ahgid g Abrahambad. Tsh eda am i si muꞌida g t‑shohshonbad amai Egypt ch ed. 18 Kutsh am hema i wuhsh g kownal mash pi shaꞌi mahch matsh wa has masma am si i ha wehmt g Josephbad amai Egypt ch ed. 19 Kush ihda nahnko ha wua hegam t‑shohshon ch ha shoꞌigchud ch hab ha ahg mat gam hu wo ha shul g chuꞌuchum e‑aꞌaliga hab ahgch mat wo koi.
20 Kutsh eda mahsi g Mosesbad k si s‑kehg d ali. Kutsh am i nuhkud g jehjij waik mashad ab 21 k gam hu hahawa i wuhshad. T g kownal uwi alidag am chehg k ab i bei hab masma mo d madaj. 22 Kumtsh wehs haꞌichu mashcha mo haschu d i si s‑hasig haꞌichu am Egypt ch ed. Tsh ab si i mai ihda wehs k d si s‑has haꞌichu am heg eda mo haschu hab i kaij ch haschu hab i junihim.
23 “Batsh wa masma am i geꞌeda g Mosesbad k am i ai g giꞌikko wehst‑mahm (40) aꞌahidag. Tsh am hu hebai hab i e ah mat am wo i ha chehgim g e‑hahajuni. 24 Kush hema g Egypt t am oꞌodham am hema shoꞌigchud g Tuhligo. Tsh g Mosesbad am i wehmt g e‑hajuni k mua ihda Egypt t am oꞌodham mat wo agwua 25 k hab e ahg mat g hajunij wo chum s‑mahchk mat g Jiosh wo hekaj k wo ha doꞌibia. Sh wabshaba g hajunij pi hab masma hab elid haꞌichu. 26 Sh am baꞌich d i tash, sh am haꞌi e cheggia g Tutuligo. Tsh am ha neid k chum s‑ha daꞌid k hab kaij, ‘Kia, ahpim! Dam e‑wepngam ch eda haschu ahgch e cheggia?’
27 “Kut hegai mo ha cheggia ab si nuꞌichkwua g Mosesbad k hab kaij:
Shahchu ap ahgch hab chum e wua maps am t‑dahm.
Pi o ab hu shaꞌi m‑ab maps ahpi am haꞌichu wo i apꞌechudad am t‑shahgid.
28 Napt hab waꞌap wo chum ni‑mua mapt wa hab juh g Egypt t am oꞌodham tako? Exodus 2:13-14
29 “Tsh am i kah g Mosesbad ihda k ha hekaj gam hu i e mehkod ab Egypt amjed k gam hu i jiwia mash am d Midian jewed. Sh am haꞌi oꞌodhamag. Kutsh am ha hohnt k gohk chechoj aꞌalidt
30 “Sh am him k am d i giꞌikko wehst‑mahm aꞌahidag. Sh am hu hebai ha nuhkud g kahwal g Mosesbad am miabidch hegai doꞌag mo hab e aꞌaga Sinai. Tsh ab wui haha wabsh hema i e chehgi g anghil hab masma mo am meihim g shaꞌi ch eda pi meitto. 31 Tsh ab i miabi g Mosesbad mat ab si s‑ap wo i nei nash pi pi amichud matsh wa pi shaꞌi meitto g shaꞌi. Sh g Jiosh ab wui hab kaij am gahi wuhshanim g anghil:
32 Ahni ani d Jiosh.
K wa ab has ni‑elid hegam m‑shohshon mo d Abraham ch Isaac ch Jacob. Exodus 3:6
Tsh hahawa si gigiwuk g Mosesbad k si s‑ehbeni mat am wo i nei.
33 “Sh hab ep kaij g Jiosh ab wui:
Ab g has i ni‑elid k wuashulig g e‑kaikia shuhshk nap pi ia kehk ni‑wui.
34 S‑mahch ani mam has i masma ha shoꞌigchud g m‑hajuni amai Egypt t am.
Do ni‑hemajkamga.
Kuni kah g ha‑shoshaki ch heg hekaj am i ni‑maskogi ab m‑wui mapt ahpi wo ha doꞌibia.
Pt oi am wo i e nako mapt am wo hih Egypt wui. Exodus 3:5, 7-10
Neh, bash kaij g Jiosh.
35 Kuni hab ep s‑cheꞌimk mo ihda Mosesbad d hegai matsh wa g hajunij pi ab hu tatchua ch hab kaij:
Shahchu ap ahgch hab chum e wua maps am t‑dahm?
Pi o ab hu shaꞌi m‑ab maps ahpi am haꞌichu wo i apꞌechudad am t‑shahgid. Exodus 2:14
Do wa ihda Mosesbad matsh g Jiosh am i kei ha dahm g hajunij matsh wo ha wanimed k wo ha doꞌibia. Kutsh hegai anghil mash ab neok mei ch ed am uꞌapa g Jiosh neꞌoki Mosesbad wui. 36 Kutsh g Mosesbad am uhpam hih Egypt wui k am hab juh g s‑hasig haꞌichu chehgida k am i ha wanim g e‑hajuni mat ab i wuwha Egypt amjed. Kutsh wa am i e tahp hegai mash hab e aꞌaga Al S‑wegi Kahchki. Tsh am gahi i shul idam Mosesbad k am chipiahim giꞌikko wehst‑mahm ahidag oidam tohono jewed ch ed.
“Sh g Mosesbad heg oidam s‑hasigam haꞌichu am hab junihim 37 ch am ha ahgid ch hab kaij:
Jiosh atsh am hema ep wo i kei g t‑hajuni hab masma mat ahni am i ni‑kei.
Kut heg d ep wo Jiosh haꞌichu i tashogiddamk. Deuteronomy 18:15
Neh, bash kaij g Mosesbad. 38 Tsh g Jiosh ab mah g e‑neꞌoki doꞌag t ab am gahi wuhshanim g anghil. K d t‑himdag ihda neꞌoki matsh ab bei.
39 Tsh pi oi jiwia g Mosesbad ab doꞌag t amjed. Tsh g t‑shohshonbad pi ab hu wohog elid k im hu hab wabsh i s‑junimk g Mosesbad ch uhpam s‑hihimimk am Egypt wui 40 Sh g ha‑uhgchu pahlig d Aaronbad. Sh idam ab wui hab kaij:
Pi ach mahch mas has e juh ihda Moses mat ab i t‑wuwhas Egypt amjed.
Am g wabsh haꞌi ha nahto g jijosh mat hegam am wo t‑wanimedad. Exodus 32:1
41 “Kush wa am hema wisilot g ohlakaj k ab wui iagchul heg wepogidch mo d ha‑jioshga k am ep piast mat heg hekaj ab wo si i haꞌichuch hegai e‑jioshta. 42 Kutsh heg hekaj im hu hab i e juh g Jiosh ab ha amjed k am wabsh ha hiwigi mat wabsh g hejel hab e‑elida am hab wo junihid. Kush wabsh g huhuꞌu ab ha ihm mat hab masma an oꞌoha g Jiosh haꞌichu i tashogiddam mash hab kaij g Jiosh:
Ab ani ha chehani g Tutuligo hemajkam mat wo mumꞌa g e‑shoshoiga k ab ni‑wui wo iagchul am wehhejed g pi ap e‑chuꞌijig.
K wabshaba pi woho ab hu ni‑ihm mo eda am haꞌichug tohono jewed ch ed giꞌikko wehst‑mahm ahidag oidam.
43 Do hejel ha‑nahtoi jijosh mo ab ha ihm.
Bo ha aꞌaga Molok ch Rephan ch hab ha elid mo an kih huhuꞌu t an.
Nt heg hekaj gam hu mehk wo em‑shul Babylon jewed t am. Amos 5:25
Neh, bash kaij g Jiosh.
44 “Kuni hab ep s‑cheꞌimk mash hegam an uꞌahim hegai cheopi mash heg hekaj am ha tashogid g Jiosh mash am ha wehmaj. Sh heg d wabsh hogi ch hab masma e nahto matsh wa g Jiosh am chehgi g Mosesbad. 45 Sh g ha‑amjedkam an ep uꞌahim hegai cheopi matsh hekid g Joshuabad am i e kei matsh wo i ha wanim. Kutsh g Jiosh ia i ha wahpki id eda jewed k am ha wehhejed gam hu i ha wuwhas hegam nahnko mahs hemajkam mo ia d chum kihkam. Kush am haꞌichugkahim ihda cheopi ch ab ai mash eda g Davidbad d ha‑kownalig. 46 Sh ihda Davidbad d si Jiosh tatchui ch ab ahgid mat wo hiwigi mat hema wo kihch. Tsh heg eda am hab wo e junihid g hoꞌigeꞌidahuna Jiosh wui. 47 Kutsh g Jiosh hiwigi g alidaj Solomonbad. Tsh heg am i kei g kih am wehhejed g Jiosh.
48 “K eda g Jiosh baꞌich i geꞌej mo haschu i mo an hab chuꞌig t‑wehgaj. T pi wo shaꞌi e nako g oꞌodham mas wo kihch. Batsh wa masma an oꞌoha g kelibad Jiosh haꞌichu i tashogiddam mash hab kaij g Jiosh:
49 Ahni ani d Jiosh ch ab dahm kahchim t amjed ia nuhkud g jewed kahchim.
Pi amt wo shaꞌi e nako mamt wo ni‑kihch mamt heg eda am wo ni‑dai
50 nant pi ahni wehs haꞌichu nahto. Isaiah 66:1-2
Neh, bash kaij g Jiosh.
51-52 “Kush wabshaba g t‑shohshonbad si e sheshemachud ch pi chechkaidag ch pi ab hu kaiham g Jiosh haꞌichu ahga. Jiosh ash am i ha wuwhasid g haꞌichu i tashogiddam. Kush wa g t‑shohshonbad ha shoꞌigchud ch haꞌi ha kokda. Kum ahpim hab waꞌap chuꞌig ch ab wabsh wui gegok g Hekia S‑apꞌekam Gewkdag. Jiosh haꞌichu i tashogiddam ash am ahgachug mat wo jiwia g Jiosh si pionag k d wo si wehs s‑apꞌekamk. Kut wa woho jiwia. Kumt wa gagda mat wo e muhkid. 53 Ahpim amt ab em‑mah g Jiosh chehanig mat wa g anghil ia uꞌapa. Mt eda am wa pi wohoch.” Neh, bash kaij g Steven.
Mamtsh mua g Steven
54 Tsh am i kah g e jehnigiddam mash has ha ahg g Steven k wabsh wohoꞌi babgat k si kuhm g e‑tahtami. 55 Sh wabshaba g Hekia S‑apꞌekam Gewkdag ab baꞌich i si mahkch g Steven g gewkdag. Tsh am i nea dahm kahchim wui k nei mo si s‑masma tonod g Jiosh gewkdag. Kush g Jesus an si hugidaj an kehk g Jiosh.
56 Kush hab kaij g Steven, “Neido! B at e kuhpiꞌo g dahm kahchim. K ab kehk g Jiosh si Kehsha an si s‑apko hugidaj an g Jiosh.”
57 Tsh si hihinkiad k am si kuhkp g e‑nahnk k ab hahawa si wui i wohp 58 k an be k gam hu i wuhshad kihhim t amjed mat wo maꞌichkwua. Sh am hema ha wehmaj g wechij oꞌodham ch hab chehgig Saul. Kutsh heg nuhkudach g e‑liliwa hegam matsh wo maꞌichkwua g Steven.
59 Kush g Steven ab si ihm g e‑doꞌibiakam ch hab kaij, “Ni‑kownalig Jesus, ia g behꞌi ni‑doakag.”
Sh eda heg oidch ab maꞌikkash g s‑kehꞌiddam. 60 Tsh am hahawa tohtonwua g Steven k si s‑kaidam hab kaij, “Ni‑kownalig, pi g ab hu ha abchud ihda chuꞌijig mat ihab e juh.” Bash kaij ch am i muh.