1 Tsh idam Paul am wabsh gahi wuwha g Amphipolis kihhim ch Apollonia kihhim k gam hu dada Thessalonica kihhim t am. Sh am hema kehk g Tutuligo ha‑cheopi. 2-3 Tsh heg wui am hihi hegam Paul mo hab wa e wua chum hekid. Tsh g Paul am ha wehm aꞌaga ab amjed g Jiosh oꞌohana k id hekaj am chum wohokamch mat g Jiosh si Kehsha hemho wa wo e shoꞌigchud k wo e muꞌa k wabshaba ep wo i wuhsh ab muhkig t amjed. Sh hab ep kaij, “Ihda Jesus mani ia mahsko wua em‑shahgid d hegai Jiosh si Kehsha.” Sh waik domig oidam am ha jehnigid mihshmda tash ab. 4-5 Kutsh haꞌi ab i s‑wohochud k ab i ha wehmt hegam Paul. Tsh muꞌi hegam Greek hemajkam ch hegam s‑has haꞌichu uꞌuwi mash ab ihm g Jiosh ab hab waꞌap i s‑wohoch g haꞌichu ha‑ahga k ha wehmt. Sh hema idam hab chehgig Jason.

Tsh wabshaba haꞌi s‑ha hehgam g Tutuligo. Kush am haꞌi oiopo g s‑papadmakam ch am i ha wehmt hegam Tutuligo k am i ha kudut g kihkam. Kutsh wabsh woho i babgat k am hihim k am wabsh si wahp Jason kih ed mat am wo ha ui g Paul ch Silas k am wo ha uꞌapa hemajkam ha wui. 6-7 Sh wabshaba pi am hu haꞌichug. Kush heg hi wa Jason am da. Kush haꞌi ep dadha g wehmaj wohochuddam. Kumtsh idam ha uꞌu k am i ha chewaim hahaꞌichu ha wui k si hihnk ch hab kaij, “Ia at haꞌi dada g oꞌodham k ash wa wehsko ha kudut g hemajkam ch ab wui gegok g si uhgchu kownal hab kaijch mo am hema d ep kownal ch hab chehgig Jesus. K ihda Jason ab ha toꞌakch e‑kih ab.” 8 Neh, bash kaij ch hekaj ab si i ha kudut g hemajkam ch hahaꞌichu mat wabsh wohoꞌi babgat. 9 Tsh g hahaꞌichu am cheha g Jason ch hegam haꞌi mat wo ha namkid haꞌakia mo haschu d i ha‑chehanig. Kutsh am hab e juh. Tsh hahawa ha dagito.

10 Tsh am i s‑chuk. Tsh hegam Jesus ihmdam am ha ahgi idam Paul matsh gam hu wo hihi Berea kihhim wui. Tsh ged hu dada k am ha hekaj hihi Tutuligo ha‑cheopi wui. 11 Tsh idam s‑ap ab i ha nei. Sh am ha mihshmad. Kush si s‑hohhoꞌid ch ab kaiham g haꞌichu ha‑ahga ch wehs tashkaj am si hoan g Jiosh heki hu oꞌohana mat wo s‑mai mas wa woho hegai mash g Paul am ha ahgid. 12 Tsh muꞌijj ab i s‑wohoch g Tutuligo. Tsh muꞌijj g gawul mahs hemajkam hab waꞌap ab i s‑wohoch. Haꞌi idam ash d s‑has hahaꞌichu uꞌuwi.

13 Tsh am wabsh i chum kah g Tutuligo am Thessalonica t am mash idam Paul am ha mihshmad Berea t am hab wa ehp k am ha hekaj i hihim k am i ha kudu g hemajkam. 14 Kutsh heg hekaj am ahgi g Paul hegam mash ab s‑wohochud mat gam hu wo hih ge kahchki hugidgo. Tsh wabshaba g Silas am waꞌi wih Berea t am g Timothy wehm. 15 Tsh hegam matsh am i bei g Paul gam hu uꞌapa Athens kihhim t am. Tsh am hahawa ha ahgi g Paul mat wo ha ahgi g Silas ch Timothy mamt hekid wo i e nakog k ab ha hekaj wo i hihi. Tsh amjed gam hu hahawa uhpam hihi idam e‑kihhim wui.

16 Sh am daha g Paul Athens t am ch am ha nenida g Silas ch Timothy. Sh eda wehsko chuhch g ha‑jijoshta. Sh g Paul am ha neid idam ch hab si pi ap e tahtk. 17-18 Tsh am wabsh apꞌet mat ha wehm wo si i aꞌaga g hemajkam am ha‑cheopi ed. Kush am haꞌi ha wehm e mihshmad g gawul mahs hemajkam.

Sh g Paul am epai kuaya ch ed ha wehm haꞌichu i aꞌaga ab amjed g Jesus am ha ahgidch mat g koꞌi wo i wuwha ab muhkig t amjed. Sh am haꞌi d jewed t ab haꞌichu s‑chu aꞌamichuddam ch wabsh ab uhpam i neꞌowi g Paul.

Sh haꞌijj hab kaij, “K haschu hab chum ahg ihda pi haꞌichu amichuddam oꞌodham?”

Kush haꞌi hab ep kaij, “Shahag wepo mo g mehk jewed dahm jijosh am ha aꞌaga.” 19-21 Kush eda hegam kihkam ch hegam mo am wabsh sha dadha s‑hohhoꞌid mat tash oidam wo kaihamad ch wo aꞌagad hegai mo haschu d si wechij ahga. (19) Kumtsh ab i bei g Paul k ged hu uꞌapa mo am e nanmek k hab kaij ab wui, “Shahꞌo d ahga ihda wechij mashchama map ab amjed neok. (20) Pi ach am wa chum amichud.”

22 Tsh am hahawa kekiwua g Paul k hab kaij, “Ahpim kihkam amki ab si has ha elid g jijosh. 23 Am ani neid m an chuhch g em‑jijoshta kahya oidk. Kuki am hema kehk g iagchulidakud mo id an oꞌohanas, ‘Ia amt wo haꞌichu dai heg wehhejed jiosh mattp hems pi mahch.’ Pegih, ihda pi em‑machiga o d hegai mant am haha wo em‑ahgi ab amjed.

24 “Do ihda Jiosh mat wehs haꞌichu nahto ch d kownal wehs haꞌichu dahm. Wehsko o an haꞌichug g Jiosh. K pi hab shaꞌi mahs mas am hebai wabsh wo e dai hab masma mam hab ha wua g e‑jijoshta. 25 Jiosh o ab t‑mahkch g doakag ch wehs haꞌichu. K pi am hu haꞌichu d shaꞌi hegai mas ab i si tatchua ab amjed g oꞌodham mat ab wo mah chikpank.

26 “Jiosh at am hemako nahto g oꞌodham k ab amjed i wuhshad g wehs nahnko mahs hemajkam k an aꞌai i ha gantad wehsko jewed oidk mat hebai heki hu i apꞌech mat an wo kihkad. 27 K hab d elidaj mat am wo i e gahgidahi g Jiosh k atp hems wo cheh. Pi o shaꞌi mehk ab hema i t‑amjed 28 ch ab t‑mahkch g doakag ch kihdag. Haꞌijj g em‑wehm oꞌodham o d haꞌichu aꞌamichuddam ch hab kaij, ‘Ahchim hemajkam ach d Jiosh aꞌaliga.’

29 “Pegih neh, id o d wohokam mach d aꞌaligaj g Jiosh. Tt pi hab wo ge t‑ahgad mas g wohokam Jiosh hab mahs mo idam em‑jijoshta mat wabsh g oꞌodham am nahto g ohlakaj o g plahdakaj o g hodaikaj. 30 Heki o hu pi mahch g hemajkam g Jiosh tatchui. K g Jiosh si s‑hemajim am ha nakog. Ni wabshaba hemu em‑ahgid mo hahawa ab si i ha chehani g hemajkam wehsko mat gam hu wo s‑ohhod g pi ap e‑chegitoi. 31 Am at i apꞌech g tash mat wehs wo ha lodai g hemajkam k heki hu am hema si i kei mat hab wo juh g lodaita. Tsh id ia mahsi t‑shahgid k ia oimmelhim ch e muhkid. Tsh g Jiosh ab i wuhshad muhkig t amjed mat wo wohokamch mo d si Kehshaj.” Neh, bash kaij g Paul.

32 Tsh idam am i kah mo hab kaij matsh hema i wuhsh ab muhkig amjed. Kush haꞌijj wabsh si ash ch wabshaba haꞌi hab kaij, “Am g wa ep t‑jehnigid ab amjed ihda.” 33 Tsh amjed gam hu hahawa hih g Paul. 34 Tsh haꞌi ab s‑wohochud k ab i wehmt. Sh hema idam d Dionysius ch d hema hegam s‑chu aꞌamichuddam. Kush am hema d ep uwi ch hab chehgig Damaris.