4
Haꞌichu i tashogida ab amjed g Abrahambad
1 Am ant wo i wuhshad g Abrahambad mant am wo i em‑tashogi ihda mani wa em‑ahgid. Ihda Abrahambad ash d t‑shohshon ahchim Tutuligo 2 ch ab i s‑wohoch g Jiosh. Tsh g Jiosh heg hekaj am i apꞌech e tahgio. Pi atsh wa hejel am i e apꞌech heg hekaj mas hab junihim g s‑apꞌekam. K heg hekaj wa pi am hu haꞌichu d shaꞌi hegai matsh wa heg hekaj wo chum si e haschudad g Abrahambad. 3 An o hab chuꞌig Jiosh oꞌohana ed:
Abrahambad at ab i s‑wohoch g Jiosh.
T g Jiosh heg hekaj am i apꞌech e tahgio. Genesis 15:6
4 Neh, do em‑namkidadag hegai mamt wo ha gehg chikpank. 5 K wabshaba d em‑mahkigdag hegai mamtp ab wo bei ab s‑wohochudk hegai mo ab em‑makiog. K g Jiosh hab kaij mat am wo i ha apꞌech e tahgio k gam hu hab wo i juh g pi ap ha‑chuꞌijig hegam mat ab wo i s‑wohoch. Id o d Jiosh mahkigdag. 6 K id hab ahg g Davidbad ch hab kaij mo s‑ap e tahtk hegam mat ab wo i s‑wohoch g Jiosh nat pi am wo i ha apꞌech e tahgio. K hab masma an oꞌohadag:
7-8 Shoꞌo waꞌi s‑ap e tahtk hegam mat hedam g Jiosh gam hu hab i juh g pi ap ha‑chuꞌijig k pi ab hu wo ha mohtoꞌi. Psalm 32:1-2
9 David o pi hegam hab waꞌi ha ahg mo pahl hikuchkas ch wabshaba hegam hab ep ha ahg mo pi pahl hikuchkas. Heki ani hu ahg matsh g Abrahambad ab i s‑wohoch g Jiosh. Sh g Jiosh heg hekaj hab kaij mo d s‑apꞌekam. 10 Id at hab e juh mat koi e pahl hikuch g Abrahambad. 11-12 Ab ash wa s‑wohochud g Jiosh. Sh g Jiosh heg hekaj hab kaij mo d s‑apꞌekam. T heg i dahm am hahawa e pahl hikuch mat hab masma am wo wohokamch g e‑wohochudadag mat heg hekaj am i apꞌech g Jiosh. T g Jiosh hab masma wehs am wo i ha apꞌech hegam mat hab waꞌap ab wo i s‑wohoch, chum hems hegam mo pi pahl hikuchkas. Heg o wa wepo mach ahchim Jiosh wohochuddam woho d Abrahambad amjedkam nach pi hab masma apꞌedag. Hemho wa att ab wo s‑wohochudad ch ab wo hiwgad hab masma mash wa g Abrahambad.
Matsh g Jiosh wohochuddam wo bei g apꞌechudaj
13 Jiosh ah am ha ahgid g Abrahambad ch amjedkamaj matsh am wo i ha apꞌech e tahgio k wehs ab wo ha mah g jewed kahchki matp ab wo i s‑wohoch. 14 Kut pi haꞌichu wehhejed wo s‑kehgajk g ha‑wohochudadag matp id hab wo sha ha juni g Jiosh hegam mo pi ab hu wohochud ch am hab wabsh junihim hegai mo an oꞌohanas chehanig ed. T g Jiosh d wo s‑iattomkamk matp am hab wo sha ha juni. 15 Pi att ab hu wo shaꞌi i t‑apꞌech g chehanigkaj k wabshaba heg hekaj ab wo t‑abch g t‑chuꞌijig matt ab wo bei g s‑koꞌok t‑namkidadag. T hegam mo pi edgid pi heg hekaj ab hu wo e abch.
16 Pi at ahchim am waꞌi i t‑apꞌech g Jiosh mach wa an uꞌukch g heki hu chehanigaj. Ahpim at am ep i em‑apꞌech mamt hab waꞌap ab i s‑wohoch g haꞌichu ahgaj. Batt masma am oidk hab t‑juh g Abrahambad k ab hiwig g Jiosh hemajimatalig. Id o heg wa wepo mo g Abrahambad d t‑ohg. K g Jiosh heg hekaj am t‑chehgidch mat has wo chum masmak. 17 Bo masma an oꞌohadag mash g Jiosh am ahgid g Abrahambad:
Bant m‑juh mapt d wo ha‑shohshonk g muꞌi nahnko mahs hemajkam. Genesis 17:5
Id at woho hab e juh. K d wohokam hegai Jiosh neꞌoki mat g Abrahambad ab i s‑wohoch. Jiosh oki e nakog mat ab wo i wuhshad g muhki ab muhkig amjed k am wo nahto haꞌichu hab wabsh cheꞌek mat am hab wo e juh. 18 Abrahambad ash wa ab s‑wohochud mat g Jiosh ab wo ha mah g ali mat eda kekelit chum as pi mahch mas has masma hab wo juh. Tsh heg hekaj hab juh g Jiosh mo d ha‑shohshon g muꞌi nahnko mahs hemajkam. Bo masma an hab chuꞌig Jiosh oꞌohana ed mo g Jiosh hab kaij:
G i ha neid g huhuꞌu.
Haꞌakia at d wo k g m‑amjedkam. Genesis 15:5
Neh, boki kaij. 19 Tsh pi shaꞌi gawul juh g e‑wohochudadag g Abrahambad, chum as hems aihim g siant ahidag. Kush g Sarabad pi ha mamdat. 20-21 Abrahambad ash ab si ihm g Jiosh nash pi ab si s‑wohochud mat wo e nakog k woho am hab wo juh hegai mo haschu am ahgid. 22 Heg atsh hekaj am i apꞌech g Jiosh e tahgio k gam hu hab i juh g chuꞌijigaj. 23 K pi heg waꞌi wehhejed an oꞌohanas hegai 24 ch wabshaba ahchim ep t‑wehhejed. Jiosh atsh gam hu hab ep wo i juh g t‑chuꞌijig ahchim matt hab waꞌap ab i s‑wohoch. 25 Heg atsh hekaj am i kei g t‑kownalig Jesus mat wo e muhkid g t‑chuꞌijig wehhejed k ab ep wo i wuhsh muhkig amjed. Kutt am i t‑apꞌech Jiosh tahgio ab i s‑wohochudk ihda.