Jon
oh tipnerip ma brak mat atip ohe meng oh
Ohri ma brak matip han Jon orhor mama kom meng mohhe brak matipmur. Ma brak matip oh Noh Got orhe kis nahat napapat kuu gonong brak mat mama nasar ohmur ma potip meng oh arpin kuu uhnong por gipotipda da paham meng Sios bap ire boknong mar gipotipo rim hanhan hat patimur. Imat ma brak matip oh dasuh han ihir aprisa dasuh matipririm ihir inin hat ha patengwe rim mameng moh por brak matipmur.
1
Sios ihirnong wamat papat han Jon noh mama brak mat nasar ohmur. Got orhe kis nahat napapat kuu gorhoro gorhe brer ihiro gurnong mama meng moh brak mat nasar ohmur. Noh arpinnap gurnong da napris bopor nahat napapatmur. Nohe imat ma bopor nahat napapat oh nohwi basmur. Arpin mengnong amram ma dindeipti kuuhan bap ihirsi nuhur tap hat gurnong bopor nahat napaptimur. Arpin meng oh diradire mutuh oh dipwi pato rim gurnong da napris bopor nahat napaptimur.
Gin itap Got ohsi; orhe mon Jisas Krais ihit taman itaite damdapat orhor Imat yah matpera ma dahapti dao kamahara nahapti dao manap gosham yah hat pati dao oh ama da ohsi dirnong napaptimur. Inahat napaptin dir arpin dao bopor goshat indin dao ohsi hat patimur. Arpin dasi hat patim bopor goshat pati han dire mutuhnong naham inahat sa napaptepri rim noh mama brak mat nasar ohmur.
Got orhe sawa meng oh Hanip ihirnong da apris bopor mat paptenmur ritip oh meng oh
Kat han ihirdapat Uhe brer kat ihir itap Got orhe Gur ihat indinmur ma naporpatru hat orhor ihirhe amram ihat orhor itap orhe arpin meng dindeiptimur ritperhan noh amrama nohri amam isip tit hat patmur. Got orhe kis nahat napapat kuu gonong Go kopenohe sawa meng oh go ihat indinmur na napotiprohmur. Kopenat Krais ohe danong haya tei orhor ma amratpa wanin sawa meng orhor dimar ha paptenoh rim gonong mama napor ohmur. Hanip ihirnong da apris bopor mat orhorwi paptenmur ma ritpa ohe meng oh dimar ha patenoh rim noh mama napor ohmur. Gur kopenat Krais orhe danong haya tei orhor Got ohe sawa meng oh Gur arwananah ihirnongsi; Got ohnongsi da gosapris bopor goshat paptenmur ritperhan gur amratpamur. Ama Got orhe sawa meng oh da gosapris bopor goshat paptenmur naporpat ohoh ihan dir da gosapris bopor goshat ma pati da moh Got ohe sawa mengnong amram dindeipti da ohmur.
Krais orhe arpin mengnong oh kasip ham marin paptenmur ritip ohe meng oh
Mong mong mama pati han ihir kat han ruumsan han ihir Jisas Krais oh hanip na hatip hanmur rim dasuh nahat apriptimur. Ama ihat dasuh nahat apripti ihir Krais ohnong mahaw mar kom at pati bap ihirmur. Ihat dasuh nahat apripti ohoh ihan diradire kasip ham tamreipti ohe pe ma dat pati da oh timbas hatiprarim gurhe kasip ham inin hat orhorwi wamat patenmur. Guragure kasip ham ma daripti da oh isip mat pei mat orhor ha napinoh rim kasip hat orhor patim inin hat patenmur. Han ihir Krais orhe naporpat mengnongwi marin na paptema wan meng tit ohe boknong dip mar pot pisayahanoh ama ihat sapti han bap ihiroh Got ohsihe tap hat na pati han bap ihirmur. Krais orhe naporpat mengnong asoh arpin meng ma hapat daham kasip ham marin papayahanoh ama ihapti han gur itap ohsi; mon ohsi itait tamansi tap hat pati bap gurmur. 10 Nuhur Got orhe nitamur rim Krais orhe arpin meng oh na napot apriyahanhe ama ihya han ihirnong oh Gurhe patida por amburo hapri. Mandanmur. 11 Nohana. Go patda por amburo hayahanoh ama ihat amburiya han gur ire er hat ma sapti da oh guragur tap mat dara arwananah ihirnong asoh er da pinggit pisaptimur.
Jon oh kapkep matip ohe meng oh
12 Noh gurnong ruumsan meng napotin orhor brak tei moh brak mar na napotiprohmur. Kakduup apris diradir tap hat tongnoma meng oh pomat napora diradir amam isipnap gosham indiprineng dahapatmur. 13 Gorhe taptem Got orhe kis mat papat arwanir uhe brer maihir Kuu gohe sa pato rim maihir dahatahatperhan noh mama brak mat nasar ohmur.
Gin Jon nohe bok meng moh kimur.