18
Jisas oh Got ohnong dahamtin oh garhapririm dipwi dahamar patenmur potip ohe meng oh
Jisas oh Gur Got ohnong dahandein ohe da oh garham na mandama dipwi dahamar ha patengwe rim noh paham meng tit napotiprohmur. Paham meng oh mamarumur.
Tit ap mutuh tit meng sam pondeipat han tit patesuhri. Ama han oh Got ohnong na kasa ham hanip ire danong na hapat han oh patesuhri. Patin orhe pat ap mutuh oh kuu tahem tit ama patesuh oh. Patin uhe boknong meng tit matperhan uh sus meng sam pondeipat han ohnong Nohe boknong meng tit ma nahapti ohe meng oh go ponaham napanggeitinmur dipwi ponipatri. Porpatin meng sam pondeipat han oh meng na amram kimirit patesuhri.
Na amram kimirit patdapat gahan oh Noh Got ohnong na kasa ham hanip ire danong na hapat orhora; kuu tahem uhe dipwi apris dahanahapat moh nohnong ina ruumsi nahapatmur. Ina ruumsi nahapat moh noh na pondeihanoh atnap dipwi dahanahapatin nohnong garnahatipra ma hapat. Ihan noh gin orhor meng sam pomara ayah matpora daham meng sam apomtipri. Ihtipri pongopri.
Giporpat Hanipyah oh Gin gur meng sam pondeipat er han ohe meng oh amraya ohe meng oh dahenmur. Got orhe nitao rim kis nahat napapat bap gurnong oh kwitem timbas mong da timbas dipwi ohnong dahamatwi ayahanoh oh namram na napanggeitiprohda. Basra. Oh sunhat na patema kapkap orhorwi namram yah mat napanggeitiprohmur. Noh arpin meng napotiprohmur. Got oh kapkap orhorwi namram napanggeitin da hat pat orhor Hanip Brer norhe it ma apripra oh apris wanahahoh kuuhan gur Got ohwi inahatin hatin hanwa dahat pati hatiprio da ihtin dasi hat na pati hatiprido pongopri.
Jisas oh Hanip guragure winnonghe daptuhutipri por paham meng potip ohe meng oh
Kat han ihir Nuhurwi Got orhe meng amram yah hat saptimur. Kat ihir nure tan hat na saptimur por ihirnong dasei matpamur. Ama ihat nuhurwi yah hat saptimur ma dahapti han ihirnong Jisas oh mama paham meng moh pongopri.
10 Yot han tit patesheri. Tit han oh Parisi ihirri; tit han oh takis yan darpat han ihirri. Ama han yot ihit Got ohsi mengitinmat Got ohe ap yawarnong ruhpari. 11 Rosa Parisi oh tandeima orhe danongwi hama orhe damdapatwi Got ohnong Gota. Noh kuuhan gonsi ire ma gapah hat saptio er hat saptio bisei saw hat saptio ire ma ihat sapti ohe tan noh na hat pato rim noh gonong weso napormur. Mama takis yan dar kat orhe gapah hapat han moh ohe tanhe noh na hat pato rim gonong weso napormur. 12 Noh tit wik tit wik oh gosi mengitinmat yot dah den na dam gosi mengripatmur. Noh erer gonsi ma darpat oh sama kathei hatporhan kat oh gonong napripatmur. Noh ihatwi sapat ohoh ihan nohe ma ihpat oh yahnap hat pat ma hapat daham gonong weso napormur por sa potipri.
13 Oh Parisi ohe Got ohnong potip meng oha; Takis yan darpat han oh meihdapat tandeima da er ham aw teinong mahat na watahama mem hat patim orhor orhe rangrang teinong bessi pung pung pora Got ohnong Gota. Noh er hat sapat hanmur. Ihan go hinhina naham napanggeitina por dahamar sa pipri pongopri.
14 Jisas oh ameng oh giporpat Noh arpin meng napotiprohmur. Hanip gur Nohwi win isipsi hanmur daham guragure winnong daptuhuripti han gurnong oh Got oh win garsi han nahatipramur. Gur guragure winnong daptuhutin ohe danong na hat pati han gurnong oh Got oh win isipsi han naham win nadaptuhutipramur. Ihtin ohoh ihan ama yot han ite Got ohnong ma meng potpa ohe pe oh Got oh Parisi ohnong Go yah hat sapat hanmur na potipmur. Na pora takis yan darpat han ohnongwi er da hirmat amdama Go yah hanmur potipmur. Potporhan oh pokwi yah han ham it orhe apteinong pipmur pongopri.
Jisas oh brer ire danong hatip ohe meng oh
(Matyu 19:13-15; Mak 10:13-16)
15 Gahan kuuhan ihir Nohe brer moh Jisas oh bes marima ha beten matinoh rima popingopari. Popriperhan orhe pinggit pisapat han ihir Baso por imtipari. 16 Imtiperhan Jisas oh Es. Gur ihirnong Baso potipri. Got orhe napapindin hrepnong ma hapti ihir oh mihtin brer ihir ihapti bap ihir ohoh ihan gur baso potipri. Brer ihir nohe patnong moh ha apringwemur por ihirnong Nohe duupnong moh aprino pongopri. 17 Porpat orhe han ihirnong Noh arpin meng napotiprohmur. Hanip gur brer ire Itapir supir ihir napaptiwa daham ire hrepnong hat ma patiru gurhe ihat orhor Got oh napapat hanwa daham orhe napapat hrepnong na ayahanoh gur eimatnap Got ohe napapindin hrepnong na hatipri bap gurmur pongopri.
Kamah han ihir Got orhe napapindin hrepnong hatperda da na hatper daham butahapti ohe meng oh
(Matyu 19:16-30; Mak 10:17-31)
18 Gahan kak hat pat han tit apris Jisas ohnong Tisa. Yah hatwi sapat hana. Noh kinhat ushanoh yah hat eimat paten dasi hatiproh por dahandeingopri.
19 Por dahamtiporhan Jisas oh ohnong Wa. Got orhap yah hat pat hanmur. Gin nohnong yah hatwi sapat hanmur ma napor oh Oh Got hatin hat pat hanmur daham naporda da na gidaham napor. 20 Go Got ohe sawa meng Moses ohe atem teimdapat ma napotip meng oh go am hat patmur. Sawa meng oh mamarumur. Bisei sawheri hapri. Haniphe ha haputinoh daham supri. Gapahhe hapri. Dasuh inin menghe hanip ire boknong deipri. Suanir itanir ire danong ham ire mengnong pomar amram dindeinmur. Ama sawa meng muk oh go am hat pat ohoh ihan go ama sawa meng muknong oh amram dindeinmur pongopri. 21 Potporhan oh Ama sawa meng ohra noh rih brer garsut orhor gonsi pomat amram dindeisuhru ginhe imat orhorwi dimar patru patmur pongopri.
22 Potporhan Jisas oh Go imat dindeipat orhora; mama tit da mohoh go na ihpatmur. Gwe ma na ihpat oh mamarumur. Gin noh napotiprohmur. Gorhe ihsen erer ruumsan ma papat oh gin wan han ihirsi mohoma mani oh dara borop hat ma pati han ihirnong apinmur. Ihahhanoh go aw tei Got ohe napaptepra tei mahat ohe ruumsansi han hatipramur. Ihpat nohsi tap hat sashen han hat aprishenmur pongopri. 23 Potporhan oh Noh ihsen ruumsansi han ohoh ameng oh amrama Noh ihsen ruumsan pat moh gonsi ha mandatiproho daham isip da heimse ringopri.
24 Heimse ritporhan Jisas oh ohe da er hah danong am hama Ihsen ruumsansi ham kamah han hat ma pati han ihiroh Got ohe napapindin hrepnong hatinmat kinhat son ham butahaptimur. 25 Sahapti han kemar ihir sur tem kat oh kinhat ron ham butahaptimur. Erer ruumsansi hat pati han ihiroh amaru hat orhor atnap Got ohe napapindin hrepnong sonmat oh atnap kinhat son ham butahaptimur pongopri. 26 Potporhan ihir ameng oh amrama Epe. Kamah han ihirnongri Got oh amburpatmur dahapti tei moh gin Jisas oh kamah han ihir na saprimur ri moh ihan kinhatin han ihirnongwi ambura yah hat eimat paten dasi matipra por dahamtipari.
27 Dahamtiperhan Jisas oh Es. Hanip guragurdapat nambutin inasi na matin hat patimur. Got orhordapatwi nambutin inasi naham namburpatmur pongopri. 28 Potporhan Pita oh Nuhur erer mandam ohe kom sapti ohoh ihan Got oh amam nahat patkin daham Jisas ohnong Nohana. Nuhurra nure erer oh mandama gonong ma dinahapti ohwa pongopri.
29 Potporhan Jisas oh Noh arpin meng napotiprohmur. Hanip gur Got ohe napapindin ohe danong ham apo kuu brero taptemo supir itapiro ihirnong mandam ihat sayahanoh 30 ama ihat sapti han gurnong oh Got oh Gin kakdah moh patinhe gure mandaya ohe erer oh isip mat orhor naprisipramur. Kaput eimat ma patepri teihe Got oh yah hat eimat paten dasi nahatporhan eimat yah hat pateprimur pongopri.
Jisas oh Noh hapura it masapramur it tei ma potip ohe meng oh
(Matyu 20:17-19; Mak 10:32-34)
31 Gahan Jisas oh orhe pinggit pisapat nathei han ihirnong ambur irarhe teinong tap tei deipat Gin gur amratin. Dir Jerusarem ap mutuhnong ruptimur. Rusa ap mutuhnong hatperhan Got oh Hanip Brer nohe boknong ma inahatipri meng oh propet ihirnong potporhan ma brak matpa meng oh gonsi nohnong inahatperhan arpin dam timdipramur. 32 Inahatperhan ma dam timdipra oh mihat timdipramur. Nohnong Juda na hat pati han bap ire bes teinong nahatiprimur. Nahatperhan ihir tang nahayao dasei meng naporiyao tumbe gut nasariyao kaw boksi niyao naham nitiprimur. Nitperhan noh haputipramur. 33 Hapur sein nitperhan bimrip oh da apris it masapramur pongopri.
34 Potporhan orhe pinggit pisapat han ihir orhe ma por meng oh na dahatpari. Ama mutuh meng oh ihir da ban tahat patin ohoh pomat na dahatpari.
Jisas oh kin kwisi hat patesuh han ohnong yah matip ohe meng oh
(Matyu 20:29-34; Mak 10:46-52)
35 Jerusarem ap mutuh ruperim mandap oh sus Jeriko aptei oh koriyaoh kin kwisi han tit mandap manggap tan amdapat tongnoma hanip ihirnong manio erer oh ti namdina por deip deipatgopri. 36 Deip deipatdapat Hanipyah Jisaso ire ma apriyanong oh amrama We. Hanip ma apris hapti gur de gurwi apriptio por dahandeingopri. 37 Dahamtiporhan ihir Jisas Nasaret aptei han ohsi nuhur apriptimuro potpari. 38 Potperhan oh Jisas Depit ohe mon go apris kamahara naham yah nahatinmuro por uangopri. 39 Uatporhan ohri hat saya kuuhan ihir Ai. Kin kwisi han go imatri uatipra por baso por indeingopari. Baso por imtiperhan oh ire meng na amram atnap akit orhorwi Depit ohe mon go nohnong kamahara naham yah nahatina por ut patwi hangopri.
40 Ut patwi hatporhan Jisas oh sapatdapat tandeim kimiringopri. Kimiripat Ginra kin kwisi han ohnong ambur nohe pat duupnong moh poprina pongopri. Potporhan ihir ambur orhe duupnong popriperhan 41 Jisas oh Gin noh gonong ha kinnahatinoh rim go nohnong unar por dahandeingopri. Gipor dahamtiporhan oh Hanipyaha. Nohe kin mama kwi hat pat moh nayah matporhan noh kin watahatporo daham ginapot unarmur pongopri.
42 Potporhan Jisas oh Go nohnong ohwi yah nahatiprohwa ma dahah ohe pe oh gorhe kinnong noh nayah deimur. Gin wataham sonmur pongopri. 43 Potporhan arpin kapkap asut orhorwi kin tandipekas rim watahangopri. Watahama Got ohnong weso pora armi mat Jisas ohe kom oh apingopri. Ihtiporhan kuuhan ihir wamara Got orhor yah dei ma hapat daham Got ohe winnong adaptuhur armi deingopari.