12
Jamasuhʉ de ya tsꞌo ntꞌudi de ya fariseo ya yohmi
Nepʉ de gueꞌa̱ bi muntsꞌa ya ꞌmotho gá ja̱ꞌi, y co yá ndunthiꞌʉ mri netꞌasɛ ꞌna ngu maꞌna. Y nura Jesu bi mʉdi bi zofo ꞌmɛtꞌo sɛhɛ yá nxadi ne bi ꞌñembabi:
―Jamasuhʉ de yá tsꞌo ntꞌutuate ya fariseo, ngueꞌa̱ nuꞌʉ́ xi ya yohmi, ne yá ntꞌutuate nja ngu ra nzoi tsini. Pe ma da zø ra pa da fa̱tuabi yá ntꞌutuate gue xá ntsꞌo, ngueꞌa̱ gatho núꞌa̱ tꞌa̱guibya, ꞌnara pa ma da hnequi, ne gatho núꞌa̱ tꞌøtꞌe mantꞌa̱guibya, ma da zø ra pa da fa̱di. Hangue nugui dí xiꞌahʉ gue gatho núꞌa̱ guí ma̱ñhʉ mantꞌa̱gui, ꞌmɛfa ma da fa̱di habʉraza, y gatho núꞌa̱ guí ma̱ñhʉ dega njone ꞌnambʉ, nuꞌá̱ ma da hma̱ ntsꞌɛdi pa da ntꞌøde habʉraza.
Toꞌo mahyoni gui tsuhʉ
(Mt. 10:28-31)
Nepʉ ra Jesu bi ꞌñembabiꞌʉ:
―Núꞌahʉ guí ꞌyohʉ con guequi, oxqui tsuhʉ núꞌa̱ toꞌo da ne da hña̱cꞌa ri tehʉ ne ꞌmɛfa ya hinda za te da ꞌyøꞌtꞌaꞌihʉ. Nugui dí xiꞌahʉ, gue nu Ajua̱ hønsɛ go gueꞌa̱ mahyoni gui tsuhʉꞌa̱, ngueꞌa̱ nuꞌá̱ da za da hña̱cꞌa ri tehʉ, ne pɛꞌtsa ra tsꞌɛdi pa da mɛhnꞌahʉ ja ra nidu nehe.
Ya zi tsꞌintsꞌʉ hintsꞌʉ ri muui asta ꞌba cʉtꞌa por ngʉdmi, ¿ha ngue ha̱? Masque nuꞌʉ́ hini muui ndunthi, pe Ajua̱ hinhyaꞌmʉ ri pumfri ni ꞌna de gueꞌʉ. Xihma̱ꞌihʉ, gue asta ri sta̱hʉ Ajua̱ pa̱di ri hanguꞌʉ. Hangue oguí tsuhʉ, ngueꞌa̱ maꞌna grí muuihʉ que nuya tsꞌintsꞌʉ.
Núꞌʉ toꞌo damajua̱ni de ra Jesu ja yá thandi ya ja̱ꞌi
(Mt. 10:32-33; 12:32; 10:19-20)
Ne dí xiꞌahʉ gue gatho núꞌʉ toꞌo ma da ma̱nga ja yá thandi ya ja̱ꞌi gue xa gamfrigui, necagui ma ga ma̱nga ja yá thandi yá ɛnxɛ Ajua̱ gue majua̱ni xa gamfrigui. Pe nuꞌʉ tóꞌo tsu ne cøngagui ja yá thandi ya ja̱ꞌi, necagui ma ga ma̱ ja yá thandi yá ɛnxɛ Ajua̱ gue nuꞌʉ́ hinstá pa̱di.
10 Nuꞌa̱ tóꞌo da ña̱maꞌñʉ de Núꞌa̱ Toꞌo bi e bi Nja̱ꞌi, Ajua̱ da pumbabi; pe nuꞌa̱ tóꞌo da ña̱maꞌñʉ de ra Ma̱ca Nda̱hi, nuꞌá̱ hinda pumbabiꞌa̱.
11 Nu sta tsꞌixꞌahʉ ja yá nija̱ꞌʉ o ja yá thandi ya nzaya o ja maꞌra ya nda̱ de ya hnini, oxqui tu ri mʉihʉ ndaꞌa̱ ma gui tha̱dihʉ, nixi oxqui beñhʉ ꞌmɛtꞌo ndaꞌa̱ ma gui ma̱ñhʉ, 12 ngueꞌa̱ nura ora gui ña̱hʉ, rá Ma̱ca Nda̱hi Ajua̱ ma da ꞌñuꞌtꞌahʉ ndaꞌa̱ rí ꞌñepi gui ma̱ñhʉ.
Jamasuhʉ de ra ncꞌatꞌaboja̱
13 Nepʉ ꞌna de núꞌa̱ ra hmuntsja̱ꞌi bi ꞌñembabi ra Jesu:
―Ma Xahnateꞌi, xipa tsꞌʉ ma cu da ꞌracagui núꞌa̱ rí ꞌñepqui de núꞌa̱ bi zogahe ndu ma dadahe.
14 Pe nura Jesu bi ꞌñembabiꞌa̱:
―Xiꞌaꞌi, ¿pa te guí xiqui njabʉ? ¿Xi toꞌo xa hñuxcaguiga dega nzaya o dega hyeca hai?
15 Nehe bi ꞌñena:
―Jamasuhʉ pa hingui hyøcuahʉ yá hño ra ximhai ne gui ne gui pɛꞌtshʉꞌʉ, ngueꞌa̱ hingue po ya hño de ra ximhai ma da nja rá te ra ja̱ꞌi.
16 Nepʉ bi xipa ꞌnara ꞌbede núꞌa̱ ra hmuntsja̱ꞌi, ne bi ꞌñembabi:
―Mi ꞌbʉi ꞌnara ꞌñøhø xi mi pɛꞌtsa ndunthi yá hño, y nuyá hai nehe bi unga ꞌnara da̱nga sofo. 17 Nepʉ núꞌa̱ ra ꞌñøhø bi ꞌño rá mfeni ne bi ꞌñena: “¿Te ga øtbya gue otho habʉ ga pɛꞌtsa gatho ma sofo?” 18 Y nuꞌá̱ bi beni ne bi ꞌñensɛ: “Ya dí pa̱di te ma ga øtꞌe, ma ga yøꞌta nuyʉ ma troha, ne ma ga hoca maꞌra maꞌna dya da̱ngui, ne ja ga ʉtni gatho ma sofo ne gatho núꞌa̱ maꞌna te dí pɛꞌtsi. 19 Y nu xcrá juadi ga pɛꞌtsni gatho, nuꞌbʉ́ ga embabi ma te: Nubyá ha̱, jani gatho núꞌa̱ te gui hyoni pa ndunthi ya jɛya da ꞌñepʉ. Nubyá da za gui ntsaya, gui ñuni, gui ntsithe, gui johya ndunthi.” 20 Pe Ajua̱ bi ꞌñembabi núꞌa̱ ra ꞌñøhø: “ꞌNagrá ꞌbɛmfeni, núbya dí nxuui ma gui tu, y gatho núꞌa̱ guí pɛꞌtsi, ma gui tsopʉ nixi guí pa̱di pa toꞌo.” 21 Njabʉtho nehe núꞌa̱ toꞌo xa muntsꞌa ndunthi yá hño pa guesɛꞌa̱, pe nu sta du, ma da hñoya ja rá thandi Ajua̱.
Ajua̱ ri su gatho yá ba̱tsi
(Mt. 6:25-34)
22 Nepʉ ra Jesu bi ꞌñembabi yá nxadi:
―Nubyá dí xiꞌahʉ, oguí tu ri mʉihʉ de núꞌa̱ te gui tsihʉ nixi núꞌa̱ te gui hyehʉ. 23 Ngueꞌa̱ nuri tehʉ maꞌna ri muui que ra hñuni, ha nuri ndoꞌyohʉ maꞌna ri muui que ra he. 24 Hyanthʉ ya ca, nuꞌʉ́ hingui potꞌi nixi xofo, nixi otho yá troha, pe Ajua̱ go gueꞌa̱ ri ꞌuiniꞌʉ. ¡Pe nuꞌahʉ maꞌna grí muuihʉ que ya ca, ne maꞌna grí muuihʉ que nuꞌa̱raza ya tsꞌintsꞌʉ! 25 ¿Toꞌo ꞌna de gueꞌahʉ núꞌa̱ da hñuxa má tsꞌʉ rá hñetsꞌi de rá tsꞌɛdisɛ? Ni ꞌna hinda za da ꞌyøtꞌa njabʉ. 26 Nuꞌbʉ́ ¿hanja guí tu ri mʉihʉ po maꞌra ya tꞌøtꞌe de ri tehʉ?
27 Hyanthʉ ya døni hanja gra nhye. Nuꞌʉ́ hingui hetꞌi nixi pɛ maꞌna ra ꞌbɛfi, pe maꞌna ri hnequi mahotho que yá hoga he ra nda̱ Salomó masque mri hñe mahothoꞌa̱. 28 ꞌBʉ Ajua̱ heta ya nda̱po núꞌʉ ꞌba ja ra mbonthi da ndømbya, ne rixudi dra cꞌʉꞌtsi ne dra tsꞌa̱tꞌi, xi nuꞌahʉ, ¿hanja hinguí camfrihʉ gue Ajua̱ maꞌna da heꞌtꞌahʉ que gueꞌʉ? 29 Hangue odi oda ri mfenihʉ núꞌa̱ te gui tsihʉ ne núꞌa̱ te gui hyehʉ, ne odi tu ri mʉihʉ núꞌa̱ te ri ꞌbɛꞌaꞌihʉ. 30 Ngueꞌa̱ gatho núꞌʉ ya ja̱ꞌi hingui camfri, nza̱ntho oda yá mfeni núꞌa̱ te da zi ne te da hye, ne tu yá mʉiꞌʉ ꞌbʉ te ꞌbɛpabi. Pe ri Dadahʉ núꞌa̱ bí ꞌbʉ mahetsꞌi, nuꞌá̱ pa̱di xá hño te gatho øꞌtꞌahʉ ra ꞌbɛdi. 31 Nuꞌahʉ, nuꞌa̱ gui ꞌyøthʉ, ꞌmɛtꞌo hyoñhʉ hanja da za gui ꞌbʉhʉ xá hño ja rá hmanda Ajua̱, y nuꞌá̱ da ꞌraꞌahʉ gatho núꞌa̱ te gui hyoñhʉ.
Pɛꞌtsa ri hñohʉ nuni mahetsꞌi
(Mt. 6:19-21)
32 Ma zi tꞌʉca taxo dɛtiꞌihʉ, oguí tsuhʉ núꞌa̱ te da ꞌbɛꞌaꞌihʉ, ngueꞌa̱ Ajua̱ ri Dadahʉ go gueꞌa̱ rá paha pa gui ꞌbʉhʉ ja rá hmandaꞌa̱, ne nuꞌá̱ ma da suꞌaꞌihʉ. 33 Hangue pahʉ gatho núꞌa̱ guí pɛꞌtshʉ, ne hyecuabihʉ ya hyoya, njabʉ gui øtꞌa ri ꞌmɛꞌtsihʉ nuni mahetsꞌi núꞌa̱ hinhyaꞌmʉ da thegue nixi da tsꞌoqui, ne nuni hinda za da yʉtꞌa ya be pa da bepꞌahʉ, nixi ya zuꞌue hinda zipꞌahʉ núꞌa̱ xcá pɛꞌtshʉ. 34 Ngueꞌa̱ habʉ ja ri ꞌmɛꞌtsihʉ, ja guehni oda ri mfenihʉ.
Hñocjʉ ne ndøꞌmhʉ ngu ꞌraya hoga ꞌbɛgo
35-36 Hñocjʉ ne ndøꞌmhʉ. Njahʉ ngu ꞌraya hoga ꞌbɛgo di zø yá ñotꞌi ne tøꞌma yá hmu sta menga ja ꞌnara ngo dega ntha̱ti, ha nu sta gantꞌa ra gosthi, nuꞌʉ́ ꞌbestho da xocuabi. 37 Ma da johya ndunthi núꞌʉ ya ꞌbɛgo di nuhu sta zø yá hmu. Nugui dí xiꞌahʉ gue nura hmuꞌa̱ da mø ra mexa ne da ꞌñei da ꞌuini. 38 Masque ꞌbʉ da zøhø made ra xuui o ante da hyatsꞌi, ma da johya ya ꞌbɛgo núꞌʉ da tsꞌʉdi di nuhu. 39 Nehe dí xiꞌahʉ, ꞌbʉ ꞌnara ja̱ꞌi di pa̱hma̱ haꞌmʉ da zøhø ra be ja rá ngu, nuꞌbʉ́ nura ja̱ꞌiꞌa̱ hinda ꞌña̱ha̱, di su rá ngu pa hinda hyopabi ra be da yʉtꞌi da bepi. 40 Hangue neꞌaꞌihʉ ndøꞌmihʉ, ngueꞌa̱ núꞌa̱ ra pa nixi gri beñhʉ, gueꞌbʉ xcrí tha̱mfrihʉ ma dua yopa pengui Núꞌa̱ Toꞌo bi e bi Nja̱ꞌi.
Ra hoga ꞌbɛgo ne ra tsꞌoꞌbɛgo
(Mt. 24:45-51)
41 Nepʉ ra Pedro bi ꞌyambi ne bi ꞌñena:
―Ma zi Hmuꞌi, xi nuna ꞌbede ja juadi gá ma̱, ¿ha gue hønsɛ pa guecje, o pa gatho ya ja̱ꞌi?
42 Nepʉ ra zi Hmu Jesu bi ꞌñena:
―Xi ꞌnara hmu de ꞌnara ngu, ꞌbʉ da bøni da ma, ¿toꞌo da zocuabi rá ꞌbɛfi pa da su ne pa da ꞌuimba gatho yá mɛfi? Da zocuabi ꞌnara hoga ꞌbɛgo núꞌa̱ pa̱ da su gatho, ¿ha ngue ha̱? 43 Xi da johya núꞌa̱ ra ꞌbɛgo nu sta zø rá hmu di øtꞌa gatho ngu núꞌa̱ xqui zocuabi. 44 Majua̱ni dí xiꞌahʉ, gue núꞌa̱ ra hmu ma da hñuxa núꞌa̱ ra hoga ꞌbɛgo pa da supa gatho núꞌa̱ di pɛꞌtsa ja rá ngu. 45 Pe nuꞌbʉ núꞌa̱ ra ꞌbɛgo toꞌo bi tsꞌogui pa da supa rá ꞌbɛfi rá hmu, da beni gue hiꞌme dua penga rá hmu, nepʉ nuꞌá̱ da mʉdi da naꞌmbabi yá miꞌbɛgoui ne ya ꞌbɛhña̱ núꞌʉ ri ꞌmɛgo pa da ꞌuinga ya mɛfi, y nuꞌá̱ go xi dri ñuni ne dri nti. 46 Ha nurá hmu da zøhø núꞌa̱ ra paꞌa̱ hindi tøꞌmi. Nuꞌbʉ́ nura ꞌbɛgoꞌa̱ ma da castiga rá hmu ngu ma da ncastiga núꞌʉ maꞌra ya tsꞌoꞌbɛgo.
47 Nuꞌa̱ ra ꞌbɛgo pa̱di xá hño núꞌa̱ rá hne rá hmu, ne hinda ꞌyøtꞌe, núꞌá̱ xi dra castiga co ya mfɛi. 48 Pe nuꞌa̱ ra ꞌbɛgo hindi pa̱di xá hño tengu rá ꞌbɛfi rá hmu, ne hinda mɛfi xá hño, dra castiga pe hinga ndunthi ngu núꞌa̱ maꞌna. Ngueꞌa̱ nuꞌa̱ tóꞌo da tꞌɛntꞌua rá ꞌyɛ ndunthi ra ꞌbɛfi, go gueꞌa̱ maꞌna ma da tha̱ꞌmba nguɛnda. Ne nuꞌa̱ tóꞌo da tꞌumbabi ndunthi pa da su, gueꞌa̱ nehe ma da tꞌambabi ndunthi.
Po rá ngue ra Jesu ma da hyegue ya ja̱ꞌi
(Mt. 10:34-36)
49 Nugui ngueꞌa̱ stuá ehe nuua ja ra ximhai, ma da nja ya ntꞌʉtsate ne ya hegue po rá nguecagui, ne dí ne da njabʉ ꞌbestho. 50 Ne nugui pɛꞌtsi ga thogui ndunthi ya ʉgui ne ya tsꞌothogui, ne dí ne da njabʉ ꞌbestho. 51 Guí hu ri mʉihʉ gue ngueꞌa̱ stuá ehe hinda ma da nja ra tuhni ja ra ximhai. Hina, ngueꞌa̱ por guequi ma da nja ya hegue ne ya tuhni. 52 Desde núbya pa dí ꞌñepʉ, ꞌbʉ ꞌnara ꞌmʉi di ꞌbʉi cʉtꞌa dya mengu, nuꞌʉ́ ma da ntunsɛ ne da hyegue po rá nguequi; ꞌbʉ di ꞌbʉi hñu núꞌʉ hingui camfrigui, da ʉtsa núꞌʉ má yoho camfrigui, ha nuꞌbʉ di ꞌbʉ yoho núꞌʉ hingui camfrigui, da ʉtsa núꞌʉ má hñu. 53 Ya dada da ʉtsa yá tꞌʉ, ha nuya tꞌʉ da ʉtsa yá dada. Ya na̱na̱ da ʉtsa yá tꞌixu, ha nuya tꞌixu da ʉtsa yá na̱na̱. Nuya suegra da ʉtsa yá tsꞌihuɛ, ha nuya tsꞌihuɛ da ʉtsa yá suegra.
Ya ntꞌudi de te bra ꞌñehe
(Mt. 16:1-4; Mr. 8:11-13)
54 Nehe ra Jesu bi ꞌñembabi ya ja̱ꞌi:
―Ora gui hyanthʉ da njʉxa ya guui lado yʉhyadi, ꞌbestho guí eñhʉ gue ma da ꞌua̱i, y majua̱ni da ꞌua̱i. 55 Ora da mʉdi ya panthi, guí eñhʉ gue ya ma da zø ra pahyadi, y majua̱ni ya ma da njabʉ. 56 ¡ꞌNagyá yohmihʉ! ꞌBestho guí huxhʉ nguɛnda núꞌa̱ ma da nja ngueꞌa̱ guí hanthʉ núꞌa̱ ri hnequi ja ra ximhai ne mahetsꞌi, pe ¿hanja hingo guí huxhʉ nguɛnda de núꞌʉ ya ntꞌudi ri hnequibya pa gui pa̱hma̱hʉ toꞌogui?
Cohʉ ꞌnara cohi co ri ncontrahʉ
(Mt. 5:25-26)
57 ¿Hanja hinguí beñhʉ de sɛhɛꞌihʉ ndaꞌa̱ xá hño gui ꞌyøthʉ y ndaꞌa̱ hina? 58 Nuꞌbʉ ꞌna toꞌo da zixꞌaꞌi pa ja ra tsꞌʉtbi, nu xcrí ꞌyohʉ ja ra ꞌñu, ꞌramanu gui cohui ꞌnara cohi de grí yosɛhʉ, pa njabʉ ya hinda zixꞌaꞌi ja ra nzaya, ngueꞌa̱ nuꞌbʉ gui tsøñhʉ ja ra nzaya, nuꞌá̱ da ꞌbɛpa ra polecia da zixꞌaꞌi, ha núꞌa̱ ra polecia ma da goꞌa fadi. 59 Y de guehni hingui pøni asta hingui jutꞌi gatho núꞌa̱ gri tu.