12
Pa nsispi ra 'yɛ̨thi rá gua ra Jesús
Di 'bɛh man 'dato pa din ja ra dąnts'ihmɛ bʉ Jerusalén nangue ran dąbaxjua, nɛ bi mba mahøn'a bʉ Betania a ra Jesús, nguepʉ rá ngu a ra Lázaro, gue'a xí jap ra Jesús bi dąmbɛ̨ni bʉ ja rán 'yägui ngue xí du. Nu'bʉ mín de, nu ra Marta bi 'yørpa n'da ran ts'ihmɛ ra Jesús. Nɛ'a ra Lázaro 'darpʉ bin sihmɛhʉ bʉ ja ra mɛxa. Nɛ bi mba ra María bʉ mí huh ra Jesús, bi xispa rá gua made litro ra 'yɛ̨thi ɛ̨mmɛ yʉman'u nɛ xʉm hmadi, nɛ í 'yonba ra 'yɛ̨thi nangue rá xtą. Nɛ gätho ra ngu bi yʉn'a ra 'yɛ̨thi. Nɛ mí 'bʉpʉ rá ts'ʉnt'ʉ ra Simón, ra Judas Iscariote a, n'da ma mixädihe a, nɛ gue'a bi dä a ra Jesús. Nɛ nu'bʉ mín nu a bi 'yøt'a ra María, bi 'yɛ̨na:
―Hanja him bi 'bä a ra 'yɛ̨thi, yʉ mahuąhi thoho xtín ja rá muui gue xtín t'un yʉ hyoya, sä bi 'yɛ̨n a ra Judas.
Ngubʉ bi man a nguetho ra bɛ̨ a, nɛ him majuąni di huɛ̨c yʉ hyoya. Pɛ rá 'bɛfi a gue ní mbɛsca ma mbɛtihe dyʉ xädihe nɛ'a rá mbɛti ra Jesús. Nɛ nząi hąc zɛhɛ ra mbɛti 'bʉ in nde. 'Bex bi 'yɛ̨n'a ra Jesús:
―O guidí hɛcpa na ra xisu, nguetho bi 'yørca a rán säui da 'yørque, nguetho mi ts'ʉtho ga tu ngue da t'ägagui. Janangue'a mí pɛsta'a ra 'yɛ̨thi na, xtí jacä ma ją'i 'bʉ dá tu. Pɛ thocpa thoho gam 'bʉhmbʉ yʉ hyoya, pɛ nugä hinga thocpa thoho dam 'bʉhmbʉ ua, bi 'yɛ̨n'a ra Jesús.
I hma da tho ra Lázaro
Nu'bʉ mi 'yøde xʉn ngu ma mijudíohe, gue 'bʉpʉ ja rán ngu ra María a ra Jesús, bi mba bá nu, pɛ hinga hønt'a ra Jesús in nde da nu, pɛ nɛ'a ra Lázaro gue xí xox ra Jesús bʉ ja ran 'yägui. 10 Janangue'a nu yʉ dąmbäją bi bɛ̨ni nɛ'a ra Lázaro da hyo. 11 Nguetho gue'a ra Lázaro í japi man'da xʉn ngu bi 'yɛ̨c'yɛi a ra Jesús ʉ ma mijudíohe.
Bi t'ɛ̨spa ra Jesús 'bʉ mí yʉt'a Jerusalén
12 Nu'bʉ mi hyax bʉya dá mbähmbe ra Jesús bʉ Jerusalén. Nɛ nu'ʉ yʉ ją'i xʉn ngu xí zøm bʉ Jerusalén gue in nu ra dąmpɛti, bi 'yøde da mba bʉ ra Jesús. 13 Janangue'a bi gąx yʉ́ xi yʉ jąxiza nɛ bi mba bá thąpʉ 'yu. Nɛ nts'ɛdi bi 'yɛ̨n'ʉ:
―Nuįxte tho rá ts'ɛdi Oją di jąp na ma Hmuts'ʉt'abihʉ dyʉ israelhʉ, dyʉ judíohʉ, bi zøcua ya nangue rá thuhu Oją, bi 'yɛ̨n ʉ.
14 Nu'a ra Jesús i hux'a n'da ra t'ʉburu xí dįni, tengu mán t'o't'i bʉ ja rám hman Oją. 15 Gue mán t'o't'i:
Him man gan suhʉ ya gyʉ mɛnguhʉ ua Sión,
nguetho ba ɛ̨h ni hmuts'ʉt'abihʉ,
da hyux'a n'da ra t'ʉburu, mí ɛ̨n rá t'ohni maya'bʉ.
16 Pɛ nuje dyʉ xädihe him 'bexque dá pąhmbe 'bɛ'a nám bøn na bin ja, pɛ nu'bʉ mí mbeng mahɛ̨ts'i ra Jesús dá bɛ̨mhbe bʉya gue guehna bi t'ørpa ra Jesús gätho mán t'o't'i maya'bʉ.
17 Nu'ʉ yʉ ją'i mí 'bʉhmbʉ ra Jesús 'bʉ mi xox'a ra Lázaro, xí ma gue xí xox'a ra Lázaro. 18 Janangue xʉn ngu yʉ ją'i bi mba bá thą a ra Jesús, nguetho bi 'yø a xin ja. 19 Janangue'a nu yʉ fariseo bin 'yɛ̨mzɛhɛ ʉ:
―Nte ts'ʉ ní mbatho 'bʉ dadí hɛcpahʉ yʉ ją'i. Ha hin guín nuhʉ ya gätho ra ximhäi i tɛnnʉ ra Jesús, bin 'yɛ̨mp'ʉ.
I hon ra Jesús ʉ yʉ mɛngu bʉ Grecia
20 Nɛ nu'ʉ 'da bi mba bʉ Jerusalén da nu ram pɛti bʉ, yʉ mɛngu bʉ ja ra häi Grecia ʉ. 21 Nɛ bin tįmhbʉ ra Felipe ʉ 'bʉ mám 'bʉhmbe bʉ Jerusalén. Nɛ nu ra Felipe, ma mixädihe a, ra mɛngu bʉ Betsaida ra xɛqui Galilea. Nɛ nu yʉ mɛngu bʉ Grecia bi 'yɛ̨n'ʉ:
―Hague n'yø, dín nde dan yąhe ts'ʉ ra Jesús, bi 'yɛ̨n'ʉ.
22 Nu'a ra Felipe bʉya bi xi a ra Andrés, nɛ nu'ʉ bʉya bi xi a ra Jesús. 23 Nɛ nu ra Jesús bi dąt'ʉ:
―Ya mi ts'ʉtho da zøn ra pa dan uįxtegä 'bʉ dá tu, guecä dán ją'igä ua ja ra ximhäi. 24 Majuąni dí xi ahʉ, tengu n'da ra hmudä, nu'bʉ hin da thupʉ ja ra häi ngue dim 'bɛpʉ, hin din xąndi. Pɛ nu'bʉ da thuhu, da zä din xąndi xʉn ho. 25 Nu'a to'o i su din ʉnba 'bʉ da dɛngui, da mba ma ʉnbi rá te a, pɛ nu'a hingui su din ʉnba 'bʉ da dɛngui guecua ja ra ximhäi, din ja ra te maząi a. 26 Nguetho nu'bʉ 'bʉ a n'da in nde din 'yɛ̨hɛ nanguecä, jatho da bɛ̨ni tengu dím bɛ̨ngä, nɛ ga com'be ma ts'ɛdi bʉ mahɛ̨ts'i bʉya. Nu'bʉ 'bʉ a n'da din 'yɛ̨hɛ nanguecä, nu'a ma Ta da numanho a.
Ra Jesús im ma da tho
27 ―Pɛ nuya ɛ̨mmɛ tu ma mbʉi, bi 'yɛ̨n'a ra Jesús. 'Bɛ'a sä ga xih ma Ta. Ha sä ga äpi di 'uegä 'bɛ'a din jacä ya. Pɛ hingui sä, nguetho gue'a bá ɛ̨cä ngue gan nu'a i jatho gan nugä ya, bi 'yɛ̨n'a ra Jesús.
28 Nɛ nubʉya bin yąui rá Ta:
―Ma Ta a i, dami jaqui gan nugä hønt'a go nda'a dí t'ɛ̨s'i i, bi 'yɛ̨mbi.
'Bexque bi t'ø'a n'da ra nde bʉ mahɛ̨ts'i, bi 'yɛ̨na:
―Pɛ ya dí ja'i guín nu, nɛ guin nu mahøn'a, bi 'yɛ̨na.
29 Nɛ nu'ʉ yʉ ją'i mí 'bähmbʉ bʉ, bi 'yøh rá nde Oją nɛ bi 'yɛ̨n'ʉ 'da:
―Bin gäni.
Nɛ nu'ʉ mi'da:
―Masque n'da rám 'bɛhni Oją mahɛ̨ts'i bi zofo, bi 'yɛ̨n ʉ.
30 Pɛ nu'a ra Jesús bi 'yɛ̨mp'ʉ:
―Nu'a ra nde gá 'yøhmbʉ, nts'ɛdi bi zocä Oją, hin nangue ga pącä bi 'yøh ma nde, pɛ guepʉ gui pąhmbʉ ya i øh ma ndegä a. 31 Nuya mi ts'ʉtho ga øt'ä a dí fądi nda'ʉ da mba ma ʉnbi, nɛ nda'ʉ hin da mba ma ʉnbi. Nɛ mi ts'ʉtho ga tąp ra zįthu, gue in ts'ʉt'abi ua ja ra ximhäi a, nɛ da ts'änba ya da t'ɛrbʉ ja ran ʉnbi. 32 Nu'bʉ dá cuat'ä bʉ ja ra pont'i, gue'a dá zohn'dʉ gätho yʉ́ mbʉi yʉ ją'i ga xifi di däc yʉ́ mbʉi gan yąn'ʉ, bi 'yɛ̨n'a ra Jesús.
33 Nɛ guehna mi man na, ngue mi ndepe xtám bąh yʉ ją'i 'bɛ'a nín dąte dí tho a. 34 Nɛ nu yʉ ją'i bʉya bi dąt'a:
―Nugähe ya dá øhmbe im mam bʉ ja rán t'ɛ̨di Oją, i 'bʉi mazą̈i a ra Cristo. Nɛ guí ɛ̨nsɛ jatho gui tu bʉ ja ra pont'i, gán ją'i ua ja ra ximhäi. To'o e ngue guí ɛ̨nsɛ gán ją'i ua ja ra ximhäi. Masque hinga gue'e gra Cristo 'bʉ.
35 Nu ra Jesús 'bex bi 'yɛ̨mp'ʉ:
―Him min ngu yʉ pa ga xän'nahʉ ya, ngue drán nɛquigä. Nde'bʉ gan 'yohʉ bʉ ja ran nɛqui ya, nɛ hin da zʉ ahʉ ra 'bɛxui. Nguetho nu'a to'o i 'yo bʉ ja ra 'bɛxui hingui pądi hapʉ i 'yo. 36 Dami hyąmhbʉ ran nɛqui ya, janya i ja ya, nɛ din ja ran nɛqui ni mbʉihʉ bʉya, bi 'yɛ̨mp'ʉ.
Nɛ nu'bʉ mí jua a bi man ra Jesús bi mba, bin 'yąnsɛ.
Hinguin nde da 'yɛ̨c'yɛi ʉ ma mijudíohe
37 Pɛ guexta'a him bi 'yɛ̨c'yɛi xʉn ngu ma mijudíohe, madague'a xʉn ngu yʉn t'øt'e nuįxte bi nu bi 'yøt' ra Jesús. 38 Pɛgue bin ja tengu thoho bi man ra pøngahyą Isaías 'bʉ mí ma 'bɛ'a din ja, bi 'yɛ̨na:
Ma Hmu i, to'o maha bi 'yɛ̨c'yɛi a dá mamhbe
nɛ to'o bi bą 'bʉ gmí 'yuh ni ts'ɛdi, bi 'yɛ̨na.
39 Him bi zä bi 'yɛ̨c'yɛi ʉ 'da nguetho nu'bʉ him mín nde ʉ, bi mba njapi tengu bi man ra Isaías 'bʉ mí ma mahøn'a:
40 Nu'a Oją bi gomba yʉ́ dä ʉ nɛ bi mɛp yʉ́ mbʉi ʉ,
gue din ja tengu'bʉ din xädä,
nɛ hin din ja yʉ́n 'yomfɛ̨ni yʉ́ mbʉi,
nɛ hin da zä di päh yʉ́ mbʉi gue xtí punba Oją ʉ, bi 'yɛ̨n a ra Isaías.
41 Guehna bi man ra Isaías 'bʉ mí 'yut Oją din ja rá ts'ɛdi nuįxte ra Cristo, nɛ bi mam bʉya 'bɛ'a da 'yøt'a ra Cristo.
42 Pɛ xʉn ngu ma ngʉrpihe mim bɛ̨nsɛ ngue ɛ̨c'yɛi ra Jesús. Pɛ him bi ma gue ɛ̨c'yɛi ʉ, nguetho i su xtá hyøn a thi yʉ fariseo bʉ ja yʉ́ niją, gue má zä da zan'ʉ. 43 Nguetho man'da bi bɛ̨ni 'bɛ'a da man yʉ́ miją'ihʉ, gue da 'yɛ̨mbi xʉn ho ʉ, xinda gue'bʉ go xtá 'yɛ̨mp Oją xʉn ho ʉ.
Dí mba ma juąnbi n'da ʉ yʉ́m hman ra Jesús
44 Pɛ nu ra Jesús nts'ɛdi bi ma:
―Nu'a to'o i ɛ̨c'yɛigui, i ɛ̨c'yɛi a bá pɛngui. 45 Nguetho nu'ʉ to'o i pąqui, i pą a bá pɛngä. 46 Nu'a bá ɛ̨cä gue ga yorba yʉ́ mbʉi ʉ 'bʉcua ja ra ximhäi. Nu'a to'o da dɛngui hin din 'yo bʉ ja ra 'bɛxui a. 47 Nu'a to'o da 'yøh mam hmangä nɛ hingui ɛ̨c'yɛi, pɛ hinga guecä ga juąnbä a, nguetho hin ná ɛ̨cä ga øt' ran juąnbate, pɛ ná ɛ̨cä ua gan yąn ʉ 'bʉcua ja ra ximhäi. 48 Nu'a to'o hin da 'yɛ̨c'yɛigui nɛ hin da 'yø a dím mangä ya, nu'a mam hma dá mangä ya, gue'a dí juąnba ʉ 'bʉ rán zɛgui ra pa. 49 Nguetho him mam hmansɛ a dá ma, pɛ nu'a ra Ta gue bá pɛngä bi xiqui 'bɛ'a dá mangä nɛ 'bɛpʉ ná xänba yʉ ją'i. 50 Nɛ dí pącä da dįn ra te maząi ʉ to'o da hyąn rám hma ma Ta. Nɛ gue'a i xicä a nɛ dí mangä a bʉya, bi 'yɛ̨n'a ra Jesús.