1 የሱስ ክርስቶሳ ሐዋረን ኤ አሮ፥ ታኒ፥ ስሞን ጴጥሮሳ፥ ኑ ጾዘን ኑና አሽዘ የሱስ ክርስቶሳ ጽሎትꬅት ባጋራ ኑ ጋር አልኦ አማኖ ኤክዱንꬅስ Ꮉይ ኪትዛ ጻፍዳ።

2 ጾዛን ኑ ላꬃ የሱሳ ኤረራ አꬎ ኬሃትꬅን ሳሮ ይንትስ ኩሞ።

3 ፋ ቦንችተን ሎኦትꬅተ ኑኒ ሻክንቶደ ፋና ጼግደ ኤዛ ኤርዳነ ጾዘትꬅ ዎልቃ ኑኒ ጾዛ አዚ የሳደስ ኮሽዘ ባዝ ኡባ ኑስ እንግዳ። 4 ይን ኢታ አሞ ባጋራ መꬍንትዘ Ꮉና አላምተ የዘ ꬋብሰፓ ኬሲ ኤኮደ ፋናን ጾዘ ጾዘትꬅቶ ሻክንቶደ ፋና፥ Ꮉና እሞትꬅት ባጋራ ጋማ አልኦን ዳማ ኡፋይስ ኑስ እንግዳ። 5 ይኒ ግሾ፥ ሚንግ፥ ይን አማንትላ አፋ ሎኦትꬅ፥ ሎኦትꬃላ አፋ ኤራትꬅ፥ 6 ኤራትꬃላ አፋ ፋና ናገ፥ ፋና ናገላ አፋ ገንጨ፥ ገንጨላ አፋ ጾዛ ኡፋይስ የስ የዘ፥ 7 ጾዛ ኡፋይስ የዘሳላ አፋ እሽትሞ ካ፥ እሽትሞ ካላ አፋ አስ ኡባ ሲቀ ጉጆተ። 8 Ꮉንስ ይንትስ ጋንግ የዝኮ፥ ላꬂ የሱስ ክርስቶሳ ኤረራ ማድዘ አስን ኣፈራ የዘ አስ ማቆዳ። 9 የዝን Ꮉንስ ባይዘ ኦንን ኡከ የዘ ባዝ ጻላላ በእዘ ቆቀ። ኤ ፋ ቲኖ ናጋርትፓ ጌዥዳኖ ቦትዳ።

10 ይኒ ግሾ፥ ታ እሹንꬆ፥ ይን ጼግንቶን ይን ዶርንቶ ምንꬆደስ ካሰንፓ አꬂ ምንጎተ። ይን Ꮉንሳና ኦችዘባዝ ማቅኮ፥ ꬉቡንታማ። 11 ይነ ኑ ላꬃን ኑና አሽደ የሱስ ክርስቶሳ መዽና ካእቱሞ ገልዘ ኩሙꬅ ዎልቃ ይንትስ እንግንቶዳ።

12 ይኒ ግሾ፥ ይን Ꮉንሳና ኤርዘ ባዝን ይና አይክደ ቱርተ ሚንግ የዘ ባዝ ማቅኮ፥ ታኒ Ꮉንሳና ኡባ ዎደ ይንታና ቆፍዘ አሾስ። 13 ታኒ ሸምፖራ የዘ ዎደ ኡባ ይንታና ቆፍዛና ኮሽዘ ባዝ ጋእ ቆፓነ። 14 ኑ ላꬄ የሱስ ክርስቶሳ ታስ ቆንጭዝዳን ፋና ታኒ Ꮉና Ꮉይቅዘ ጋልቶ ጋሪ ኦሊ ቅቶዳኖ ኤራነ። 15 ታኒ ይንታፓ ሻክንትኮን ይን Ꮉንሳና ኡባ ዎደ ቆፖደ ፋና ታስ ዳንዳእንትዘ ባዝ ኡባ ኦቾዳ።

16 ኑኒ ላꬄ ክርስቶሳ ዎልቃን ኤ የእቶ ይንትስ ኦህዘ፥ ኤ ዳማ ቦንችቶ ኑ ኣፍተ ብእዳ ፋትን መꬊ ኬስደ ቶሴ ባያ። 17 ዳማ ዎልቃማ ቦንቾፓ፥ «ታና ኡፋይስዘ፥ ታ ካዽዘ ናአይ Ꮉያ» ጋዘ ቃላ ኦꬅ ይእደ ዎደ ጾዘ አደፓ ቦንቾን ጋላታ ኤክዳ። 18 ኑኒ ጌሽ ደረላ አፋ ኤራ የዘ ዎደ ይና ቃላ ኦꬅ ሳሎፓ የእዝን ስእዳ። ማቶ. 17:1-5፤ ማር. 9:2-7፤ ሉቃ. 9:28-35

19 ኑስ Ꮉንፋ አꬍዘ አማንንትደ ትንቢተ ቃላ የነ። ሳአ ዎንቶደ ዎንꬅስን ጎልጸ ይን ዎዝንተ ዶሎደ ዎንꬅስ፥ ꬉማ በሳ የዘ ፎኦስ አስ ናግንትዘ ፋና፥ ይን Ꮉና ቃልቶ ናግኮ ሎኦ ኦቻነ። 20 ኡባፓ ቲኖ Ꮉኖ ኤሮተ። ጌሽ ማጻፍተ ጻፍንትደ ትንቢተ ቃላ ኦደን ፋ ኮይደ ፋና ብሎደስ ዳንዳኦስ። 21 ትንቢተ ኡባ፥ ጾዘ ኪትደ አሱንꬅ ጌሽ አያና ካልꬅን፥ ኦህዳ ፋትን አስ ቆፋራ ኦህካያ።